Chúriká mi kaníliami nima mujé téemala yúa

Japalí ta mi ma niwisa jipi ko okuaka ta mi piré. Chíkoré mi ma niwíkami ke ami sinibí riwíwima mujé wénwala alí mi si nakimea, nalí jipi ko mi we natéami niraa ineni mujé kunala, mujé upila ma. Isini kaachi mujé téemala ma ke kanílimiré kiti mi jipi ko ma niwíkami ju. Japi aní echi Biblia mi iwírima kiti ta mi kaníliami nipo emi téemala yúa ayénachó ta mi kanílipo emi okuaka.

1 TO NATABO CHU IYIRI MI NÍSARÉ MUJÉ TÉEMALA YÚA

JAPI ANÍ ECHI BIBLIA: “Galá oʼwiké [riwiwi] kemi onó, echi kemi iyé ayénachó” (Efesios 6:2). Tákoré mi ma wiká bamibi we natéami ju japi mi aʼlá riwíwima mujé wénwala. Ayénachó natá japi mujé upila kunala ma ayénachó tibúsaré binoy wénwala. “Échiko wabé galabé oláami ju, chopi tarapé korúkami ju”, kiti siné nijichémami nisi japalí ta mi napawisa emi téemala yúa (1 Corintios 13:4; Gálatas 5:26).

JAPI MI ISIMA:

• Kiti jéaníami ni ka: “Mujé wénwala sinibí cha riká raʼicha tamí kitra”, “Mujé iyela tasi sineti tamí kalé”

• Mujé ko nata chu nilia biléala

2 WE AʼLÁ RIWIKA RAʼÍCHI MUJÉ WÉNWALA JAPI MI NILI

JAPI ANÍ ECHI BIBLIA: “Kiti bela echi rejoy ko riwema kipi onó alí kipi iyé alí che ka isíisaré kipi upila alí nísaré japi riká bilepi ripoká” (Génesis 2:24). Ma ta mi niwísaká, emi wénwala a bijí mi tibúnilimalé, alí mi ruyénilimalé japi piri mi isima.

Emi okuaka machí chúriká ta mi aʼlá raʼíchika anepo emi wénwala kiti keʼme mi nulema japi piri ta mi nokiboa. Ke mi iyórika raʼíchima alí né bichíwika ané (Proverbios 15:1). Kiti natá japi mi we natéami ju, kilii pirélisi, kiti sapú naʼáwami nisi jarecho yúa “wabé galesi aʼnagupi, kilí niráa anáchaga” (Kolosenses 3:13). Echi riká mi isíisaká we kaníliami nima mujé téemala yúa.

JAPI MI ISIMA:

• Échaníami nísaká mujé wénwala, okuaka kilii niraa raʼichasi

• Okuaka raʼichasi piri ka ta mi nokiboa echi riká ta mi anésiwaká