LISOMO LYA 34
Tuli Kukita Siani Eevi Tulangilile Nangue Tumutonene Yehova?
Ntangia luwatendekele kusambilila Bibilia, eba, uli waimona kuya wali peepi ni Leeza? Eba, utonene kutwalilila kulumia bukibuza bobe pamo nakue? Kine utonene, languluka eevi, musita Yehova lwakaba kumona wakila kutwalilila kumutona, ni weene wakaba kukila kukutona ni kukwemena. Kunti wamulangilila siani nangue umutonene?
1. Kunti twalangilila siani nangue tumutonene Yehova?
Tuli twalangilila nangue tumutonene Yehova kupitila kumunakila. (Some 1 Yoane 5:3.) Teezi kupatikizia muntu amunakile. Inzi, apeele kila muntu buntungua ao uuru wa kusaakula kine ali kumunakila ao abe. Juu ya ki? Paantu Yehova atonene ‘tumunakile na mitima yeetu yonse.’ (Baroma 6:17) I kulanda nangue atonene umunakile, apana paantu wakupatikizia, inzi paantu umutonene. Seemu ya 3 ni ya 4 ya mu keenu kitabu, iteaniiziwe eevi ikukwasie umone vya kukita eevi ulangilile nangue, umutonene Yehova kupitila kukita bintu beelia bili byamusaansamusia, ni kutiina kukita beelia bili byamulengia afiitue.
2. Juu ya ki kunti kyakola kulangilila nangue tumutonene Yehova?
“Muntu wa nsaambu ali ni maavia engi.” (Malumbo 34:19) Fwe bonse, tuli ni maavia ali aleetua na kusipuililika. Kabili musita unge kunti twakitilua bila nsaambu, twaaluka ni buavia bwa kupata nfalanga, aosie maavia ange. Kine twaaluka mu maavia, kunti twamona kyakolele kukita beelia bitulandilue kuli Yehova tukite. Kili kyalengia, paantu lingi kukita bintu bibiipile kuli kwasaangua kwaleengele. Inzi, kine wakita kakiine beelia bikulandile Yehova ukite, uli kulangilila nangue umutonene kupita kintu kinge kyonse. Kabili uli kulangilila nangue uli muntu wa kisinka kuli weene. Ni weene wakaba kuya wali wakisinka kuli weewe. ‘Takaba kukusia’ ata kaniini.—Some Baebrania 13:5.
TUKEBE SAANA
Tumone juu ya ki Yehova ali wasaansamuka kine weewe wamunakila, kabili keelia kiuli kukita eevi utwalilile kumusaansamusia.
3. Sataana wakusitaaka
Nga vilandile lileembo lya Yobu, Sataana taamusitaakilesie Yobu bunke, inzi kabili waasitaakile bantu bonse bali bamubombela Yehova. Some Yobu 1:1, 6–2:10, kisia londoluele beebi biipuzio:
Kukoonkana ni bulanzi bwakue Sataana, juu ya ki Yobu abanga wamunakila Yehova?—Mona Yobu 1:9-11.
Sataana waabasitaakile ki bantu bonse, kubiika pamo ni weewe?—Mona Yobu 2:4.
Some Yobu 27:5b, kisia londoluele keeki kiipuzio:
Yobu waalangiliile siani nangue amutonene Yehova kakiine?
Yobu waalangiliile nangue amutonene Yehova Kupitila kusiala wali wa kisinka kuli weene
Tuli twalangilila nangue tumutonene Yehova kupitila kusiala twali ba kisinka kuli weene
4. Saansamusia mutima wakue Yehova
Some Tuswalo ni Mafunde 27:11, kisia londoluele beebi biipuzio:
Yehova ali waiunvua siani kine wamunakila ni kukwata bupinguzi buweeme? Juu ya ki?
5. Kunti kyakitika uye wali wa kisinka kuli Yehova
Kine tumutonene Yehova, tuli kukinkiziiwa kubabuilako bange palwakue. Kuya twali bantu ba kisinka kuli weene, kuli kutukwasia tukite evio anzia kine te kileengele. Mone VIIDEO, kisia londoluele beebi biipuzio.
Eba, uli wamona kyakolele kubabuilako bange palwakue Yehova?
Mu eezi viideo, ni kiki kyaamukwasiizie Grayson alekele kutiina?
Kine tutonene bintu bitonene Yehova ni kusuula beelia byasuulile, tuli kumona kyaleengele kusiala twali ba kisinka kuli weene. Some Baroma 12:9, kisia londoluele beebi biipuzio:
Kukoonkana ni beelia biwakisambilila, ni bintu ki bitonene Yehova? Ni bintu ki byasuulile?
Kunti wakita siani eevi utone biweeme ni kusuula bibiipile?
6. Kine twamunakila Yehova tuli twapata mpaalo ingi
Lyonse, kumunakila Yehova kuweeme saana. Some Isaya 48:17, 18, kisia londoluele beebi biipuzio:
Eba, uli watontonkania nangue kunti twaswapila Yehova aye wamanine lyonse bintu bikilile kuwaama palwetu? Juu ya ki?
Teusyapatile mpaalo ki ntangia musita luwatendekele kusambilila Bibilia ni kumumana Yehova, Leeza wa kisinka?
BANGE BALI BALANDA: “Leeza teezi kumonapo kantu ku bintu bindinakita.”
Kunti wabombia lileembo ki eevi umukwasie muntu amane nangue, bintu bituli twakita, kunti byamulengia Yehova asaansamuke ao afiitue?
MU KIFUPI
Kunti walangilila nangue umutonene Yehova kupitila kumunakila ni kusiala wali wa kisinka kuli weene, anzia kine wasaakaana ni maavia.
Kunti waasuka siani?
Mufuano wakue Yobu wakusambilizia ki?
Kunti walangilila siani nangue umutonene Yehova?
Ni kiki kili kukukwasia utwalilile kuya wali wa kisinka kuli Yehova?
MANAKO NI BINGE
Mona vya kukita eevi uye wali wa kisinka kuli Yehova ni ku kilonghaano.
Mana bingi palua masitaaka asitaakilue bantu kuli Sataana.
“Yobu Waatwaliliile Kuya Wali wa Kisinka” (Bibilia—Ili ni Mpunda ki? Seemu ya 6)
Baanike ni beene, kunti alangilila nangue bamutonene Yehova. Mona vibali kukita.
Balumendo ni bakaziana kunti bakita siani eevi basiale bali bakisinka kuli Yehova, musita ubapatikiziiwa na benaabo bakite bintu bibiipile?
Imana Sinta Musita Benoobe Lubakupatikizia Ukite Bibiipile! (3:59)