BINELÍWAMI 28
CANCIÓN sjj-S 123 Seamos leales y sumisos al orden teocrático
¿Ami aʼlá machí chu iyiri ju “echi ne Bichíwali”?
“Ne sinibí echirigá galá bichíyami níisi echi ne Bichíwali” (EFES. 6:14).
JAPI TA JITRA BINEPO
Binepo chúriká ti omeri machiyá chu iyiri ju echi bichíwali japi Jeobá aní alí echi ikaléwami japi Satanás aní alí echi tamó sayérala.
1. ¿Piri mi inili echi bichíwali jitra?
JAPI ta Jeobá nijéwami ju, ati we galé echi bichíwali japi aní echi Onorúami Raʼicháala. Ati we bichiwi suwaba japi aní echoná (Rom. 10:17). Alí ti we bichiwi japi Jeobá wilali echi congregación cristiana jiti nawisama “echi ne Bichíwali jenaʼí wichimóbachi” (1 Tim. 3:15). Ayénachó ti we kanílika nijewi echi japi tamó nulé jiti echi ko tamó bineri néeka echi Biblia alí tamó ané japi nokiboa jaré namuti japi tamó iʼwiri nokayá japi Onorúami nakí (Heb. 13:17).
2. Japi riká aní Santiago 5:19, ¿piri iyiri a keʼré japi ta ikiboa?
2 Tákoré ti ma machí echi bichíwali alí ti machí japi ta nijéwisaré echi organización Jeobá níwala, nirúlimiré namuti japi isima japi ta ma ke me bichiwia nílipo (leeri Santiago 5:19). Satanás ko nakí japi ta ma ke bichíwipo japi aní echi Biblia alí echi organización Jeobá níwala (Efes. 4:14).
3. ¿Chúsiá ti we bichíwisaré echi bichíwali? (Efesios 6:13, 14).
3 (Leeri Efesios 6:13, 14). Ma mulipi echi Diablo néema wiká ikaléwami jiti echi naciones omáana nirúami sayérima Jeobá (Apoc. 16:13, 14). Ayénachó ti machí japi Satanás aminabi iʼwérili isima ekia echi japi Jeobá nijéwami ju (Apoc. 12:9). Jiti la we natéami ju japi jipi jonsa ati binepo machiyá chu iyiri ju echi bichíwali alí chu iyiri ikaléwami ju alí nijéwami niya echi bichíwali (Rom. 6:17; 1 Ped. 1:22). We natéami ju japi ta nokiboa jepuná, jiti niyúbitami nipo japalí ma gran tribulación kaachi.
4. ¿Piri binepo jenaʼí binelíwami?
4 Jenaʼí binelíwami binepo okuá cualidades japi ta newalé jiti oméripo machiyá chu iyiri ju echi bichíwali japi aní echi Biblia alí jiti bichíwipo japi aní echi organización Jeobá níwala. Ayénachó binepo bikiá namuti japi ta nokisáré jiti ke siné riwepo echi bichíwali.
CUALIDADES JAPI TA NEWALÉ JITI MACHIBOA CHU IYIRI JU ECHI NE BICHÍWALI
5. ¿Chúriká tamó iʼwiri majaa Jeobá jiti machiboa echi bichíwali?
5 Majaa Jeobá. Jepuná ko aniwáami ju japi riká ti we galé Jeobá ke ti nokinali echi namuti japi ke kaníliti echi. Ati binénali machiyá japi aʼlá ju alí japi ke aʼlá ju, alí echi japi bichíwali ju alí japi ikaléwami ju, jiti echi riká kanílitipo Jeobá (Prov. 2:3-6; Heb. 5:14). Ke ti siné riwésaré japi majaa echi pagótami, isima japi ta ma ke me galebo Jeobá. Echi riká ti nokisáaká ati kanílitipo echi pagótami, alí ne sojí suwaba japi iyiri galé echi pagótami, ke galé Jeobá.
6. ¿Piri nokali echi 10 rijoi jiti we majali echi pagótami?
6 Ati wabé majásaká echi pagótami Jeobá yúa, a keʼré japi ta ma ke bichíwipo echi bichíwali japi Jeobá aní. Natabo echi 12 rijoi jitra japi simíali inesia echi weʼé japi Jeobá iyama riweili echi israelitas. Jiti 10 echi wabé majali echi cananeos alí ke me galeli Jeobá, jériká anijoli: “Ke ti omeri simíaya nakosia echi yúa, jiti echi ko wabé jiwérami ju tamujé yúa” (Núm. 13:27-31). A bichíwali ju japi echi cananeos wabé jiwérami nili echi israelitas yúa. Nalí, japalí anili japi ke omérima niyuria echi sayérala, echi ko néwariwélitili japi ke newalali Jeobá jitra. Echi ko natasa riweili japi Jeobá nakili japi nokimea echi israelitas. Ayénachó newalasa riweili japi Jeobá kulí isili echi jitra. Néwalayá jepuná iʼwírima riweili echi, jiti machimea japi Jeobá nalí wabé omériami ju echi cananeos yúa. Nalí Josué alí Caleb sinúrika nili: echi ko a bichíwili alí nakili japi Jeobá kanílima. Jiti la jériká aneli echi israelitas: “Jeobá a kanílisaká tamujé yúa, echi ko ne bichíwali tamó tomea echoná weʼé japi tamó iyama ruli” (Núm. 14:6-9).
7. ¿Piri tamó iʼwírima aminabi majaa Jeobá? (Ayénachó iné echi dibujo).
7 Bilé namuti japi tamó iʼwírima aminabi majaa Jeobá, echi ko ju sinibí natia echi namuti japi echi galé kecho nokayá bilé namuti (Sal. 16:8). Japalí mi leeri bilé historia japi chukú echoná Biblia, nárika isí: “Nijé echoná si asálaká, ¿piri ni isímili?”. Japi riká, natá japi mujé si kipúa wilí echi ke aʼláala raʼíchali japi aní echi 10 rijoi. ¿Achi mi bichíwimili japi echi aní alí mi we majámili echi pagótami? ¿O achi mi wabé nílimili nijéwinalia Jeobá jiti mi we galé? Sinéami echi israelitas japi echalí pireili ke machili japi Josué alí Caleb anili echi bichíwali. Jiti la, ¿piri ikili? Echi ko ke moʼili echoná weʼé japi Jeobá iyama riweili (Núm. 14:10, 22, 23).
¿Jépuká mi nalí bichíwimili? (Iné echi párrafo 7).
8. ¿Chu iyiri cualidad ati iʼwérili nokisáré olayá, alí chúsiá?
8 Ke niráami niya. Jeobá ko bineri echi bichíwali echi japi ke niráami ju (Mat. 11:25). Japalí ti bineli echi bichíwali, tamujé ko ke niráami nili alí ti riweli japi jarecho tamó iʼwírima (Hech. 8:30, 31). We be nalí, ati aminabi we aʼlá tibuka nokisáré jiti ke niráami nipo. Niráami niya, isima japi ta natabo japi wabé natéami ju japi ta nata echi busuréliami yúa japi aní echi Biblia alí japi nulá echi Jeobá organizaciónwala.
9. ¿Piri tamó iʼwírima ke niráami niya?
9 ¿Piri tamó iʼwírima ke niráami niya? Ati newalásaré japi Jeobá ne walubéala ju tamujé yúa (Sal. 8:3, 4). Ayénachó ti tánisaré Jeobá japi tamó iʼwírima ke niráami niya alí ti riwésaré japi echi tamó binérima. Jeobá tamó iʼwírima wabé natéami niraa inea japi riká echi nata, japi echi tamó bineri echoná Biblia alí néeka echi organización, alí ke we natéami niraa inea japi riká tamujé aboi nata. Japalí ta leeri echi Biblia, aapo japoná Jeobá néwariwéliti japi we galé echi japi ke niráami ju, nalí japi we kichí echi japi niráami ju alí japi walúala ka nili jarecho yúa. Alí, ami narésaká bilé nóchali japoná mi walúala niraa wilaari, aʼlá tibuka isí jiti mi ke niráami nima.
PIRI TA NOKISÁRÉ JITI KE SINÉ RIWEPO ECHI BICHÍWALI
10. ¿Jépuká néeli Jeobá anemia japi echi nijéwami ju japi nokisáré?
10 Sinibí bichiwi japi aní echi organización japi riká nokiboa. Chabé japalí pireili echi israelitas, Jeobá ko néeli Moisés ruyemia echi israelitas japi nokisaa riweili, alí miná ko néeli Josué (Jos. 1:16, 17). Echi israelitas we aʼlá pireili japalí ineli jepuná rijoi japi riká ko jawárami Jeobá jitra. Pe aminana, japalí ma niruili echi congregación cristiana, Jeobá ko néeli echi 12 apóstoles jiti animea japi nokisáré (Hech. 8:14, 15). Miná ko jawari jarecho ancianos echoná Jerusalén muchúwami. Jiti echi hermanos we nijéwami nili jepuná rijoi japi jawárami nili, echi congregaciones “sinibí rawé [...] galá bichíiga muwésali” (Hech. 16:4, 5). Jipi rawé, Jeobá ayénachó tamó iʼwiri japalí ti nijewi japi echi tamó nulé néeka echi organización. Natá chu nílima Jeobá ke ti nijéwisaká echi hermanos japi echi jáwili. Jiti ta machiboa, ma binepo japi ikili echi israelitas japalí sírili echomí buwichimi simamia echoná weʼé japi Jeobá iyama riweili.
11. ¿Piri ikili echi pagótami japi ke nijéwili echi rijoi japi Jeobá wilali jiti anema echi puéblowala japi nokimea? (Ayénachó iné echi dibujo).
11 Japalí echi israelitas sírili echomí buwichimi simíaya echoná weʼé japi Jeobá iyama riweili, jaré rijoi japi olali bilé nóchali we natéami, cha riká raʼíchili Moisés jitra alí echi nóchali japi Jeobá iyali. Echi ko anijoli: “Suwaba echi pueblo santo ju [ke Moisés bi], sinéami echi, alí Jeobá nasipa atí echi yúa” (Núm. 16:1-3). A bichíwali ju japi Jeobá jitra ko sinéami echi pueblo santo nili, nalí echi ko chapili Moisés jiti anema echi israelitas japi nokimea (Núm. 16:28). Jiti la, japalí cha riká raʼíchili Moisés jitra, ayénachó cha riká raʼíchili Jeobá jitra. Jepuná rijoi ko ke nátili japi Onorúami nakili, nalí japi aboi nakili, japi wabé omériami nima alí we machirúami. Jeobá ko suwábili jepuná rijoi alí sinéami echi israelitas japi iʼwírili echi (Núm. 16:30-35, 41, 49). Jipi rawé, Jeobá ayénachó ke galé echi pagótami japi ke riwiwi japi tamó nulé néeka echi organización.
¿Jépuká mi nalí iʼwírimili? (Iné echi párrafo 11).
12. ¿Piri jitra ati omeri bichiwia echi organización Jeobá níwala?
12 A nirú wiká namuti japi ta jitra omeri bichiwia echi organización Jeobá níwala. Japalí echi Japi Aʼlá Niseri iné japi sinúrika ku bichíwisaré jaré namuti japi aní echi Biblia o sinúrika nokisáré Jeobá nóchilia, echi ko sapú echi riká noká jiti kanílitinali Jeobá (Prov. 4:18). Ayénachó sinibí iʼwérili noká nokayá japi riká aní echi Biblia, alí sinéami japi ta nijéwami ju Jeobá, ati echi riká cho nokisáré.
13. ¿Piri ju “echi wabé Galabé Riosi Raʼíchala”, alí piri ta nokisáré?
13 “Ne galá bichiwi [...] echi wabé Galabé Riosi Raʼíchala” (2 Tim. 1:13). Nalí, ¿piri ju “echi wabé Galabé Riosi Raʼíchala”? Echi ko ju suwaba japi aní echi Biblia japi ta bichiwi (Juan 17:17). Alí echi organización Jeobá níwala tamó bineri nijewia japi aní echi Biblia. Ati echi riká nokisáaká, ati we aʼlá pirélipo.
14. ¿Chúriká jaré cristianos riweli bichiwia “echi wabé Galabé Riosi Raʼíchala”?
14 ¿Piri ikimea ati riwésaká bichiwia “echi wabé Galabé Riosi Raʼíchala”? Ma inepo japi ikili echalí bachá siglo. Jaré cristianos raʼichia járili japi ma nawali echi Jeobá rawéwala. Echi riká anijóliré jiti a keʼré niruili bilé carta japi ruyeli echi jitra alí japi echi pagótami nátili japi osali echi apóstol Pablo. Nalí kecho bijí aʼlá machisaa achi bichíwali ju japi aniri, echi cristianos Tesalónica piréami, bichíwili echi raʼíchali alí ruyeli jarecho. Ke echi riká ikimeli, a newalálaká echi namuti japi Pablo binérili japalí echi yúa asali (2 Tes. 2:1-5, TNM). Echi apóstol Pablo aneli japi ke bichíwima suwaba japi kipú. Alí jiti ke echi riká cho ikimea, echi okuá carta japi osélili jériká sunili osayá: “Nijé, Pablo, ʼyemi mi jeʼná jerigá osega ripora, nijé binói sikala jiti osogá, achigórigá mapurigá nijeni sinibí osá mapalini niwá bilé oselí. Nijeni sinibí jeʼná jerigá osá” (2 Tes. 3:17).
15. ¿Piri nokiboa jiti ke bichíwipo echi ikaléwami tákoré ju japi riká ko bichíwali ka? Ruyé bilé ejemplo. (Ayénachó iné echi fotos).
15 ¿Piri ta biné echi jitra japi Pablo osélili echi cristianos Tesalónica piréami? Ati kipúsaká bilé raʼíchali japi sinúrika aní japi riká aní echi Biblia o japi ta ke siné kipuli, aʼlá nátika nokiboa. Chabé echoná Unión Soviética, echi tamó sayérala júali bilé carta japi nili japi riká ko julárami ka echoná central mundial ka jonsa, japoná anili japi echi hermanos rojásaré alí bilecho organización niwásaré. Tákoré echi carta nili japi riká ko bichíwali ka, echi hermanos japi we aʼlá nijéwami nili, ke bichíwili. Echi ko ineli japi aniyé echoná, ke nili japi riká bineli echoná Biblia. Jipi rawé, echi tamujé sayérala isini kaachi nee echi internet alí jarecho si namuti, jiti ke machiyá nílipo chu iyiri ju echi bichíwali alí rojaa nipo. Ati aʼlá inésaká achi echi namuti japi ta kipú o japi ta leeri ju japi riká aní echi Biblia, “ketasi siné siʼwinárigá bichíibo” (2 Tes. 2:2, TNM; 1 Juan 4:1).
Kiti ékirami nii echi ikaléwami jitra japi ju japi riká ko bichíwali ka. (Iné echi párrafo 15).a
16. Japi riká aní Romanos 16:17, 18, ¿piri ta nokisáré echi pagótami yúa japi riwé echi bichíwali?
16 Napawika nipo echi yúa japi we nijéwami ju Jeobá. Onorúami ko nakí japi sinéami echi hermanos napawika echi nóchilima, alí ati bi oméripo echi riká nokayá, ati ke riwésaká echi bichíwali. Echi japi riwé echi bichíwali, noká japi echi congregación rojaa nima. Jiti la Onorúami ko tamó ané japi ta ke napawipo echi pagótami yúa jiti ke riwepo echi bichíwali (leeri Romanos 16:17, 18).
17. ¿Piri ikimea ati we aʼlá machisáaká echi bichíwali alí ti ke riwésaká?
17 Ati we aʼlá machisáaká chu iyiri ju echi bichíwali alí ti ke riwésaká, sinibí we mulipi nipo Jeobá yúa alí we bichíyami nipo (Efes. 4:15, 16). Ke ti ékirami nipo echi namuti jitra japi ke bichíwali bineri echi Satanás, alí Jeobá tamó tibuma japalí ma gran tribulación kaachi. Kiti riwé echi bichíwali “aʼlí echi Walubela Riosi” mujé yúa asimea (Filip. 4:8, 9).
CANCIÓN sjj-S 122 ¡Mantengámonos firmes, inmovibles!
a JAPI RUYÉ JAPI MACHINA ECHONÁ FOTOS: Escenificación. Chabé echoná Unión Soviética, echi hermanos nareli bilé carta japi nili japi riká ko julárami ka central mundial ka jonsa, nalí japi júali tamó sayérala. Jipi rawé, echi tamó sayérala néemiré echi internet jiti animea jaré namuti ke bichíwali echi Jeobá organizaciónwala jitra, tamó ékimia.