Tumwene Liina Lyakue Yehova Kuya Lyali lya Mana Sana

1-2. Twamana syani nangue Yesu amwene liina lyakue Yehova kuya lyali lya mana sana?

YESU amwene liina lyakue Yehova kuya lyali lya mana sana. Te kuli muntu ata umo waaswesiizie liina lyakue Yehova nga Yesu. Nga vitwaakimona mu lyasi lyaakipita, Yesu waapingwile kufwilapo evi kusakila ni kuswesia lelio liina. (Mark. 14:36; Baeb. 10:​7-9) Kabili, kisia Buteeko Bwakue bwa Myaka Elufu Imo, Yesu wakaba kubwezia Bukolo kuli Baba wakue pantu atonene Baba wakue akabe kupeelua bulumba bonse. (1 Bakor. 15:​26-28) Kintu kyonse kibanga kyakita Yesu pa lwakue Yehova kisininkiziizie nangue amutonene sana Yehova.

² Yesu waaizile panu pa kyalo mu liina lyakue Baba wakue. (Yoan. 5:43; 12:13) Waababwilile basambi bakue liina lyakue Baba wakue. (Yoan. 17:​6, 26) Waasambiliziizie ni kukita bimpezia-mano mu liina lyakue Yehova. (Yoan. 10:25) Kulanda kisinka, Yesu waamulombele Yehova abalabukile basambi bakue “juu ya liina [Lyakue].” (Yoan. 17:​11, NWT) Pa kako, kine Yesu Kristu abanga wamwene liina lyakue Yehova kuya lyali lya mana sana, eba muntu kunti walanda syani nangue ni musambi wakue Kristu inzi bila wamanine ao bila wabombia liina lyakue Yehova?

3. Tuli kumona ki mu leli lyasi?

³ Pantu tuli Bakristu, baalia bali baikwinda kumupala Yesu, tuli twatona sana liina lyakue Baba wakue. (1 Pet. 2:21) Mu leli lyasi, tuli kumona juu ya ki Yehova abapeele liina lyakue baalia bali basimikila “mpunda iweme ya Bukolo.” (Mat. 24:14) Kabili, tuli kumona juu ya ki tupalile kumona liina lyakue Yehova kuya lyali lya mana sana.

“BANTU PALUA LIINA LYAKUE”

4. (a) Yesu waabapeele batumua bakue miilo ki ntanzi tanabwele ku muulu? (b) Tuli kwasuka kipuzio ki?

⁴ Musita unini ntanzi Yesu tanabwele ku muulu waabalandile evi basambi bakue: “Mwakapokelela buvinde musita mupasi utakatifu luwakeza pali mwemue, kabili mwakaba bakasininkizia bane, mu Yerusalemu, mu Yudea yonse ni mu Samaria, ni mpaka ku nkende ya kule sana ya kyalo.” (Miil Bat. 1:8) Pa kako, mpunda iweme ibanga yapalile kusimikilua, apana sie mu Israeli, inzi mu ma fwasi onse. Kekio kibanga kyali kya kwiza kubapeela bantu bonse fwasi ya kwaluka basambi bakue Yesu. (Mat. 28:​19, 20) Yesu waalandile evi: “Mwakaba bakasininkizia bane.” Eba, baaba basambi ba lenu babanga bali ni lazima ya kumana liina lyakue Yehova, ao babanga baali ba kwaluka sie bakasininkizia bakue Yesu? Bintu bilandilue mu lilembo lya Miilo ya Batumua katue ka 15 i bili kutukwasia kupata kyasuko kya kekio kiipuzio.

5. Batumua pamo ni bakote mu Yerusalemu baalangiliile syani nangue bantu bonse babanga bali ni lazima ya kumana liina lyakue Yehova? (Mona ni foto.)

⁵ Mu mwaka wa 49, Yesu wasyavyelue, batumua pamo ni bakote mu Yerusalemu baaikeele pamo evi kulondolwela palua bintu bibanga byapalile kukita bantu basibanga bali Bayuda evi baaluke Bakristu. Kisia kupua kulondolwela palua kekio, Yakobo, lupua wakue kwa Yesu, waalandile evi: “[Petro] waakilondolola bwino Leeza vyaapozele mano akue lya kwanza ku ntundu evi asaakule kufuma pakati kabo bantu palua liina lyakue.” Eba, Yakobo abanga walandila palua liina lyakue ni? Lwaabwelele kulanda milandu yakue kabika Amosi, waaongeziizie kulanda evi: “Evi bantu basyelepo bamukebe Yehova kwa mute pamo ni bantu ba ntundu yonse, bantu baalia bali bakuutua mu liina lyane, i vyalanda Yehova.” (Miil Bat. 15:​14-18) Babo basambi ba lenu te babanga bapalile kusambilila sie pa lwakue Yehova, inzi kabili babanga bali ‘ba kukuutua mu liina lyakue.’ Kekio, kilangiliile nangue babanga bapalile kubabwilako bange liina lyakue Leeza, kabili babanga bapalile kukuutilua mu lelio liina.

6-7. (a) Juu ya ki Yesu waaizile panu pa kyalo? (b) Ni nsambu ki ya mana sana yaalengiizie Yesu eze pa kyalo?

⁶ Liina lyakue Yesu lili na mana ya “Yehova I Bupusuko.” Yehova waamubombiizie Yesu evi aye wali nzila ya kubapususiiziamo baalia bonse bali ni kiketekelo muli bene. Yesu waaizile pa kyalo evi kubafwila bantu. (Mat. 20:28) Pantu waalipile kilubula-mulandu waalengiizie kivindikane Yehova aye wabeleela bantu mazambi abo, kabili baaluke ni kiswapilo kya kupata bukose bwa lonse.—Yoan. 3:16.

⁷ Inzi, juu ya ki bantu bali ni lazima ya kilubula-mulandu? Ni juu ya belia byaakitikile mu busitani bwa Edeni. Nga vitwaakimona mu lyasi lyaakipita, bavyazi betu ba kwanza, ba Adamu ni Eva, baamusangukiile Yehova. Ni kekio kyaalengiizie bazezie lisyuko lya kwikala lonse. (Kut. 3:​6, 24) Inzi, kuli nsambu inge ya mana sana yaalengiizie Yesu eze panu pa kyalo. Sataana waafisiizie liina lyakue Yehova. (Kut. 3:​4, 5) Pa kako, bantu babanga bapalile kumana nangue Yehova taakitile kilubo ata kimo, kabili nangue liina lyakue ni litakatifu. Pantu Yesu abanga wali mukenzi ao kikula wakue Yehova, waakitile maka akue onse evi kuswesia liina lyakue Yehova.

8. Baalia bonse bamuzumiine Yesu bapalile kwinika ki?

⁸ Baalia bonse bamuzumiine Yesu, bapalile kwinika nangue Nsulo ya bupusuko bwabo ni Yehova Leeza, Baba wakue kwa Yesu. (Yoan. 17:3) Kukila pa kako, nga evelia sie Yesu, bapalile kukuutilua mu liina lyakue Yehova. Kabili, bapalile kwinika nangue ni kintu kya mana kuswesia lelio liina. Bapalile kukita evio evi kupusuka. (Miil Bat. 2:​21, 22) Pa kako, basambi bonse bakue Yesu bapalile kusambilila pa lwakue Yehova pamo ni Yesu. Kekio i kyaalengiizie Yesu apwililile lipepo lyakue na ezi milandu ili mu Yoane katue ka 17 ilandile nangue: “Naababwilile liina lyobe, kabili nakatwalilila kubabwila, evi kolia kuntona kuwaantonene kuye kwali mukati mwabo, kabili nene ngie nali muli bene [ao mu buumo pamo nabo].”—Yoan. 17:26.

“MULI BAKASININKIZIA BANE”

9. Tupalile kulimona syani liina lyakue Yehova, kabili kunti twalangilila syani nangue tulimwene evio?

⁹ Nga vitwamona, fwe basambi bonse ba kisinka bakue Yesu tupalile kupoza sana mano ku kuswesia liina lyakue Yehova. (Mat. 6:​9, 10) Tupalile kulimona liina lyakue Yehova kuya lyali lya mana sana kuliko meena ange onse. Tupalile kulangilila nangue tulimwene evio kupitila lwendo lwetu. Pa kako, kunti twakita ki evi kuswesia liina lyakue Yehova ni kulangilila nangue belia byaalandile Sataana ni bya bufi?

10. Lilembo lya Isaya 42 mpaka 44 lilandile ki? (Isaya 43:9; 44:​7-9) (Mona ni foto.)

¹⁰ Lilembo lya Isaya 42 mpaka 44 lilangiliile bintu bitupalile kukita evi kuswesia liina lyakue Yehova. Mu lelio lilembo, Yehova wabalomba baalia basizi kumupupa wene basininkizie kine ba leeza babo kubali kakiine. Kabili, walomba kine kuli ni bakasininkizia ba kusininkizia kekio balande. Inzi, te kumwenekele ata umo wa kusininkizia!—Soma Isaya 43:9; 44:​7-9.

11. Nga vilandile lilembo lya Isaya 43:​10-12, Yehova wabalanda ki bantu bakue?

¹¹ Soma Isaya 43:​10-12. Yehova wabalanda evi bantu bakue: “Muli bakasininkizia bane, . . . kabili nene ndi Leeza.” Yehova ali mukubalomba baasuke keki kipuzio: “Eba, kuli ni Leeza unge kufumiako nene?” (Is. 44:8) Pa kako, tuli ni lisyuko kikata lya kwasuka kekio kipuzio. Kupitila milandu ni bikitua byetu, tuli twalangilila nangue Yehova i Leeza wa kisinka. Liina lyakue i lya pa muulu sana kupita meena onse. Tuli twalangilila kupitila lwendo lwetu nangue tumutonene Yehova kakiine, kabili nangue tuli ba kisinka kuli wene ata sie kine Sataana ali wakeba kutulekezia kukita evio. Kupitila kukita evio, tuli twakwasia kuswesia liina lyakue Yehova.

12. Bukabika buli mu Isaya 40:​3, 5 bwaafikiliziiziwe syani?

¹² Tuli twalangilila nangue tuli twamupala Yesu Kristu kupitila kuswesia ao kusakila liina lyakue Yehova, ao sifa yakue. Ni Isaya waalandile nangue kuli muntu umo ‘wakaseba ao kuteania nzila yakue Yehova.’ (Is. 40:3) Bobo bukabika bwaafikiliziiziwe syani? Yoane Mubatizi waateaniizie nzila pa lwakue Yesu. Yesu i olia waaizile mu liina lyakue Yehova ni kulanda mu liina lyakue Yehova. (Mat. 3:3; Mark. 1:​2-4; Luk. 3:​3-6) Bobo bwenka bukabika bwaalandile evi: “Bulumba bwakue Yehova bwakaba kufiikulua.” (Is. 40:5) Kekio kyaafikiliziiziwe syani? Lwaaizile panu pa kyalo, Yesu waalangiliile, kupitila milandu ni bikitua byakue, vyaamupalile Yehova mu nzila ipwililikile; ni kekio kyaamwenekele sie nga evelia Yehova i waaizile panu pa kyalo.—Yoan. 12:45.

13. Kunti twamupala syani Yesu?

¹³ Ni fwefue tuli Bakasininkizia Bakue Yehova nga evelia sie Yesu. Tuli twababwila bantu liina lyakue Yehova, kabili tuli twamubwila kila muntu utuli twasaakaana nakue palua bikitua byakue Yehova bya kupapia. Inzi kabili, tupalile kubabwila bantu bintu byonse byaakitile Yesu evi kuswesia liina lyakue Yehova. (Miil Bat. 1:8) Yesu i Kasininkizia mukulu sana wakue Yehova, ni fwefue tuli twakonka mufuano wakue. (Nfy. 1:5) Inzi, tupalile kulangilila mu nzila ki inge nangue tumwene liina lyakue Yehova kuya lyali lya mana sana?

VYA KULANGILILA MU NZILA INGE NANGUE TUMWENE LIINA LYAKUE YEHOVA KUYA LYALI LYA MANA SANA

14. Nga vilandile Malumbo 105:​3, tuli twaiunvua syani palua liina lyakue Yehova?

¹⁴ Tuli twaitasia mu liina lyakue Yehova. (Soma Malumbo 105:3.) Yehova ali waunvua makola lutuli twaitasia mu liina lyakue. (Yer. 9:​23, 24; 1 Bakor. 1:31; 2 Bakor. 10:17) Bulanzi ‘kwitasia muli Yehova’ buli na mana ya kwitoneena muli Yehova Leeza wetu. Tuli twamona nangue ni lisyuko likata kukindika liina lyakue ni kusakila sifa yakue. Te tupalile kunvua busoni ata kanini bwa kubabwila baalia batuli twabomba nabo, banafunzi netu, bekazi netu, ni bange nangue tuli Bakasininkizia Bakue Yehova. Kibanda atonene tulekele kubabwilako bange palua liina lyakue Yehova. (Yer. 11:21; Nfy. 12:17) Kulanda kisinka, Sataana ni ba kabika bakue ba bufi bali batona kubalengia bantu balabe liina lyakue Yehova. (Yer. 23:​26, 27) Inzi, pantu tutonene liina lyakue Yehova, kekio kili kyalengia tutwalilile kusansamukila mu lelio liina “koba konse.”—Malum. 5:11; 89:16.

15. Kukuutila mu liina lyakue Yehova kuli na mana ki?

¹⁵ Tuli twatwalilila kukuutila mu liina lyakue Yehova. (Yoel. 2:32; Bar. 10:​13, 14) Kukuutila mu liina lyakue Yehova te kumana sie ni kubombia liina lyakue. Inzi, kubiikile mukati bintu bingi, nga evelia, kufikiila kumana bumuntu bwakue, kumuswapila, ni kumulomba atutungulule. (Malum. 20:7; 99:6; 116:4; 145:18) Kabili, kubiikile mukati kubabwilako bange liina lyakue ni mibele yakue, kubakwasia balapile ni kutendeka kukita bintu bya kulengia Yehova abetabile.—Is. 12:4; Miil Bat. 2:​21, 38.

16. Kunti twakita ki evi kulangilila nangue Sataana ni wa bufi?

¹⁶ Tupingwile kutesekelapo palua liina lyakue Yehova. (Yak. 5:​10, 11) Kine twatwalilila kuya twali ba kisinka kuli Yehova ata sie kine twateseka, tuli twalangilila nangue Sataana ni wa bufi. Mu nsita yakue Yobu, Sataana waalandile evi palua bantu bonse bali bamubombela Yehova: “Muntu wakaba kufumia kyonse kyali nakio evi apususie bukose bwakue.” (Yob. 2:4) Sataana waalandile nangue muntu kunti wavinda sie kumubombela Yehova kine bintu bili mukumuila bwino, i kulanda, kine wene wapata maavia, ali kulekela kumubombela Yehova. Inzi Yobu, mubombi wa kisinka, waalangiliile nangue Sataana waabepele. Ni fwefue kunti twalangilila nangue Sataana ni wa bufi kine twatwalilila kuya twali ba kisinka kuli Yehova ata sie kine twapata maavia ali aletua na Sataana. Tupalile kuya twasininkiziizie kakiine nangue Yehova wakaba kutwalilila kutulabukila juu ya liina lyakue.—Yoan. 17:11.

17. Nga vilandile 1 Petro 2:​12, kunti twatasia liina lyakue Yehova mu nzila ki inge?

¹⁷ Tuli twaikwinda kutasia liina lyakue Yehova. (Tus Maf. 30:9; Yer. 7:​8-11) Pantu tuli Bakasininkizia Bakue Yehova, kunti twatasia liina lyakue ao kulikoosiizia mukinzi. (Soma 1 Petro 2:12.) Pa kako, tupalile kukita kintu kyonse kili mu buvinde bwetu evi kumutasia Yehova kupitila milandu ni bintu bituli twakita. Kine twakita evio, twakaba kuvinda kutasia ao kukindika liina lyakue ata sie kine te tupwililikile.

18. Kunti twalangilila mu nzila ki inge nangue tumwene liina lyakue Yehova kuya lyali lya mana? (Mona ni bulondolozi bwa pensina.)

¹⁸ Tuli twaemena sana liina lyakue Yehova kuliko kwemena sifa yetu. (Malum. 138:2) Juu ya ki kukita evio ni kwa mana? Lingi, bantu kunti batusuula, kabili kunti batendeka kulanda bintu bibipile pa lwetu pantu tutonene liina lyakue Yehova.a Yesu waaitabiile kufua lufu lwa busoni nga kipondo evi atasie liina lyakue Yehova. Yesu “waapuulwile busoni,” i kulanda, taaemeene sana vibanga vyawaza bantu pa lwakue. (Baeb. 12:​2-4) Wene waapozele mano akue ku kukita kutona kwakue Leeza.—Mat. 26:39.

19. Wewe uli waiunvua syani palua liina lyakue Yehova, kabili juu ya ki?

¹⁹ Tuli twaitoneena pantu tuli twamubombela Yehova, kabili tuli twamona nangue ni mukinzi ukata kukuutua nangue Bakasininkizia Bakue Yehova. Kansi, twakaba kutwalilila kumutasia wene ata sie kine bange batupunika ao kutwemia. Tuli twamona liina lyakue Yehova kuya lyali lya mana sana kuliko sifa yetu. Pa kako, tuye twapingwile kutwalilila kutasia liina lyakue Yehova ata sie kine Sataana waikwinda syani evi kutulekezia. Kine twakita evio, twakaba kulangilila nangue tumwene liina lyakue Yehova kuya lyali lya mana sana, nga evelia sie Yesu Kristu vyali walimona.