Aminabi we galéami nipo

1. ¿Piri namuti mi machili binea echi Biblia?

¿AMI NEWALÁ suwaba echi namuti japi mi bineli kulí chotasia binea echi Biblia? A keʼré japi mi we galeli machiyá japi Onorúami a olá bilé rewalá. Alí a keʼré japi mi kilí nílili machiyá japi Jeobá ke risoa olá echi pagótami echoná naʼírili. Ayénachó a keʼré japi mi we kanílili binea japi mi checho ku inema echi japi ma suwili echoná Wichimóbachi we baʼóachi.

2. Japalí mi bineli echi Biblia, ¿piri jarecho namuti mi isili? (Efesios 5:1, 2).

² Japalí mi aminabi bineli echi Biblia, mujé ayénachó aminabi we galeli Jeobá. Alí echi jitra mujé ko iʼwérili isili isiá japi riká mi bineli. Ayénachó mi chotásili we aʼlá nátika isiá jiti mi nijéwili echi busuréliami japi Bíbliachi uchuwi. Alí mi riweli natia alí isiá echi namuti chati jiti mi kanílitinali Onorúami. Japi riká bilé towí isimí japi riká echi onolá, mujé ayénachó chotásili isiá japi riká mujé Onolá Jeobá, japi we galéami ju (leeri Efesios 5:1, 2).

3. ¿Piri ta nárika nokisáré ibili niraa tamujé?

³ Nalí jipi ko nárika isí jepuná: “¿Achi ni jipi aminabi wabé galé Jeobá japalí ni jonsa pakoli? ¿Achi ni jipi aminabi nata alí isimí japi riká Jeobá galea echi hermanos?”. Ami níliaká japi mi ma ke me galéami ju, kiti siwé. Echi riká ikili jaré cristianos bachá siglo piréami. Nalí Jesús ko ke nátili japi ke siné omérima ku galéami niya alí ke cho echi riká nata tamujé jitra (Apoc. 2:4, 7). Jesús ko machí japi ta a omeri ku galéami niya japi riká ne kulí.

4. ¿Piri ta binepo jenaʼí binelíwami?

⁴ Jenaʼí binelíwami ata binepo chúriká ti nokiboa jiti ta aminabi we galepo Jeobá alí jarecho si. Alí miná ko binepo piri namuti aʼláala ikí japalí ti aminabi we galéami ju.

IʼWÉRILI NOKIBOA JITI AMINABI WE GALEPO JEOBÁ

5, 6. a) ¿Piri namuti we jilírami ikili Pablo? b) Nalí, ¿piri iʼwírili jiti ke riwema nóchilia Jeobá?

⁵ Echi apóstol Pablo we kanila nóchili Jeobá, nalí ayénachó ikili namuti we jilírami. Japi riká, echi ko we miká simili nawisasia alí sibamia echoná we jilí nili. Echi ko anili: “Wikanáami bakochi, wisabeni ne noguí uʼlúsali. Wisabeni ne noguí miʼlirúami níili jaré chigórami jiti”. Ayénachó risoa olárami nili echi sayérala jitra (2 Cor. 11:23-27). Nalí ke echi bi nili jiti jaré hermanos ke natéami niraa ineli japi Pablo isili echi iʼwiria (2 Cor. 10:10; Filip. 4:15).

⁶ ¿Piri namuti iʼwírili Pablo jiti ke riwema nóchilia Jeobá? Echi namuti japi iʼwírili ko nili binea japi chúriká ju Jeobá echoná Onorúami Raʼicháala alí echi namuti jitra japi binoy ikili. Jiti la Pablo we bichiwie japi Jeobá we galeli echi (Rom. 8:38, 39; Efes. 2:4, 5). Alí echi ko ayénachó we galeli Jeobá alí néwariwélitili japalí iʼwérili isili nóchilia Jeobá alí iʼwiria echi hermanos (Heb. 6:10).

7. ¿Piri ta nokisáré jiti ta aminabi we galepo Jeobá?

⁷ Jiti aminabi we galepo Jeobá, ata leérisaré echi Biblia sinibí rawé. Alí japalí ta leeri, ati natásaré piri ta biné Jeobá jitra. Jiti la nárika nokisáré jepuná: “¿Chúriká néwariwéliti japi ni leeria atí japi Jeobá we tamí galé? ¿Alí piri namuti japi ni biné tamí iʼwiri jiti ni aminabi we galema Jeobá?”.

8. ¿Chúriká tamó iʼwírima sinibí raʼichia Jeobá yúa?

⁸ Bilecho namuti japi ta nokisáré jiti ta aminabi we galepo Jeobá, echi ko ju raʼichia sinibí rawé echi yúa ne sulachí jonsa (Sal. 25:4, 5). Echi riká ti nokisáaká, Jeobá ko tamó kipuma alí tamó iʼwírima (1 Juan 3:21, 22). Khanh,b bilé hermana japi bité echomí Asia, jéaní: “Ne kulí ko, ani galéi Jeobá echi namuti bi jitra japi ni bineli. Nalí aminabi ni we galeki japalí ni ineli chúriká echi tamí iʼwírili japalí ni echi yúa raʼichie, alí echi riká isiá tamí iʼwírili jiti ni aminabi isínilima japi echi galé”.

IʼWÉRILI NOKIBOA JITI AMINABI WE GALEPO JARECHO

9. ¿Chúriká ti machí japi Timoteo we galeli echi hermanos?

⁹ Ma jaré bamíali simírisa japalí Pablo chotásili cristiano ka, echi ko machili bilé remalí Timoteo riwéami japi we aʼlá isíami nili, ayénachó japi we galéami nili Jeobá alí echi pagótami. Jiti la pe aminana Pablo jériká aneli echi filipenses Timoteo jitra: “Binói ne wabé nakí mapu ʼyémitamo ne bichíwali waminabi kuʼwíratami níibo. Aʼlí ke wesi auché bilé nirú tamí yuwa nóchami mapu achigórigá galabéala ʼnátami ju” (Filip. 2:20). Pablo ko ke anili japi Timoteo we machili isiá wiká namuti o japi we aʼlá nawésami nili. Echi ko nalí wabé natéami niraa ineli japi Timoteo we galeli echi hermanos. Jiti la suwaba echi congregaciones we kaníliliré buwea japi Timoteo echi yúa nawama (1 Cor. 4:17).

10. ¿Chúriká néwariwélitili Anna alí echi kunala japi we galé echi hermanos?

¹⁰ Japi riká Timoteo tamujé ayénachó iʼwérili nokiboa iʼwiria echi hermanos (Heb. 13:16). ¿Achi mi newalá Anna jitra japi ti kulí bineki echoná binelíwami 29? Japalí kulí simírili echi waʼlú ukí, Anna alí echi kunala simíali inesia bilé niwíkami alí echi kúchuwala japi Testigos ju. Alí ineli japi echi bitélachi poala najuli, jiti la echi hermanos ke olali chiní biʼwíkami japi uchama. Anna ko jéaní: “Ati wichóniki echi chiní, plancháriki alí ti romínika ku iyaki. Tamujé jitra ko ke me jilí nili, nalí echi isili japi jipi jonsa we aʼlá amigos nipo”. Anna alí echi kunala echi riká nokali iʼwiria jiti we galé echi hermanos (1 Juan 3:17, 18).

11. a) ¿Piri ikí japalí ti néwariwéliti japi ta galé jarecho? b) Japi riká aní Proverbios 19:17, ¿chúriká iné Jeobá echi aʼláala namuti japi ta noká jarecho jitra?

¹¹ Japalí ti we galé jarecho alí ti simá noká echi yúa, ata néwariwéliti japi ta nata alí noká japi riká Jeobá. Alí jarecho a ritiwá japi ta noká, nalí a keʼré japi ta ke siné machiboa japi chu yena natéami niraa iné japi ta noká echi jitra. Khanh, echi hermana japi ta jitra bineli echoná párrafo 8, aní japi we kanila newalá suwaba echi hermanos japi echi iʼwírili: “Ani waʼlú matétara iyá suwaba echi hermanas japi tamí yúrili nawisasia. Echi ko we galéami nili. Bitichí siyé tamí ujusia jiti napawika okebo alí checho ku bitichí tamí riwéi. Jipi ko ni machí japi a jilí nili echi riká nokayá, nalí echi riká nokali jiti we tamí galeli”. A bichíwali ju japi ke ne sinéami matétara nijima japi ta noká echi jitra. Khanh ayénachó jéaní: “Ani kanílisa nili ayénachó ku iʼwiria echi japi tamí iʼwírili, nalí ke ni machí kumi piré jipi sinéami echi. Nalí Jeobá ko a machí japi simá nokali tamí iʼwiria alí echi ko ku natétima, jiti la ni sinibí tani japi echi riká isima”. Japi riká aní Khanh a bichíwali ju, Jeobá ko a iné suwaba echi aʼláala namuti japi ta noká jarecho jitra. Echi ko iné japi riká bilé chiliwéliami we natéami japi ta echi iyá alí japi riká ko bilé namuti japi echi binoy natétisaré (leeri Proverbios 19:17).

12. ¿Piri omérima nokayá echi hermanos jiti néwariwélitima japi galé echi congregación? (Ayénachó iné echi fotos).

¹² Ami bilé hermano nísakó, ¿chúriká mi néwariwélitima japi mi galé jarecho echoná congregación? Iʼwiria echi hermanos. Japi riká isili bilé hermano Jordan riwéami, echi ko nárili bilé anciano piri jarecho si namuti isima jiti aminabi iʼwírima echoná congregación. Echi anciano ko aneli japi ma aʼlá isimí jaré namuti, nalí ayénachó aneli japi nirúe jarecho namuti japi aminabi isísaré. Japi riká, aneli japi biʼá pe nawama echoná napawíliwachi alí japi narépima echi hermanos, nijima comentarios, japi sinibí simea nawisasia echi grupo yúa japoná atí alí japi inema piri jarecho si namuti omeri isiá iʼwírimia echi hermanos. Japalí Jordan echi riká isili, ke bi bineli isiá jaré namuti, nalí ayénachó aminabi we galeli echi hermanos. Jordan ayénachó bineli japalí bilé hermano wiláliwa japi riká siervo ministerial, ke chotasi iʼwiria jarecho, nalí aminabi echi riká isimí (1 Tim. 3:8-10, 13).

13. ¿Piri iʼwírili Christian jiti checho ku anciano nima?

¹³ ¿Ami siervo ministerial o anciano nili alí jipi ko ma ke? Jeobá ko ke wikawi echi nóchali japi mi isili alí japi mi we galeka echi riká isili (1 Cor. 15:58). Alí echi ko a bijí ritiwá japi mi aminabi we galé echi hermanos. Bilé hermano Christian riwéami we omona nílili japalí riweli anciano niya. Nalí ke siweli, echi ko jéaní: “Tákoré ni ma ke anciano nili, nijé ko nátiki japi ni aminabi iʼwérili isima nóchilia Jeobá jiti ni we galé”. Pe aminana echi ko checho ku wilaari japi riká anciano. Alí jéaní: “Ke ni aʼlá machiyé achi ni narema echi nóchali, nalí ani nátiki japi riká Jeobá we galéami ju alí tamí riwé japi ni checho ku anciano nima, nijé ko animea japi ayena jiti ni we galé echi alí sinéami echi hermanos”.

14. ¿Piri ta biné japi riká anili bilé hermana Georgia bitéami?

¹⁴ Tamujé ayénachó we galé echi pagótami japi ke Testigos ju (Mat. 22:37-39). Japi riká, bilé hermana Elena riwéami japi bité echomí Georgia, aní: “Ne kulí ko nijé ko simiyé nawisasia jiti ni we galé Jeobá. Nalí japalí ni aminabi we galeli Jeobá, ayénachó echi isili japi ni aminabi we galema echi pagótami. Ani iʼwérili isié natia echi karú ikiwáami japi echi olayé alí chu iyiri namuti ani omérima ruyea japi echi machinálima. Echi riká isiá, ayénachó isili japi nijé aminabi echi iʼwírinalima” (Rom. 10:13-15).

PIRI AʼLÁALA NAMUTI IKÍ JAPALÍ TI GALÉAMI JU

15, 16. Japi riká machina echoná fotos, ¿piri aʼláala namuti ikí japalí ti galé jarecho?

¹⁵ Japalí ti néwariwéliti japi ta galé echi hermanos, ke echi bi ju japi iʼwíritami ju. Japi riká japalí niruili echi nayulí COVID-19, Paolo alí echi upila iʼwírili wiká hermanas ma wiláami jiti machimea néea echi celular, tableta ma o jarecho si namuti, jiti omérima nawesia. Bilé hermana we jilí nirali echi riká isiá, nalí aminá ko ma bineli alí echi ko a omérili bayea echi téemala jiti simama echoná Conmemoración. Alí 60 pagótami nili japi ineli videoconferencia niraa. Jiti la, japi nokali Paolo alí echi upila iʼwírili echi hermana alí echi téemala. Miná ko echi hermana osélili Paolo alí echi upila: “Waʼlú matétarabá jiti timí tamujé binérili japi ta wiláami ju alí ochérami. Ke ni siné wikawama japi Jeobá néwariwélitili japi we tamó galé alí japi emi iʼwérili nokali kilí niraa tamó iʼwiria”.

¹⁶ Echi namuti jitra Paolo ko bineli bilé namuti we natéami: japi wabé natéami ju galéami niya alí ke ko machíami niya. Echi ko jéaní: “Chabé ani nóchiki japi riká superitendente de circuito, alí a keʼré japi jipi ko echi hermanos ma ke newalá echi nawésali japi ni nijili, nalí a newalá echi namuti japi ni isili echi iʼwiria”.

17. ¿Jépuká ayénachó iʼwíritami ju japalí ta galéami ju?

¹⁷ Japalí ta galé jarecho, ayénachó tamujé aboi aʼláala namuti ikí. Echi riká ikili Jonathan, bilé hermano japi bité echomí Nueva Zelanda. Siné kaachi sábado rawé, Jonathan ineli bilé precursor japi bineli iyénili nawesia we ratáachi nasipa rawé. Jiti la chotásili nawesia echi yúa sinibí sábado ma aʼlí. Echalí echi ko ke machiyé japi echi riká isiá, binoy iʼwíritami nima. Jonathan ko jéaní: “Echalí nijé ko ke kanila simiyé nawisasia. Nalí japalí ni ineli japi echi precursor we aʼlá binerie alí japi wiká pagótami kipúe echi, ani aminabi we kanila simiyé nawesasia. Ayénachó jipi ko ani olá bilé amigo japi tamí iʼwiri aminabi we aʼlá nóchilia Jeobá, kanila simiyá nawisasia alí aminabi Jeobá amígowala niya”.

18. ¿Piri nakí Jeobá japi ta nokiboa?

¹⁸ Jeobá ko nakí japi ta sinéami aminabi we galepo echi alí jarecho si. Japi riká ti ma bineli, jiti ta aminabi we galepo Jeobá ata sinibí rawé leérisaré echi Biblia alí natásaré japi aní echoná, ayénachó sinibí raʼichásaré echi yúa. Alí jiti ta néwariwélitipo japi ta we galé echi hermanos, ata iʼwérili nokisáré echi iʼwiria. Ati aminabi we galéami nísaká, ayénachó ti aminabi mulíwipo Jeobá alí suwaba echi hermanos. ¡Alí sinibí amigos nipo anakupi niraa!