BINELÍWAMI 15
CANCIÓN sjj-S 30 Mi amigo, mi Padre, mi Dios
Muliwia Jeobá we aʼlá ju tamujé jitra
“Muliwia Jeobá we aʼlá ju tamí jitra” (SAL. 73:28).
JAPI TA JITRA BINEPO
Piri ta nokisáré jiti aminabi mulíwipo Jeobá alí piri namuti aʼláala narepo echi riká ti nokisáaká.
1, 2. a) ¿Piri ta nokisáré jiti olabo bilé we aʼlá amigo? b) ¿Piri ta binepo jenaʼí binelíwami?
NATÁ bilé we aʼlá amigo jitra japi mi olá. ¿Piri mi isili jiti mi we aʼlá amigo nima echi yúa? A keʼré japi mi wilí simírili echi yúa, ami machili chúriká biteili alí mi machili piri namuti galé alí piri ko ke. Ayénachó mi ineli japi we simá isíami ju alí mi echi riká cho nínali. Alí miná ko mujé ko ma we galeli echi.
2 Ke ti sapú we aʼlá amigo ju bilé yúa, ati newalé japi ta iʼwérili nokiboa. Alí echi riká cho ju amigos niya Jeobá yúa. Jenaʼí binelíwami binepo chúriká ti nokiboa jiti aminabi we mulíwipo Jeobá, echi japi wabé aʼlá amigo ju. Nalí bachá binepo chúsiá we aʼlá ju echi riká nokayá.
3. ¿Chúsiá ti natásaré echi namuti aʼláala japi ikimea ati mulíwisaká Jeobá?
3 We natéami ju japi ta natabo suwaba echi namuti japi ta jitra mulíwisaré Jeobá (Sal. 63:6-8). ¿Chúsiá? Natabo jepuná namuti japi tamó iʼwírima aʼlá inamia. Sinéami pagótami machí japi aʼlá koʼyá, bajía baʼwí, niwayá ejercicio alí isabia we tamó iʼwiri jiti ke me nayupo. We be nalí, wiká pagótami ke noká echi namuti. Nalí bilé a echi riká isima sinibí natásaká echi aʼláala namuti japi ikimea a echi riká isísaká. Echi riká cho, ati machí japi muliwia Jeobá we aʼlá ju tamujé jitra. Nalí natia echi aʼláala namuti japi ikimea a echi riká ti nokisáaká, tamó iʼwírima jiti aminabi mulíwinalipo Jeobá (Sal. 119:27-30).
4. ¿Piri anili echi salmista echoná Salmo 73:28?
4 (Leeri Salmo 73:28). Echi japi osali echi Salmo 73 ko nili bilé levita alí siméami echoná templo. A keʼré japi ma wiká bamíali olali nóchilia Jeobá, nalí echi ko machili japi we natéami ju sinibí natia japi we aʼlá ju echi jitra muliwia Jeobá. Alí nakiyé japi jarecho machimea japi we aʼlá ju Jeobá amígowala niya. Ma inepo jaré echi namuti aʼláala.
MULIWIA JEOBÁ YÚA WE TAMÓ KANÍLITI
5. a) ¿Chúsiá we tamó kaníliti muliwia Jeobá? b) ¿Chúriká mi iʼwiri alí mi tibú echi busuréliami japi Jeobá mi iyá echi Biblia jitra? (Proverbios 2:6-16).
5 Aminabi we kaníliami nipo ata aminabi mulíwisaká Jeobá (Sal. 65:4). ¿Chúsiá? A nirú wiká namuti. Japi riká, japalí ta nijewi japi echi tamó ané echoná Biblia, we ti aʼlá piré. Ayénachó echi busuréliami japi aní echoná Biblia, tamó iʼwiri jiti ke napawipo echi cha nokáami yúa alí jiti ke nokiboa echi namuti japi we chati ju (leeri Proverbios 2:6-16). Jiti la echi Biblia aní: “We kaníliami ju echi rijoi japi machíami ju alí echi rijoi japi aʼlá nátika isíami ju” (Prov. 3:13).
6. ¿Chúsiá echi salmista omona nílili?
6 Nalí jepuná ko ke ruyá aní japi echi Jeobá amígowala ke siné omona nílima. Echi japi osali echi Salmo 73 omona nílili japalí nátili echi namuti japi echi ke aʼlá niraa ineli. We nátili japi echi pagótami japi ke nijewi Jeobá we aʼlá piré, alí ayénachó echi riká bitélinali. Echi ko mayeli japi echi pagótami nakóami we winomíwami nili, ke nayúami nili alí ke siné risoa riká piré; nalí jepuná ko ke bichíwali ju (Sal. 73:3-7, 12). Echi salmista chotásili natia achi natéami ju suwaba echi namuti japi isié Jeobá jitra. Jiti la echi ko we omónika anili japi ke natéami nili isiá echi namuti japi aʼlá ju (Sal. 73:13).
7. ¿Piri tamó iʼwírima jiti ku kanílipo japalí ti we omona nílisa? (Ayénachó iné echi dibujo).
7 ¿Alí piri isili echi salmista jiti ku kanílima? Echi ko bakili echoná templo, alí echoná Jeobá iʼwírili jiti aʼlá ku natama (Sal. 73:17-19). Jeobá ko we aʼlá amigo ju alí echi ko we aʼlá machí japalí ti omona nili. Ati tánisaká japi tamó iʼwírima alí ti riwésaká japi tamó iʼwírima echi Biblia jitra alí echi congregación, ati ku jiweria nílipo japalí ti omona nílisa. Ayénachó japalí ti ikisaa namuti we jilírami, Jeobá tamó iʼwírima jiti ku kilí nílipo (Sal. 94:19).a
Echi levita japi osali echi Salmo 73 wilí echoná templo Jeobá níwala. (Iné echi párrafo 7).
MULIWIA JEOBÁ TAMÓ IʼWIRI KANILIA JIPI ALÍ PE AMINANA
8. ¿Chu iyiri ju jarecho okuá namuti japi riká tamó iʼwiri muliwia Jeobá?
8 ¿Chu iyiri ju jarecho okuá namuti japi riká tamó iʼwiri muliwia Jeobá? Bachá, we ti kanílika piré jipi. Alí okuá, ati buwea piré japi pe aminana sinibí we kanílika pirélipo (Jer. 29:11). Ma binepo ibili niraa jepuná jitra.
9. ¿Chúsiá muliwia Jeobá tamó iʼwiri we kanílika pirea jipi?
9 Muliwia Jeobá yúa tamó iʼwiri jiti we kanílika pirélipo jipi. Wikabé pagótami jipi rawé aní japi echi Onorúami ke bité. Jiti la jaré ke tasi machí chúsiá piré alí nata japi pe aminana sinéami pagótami kárika suwimea. Nalí be, jiti tamujé ko ma bineli japi aní echi Onorúami Raʼicháala, ati we bichiwi japi Onorúami a bité alí japi sinibí iʼwiri echi japi a nijéwami ju (Heb. 11:6). Tamujé Onolá Jeobá tamó niwali jiti ta inílipo echi nijéwinalia. Jiti la japalí ta echi nijewi, tamujé ko we kaníliami ju (Deut. 10:12, 13).
10. ¿Chúriká pirélima pe aminana echi japi bichiwi Jeobá? (Salmo 37:29).
10 Wiká pagótami ke buwea piré echi aʼláala namuti japi ikimea pe aminana. Echi ko nochia bi piré, olayá kúchuwala alí napabúa winomí japi newalema japalí ma ochérami nisa. Echi ko ke nata Onorúami jitra. Nalí japi ta nijéwami ju Jeobá, ata we bichiwi echi (Sal. 25:3-5; 1 Tim. 6:17, TNM). Ata bichiwi japi tamujé amígowala Jeobá, a isima suwaba namuti japi riká ma anili ne chokichí jonsa. Ata buwea piré japi pe aminana ikimea wiká namuti aʼláala, alí bilé echi ko ju japi ta oméripo sinibí nijewia Jeobá echoná Wichimóbachi we baʼóachi (leeri Salmo 37:29).
11. ¿Chúriká tamó iʼwiri muliwia Onorúami, alí chu inili echi japalí ti echi riká noká?
11 Nirú jarecho wiká namuti japi ta jitra aʼlá machí japi muliwia Jeobá we aʼlá ju. Japi riká, Jeobá ko aní japi tamó ku wikáwima echi chati namuti japi ta nokali, ati ne bichíwali omona nílisaká echi jitra (Is. 1:18). Jepuná ko ruyá aní japi ta ma ke omona pirélipo echi chati namuti jitra japi ta nokali chabé (Sal. 32:1-5). Ayénachó ata kaníliti Jeobá alí machiyá jepuná we tamó kaníliti (Prov. 23:15). A keʼré japi mi nareli jarecho wiká namuti aʼláala jiti mi Jeobá amígowala ju. Nalí, ¿piri ta omeri nokayá jiti aminabi we mulíwipo Jeobá?
PIRI TA NOKISÁRÉ JITI AMINABI WE MULÍWIPO JEOBÁ
12. ¿Piri ta nokisáré jiti aminabi we mulíwipo Jeobá?
12 Kecho pakomia japi riká testigo Jeobá, mujé ko isili wiká namuti jiti mi Onorúami amígowala nima. Japi riká, ami bineli wiká namuti Jeobá jitra alí Jesucristo, ami riweli isiá echi chati namuti, ami néwariwélitili japi mi bichí Onorúami alí mi iʼwérili isili nijewia suwaba japi echi nulá. Nalí ke ti riwésaré echi riká nokayá jiti aminabi we mulíwipo Jeobá yúa (Col. 2:6, TNM).
13. ¿Chu iyiri ju bikiá namuti japi ta nokisáré jiti aminabi we mulíwipo Jeobá?
13 ¿Piri tamó iʼwírima jiti aminabi we mulíwipo Jeobá? 1) Ati ke riwésaré leeria alí binea echi Biblia. Nalí ke ti bi leérisaré jiti ta machiboa wiká namuti. Tamujé ko nalí iʼwérili nokisáré machiyá piri ju japi Onorúami nakí tamujé jitra alí ti nijéwisaré japi riká ti biné echoná Biblia (Efes. 5:15-17, TNM). 2) Ata aminabi we bichíwisaré Jeobá natia suwaba echi namuti japi néwariwéliti japi we tamó galé. 3) Ata aminabi kichísaré echi namuti japi Jeobá kichí alí ke amigos nísaré echi pagótami yúa japi noká echi chati namuti (Sal. 1:1; 101:3).
14. ¿Piri ta omeri nokayá sinibí rawé jiti kanílitipo Jeobá? (1 Corintios 10:31; ayénachó iné echi imágenes).
14 (Leeri 1 Corintios 10:31). We natéami ju japi ta iʼwérili nokiboa nokayá echi namuti japi ta machí japi kanílitima Jeobá. Alí ke bi ju nawesia alí simíaya napawíliwachi. Nísaré suwaba namuti japi ta noká sinibí rawé. Japi riká, ati machí japi Jeobá ko we kanili japalí ta wachíniga niraa noká suwaba namuti alí ta iyá jarecho japi ta olá (2 Cor. 8:21; 9:7). Jeobá ayénachó nakí japi néwariwélitipo japi ta we natéami niraa iné japi echi tamó iwítili. Jiti la aminabi mulíwipo echi, japalí ti ke waʼlú bají, ke waʼlú koʼá alí ti iʼwérili noká jiti aboi aʼlá tibupo alí ke me nayupo. Japalí ta sinibí iʼwérili noká kanílitia Jeobá echi namuti jitra japi we natéami ju alí echi namuti japi ta mayé japi ke me natéami ju, ata noká japi echi ko wabé tamó galema (Luc. 16:10).
Aʼlá tibuka melia echi carro, niwayá ejercicio jiti ke me nayupo, koʼyá echi koʼwáami japi we tamó iʼwírima alí iyayá jarecho japi ta olá, echi ju jaré namuti japi tamó iʼwiri aminabi muliwia Jeobá. (Iné echi párrafo 14).
15. ¿Chúriká nakí Jeobá japi ta nokiboa jarecho yúa?
15 Jeobá ko we simá isíami ju sinéami echi pagótami yúa, japi aʼláala ju alí echi japi chati ju (Mat. 5:45). Alí nakí japi tamujé echi riká cho nokiboa jarecho yúa. Japi riká, echi ko nakí japi echi japi nijéwami ju ke cha riká raʼichama jarecho jitra, ke naʼáwiami nima alí kilí nokáami nima sinéami yúa (Tito 3:2). Jiti la, ke ti wabé natéami ka nili jarecho yúa japi ke bichíyami ju Jeobá japi riká tamujé (2 Tim. 2:23-25). Ati sinibí simá nokáami nísaká jarecho yúa, jepuná tamó iʼwírima jiti aminabi we mulíwipo Jeobá yúa.
AYÉNACHÓ TI OMERI MULIWIA JEOBÁ JAPALÍ TI SIWEA NILI
16. ¿Chu inílili echi japi osali echi Salmo 73 siné kaachi?
16 Isini kaachi a keʼré japi mi natama japi Jeobá ma ke mulipi mi yúa atí, jiti mi chabé ke aʼlá namuti isili. Nalí newalá japi echi riká cho nátili echi japi osali echi Salmo 73. Echi ko we omónika jériká anili: “Nijé ronola ko ma sojí chakena simili, alí ni ne sojí sitali” (Sal. 73:2). Echi ko anili japi we siwea nílili alí japi Jeobá jitra echi ko nili japi riká bilé namuti jákami ke aʼlá nátami (Sal. 73:21, 22). Nalí, ¿achi nátiliré japi echi chati namuti jitra japi isili, Jeobá ma ke wikáwima alí ma ke galema echi?
17. a) ¿Piri isili echi salmista japalí siwea nílili? b) ¿Piri ta biné echi jitra japi ikili? (Ayénachó iné echi fotos).
17 A keʼré japi echi salmista nátili japi Jeobá riweli echi, nalí ke wilí echi inilia ripili. Echi ko machili japi checho ku mulíwisaré Jeobá yúa. ¿Chúriká ti machí? Jiti echi binoy jériká aneli Jeobá: “Nalí jipi ko ni sinibí mi yúa atí; mujé ko tamí watoná sikala chapiká atí. Ami tamí iʼwiri mujé níwala busuréliami jitra, alí miná ko mi tamí tomea japoná ni walubéala nima” (Sal. 73:23, 24). Japalí ti omona o siwea nili, tamujé ayénachó newalé aminabi we muliwia Jeobá yúa, jiti echi riká ku kanílipo (Sal. 73:26; 94:18). Alí siné kaachi ati nokisáaká echi namuti japi we chati ju, ¿piri ti nokiboa? Ati omeri checho ku muliwia Jeobá yúa jiti ta machí japi echi ko tamó ku wikawi (Sal. 86:5). Japalí ti we siwea nili o we omona nili, wabé natéami ju japi ta aminabi we mulíwipo Onorúami yúa (Sal. 103:13, 14).
Japalí ti siwea nili, ati aminabi mulíwisaré Jeobá raʼíchika echi yúa alí sinibí simíaya echoná napawíliwachi. (Iné echi párrafo 17).
AMINABI WE MULÍWIPO ONORÚAMI NE SINIBÍ
18. ¿Chúsiá ti oméripo aminabi muliwia Jeobá ne sinibí?
18 Ati oméripo sinibí muliwia Jeobá alí ke ti siné riwepo machiyá wiká kulíwami namuti echi jitra. Echoná Biblia aní japi Jeobá “ne suwaba namuti machíami ju, ne wabé simírami ʼnátami ayénachó” (Rom. 11:33). Jiti la ti ke siné riwepo machiyá Jeobá.
19. Japi riká aní jepuná Salmos, ¿piri ta omeri bichiwia?
19 Echoná Salmo 79:13 jéaní: “Tamujé japi kimi puéblowala ju alí kimi níwala boʼwá, ata sinibí mi waʼlú matétara anepo alí ti mi walubéala anepo sinéami tamujé alí tamó kúchuwala si”. Bichiwi jepuná: ami aminabi mulíwisaká Jeobá, mujé ko narema wiká namuti aʼláala ne sinibí alí mi omérima jéaniyá: “Onorúami ju echi rité nijé níwala sulala alí echi namuti japi nijé níwala ju ne sinibí” (Sal. 73:26).
CANCIÓN sjj 32 ¡Jeobá bi nijewi!
a Jaré pagótami japi ma chabé jonsa we omona nili, a keʼré newalé japi iʼwíritami nima echi doctor jitra o jarecho si. Jiti mi che machimea, leeri echi oselí La Atalaya número 1 bamíali 2023.