Bichiwi japi Jeobá sinibí omérima mi iʼwiria

1. ¿Chúriká néwariwélitili Moisés japi we bichiwie Jeobá?

ECHI oserúami Hebreos ruyé wiká pagótami jitra japi we bichíwili Jeobá. Bilé echi ko nili Moisés (Heb. 3:2-5; 11:23-25). Echi ko we bichíwili Jeobá japalí machibuli echi israelitas echoná Egipto jonsa. Ke majali echi faraón alí suwaba echi sontarsi. We bichíwili Jeobá alí iʼwírili echi israelitas jiti simárima echoná mar alí miná ko echoná desierto (Heb. 11:27-29). Wikabéala echi israelitas riweli bichiwia japi Jeobá omérima echi tibúa, nalí Moisés ko ke riweli bichiwia. Alí we aʼlá isili, jiti Jeobá iyali echi israelitas koʼwáami alí baʼwí jiti ke suwimea echoná desierto (Éx. 15:22-25; Sal. 78:23-25).a

2. ¿Chúsiá Jeobá nárili Moisés japi aní echoná Números 11:21-23?

² Ma simírisa bilé bamíali japalí machibuli echi israelitas echoná Egipto jonsa, Jeobá ko aneli japi kóʼama echi sapá jitra. Tákoré Moisés bilé rijoi we bichíyami nili, echalí ko jilí nirali natia chúriká Jeobá isima kóʼaya sapá jitra wiká millones pagótami echoná desierto. Jiti la, Onorúami ko jériká nárili: “¿Wechi Jeobá sikala we teeli ju?” (leeri Números 11:21-23). Jenaʼí echi raʼíchali “Jeobá sikala” ruyá aní echi espíritu santo Jeobá níwala, o echi binoy jiwérala japi nee isimia japi echi nakí. Jepuná ko nili japi riká ko Jeobá jéanea: “¿Wechi mi ke bichiwi japi ni a omero isiá chuwé namuti japi ni isínali?”.

3. ¿Chúsiá we natéami ju japi ta binepo japi ikili Moisés alí echi israelitas?

³ Alí mujé ru, ¿ami siné kaachi nátili achi Jeobá mi iyama alí mujé téemala si japi timí newalé? Echi riká mi nátilaká o ke, jenaʼí binelíwami binepo Moisés jitra alí echi israelitas, japi riweli bichiwia japi Jeobá omérima tibúa echi. Ayénachó inepo jaré textos japi tamó iʼwírima aminabi bichiwia japi Jeobá sinibí omérima tamó iʼwiria.

PIRI TA BINÉ MOISÉS JITRA ALÍ ECHI ISRAELITAS

4. ¿Chúsiá wiká israelitas riweli bichiwia japi Jeobá omérima echi tibúa?

⁴ ¿Chúsiá wiká israelitas riweli bichiwia japi Jeobá omérima echi tibúa? Jiti echi pueblo alí jarecho pagótami japi ke israelitas nili, ma wilí pe sírili simíaya echomí weʼé japi Jeobá iyama riweili (Éx. 12:38; Deut. 8:15). Echi japi ke israelitas nili ma ke koʼnalie echi maná, jiti la chotásili cha riká raʼichia alí wiká israelitas ayénachó echi riká nokali (Núm. 11:4-6). Echi ko we koʼnalie echi koʼwáami japi olali echomí Egipto. Alí jiti echi pueblo ma we aneli Moisés jepuná jitra, echi ko nátili japi binoy iyásaré echi israelitas echi sapá, nalí ke machili chúriká (Núm. 11:13, 14).

5, 6. Echi israelitas chotásili natia japi riká echi japi ke israelitas nili, ¿piri ta biné echi jitra?

⁵ Echi pagótami japi ke israelitas nili, ke natéami niraa ineli echi namuti japi Jeobá iyali o ke matétara nijíami nili, alí echi israelitas chotásili natia japi riká echi. Jipi rawé echi riká cho ikibóaré jiti wiká pagótami ke natéami niraa iné japi olá o ke matétara nijíami ju, echi jitra ke ti kaníliporé echi namuti jitra japi Jeobá tamó iyá. A keʼré japi ta olánilipo japi ta chabé olali o japi jarecho olá. Nalí ati wabé kaníliami nipo, ati kanílisaká echi namuti jitra japi ta olá.

⁶ Echi israelitas newalasa riweili japi Jeobá aneli japi iyama wiká namuti aʼláala japalí ma sisaa echoná weʼé japi echi iyama riweili, ke ko japalí sírisa echoná desierto. Echi riká cho, ke ti we natásaré echi namuti japi ta ke olá jipi, nalí ti natásaré echi namuti japi Jeobá tamó iyama japalí ma we baʼóachi nisa. Ayénachó we aʼlá nima japi ta natabo echi textos japi tamó iʼwiri aminabi we bichiwia Jeobá.

7. ¿Chúsiá ti omeri bichiwia japi Jeobá sinibí omeri tamó iʼwiria?

⁷ A keʼré japi ta nárika nokiboa chúsiá Onorúami nárili Moisés: “¿Wechi Jeobá sikala we teeli ju?”. A keʼré japi Jeobá iʼwírinalie Moisés aʼlá inamia japi echi jiwérala ke siné suwía alí omáana omeri seaya tákoré we miká ke. Jiti la, tákoré echi israelitas mochili nasipa echoná desierto, Jeobá ko a omérima iyayá echi sapá jiti sinéami sibárima. Alí Jeobá ko néwariwélitili japi omeri iʼwiria echi puéblowala kumi ke japoná muchuwi (Sal. 136:11, 12). Jiti la, japalí ti ikí namuti we jilírami, ati omeri bichiwia japi Jeobá tamó iʼwírima kumi ke japoná ti muchuwi (Sal. 138:6, 7).

8. ¿Piri ta nokisáré jiti ke nokiboa japi riká nokali wiká israelitas? (Ayénachó iné echi dibujo).

⁸ Jeobá ko a isili japi anili alí iyali wiká chuluwí codornices riwéami. Nalí echi israelitas ke matétara iyali Jeobá echi jitra. Echi ko nalí we korúkami nili alí bilé rawé aminá nasipa járili napabúa echi codornices japi ikí omérili. Jeobá ko we iyoli echi israelitas yúa japi néwariwélitili japi we korúkami nili alí castigo iyali (Núm. 11:31-34). ¿Piri ta biné jepuná jitra? Japi ta we aʼlá tibuka nokisáré jiti ke korúkami nílipo. Tákoré ti winomíwami ke o risóati ma, wabé natéami ko ju napabúa “namuti we natéami echoná ripá rewegachi”, alí ti echi riká nokiboa japalí ti iʼwérili noká aminabi we aʼlá Jeobá amígowala niya alí Jesús (Mat. 6:19, 20, TNM; Luc. 16:9). Ati echi riká nokisáaká, ati oméripo bichiwia japi Jeobá tamó iyama japi ta newalé.

9. ¿Piri ta we aʼlá machí?

⁹ Jipi rawé Jeobá a bijí iʼwírinali echi japi nijéwami ju. Nalí tákoré echi riká ju, isini kaachi ayena ti a newalepo winomí o koʼwáami.b We be nalí, ati we aʼlá machí japi Jeobá ko ke siné tamó riwema. Echi ko tamó iyama jiwérala jiti anachabo chuwé namuti jilírami. Jenaʼí binepo okuá namuti japoná ti omeri néwariwélitia japi ta we bichiwi japi Jeobá tamó tibuma: 1) japalí ti jilí niraa olayá winomí alí 2) japalí ti nata chúriká nokiboa olamia japi newalebo pe aminana japalí ma ochérami nisa o wiláami.

JAPALÍ TI JILÍ NIRAA OLAYÁ WINOMÍ

10. ¿Piri namuti isímiré japi jilí nirabo olayá winomí?

¹⁰ Japalí aminabi mulipi nílisimi japalí suwábitami nima echi namuti chati, a keʼré japi aminabi we jilí nima olayá winomí tibumia tamujé téemala. A keʼré japi ma ke olabo nóchali, echi namuti japi ta olá o echi kalí japoná ti piré, jiti we cha ikimea echi política jitra, echi guerras, kulíwami nayulí japi we sapú nachú o jarecho si namuti. Alí a keʼré japi ta aapo kulíwami nóchali japoná ti piré o natáboré biléana simíaya pirélisia tamujé téemala yúa, jiti echi riká olabo japi ta newalé. ¿Piri tamó iʼwírima aʼlá nátika nokayá japi néwariwéliti japi ta bichiwi Jeobá?

11. ¿Piri tamó iʼwírima ati jilí nirásaká olayá winomí? (Lucas 12:29-31).

¹¹ Bilé namuti japi tamó iʼwírima ko ju ruyea Jeobá echi namuti jilírami japi ta ikí (Prov. 16:3). Iʼwírili tánipo jiti we aʼlá nátika nokiboa, kilí nílipo alí ke we natabo echi namuti jilírami japi ta ikí (leeri Lucas 12:29-31). Ayénachó iʼwírili tánipo jiti kanílipo echi namuti jitra japi ta olá (1 Tim. 6:7, 8). Alí aapo echoná publicaciones jaré namuti japi tamó iʼwírima machiyá piri ta nokiboa japalí ti ke me olasa winomí. Wiká ko iʼwírili leeria echi artículos o inea echi videos japi uchuwi echoná jw.org japi raʼicha jepuná jitra.

12. ¿Piri nárika isísaré bilé cristiano jiti aʼlá nátika isima japi iʼwírima echi téemala?

¹² Jaré ko nareli bilé nóchali japi isili japi riwema echi téemala alí miká simama pirélisia, nalí pe aminana echi ko ineli japi ke aʼlá nili echi riká nokayá. Jiti la, kecho bijí narea bilé nóchali, ke bi natásaré chu kipu winomí mema, nalí ayénachó achi iʼwírima Jeobá amígowala niya (Luc. 14:28). Nárika isí jepuná: “¿Piri ikimea ani ke napawika asisáaká nijé kunala o upila yúa? ¿Achi ni omérima simiyá suwaba napawíliwachi, nawisasia alí napawika simiria echi hermanos yúa?”. Ami kúchuwami nísaká, ayénachó we natéami ju japi mi nárika isima jepuná: “¿Chúriká ni wéelima nijé kúchuwala ‘busuréwika japi riká aní Jeobáʼ ke ni napawika asisáaká echi yúa?” (Efes. 6:4, TNM). Japalí mi isima bilé namuti we natéami, nijewi japi Jeobá aní alí ke ko japi aní mujé téemala o amigos japi ke nijewi japi aní echi Biblia.c Tony, japi bité echoná Asia occidental, náritami nili achi nochánilia echoná biléanachó país. Nalí echi ko raʼíchili Jeobá yúa echi nóchali jitra alí echi upila yúa. Miná ko echi ko anili japi ke narema echi nóchali alí iʼwérili isili jiti ma ke me suwábima winomí. ¿Piri nata Tony echi jitra japi isili? Echi ko aní: “Ani omérili iʼwiria jaré pagótami machiyá Jeobá alí ayénachó ni iʼwírili nijé kúchuwala jiti we galema Jeobá. Ati bineki japi ta nokisáaká japi riká aní Mateo 6:33, Jeobá ko tamó tibuma”.

JAPALÍ TI NATA CHÚRIKÁ OLABO JAPI TA NEWALEBO MA OCHÉRAMI NISA

13. ¿Piri ta omeri nokayá jipi jiti ta olabo japi ta newalebo japalí ti ma ochérami nisa o wiláami?

¹³ Ata néwariwélitipo japi ta bichiwi Jeobá japalí ti nata chúriká nokiboa olamia japi ta newalebo japalí ti ma ochérami nisa o wiláami. Echi Biblia tamó ané japi ta iʼwérili nokisáré nochia jiti pe aminana olabo japi ta newalé (Prov. 6:6-11). Ati omériaká, we aʼlá nima japi ta napabupo winomí jiti ta olabo pe aminana. Nalí tákoré echi winomí we natéami ju, ke ti nakí japi wabé rasíruka natéami nima olánalia winomí (Ecl. 7:12).

14. ¿Chúriká tamó iʼwiri Hebreos 13:5 japalí ti nata chúriká olabo japi ta newalebo japalí ti ma ochérami nisa o wiláami?

¹⁴ Jesús ko anili bilé historia ruyemia japi ke me natéami ju japi bilé iʼwérili isima muwewia winomí, echi ke nijéwisaká Onorúami (Luc. 12:16-21). Tamujé ko ke machí japi ikimea baʼalínala rawé (Prov. 23:4, 5; Sant. 4:13-15). Ayénachó Jesús anili japi sinéami japi echi discípulowala nínali, riwénalisaré echi namuti japi olá (Luc. 14:33, nota). Echalí bachá siglo, echi cristianos Judea piréami echi riká nokali alí we kanílika (Heb. 10:34). Jipi rawé wiká hermanos ma ke olá nóchali o echi namuti japi olali, jiti ke iʼwiri japi política ju (Apoc. 13:16, 17). Echi ko néwariwéliti japi bichiwi japi aní Jeobá: “Sinibí Nijé nimí tibútama. Nijeni tarapé siné mi wana biʼneli ariwema” (leeri Hebreos 13:5). Ati iʼwérili noká nátika nokayá japi chúriká olabo pe aminana japi ta newalebo japalí ti ma ochérami nisa o wiláami, alí ti bichiwi japi Jeobá tamó tibuma a ikisáaká bilé namuti japi ta ke mayeli japi ikimea.

15. Echi wénwala japi cristianos ju, ¿piri ke natásaré echi kúchuwala jitra? (Ayénachó iné echi fotos).

¹⁵ Jaréanamí echi pagótami olá kúchuwala jiti mayé japi echi tibuma ma ochérami nisa o wiláami. Nalí be, echi Biblia aní japi echi wénwala nalí iyásaré echi kúchuwala japi newalé (2 Cor. 12:14). A bichíwali ju japi echi wénwala ma ochérami nisa, a keʼré newalema japi echi kúchuwala iʼwírima winomí jitra o sinúrika niraa, alí wiká kúchuwala echi riká noká ne sulachí jonsa (1 Tim. 5:4). We be nalí, echi wénwala japi cristianos ju, we kanílisaré iʼwiria echi kúchuwala jiti nóchilima Jeobá alí ke ko jiti echi tibuma nijika winomí (3 Juan 4).

16. ¿Chúriká omeri echi wénwala iʼwiria aboi kúchuwala jiti machimea chúriká olama pe aminana japi newalé? (Efesios 4:28).

¹⁶ Wénwala, iʼwírisi emi kúchuwala jiti machimea chúriká nokimea pe aminana olamia japi newalé alí jiti bichíwima Jeobá, nalí binérisi echi namuti jitra japi timí noká. Kuuchi ka jonsa binérisi japi we natéami ju we nóchami niya (Prov. 29:21; leeri Efesios 4:28). Japalí emi kúchuwala aminabi ochérisimi, iʼwírisi jiti we jiwérika nokimea binea echoná escuela. Aasi echoná publicaciones jaré busuréliami japi iʼwírima emi kúchuwala aʼlá nátika nokayá echi jitra japi binema. Japi timí nokisáré ko ju, iʼwiria emi kúchuwala jiti olama bilé nóchali japi echi iʼwírima olayá japi newalé alí a ikírima nawesia o precursores niya.

17. ¿Piri ta we aʼlá bichiwi?

¹⁷ Echi japi nijéwami ju Jeobá, we aʼlá bichiwi japi echi ko nakí alí omeri iyayá japi newalé. Japalí aminabi mulipi nílisimi japalí suwábitami nima echi namuti chati, ati aminabi néwariwélitisaré achi ta ne bichíyami ju Jeobá. Nalí tákoré ikiyé chuwé namuti jilírami, ati sinibí we bichíwipo japi Jeobá néema echi jiwérala jiti tamó iyama japi ta newalé. Ati we aʼlá bichiwi japi Jeobá sinibí tamó iʼwírima kumi ke japoná ti muchuwi.