SECCIÓN 2
Sinibí we nakisí emi okuaka
“Echijiti ketasi risensia ju mapu ku rojuama echi jaré mapu ma niwíami ju, mapujiti Riosi ma echirigá napabuli.” (Márkosi 10:9)
Jeobá ko nakí japi echi niwíkami “kilii aʼlá nokiká pirélima” (Miqueas 6:8). We aʼlá ju japi echi niwíkami ke chati nokimea, kiti sineti ékisi kiti mi mayema japi ke sineti chati isima echi riká ta mi nokisáaká okuaka we nakiká ta mi pirélipo.
Jipi rawé jaré niwíkami ma ke nakiká piré. Kiti mi ke echi riká ikimea ata mi nokiboa okuá namuti.
1 AMI NEWALÁSARÉ JAPI BILEALA NALÍ WE NATÉAMI JU
JAPI ANÍ ECHI BIBLIA: “Machiboa mapu chuyiri ʼnalí ju echi ne wabé galabéala” (Filipenses 1:10). Echi kunala ko newalásaré japi echi upila bi we natéami ju alí echi upila echi riká cho natama echi kunala kitra. Kiti bela echi niwíkami ko bachá natama echi kunala, upila ma.
Jeobá ko nakí japi emi niwíkami we nakiboa anakupi kiti ta mi we kanilia pirélipo okuaka (Eclesiastés 9:9). Jeobá ko nakí japi ta mi okuaka aʼlá tibuka nokiboa, chuwé bilé namuti nokisí japi ta mi kanili (1 Corintios 10:24). Okuaka we nakiká pirélima alí japi anakupi we natéami ju.
JAPI MI ISIMA:
Okuaka járisi alí raʼichasi, aʼlá kipú japalí mi raʼíchiwa
Kiti mujé bineli bi natá, okuaka natasi
2 TIBÚ MUJÉ SULALA
JAPI ANÍ ECHI BIBLIA: “Mapuyíripi rijói chopi we ʼnéniga nakígá yuwa kochinálasagá bilé siʼnú mukí yuwa, échiko ma chati olali pachana binói sulálachi niráa” (Mateo 5:28). Mujé bilecho mi yúa kochinálisa, tákoré ke yúa nasawí, echi riká mi natásaká ma mi chotasi chati isiá.
Jeobá mi ané japi mi aʼlá tibuma mujé sulala (Proverbios 4:23; Jeremías 17:9). ¿Chúriká mi tibuma? Kiti iné echi japi ke aʼlá ju kiti mi inésaká, echi riká mi cho isínilimalé (Mateo 5:29, 30). Isí japi riká isili Job; echi ko jéaneli echi busila kiti ke inea bi ripima bilé mukí kiti ke echi yúa buʼunálima (Job 31:1). Kiti inesi japi chati buyaní japi riká echi koseti. Kiti baʼori japi ke mujé upila ju, mujé mukí, kecho baʼori japi ke mujé kunala ju.
JAPI MI ISIMA:
Mujé ko néwariwéliti echi pagótami japi mi niwíkami ju, kiti machimea japi ta mi okuaka ke ku rojapo
Mujé ko kiti yúa napawí echi pagótami japi mujé upila ke nakí japi mi yúa napawima. Mujé mukí kiti echi riká cho isí. Natabo: “Yúa ni napawísaká, ¿chu nílimalé?”