BINELÍWAMI 23
CANCIÓN sjj 2 Jeobá mi riwewi
Echi Jeobá riwalá we natéami ju tamujé jitra
“Emi ko nijé testígowala ju —echi riká aní Jeobá—” (IS. 43:10).
JAPI TA JITRA BINEPO
Japi ta omeri nokayá jiti néwariwélitipo japi Jeobá suwaba namuti aʼlá isimí alí japi suwaba echi chati namuti japi anili Satanás Jeobá jitra, ke bichíwali ju.
1, 2. ¿Chúriká ti machí japi Jesús jitra ke nirú bilecho namuti wabé natéami japi riká echi Jeobá riwalá?
JESÚS jitra ke nirú bilecho namuti wabé natéami japi riká echi Jeobá riwalá. Echi ju japi wabé iʼwérili isili jiti echi riwalá riwíwitami nima. Japi riká ti ineli echoná binelíwami 22, Jesús ko riweli japi miʼárami nima echi Jeobá riwalá jitra, jiti echi riká walubéraga anérami nima (Mar. 14:36; Heb. 10:7-9). Alí ma sunisa nulayá echi mili bamíali, echi ko ku iyama echi Gobierno binoy Onolá, néwariwélitimia japi suwaba japi Satanás anili Jeobá jitra, ke bichíwali ju (1 Cor. 15:26-28). Suwaba japi Jesús isili alí japi isima echi Jeobá riwalá jitra, néwariwéliti japi we galé echi Onolá.
2 Jesús nawali jenaʼí Wichimóbachi echi Onolá riwalá jitra (Juan 5:43; 12:13). Machírtili echi Onolá riwalá echi discípulos (Juan 17:6, 26, TNM). Binérili alí isili wiká milagros Jeobá riwalá jitra (Juan 10:25). Siné kaachi japalí raʼíchili Jeobá yúa, echi ko tánili echi discípulos jitra: “Tibú echi mujé binoy riwalá jitra” (Juan 17:11, TNM). Suwaba jepuná jitra, ati machí japi Jesús we natéami niraa ineli echi Jeobá riwalá. Jiti la echi pagótami japi ke machí alí ke nee echi Jeobá riwalá, ke anisáré japi cristianos ju.
3. ¿Piri binepo jenaʼí binelíwami?
3 Japi ta ne bichíwali cristianos ju, ati iʼwérili noká nokayá japi riká isili Jesús alí tamujé jitra ayénachó we natéami ju echi Jeobá riwalá (1 Ped. 2:21, TNM). Jenaʼí binelíwami binepo chúsiá Jeobá iyali echi binoy riwalá echi japi nawesa echi Gobiérnowala jitra (Mat. 24:14). Ayénachó binepo chúriká ti inésaré ibili niraa tamujé echi Jeobá riwalá.
“BILÉ PUEBLO JAPI OLAMA BINOY RIWALÁ”
4. a) ¿Piri aneli Jesús echi discípulos kecho simiyá ripá rewegachi? b) ¿Piri náriwami binepo?
4 Kecho simiyá ripá rewegachi, Jesús aneli echi discípulos: “A timí narema jiwérali japalí echi Onorúami jiwérala nawasa emi yúa. Alí timí kini testígowala nima echoná Jerusalén, omáana Judea alí Samaria, alí ayénachó echoná wabé mikabé kawichí” (Hech. 1:8, TNM). Echi aʼláala raʼíchali ke bi nawisárami nima riweili echoná Israel, nalí pe aminana echi pagótami omáana Wichimóbachi piréami, omérima riweili Jesús najátowala niya (Mat. 28:19, 20). Nalí natabo jepuná japi Jesús anili: “Kini testígowala nima”. ¿Achi aniwáami ju jepuná japi echi kulíwami discípulos Jesús bi testígowala nima, o ayénachó machisaa riweili echi Jeobá riwalá? Hechos capítulo 15 tamó iʼwírima machiyá.
5. ¿Chúriká néwariwélitili echi apóstoles alí ancianos japi we natéami ju machiyá echi Jeobá riwalá? (Ayénachó iné echi dibujo).
5 Bamíali 49 echi apóstoles alí ancianos Jerusalén muchúwami, napawili raʼichamia jiti machimea piri nokisaa riweili echi japi ke judíos nili jiti cristianos nima. Ma sunía echi napawíliwami, Santiago japi nasipa chéami Jesús rejimala nili, jéanili: “Symeón [Pedro] we aʼlá tamó ruyeli echi bacháwala rawé jitra japalí Onorúami nátili jarecho pagótami jitra japi ke judíos ju, jiti echoná jonsa machibuma bilé pueblo japi olama binoy riwalá”. ¿Chu iyiri riwalá? Ruyemia echi ko néeli japi osali echi profeta Amós: “Jiti echi pagótami japi ripí we iʼwérili nokimea aaya Jeobá sinéami echi pagótami yúa japi ke judíos ju, pagótami japi anérami ju kini riwalá jitra. Echi riká aní Jeobá” (Hech. 15:14-18, TNM). Echi kulíwami discípulos ke Jeobá bi jitra binema riweili, nalí ayénachó anérami nima riweili echi Onorúami riwalá jitra. Jepuná ko ruyá aní japi machirúami nima riweili echi Jeobá riwalá jitra alí machíritima echi riwalá.
Echi apóstoles alí ancianos Jerusalén muchúwami, machili japi echi cristianos ne bichíwali, machíritisaré jarecho echi Jeobá riwalá alí japi machirúami nima riweili echi Jeobá riwalá jitra. (Iné echi párrafo 5).
6, 7. a) ¿Chúsiá Jesús nawali jenaʼí Wichimóbachi? b) ¿Chu iyiri nalí wabé natéami ju?
6 Newalabo japi echi Jesús riwalá aniwáami ju “Jeobá niyúbiami ju”. Alí echi riká nili: Jeobá ko néeli Jesús niyúbimia sinéami japi bichíyami ju. Jesús nawali jenaʼí Wichimóbachi jiti mukumea sinéami pagótami jitra (Mat. 20:28). Japalí mukuká natétili, echi ko omérili isiá japi sinéami wikáwirami nima echi chati namuti jitra japi noká alí sinibí pirélima (Juan 3:16, TNM).
7 Nalí, ¿chúsiá echi pagótami newaleli japi bilé niyúbima echi? Echi jitra japi ikili echoná Edén. Japi riká ti ma bineli, Adán alí Eva sayérili Jeobá alí ma ke omérili sinibí pirea (Gén. 3:6, 24). Jiti la Jesús nawali jenaʼí Wichimóbachi niyúbimia echi pagótami. Nalí ayénachó nawali isimia bilecho namuti wabé natéami. Newalabo japi echoná Edén Satanás ikaleka raʼíchili Jeobá jitra (Gén. 3:4, 5). Alí Jesús nawali néwariwélitimia japi ke bichíwali nili japi Satanás anili Jeobá jitra, jiti echi ko machili japi ma riwíwitami nísaká echi Jeobá riwalá, echi pagótami omérima niyubia. ¿Chúsiá Jesús nili japi we aʼlá omérili néwariwélitia japi Satanás anili Jeobá jitra ke bichíwali ju? Jiti nawali echi Jeobá riwalá jitra alí isili suwaba japi Jeobá nakili.
Echi pagótami japi ke machí alí ke nee echi Jeobá riwalá, ke anisáré japi cristianos ju.
8. ¿Piri inámisa alí bichíwisa riweili sinéami echi Jesús discípulowala?
8 Sinéami echi Jesús discípulowala japi judíos alí ke judíos nili, inámisa riweili alí bichiwia japi Jeobá nalí nili japi echi niyúbili (Juan 17:3, TNM). Alí japi riká Jesús, echi discípulos machirúami nima riweili Jeobá riwalá jitra. Ayénachó inámisa riweili japi we natéami ju néwariwélitia, japi ke bichíwali ju suwaba japi Satanás anili Jeobá jitra. Jepuná we natéami nili jiti niyúbima (Hech. 2:21, 22, TNM). Jiti la sinéami echi Jesús discípulowala binesa riweili Jeobá alí Jesús jitra. Ata machí jepuná jiti echoná Juan 17 Jesús ko sunili raʼichia Jeobá yúa jéaniká: “Nijé ko machíritili mujé riwalá, alí ni aminabi machíritima, jiti japi riká mujé tamí galeli, echi ayénachó echi riká nokimea alí nijé ko katúwika isima echi yúa” (Juan 17:26, TNM).
“EMI KO NIJÉ TESTÍGOWALA JU”
9. Japi ta ne bichíwali cristianos ju, ¿chúriká ti inésaré echi Jeobá riwalá?
9 Japi riká ti ma bineli, sinéami japi ta ne bichíwali cristianos ju we natéami niraa inésaré japi Jeobá riwalá riwíwitami nima (Mat. 6:9, 10, TNM). We natéami niraa inésaré echi Jeobá riwalá jarecho riwalá yúa alí néwariwélitisaré jepuná, echi jitra japi noká. ¿Nalí chúriká ti omeri iʼwiria jiti Jeobá riwalá riwíwitami nima alí néwariwélitia japi ke bichíwali ju japi anili Satanás Jeobá jitra?
10. ¿Piri jitra raʼicha Isaías capítulos 42 aminá 44? (Isaías 43:9; 44:7-9; ayénachó iné echi imagen).
10 Echoná Isaías capítulos 42 aminá 44, ata biné echi namuti japi ta nokisáré jiti riwíwitami nima echi Jeobá riwalá. Echoná Jeobá ko ané echi pagótami japi ke bichiwi echi, japi néwariwélitima achi ne bichíwali piréami ju echi dioses japi echi bichiwi. Japi riká isimí bilé oyériami, Jeobá bayé jaré testigos jiti animea achi ne bichíwali piréami ju echi dioses. Nalí ke wesi omeri echi riká isiá (leeri Isaías 43:9; 44:7-9).
Suwaba echi jitra japi ta aní alí noká, ati néwariwéliti japi Jeobá bi ju echi Onorúami ne bichíwali. (Iné echi párrafos 10 alí 11).
11. Japi riká aní Isaías 43:10-12, ¿piri ané Jeobá japi echi nijéwami ju?
11 (Leeri Isaías 43:10-12). Jeobá ané japi echi nijéwami ju: “Emi ko nijé testígowala ju [...], alí nijé ju Onorúami”. Alí ané japi ruyema jepuná náriwami: “¿Achi nirú bilecho Onorúami?” (Is. 44:8). Tamujé a omeri ruyea japi ke nirú bilecho Onorúami. Echi jitra japi ta aní alí noká, ati néwariwéliti japi Jeobá bi ju echi Onorúami ne bichíwali alí japi echi riwalá we natéami ju jarecho yúa. Alí japi riká ti piré jitra, ati néwariwéliti japi ta ne sulachí jonsa galé Jeobá alí japi ta echi nijéwami ju tákoré Satanás isimí japi ta ikiboa namuti we jilírami. Echi riká ti omeri iʼwiria néwariwélitia japi ke bichíwali ju japi Satanás anili Jeobá jitra.
12. ¿Chúriká ikili echi profecía japi aní Isaías 40:3, 5?
12 Isaías ayénachó anili japi bilé aʼlárika riwema riweili “echi buwé Jeobá níwala” (Is. 40:3). ¿Chúriká ikili jepuná profecía? Juan el Bautista aʼlárika riweli echi buwé japoná simírima riweili Jesús, japi nawali echi Jeobá riwalá jitra alí raʼíchili Jeobá jitra (Mat. 3:3; Mar. 1:2-4; Luc. 3:3-6). Isaías ayénachó anili: “Machirúami nima japi Jeobá walubéala ju” (Is. 40:5). ¿Chúriká ikili jepuná? Japalí Jesús nawali jenaʼí Wichimóbachi, isili suwaba namuti japi riká binoy Onolá, jiti la echi ko nili japi riká ko Jeobá binoy nawala jenaʼí Wichimóbachi (Juan 12:45).
13. ¿Chúriká ti omeri nokayá japi riká Jesús?
13 Ati noká japi riká Jesús japalí ti iʼwiri jiti echi Jeobá riwalá riwíwitami nima. Japi riká echi, tamujé ko Jeobá testígowala ju alí ti ruyé jarecho echi Jeobá riwalá jitra alí echi namuti jitra japi isimí. Nalí jiti we aʼlá testigos nipo, ayénachó ti ruyésaré jarecho suwaba echi namuti japi isili Jesús alí japi isima, jiti echi Jeobá riwalá riwíwitami nima (Hech. 1:8, TNM). Jesús ju echi testigo wabé natéami japi olá Jeobá, alí tamujé noká japi riká echi (Apoc. 1:5). Nalí, ¿chúriká ti inésaré echi Jeobá riwalá ibili niraa tamujé?
ECHI JEOBÁ RIWALÁ WABÉ NATÉAMI JU TAMUJÉ JITRA
14. Japi riká aní Salmo 105:3, ¿chuti inili echi Jeobá riwalá jitra?
14 Ata we kanili echi Jeobá riwalá jitra (leeri Salmo 105:3). Alí Jeobá wabé kanili japi ta kanila raʼíchipo echi riwalá jitra alí ti nirabo echi jitra (Jer. 9:23, 24; 1 Cor. 1:31, TNM; 2 Cor. 10:17, TNM). Niraa Jeobá jitra aniwáami ju japi ta we kanili jiti Jeobá ju tamujé Onorúamiwala. Tamujé jitra we natéami ju riwiwia alí walubéala anea echi Jeobá riwalá. Ke ti siné riwela nílisaré ruyea jarecho japi ta testigo Jeobá ju, japi riká echoná nóchali, escuela, japoná ti piré alí omáana japoná ti jari o muchuwi. Echi Diablo nakí japi ma ke ruyepo echi pagótami Jeobá riwalá jitra (Jer. 11:21; Apoc. 12:17). Echi alí echi ke bichíwali profetas, nakí japi echi pagótami ke newalama echi Jeobá riwalá (Jer. 23:26, 27). Nalí tamujé ko we galé echi Jeobá riwalá alí suwaba rawé ati walubéala anénali (Sal. 5:11; 89:16).
15. ¿Piri aniwáami ju néea echi Jeobá riwalá?
15 Aminabi ti nee echi Jeobá riwalá (Joel 2:32; Rom. 10:13, 14, TNM). Néea echi Jeobá riwalá, ke bi ju machiyá echi alí néea japalí ti raʼicha jarecho yúa. Echi ko ju aʼlá machiyá Onorúami, we bichiwia echi alí iʼwírili tania japalí ta ikí namuti jilírami alí jiti we aʼlá nátika nokiboa (Sal. 20:7; 99:6; 116:4; 145:18). Ayénachó ju japi ruyepo jarecho echi riwalá, echi cualidades japi olá alí japi iʼwérili iyabo jiti riwema cha nokayá alí nokimea aʼláala namuti Jeobá amígowala nimia (Is. 12:4; Hech. 2:21, 38).
16. ¿Chúriká néwariwélitipo japi Satanás ikaléami ju?
16 Ati anacha echi namuti we jilírami jiti ta we natéami niraa iné echi Jeobá riwalá (Sant. 5:10, 11). Japalí ti ke riwé nijewia Jeobá tákoré ti ikí namuti we jilírami, ati néwariwéliti japi Satanás ikaléami ju. Japalí Job biteili, Satanás jériká anili echi Jeobá nijéwami jitra: “Echi rijoi ko nijima suwaba namuti japi olá jiti binoy niyúbima” (Job 2:4). Echi ko ruyá anili japi echi pagótami bi nijéwima Jeobá japalí aʼlá piré, nalí japalí cha ikisaa riwema Jeobá. Jiti Job nijéwili Jeobá, néwariwélitili japi Satanás ikaléami ju. Alí tamujé ayénachó omeri néwariwélitia japi ta ke siné riwepo nijewia Jeobá, tákoré Satanás isimí wiká namuti. Ati we bichiwi japi Jeobá ke riwema tamó tibúa echi binoy riwalá jitra (Juan 17:11, TNM).
17. Japi riká aní 1 Pedro 2:12, ¿chúriká ti ayénachó omeri walubéala anea echi Jeobá riwalá?
17 Ati riwiwi echi Jeobá riwalá (Prov. 30:9; Jer. 7:8-11). Jiti echi pagótami machí japi ta testigo Jeobá ju, echi namuti japi ta noká isímiré japi walubéala anérami nima Jeobá o cha riká raʼichárami nima echi jitra (leeri 1 Pedro 2:12). Jiti la, ati iʼwérili nokinali jiti walubéala anérami nima Jeobá, echi jitra japi ta aní alí noká. Tákoré ti ke sébali aʼlá nokáami ju, ati omeri iʼwiria jiti walubéala anérami nima echi Jeobá riwalá.
18. ¿Chu iyiri ju bilecho namuti japi riká ti néwariwéliti japi tamujé jitra we natéami ju echi Jeobá riwalá? (Ayénachó iné echi nota).
18 Ata wabé natéami niraa iné echi Jeobá riwalá, ke ko japi jarecho nata tamujé jitra (Sal. 138:2). ¿Chúsiá? Jiti japi riká ti we galé echi Jeobá riwalá, ati noká echi namuti japi kaníliti echi. Nalí jepuná isimí japi echi pagótami tamó kawélima alí cha riká raʼichama tamujé jitra.a Japalí Jesús mukuli, echi pagótami ineli japi riká bilé we cha isíami, nalí Jesús a riweli japi echi riká miʼlirúami nima jiti echi Jeobá riwalá riwíwitami nima. Echi Biblia aní japi echi riká isili jiti ke we natéami niraa ineli japi jarecho natama echi jitra (Heb. 12:2-4, TNM). Jesús ko nalí wabé natéami niraa ineli nijewia japi riká Jeobá nakí (Mat. 26:39).
19. ¿Chumi inili Jeobá riwalá jitra, alí chúsiá?
19 We ti kanili echi Jeobá riwalá jitra alí ti we natéami niraa iné jiti ta machirúami ju japi riká testigo Jeobá. Ke ti we nata japalí jarecho tamó kaweli alí cha riká raʼicha tamó jitra. Tamujé jitra wabé natéami ju echi Jeobá riwalá, ke ko japi jarecho aní tamujé jitra. Jiti la ti aminabi iʼwérili nokinali walubéala anea echi Jeobá riwalá, tákoré echi Satanás jiwérili isimí jiti ta ikiboa jilírami namuti. Echi riká ti néwariwélitipo, japi riká Jesús, japi echi Jeobá riwalá wabé natéami ju tamujé jitra.
CANCIÓN sjj 10 Wikaránipo Onorúami Jeobá
a Echi we nijéwami Job, wabé natéami ineli japi jarecho nátili echi jitra, japalí echi bikiá amigos cha riká aneli. A bichíwali ju japalí suwili echi kúchuwala alí ma ke olali echi níwala namuti, echi ko “tasi siné cha isili alí tasi siné ichéwili Jeobá japi ikili” (Job 1:22; 2:10). Nalí japalí echi amígowala aneli japi cha isíami nili, echi ko ke nátika raʼíchili alí anili namuti japi ke aʼlá nili. Job wabé natéami ineli japi jarecho nátili echi jitra alí ke ko walubéala anea echi Jeobá riwalá (Job 6:3; 13:4, 5; 32:2; 34:5).