Piri ju Jesús jitra echi Jeobá riwalá

1, 2. a) ¿Piri namuti isili Jesús echalí rokojó japalí kecho miʼlirúami nili? b) ¿Piri ta binepo jenaʼí binelíwami?

JUEVES rokojó 14 inárachi nisán bamíali 33, Jesús ko koʼali echi apóstoles nijéwami yúa. Echi ko machiyé japi ma mulipi Judas ke aʼlá isima echi yúa, japi risoa olárami nima alí miná ko miʼlirúami nima echi sayérala jitra. Jiti la ma sunisa koʼyá, echi ko anili wiká namuti japi iʼwérili iyali echi apóstoles. Japalí ma séali japalí sinéami ku simasa riweili, Jesús ko raʼíchili Jeobá yúa namuti we natéami jitra. Echi apóstol Juan osaká riweli jepuná echoná Juan capítulo 17.

² Jenaʼí binelíwami binepo echi namuti jitra japi anili Jesús japalí raʼíchili Jeobá yúa: ¿piri namuti we nátili kecho bijí mukuyá alí piri namuti wabé natéami nili echi jitra japalí biteili jenaʼí Wichimóbachi?

“NIJÉ KO MACHÍRITILI MUJÉ RIWALÁ”

3. ¿Piri ruyá anili Jesús japalí anili japi machíritili echi Onorúami riwalá? (Juan 17:6, 26).

³ Japalí raʼíchili binoy Onolá yúa, Jesús ko jéaneli: “Nijé ko machíritili mujé riwalá”. Ati machí japi jepuná we natéami nili echi jitra, jiti osá niraa echi riká anili (leeri Juan 17:6, 26, TNM). ¿Achi jepuná ruyá anili japi binérili echi discípulos japi echi Onorúami riwalá Jeobá ju? Ke tasi. Echi ko ma we aʼlá machiyé jepuná, jiti judíos nili alí echi Onorúami riwalá ne sojí siete mil niraa oserúami nili echoná Oserúami Hebreas. Japalí anili japi echi ko machíritili echi Onorúami riwalá, Jesús ko ruyá anili japi iʼwírili echi discípulos we aʼlá machiyá Jeobá, japi riká echi namuti japi isili, japi isima pe aminana alí japi chu isíami ju. Jesús ju japi wabé aʼlá machí Jeobá, jiti la omérili bineria wiká namuti echi jitra.

4, 5. a) Néeka bilé ejemplo ruyé chúriká bilé pagótami riwalá wabé natéami ju bilé jitra. b) ¿Chúriká echi Jeobá riwalá wabé natéami nílili echi discípulos jitra?

⁴ Natá jepuná ejemplo, japi echoná congregación japoná mi simí nirú bilé anciano David riwéami japi doctor ju. A keʼré japi mi ma chabé jonsa machí echi hermano. Nalí natá japi siné kaachi mujé ko cha ikili alí mi torúami nili echomí hospital japoná nocha echi hermano alí echi ko mi iʼwiri jiti mi ke mukumea. ¿Kechi ko jipi ko wabé mi galema echi? Alí a keʼré japalí mi sinibí kipú echi riwalá, ami newalá japi isili mi jitra. Jipi ko David ma ke bi ju bilé anciano mi jitra, nalí ayénachó bilé doctor japi mi iʼwírili jiti mi ke mukumea. Jepuná aniwáami ju japi jipi ko echi riwalá we natéami ju mi jitra.

⁵ Echi riká cho, tákoré echi discípulos ma machiyé echi Onorúami riwalá, echi ko wabé aʼlá machili chúriká ju echi. Jiti la echi Onorúami riwalá wabé natéami nílili echi jitra. ¿Chúsiá? Jiti Jesús nawésili echi Onolá jitra. Echi ko néwariwélitili japi chúriká ju echi Onolá suwaba echi namuti jitra japi isili alí japi anili. Japalí echi discípulos ineli chúriká binérili Jesús alí chu isíami nili echi pagótami yúa, wabé aʼlá machili chúriká ju Jeobá (Juan 14:9; 17:3).

“MUJÉ BINOY RIWALÁ JITRA, ECHI JAPI MI TAMÍ IYALI”

6. ¿Chúsiá Jesús anili japi Jeobá echi iyali binoy riwalá? (Juan 17:11, 12).

⁶ Japalí Jesús raʼíchili echi Onolá yúa, echi ko tánili echi discípulos jitra: “Tibú echi mujé binoy riwalá jitra, echi japi mi tamí iyali” (leeri Juan 17:11, 12, TNM). ¿Achi aniwáami nili jepuná japi Jesús ayénachó Jeobá riwéami nima? Ke tasi. Jiti echoná versículo ayénachó aní: “Mujé binoy riwalá jitra”. Jiti la Jesús ko ke riwéami nima riweili Jeobá. Nalí be, ¿chúsiá Jesús anili japi Jeobá echi iyali binoy riwalá? Jiti Jesús ko nili echi japi Jeobá júali alí raʼíchili echi jitra. Alí echi riwalá jitra echi ko omérili isiá wiká namuti (Juan 5:43; 10:25). Ayénachó, echi Jesús riwalá aniwáami ju “Jeobá niyúbiami ju”. Echi jitra ata iné japi echoná chukú echi Jeobá riwalá.

7. ¿Chúsiá Jesús omérili raʼichia Jeobá jitra? Aní bilé ejemplo.

⁷ Jiti aminabi aʼlá inámipo chúsiá Jesús omérili raʼichia Jeobá jitra, natabo jepuná ejemplo. Bilé silíami omeri júulia bilecho pagótami jiti raʼichama echi jitra. Jiti la echi namuti japi raʼicha echi pagótami, wabé natéami ju japi riká ko anila echi silíami. Echi riká cho, japi anili Jesús wabé natéami nili jiti julárami nili Jeobá jitra (Mat. 21:9; Luc. 13:35, TNM).

8. ¿Chúsiá Jeobá anili japi Jesús tóoli echi riwalá kecho nawayá jenaʼí Wichimóbachi? (Éxodo 23:20, 21).

⁸ Echi Biblia aní japi Jesús ju “echi Raʼíchali” jiti Jeobá néeli anemia echi ángeles alí echi pagótami japi echi nakili japi machimea alí japi nokisaa riweili (Juan 1:1-3, TNM). A keʼré Jesús nili echi ángel japi Jeobá júali jiti iʼwírima alí tibuma echi israelitas japalí sírili echomí desierto. ¿Chúsiá echi israelitas nijéwisa riweili echi ángel? Jeobá binoy jériká anili: “Echi ko too nijé riwalá” (leeri Éxodo 23:20, 21).a ¿Piri ruyá anili japalí anili japi Jesús too echi Jeobá riwalá? Japi Jesús raʼíchili echi jitra alí japi echi omeri néwariwélitia japi Jeobá we aʼlá isíami ju alí japi santo ju.

“KINI ONÓ, WALUBÉRAGA MUJÉ RIWALÁ”

9. ¿Chúriká ti machí japi we natéami nili Jesús jitra echi Jeobá riwalá?

⁹ Japi riká ti ma ineli, kecho nawayá jenaʼí Wichimóbachi, Jesús ko we natéami niraa ineli echi Jeobá riwalá. Alí japalí iyénili jenaʼí Wichimóbachi, echi ko néwariwélitili suwaba echi namuti jitra japi isili, japi a bijí we natéami niraa ineli echi Jeobá riwalá. Ma sojí sunía nawesia, Jesús ko jéaneli Jeobá: “Kini Onó, walubéraga mujé riwalá”. Miná ko Jeobá echoná ripá rewegachi jonsa, we jiwérami raʼíchika jéanili: “Ani walubérali alí ni checho ku walubérama” (Juan 12:28, TNM).

10, 11. a) ¿Chúriká walubérali Jesús echi Jeobá riwalá? (Ayénachó iné echi dibujo). b) ¿Chúsiá Jesús néwariwélitisa riweili japi Jeobá suwaba namuti aʼlá isili alí japi ma ke cha riká raʼichárami nísaré echi Jeobá riwalá jitra?

¹⁰ Jesús ko ayénachó walubérali echi Onolá riwalá. ¿Chúriká isili? Echi ko ruyeli echi pagótami chu isíami ju Jeobá alí suwaba echi namuti japi isimí jarecho jitra. Nalí ke echi namuti bi isili walubéala anemia echi Jeobá riwalá. Echi ko néwariwélitisa riweili japi Jeobá suwaba namuti aʼlá isili alí japi ma ke cha riká raʼichárami nísaré echi Jeobá riwalá jitra. Alí néwariwélitili japi we natéami ju jepuná, japalí binérili echi discípulos chúriká raʼichásaré Onorúami yúa. Echi ko jéanili: “Tamujé Onolá japi mi ripá rewegachi atí, kiti riwé japi echi pagótami cha riká raʼichama mujé riwalá jitra” (Mat. 6:9, TNM).

¹¹ ¿Chúsiá Jesús néwariwélitisa riweili japi Jeobá suwaba namuti aʼlá isili alí japi ma ke cha riká raʼichárami nísaré echi Jeobá riwalá jitra? Jiti echoná weʼé we baʼóachi Edén riwéami, Satanás anili japi Jeobá ikaléami ju alí japi ke iyá bilé namuti aʼláala Adán alí Eva (Gén. 3:1-5). Alí japi anili, ayénchó nili japi riká ko aniyá japi riká isimí Jeobá echi namuti ke aʼlá ju. Echi riká aniká, echi ko sayérili echi Jeobá riwalá. Miná ko, japalí Job biteili, Satanás ko anili japi echi pagótami nijewi Jeobá jiti echi ko iyá namuti aʼláala. Alí anili japi ke bilé pagótami nijéwami nima Jeobá, ikisáaká namuti we jilírami (Job 1:9-11; 2:4). Jiti la buwesa riweili jiti sinéami machimea jépuká ne bichíwali aní: Jeobá o Satanás.

“NIJENI ARIWEMA MAPURIGÁ [...] TAMÍ MIʼLIMEA”

12. ¿Piri isili Jesús jiti we galeli Jeobá alí echi riwalá?

¹² Jesús ko we galeli binoy Onolá, jiti la iʼwérili isili jiti ke cha riká raʼichárami nima echi riwalá jitra. Jiti la jéanili: “Nijeni ariwema mapurigá [...] tamí miʼlimea” (Juan 10:17, 18). Jesús ko riweli japi miʼlirúami nima echi Jeobá riwalá jitra.b Adán alí Eva, echi bacháwala rijoi alí mukí japi sébali aʼlá nokáami nili, ke nijéwili Jeobá nalí nijéwili Satanás. We be nalí, Jesús nawali jenaʼí Wichimóbachi alí néwariwélitili japi we nijéwami nili Jeobá, suwaba echi namuti jitra japi isili alí anili (Heb. 4:15; 5:7-10). Alí ke riweli nijewia Jeobá japalí chéami mukuli echoná tonchi (Heb. 12:2, TNM). Echi riká néwariwélitili japi we galeli Jeobá alí echi riwalá.

13. ¿Chúsiá Jesús bi nili japi omérili néwariwélitia japi Satanás nalí ikaléami ju? (Ayénachó iné echi dibujo).

¹³ Suwaba echi namuti jitra japi isili Jesús japalí biteili jenaʼí Wichimóbachi, néwariwélitili japi Satanás nalí ikaléami ju, alí Jeobá ko ke (Juan 8:44). Ke nirú bilecho japi wabé aʼlá machí Jeobá japi riká Jesús. Bilé echi namuti japi Satanás anili Jeobá jitra a bichíwali nílaká, Jesús ayena machimeli. Nalí echi ko sinibí iʼwérili isili jiti ke cha riká raʼichárami nima Jeobá riwalá jitra. Alí tákoré Jeobá ma ke echi iʼwírili, Jesús ko ke omonáritinali Jeobá alí sinibí nijéwami nínali japalí chéami mukú (Mat. 27:46).c

“SUWABA GALÁ NIJÉWAGA OLALI MAPU IKÍ MUJEMI TAMÍ NULELI”

14. ¿Piri namuti aʼláala iyali Jeobá echi Jesús jiti nijéwami nili?

¹⁴ Japalí raʼíchili Onorúami yúa echalí rokojó kecho bijí mukuyá, Jesús ko jéaneli Jeobá: “Suwaba galá nijéwaga olali mapu ikí Mujemi tamí nuleli”. Echi ko we bichíwili japi Jeobá iyama namuti aʼláala jiti nijéwami nili (Juan 17:4, 5). Alí a bichíwali nili. Jeobá ko ke riweli japi Jesús mukuká ripima (Hech. 2:23, 24, TNM). Jeobá ko wilásili Jesús alí wilali japi riká walúala echoná ripá rewegachi (Filip. 2:8, 9, TNM). Miná ko, Jesús ko chotásili nulayá echoná Onorúami Gobiérnowala. ¿Alí piri isima riweili echi Gobierno? Jesús ko ruyeli jepuná japalí jéanili: “Wilá mujé Gobiérnowala jiti nulama jenaʼí. Isí japi mi binoy nakí jenaʼí wichimóbachi, japi riká mi isimí ripá rewegachi” (Mat. 6:10, TNM).

15. ¿Piri si namuti isima Jesús?

¹⁵ Ma mulipi, Jesús ko nikoma echi yúa japi Onorúami sayeri alí suwábima echi cha nokáami echoná Armagedón (Apoc. 16:14, 16; 19:11-16). Miná ko, erka achama Satanás echoná japi ju japi riká bilé waʼlú jochi alí echi ko ke bilé namuti omérima isiá (Apoc. 20:1-3). Pe aminana, Jesús chotásima nulayá echi mili bamíali alí echalí echi ko isima japi kilí pirélipo alí japi echi pagótami sébali aʼlá ku nokáami nima. Ku jawásima echi suwíami alí isima japi omáana jenaʼí Wichimóbachi we baʼóami nima. ¡Ne suwaba ikimea echi namuti japi Jeobá nakili! (Apoc. 21:1-4).

16. ¿Chúriká pirélipo ma simírisa echi mili bamíali japalí Jesús nulasa?

¹⁶ ¿Chúriká pirélipo ma simírisa echi mili bamíali japalí Jesús nulasa? Ma ti ke chati namuti nokiboa alí ti ma sébali aʼlá nokáami nipo. Echi pagótami ma ke newalema wikáwili tania Jeobá, jiti la ke cho newalema japi echi 144,000 japi sacerdotes ju alí Jesús echi Sumo Sacerdote, echi iʼwírima jiti Jeobá amígowala nima. Ayénachó ma ke wesi pagótami suwimea. Echi suwíami checho ku jawásitami nima. Alí sinéami japi jenaʼí Wichimóbachi pirélima, sébali aʼlá nokáami nima (1 Cor. 15:25, 26).

17, 18. a) ¿Piri si ikimea ma sunisa echi mili bamíali japalí Jesús nulasa? b) ¿Piri isima Jesús japalí ma sunisa nulayá? (1 Corintios 15:24, 28; ayénachó iné echi dibujo).

¹⁷ ¿Piri si ikimea ma sunisa echi mili bamíali japalí Jesús nulasa? Bilé namuti we natéami: sinéami aʼlá machimea japi Jeobá we aʼlá machí nulayá alí wachíniga isíami ju. Echoná weʼé we baʼóachi Edén riwéami, Satanás ko anili japi Jeobá we ikaléami ju, ke aʼlá nuláami alí japi ke galé echi pagótami. Echalí jonsa, echi japi Jeobá nijéwami ju, néwariwéliti japi ke bichíwali ju japi aniri Jeobá jitra. Nalí ma sunisa echi mili bamíali, sinéami ma kárika machimea japi Jeobá we aʼlá nuláami ju. Jeobá ko néwariwélitima japi ne bichíwali tamó galé.

¹⁸ Sinéami machimea japi echi namuti japi Satanás anili Jeobá jitra, ke bichíwali nili. ¿Alí piri isima Jesús japalí ma sunisa nulayá? Echi ko ke nima japi riká Satanás alí ke sayérima Jeobá (leeri 1 Corintios 15:24, 28). Jesús ko nalí ku iyama echi Gobiérnowala echi Onolá alí nijéwima echi. Echi riká isima jiti we galé Jeobá.

19. ¿Piri ju Jesús jitra echi Jeobá riwalá?

¹⁹ Jiti la, Jeobá ko we aʼlá niraa ineli júulia Jesús jenaʼí Wichimóbachi echi binoy jitra. Alí Jesús we aʼlá isili echi nóchali japi iyáari. Japi riká ti bineli, ¿piri ju Jesús jitra echi Jeobá riwalá? Echi namuti japi wabé natéami ju. Jiti la echi ko mukuli echi jitra alí japalí ma sunisa nulayá echi mili bamíali, Jesús ko ku iyama echi Gobierno echi Jeobá. ¿Chúriká ti nokiboa japi riká echi? Ata binepo echi jitra echoná biléala binelíwami.