Chúriká ta mi okuaka katúwika nokiboa

Japalí bilé rejoy alí bilé mukí niwisa, isini kaachi a jilika piré, jaré ko we naʼáwika piré kiti ke chopi riká nátami ju kiti ke chopi riká nili alí tasi chopi riká binéritami ju. Jarecho ko risoa nili kiti ikí namuti japi we jilí ju.

Echi riká nísaká jaré niwíkami tasi nakúrika noká anakupi niraa, we nalí echi Biblia ko mi busuré iyá japi ta mi okuaka katúwika nokiboa (Mateo 5:23, 24). Ami kaníliami nima ami né echi riká isisaká japi riká aní echi Biblia.

1 RAʼICHÁ JAPALÍ MI RISOA NILI

JAPI ANÍ ECHI BIBLIA: “A nirú [...] bilé rawé japi raʼichabo” (Eclesiastés 3:1, 7). Aní chu kabú ta mi raʼichabo okuaka, japalí mi risoa nílisa; ruyé japi mi nili alí né bichíwali ané. Japi mi nata. Sinibí “ne bichíwaga raʼichasi” (Efesios 4:25). Ami iyoa nílisaká, né anachi, kiti nikowi. Kilii niraa raʼichasi kiti ta mi ke naʼáwipo (Proverbios 15:4; 26:20).

Chíkoré ta mi ke okuaka katuwi, aʼlá simá aniká raʼichá; we aʼlá nakíami niika, ayénachó aʼlá riwíwika (Kolosenses 4:6). Jaré niwíkami ko tasi raʼicha naʼáwisa, we be nalí kiti naʼáwika bi ripisi we sapú okuaka ku akaréwika raʼichasi (Efesios 4:26).

JAPI MI ISIMA:

• Aní chu kabú mi raʼichama japalí mi risoa nílisa

• Japalí ta mi okuaka raʼicha, ma sunílachi raʼicha, nalí raʼichá mujé ko

2 AʼLÁ KIPÚ KITI MI MACHIMEA PIRI NILIA

JAPI ANÍ ECHI BIBLIA: “Sinibí galá níima ʼyemi aʼnagupi galesa [...] Ayénachó galá níima máputamo aʼnagupi galá nilabo.” (Romanos 12:10.) A bela we natéami ju japi mi aʼlá kipuma alí mi machimea chu nilia bilecho, “aʼnagupi wabé [...] natimasi” kiti bineli bi ka nili (1 Pedro 3:8; Santiago 1:19). We aʼlá nalí kipú japi mi ané. Ami omériaká riwé japi mi isiá chukú, alí aʼlá kipú japi mi anénali, ke mi echalí rawé omériaká raʼicha, nari acha che siné rawé raʼichánala. Natá japi ta mi okuaka amigos ju, echi riká mi natásaká tasi mi sapú iyoma (Eclesiastés 7:9).

JAPI MI ISIMA:

• Isini kaachi tasi mi kanílima echi riká anewa, kiti iyó nalí aʼlá nami japi mi ané

• To natabo chúsiá échaní alí chu nilia aní. We aʼlá iné piri isiá japalí raʼíchachi alí japi chúriká mi ané

3 IWÉRIKA ISÍ

JAPI ANÍ ECHI BIBLIA: “Né mi iwérika isisá ko nocha, né wiká namuti mi narema, ke mi iyiri isisá ko japi mi aní, tasi mi iyiri narema” (Proverbios 14:23). Okuaka raʼíchika anisí japi ta mi nokibóaré, né echi riká nokisí japi ta mi riká anili. We aʼlá nima echi riká ta mi iwerika nokisáaká (Proverbios 10:4). Okuaka echi riká ta mi nokisáaká, we ta mi kanilia pirélipo (Eclesiastés 4:9).

JAPI MI ISIMA:

• Okuaka raʼichasi chúriká ta mi nokiboa japi ta mi aniká nokali

• A checho ku napawika raʼichasi acha ta mi aʼlá nokala japi ta mi katúwika aniká nokali