BINELÍWAMI 29
CANCIÓN sjj 87 Iʼwérili naré echoná napawíliwachi
Chúriká we aʼlá busuré nijíami nipo
“Nijé mi inea atí alí ni mi busuré iyama” (SAL. 32:8).
JAPI TA JITRA BINEPO
Chúriká busuré nijibo jiti echi busuréliami we aʼlá nima alí iʼwírima jarecho.
1. ¿Jépuká busuré nijísaré, alí chúsiá?
JARÉ pagótami ke jilí niraa busuré iyayá jarecho, nalí jarecho ko a we jilí niraa alí ke me kanili echi riká nokayá. Nalí isini kaachi sinéami tamujé busuré iyásaré jarecho. ¿Chúsiá? Jiti Jesús anili japi echi ne bichíwali cristianos néwariwélitima japi we galéami ju (Juan 13:35). Alí japi riká néwariwélitipo japi ta galé echi hermanos ko ju, busuré iyayá echi japi newalé. Ayénachó echi Biblia aní japi ne bichíwali amigos ju, we aʼlá busuré nijí (Prov. 27:9).
2. ¿Piri namuti we aʼlá machisáré nokayá echi ancianos, alí chúsiá? (Ayénachó iné echi recuadro “Chúriká nijíliwa busuréliami echoná napawíliwachi japi ju nasipa tarali”).
2 Sinéami ti aʼlá machisáré chúriká nijibo busuréliami, nalí wabé echi ancianos, jiti Jeobá alí Jesús nuleli japi tibuma echi hermanos echoná congregación (1 Ped. 5:2, 3). ¿Chúriká noká echi ancianos? Bilé ko ju japalí nijí nawésali japi olá busuréliami Bíbliachi uchúwami. Bilecho ko ju japi tamó busuré iyá japalí ti newalé. Alí ayénachó iʼwiri echi japi riweli Jeobá jiti checho ku mulíwima echoná congregación. ¿Chúriká omeri echi ancianos alí sinéami tamujé we aʼlá busuréliami iyayá jarecho?
3. a) ¿Jépuká jitra binepo jiti we aʼlá busuréliami nijibo? (Isaías 9:6; ayénachó iné echi recuadro “Nokiboa japi riká Jesús japalí ti busuré nijí”). b) ¿Piri ta binepo jena binelíwami?
3 Ati oméripo binea chúriká we aʼlá busuréliami nijibo japalí ti iné echi ejemplos japi uchuwi echoná Biblia. Echi we aʼlá ejemplo ko ju Jesús, jiti echi Biblia aní japi echi ko “Aʼlá Busuré Nijíami” ju (leeri Isaías 9:6). Jenaʼí binelíwami binepo piri ta nokiboa japalí bilé tamó busuré tani alí japalí ti iyásaré busuréliami bilé, tákoré echi ko ke tamó tánili. Ayénachó binepo chúsiá we natéami ju japi ta machiboa chu kabú aʼlá ju japi ta iyabo bilé busuréliami alí chúriká nokiboa.
CHÚRIKÁ NOKIBOA JAPALÍ BILÉ TAMÓ BUSURÉ TANI
4, 5. ¿Piri ta nárika nokisáré japalí bilé tamó busuré tánisa? Ruyé bilé ejemplo.
4 Japalí bilé tamó tánisa bilé busuréliami, a keʼré japi ta we simá nílipo alí ti sapú ruyénalipo japi ta nata. Nalí echi riká ko ke aʼlá ju. Wabé aʼlá nima japi bachá nárika nokiboa: “¿Achi ni aʼlá machí jepuná namuti japi tamí nárili jiti ni we aʼlá busuré iyama?”. Isini kaachi newalepo iʼwiria aaya bilé japi wabé aʼlá machimea iyayá busuréliami tamujé yúa.
5 Natabo jepuná ejemplo. Japi mujé amígowala olá bilé nayulí we chati. Siné kaachi, echi ko mi ané japi ma bineli echi tratamientos jitra japi nirú alí mi nari chu iyiri nalí aʼlá ju. A keʼré japi mujé ko ma machí chu iyiri tratamiento narema, nalí mujé ko ke doctor ju alí mi ke binéritami ju chúriká iʼwírima japi olá echi nayulí. Japi riká mi omérima iʼwiria mujé amígowala ko ju, aaya bilecho japi omérima iʼwiria mujé amígowala.
6. ¿Chúsiá ti ke sapú ruyésaré japi ta nata japalí bilé tamó busuré tánisa?
6 Isini kaachi ati iníliporé japi ta oméripo busuré iyayá bilé, jiti ta nata japi ta a machí echi namuti jitra japi echi tamó nárili. Nalí ke ti sapú ruyésaré japi ta nata. ¿Chúsiá? Echoná Proverbios 15:28 ruyé japi machíami ju ko we aʼlá nata kecho aniyá bilé namuti. Jiti la, tákoré ti inili japi ta a machí, we aʼlá ju japi bachá we aʼlá binepo, raʼichabo Jeobá yúa alí natabo echi namuti jitra, jiti echi riká echi busuréliami japi ta nijí nima japi riká Jeobá nakí. Ma inepo japi ikili echi profeta Natán.
7. ¿Piri ta biné echi jitra japi isili Natán?
7 Japalí echi silíami David aneli Natán japi niwánili bilé templo Jeobá níwala, echi profeta ko sapú aneli japi aʼlá ju japi echi isínali. Nalí Jeobá ko ke nakili japi David niwama echi templo. Jiti la Natán kecho bijí ruyea japi echi nátili, echi ko bachá nárisa riweili Jeobá piri nakili japi David isima (1 Crón. 17:1-4). Jepuná jitra ati biné japalí bilé tamó tánisa bilé busuréliami, we aʼlá ju japi ta ke sapú aniboa japi ta nata (Sant. 1:19).
8. ¿Chu iyiri ju bilecho namuti japi ta jitra aʼlá tibuka nokisáré japalí ti nijí bilé busuréliami?
8 Bilecho namuti japi ta jitra aʼlá tibuka nokisáré japalí ti nijí bilé busuréliami, echi ko ju japi ta busuréliami iyásaká bilé alí echi ikisáaká namuti we jilírami, ayénachó tamujé iyiri níporé. Jiti la, kecho aniyá japi ta nata, bachá aʼlá natabo kecho nijía bilé busuréliami.
CHÚRIKÁ TI IYÁSARÉ BUSURÉLIAMI BILÉ JAPI KE TAMÓ TÁNILI
9. ¿Piri aʼlá machisáré echi ancianos kecho bijí busuré iyayá bilé hermano? (Gálatas 6:1).
9 Isini kaachi echi ancianos busuré iyásaré bilé hermano japi ke aʼlá isimí, japi riká aní echoná Gálatas 6:1 (leeri, TNM). Bilé nota de estudio jepuná versículo jitra, ruyé japi jenaʼí ko raʼicha bilé pagótami jitra japi ke aʼlá isimí, tákoré kecho bijí isimí bilé namuti we chati. Jiti la, echi ancianos ko iʼwírinali echi hermanos jiti ke riwema nijewia Jeobá alí sinibí pirélima (Sant. 5:19, 20). Nalí be, japi bachá nokisáré echi ancianos ko ju, aʼlá machiyá achi ne bichíwali ke aʼlá isili echi hermano, alí nátika japi Jeobá tamó riwé japi tamujé aboi natabo japi ta nokiboa nalí ineka japi aní echi Biblia (Rom. 14:1-4). Nalí, echi ancianos inésaká japi ne bichíwali ke aʼlá isili, ¿chúriká nokimea busuré iyayá?
10-12. ¿Piri nokisáré echi ancianos kecho busuré iyamia bilé hermano japi ke tali busuréliami? Ruyé bilé ejemplo (ayénachó iné echi imágenes).
10 A we jilí ju echi ancianos jitra iyayá busuréliami bilé japi ke tali. ¿Chúsiá? Jiti echi apóstol Pablo anili japi bilé pagótami isímiré bilé namuti japi echi ko mayé japi ke chati ju alí natámiré japi ke newalé busuréliami. Jiti la, kecho busuré iyayá, echi ancianos ko nokisáré jaré namuti jiti echi pagótami we aʼlá kipuma echi busuréliami.
11 Natabo jepuná ejemplo. Kecho bijí ichayá, bilé rijoi bachá aʼlá wasará echi weʼé jiti ke bewáami nima alí echi talí we aʼlá ochérima. Miná ko ma ichá alí upá ko roʼé echi baʼwí. Echi riká cho echi anciano, kecho bijí busuré iyamia bilé hermano japi ke busuré tali, isísaré jaré namuti jiti echi aʼlá kipuma echi busuréliami. Japi riká, echi hermano ke jilí nirama kipúa ma machisáaká japi echi anciano galéami ju alí we simá raʼíchami. Alí miná ko, japalí echi anciano ma inesa japi aʼlá ju japi iyama echi busuréliami, bachá anema japi we galé alí japi iʼwírinali.
12 Japalí echi anciano raʼicha echi hermano yúa, echi ko aminabi wasará echi weʼé. ¿Chúriká? Simárika aneka japi ta sinéami ke aʼlá nokáami ju alí isini kaachi ti newalé japi ta busuréliami iyárami nipo (Rom. 3:23). We simárika alí riwíwika niraa, echi ko néema echi Biblia alí ruyema piri namuti ju japi ke aʼlá isili. Japalí echi hermano ma machisaa echi namuti japi ke aʼlá isili, echi anciano ko ichimea echi talí aneka piri isísaré jiti checho ku aʼlá isima. Alí upá ko roʼema echi baʼwí japalí ruyé echi namuti japi aʼlá isimí alí raʼíchika Jeobá echi yúa (Sant. 5:15).
Echi ancianos we galéami nísaré alí we aʼlá machiká nokisáré jiti busuré iyama bilé hermano japi ke tali busuréliami. (Iné echi párrafos 10 aminá 12).
13. ¿Piri isísaré bilé anciano jiti aʼlá machimea achi echi hermano aʼlá inámili echi busuréliami?
13 Isini kaachi, a keʼré japalí echi anciano busuré iyasa bilé hermano, echi ko bilecho riká inámima. Echi riká ikisáaká, ¿piri isísaré echi anciano? Echi ko omeri naria jaré namuti jiti machimea japi echi hermano aʼlá inámili echi busuréliami alí jiti machimea chúriká nijéwima (Ecl. 12:11).
IYABO BUSURÉLIAMI JAPALÍ AʼLÁ JU ALÍ AʼLÁ NIRAA
14. ¿Chúsiá ti ke busuré iyásaré japalí ti iyoa nili?
14 Sinéami ti ke aʼlá nokáami ju, jiti la isini kaachi aniboa namuti japi ke kaníliti jarecho (Col. 3:13). Echi Biblia aní japi isini kaachi ati iyopo jarecho yúa (Efes. 4:26). Nalí ke ti busuré iyásaré bilé japalí ti iyoa nili. ¿Chúsiá? “Mapujiti bilé rijói wabé yóami ketasi olá echi galabéala mapurigá Riosi nakí” (Sant. 1:20). Ati iyásaká busuréliami bilé japalí ti iyoa nili, a keʼré aminabi cha nílitipo o naʼáwipo. Jepuná ko ke aniwáami ju japi ta ke siné ruyepo echi hermano o hermana japi tamó cha nílitili. Nalí we aʼlá ju japi ta buwepo japalí chéami ma ti ke iyoa nili. Ma inepo japi isili Elihú, japi we aʼlá busuréliami iyali Job.
15. ¿Piri ta biné Elihú jitra? (Ayénachó iné echi dibujo).
15 Elihú wiká rawé asali kipúa echi Job japi chúriká nimili japalí echi amigos cha riká raʼíchili echi jitra. Tákoré chiliweli Job, ayénachó we iyoli echi yúa jiti echi ko anili namuti ke bichíwali Jeobá jitra. Nalí be, Elihú ko kilí nili alí buweli japalí chéami ma omérima raʼichia echi yúa, alí miná ko busuré iyali Job we kilí niraa alí we riwíwika (Job 32:2; 33:1-7). Japi isili Elihú tamó bineri bilé namuti we natéami: japalí ti busuré iyá bilé, ata buwésaré japalí chéami ma ti oméripo raʼichia alí we galeka alí riwíwika niraa (Ecl. 3:1, 7).
Tákoré Elihú we iyoli Job yúa, echi ko kilí buweli japalí chéami ma ke iyoa nílili alí miná ko busuré iyali we riwíwika niraa. (Iné echi párrafo 15).
CHU KABÚ ALÍ CHÚRIKÁ NIJIBO BUSURÉLIAMI
16. ¿Piri mi biné japi aní echoná Salmo 32:8?
16 Echi texto we natéami japi chukú jenaʼí binelíwami, aní japi Jeobá tamó inea atí alí tamó busuré iyá (leeri Salmo 32:8). Jepuná ko aniwáami ju japi ke tamó awénili riwé alí ata newalésaká echi ko tamó iʼwiri nijewia echi busuréliami. ¡We aʼlá ju japi riká isimí Jeobá! Echi riká cho nokiboa japalí ti busuré iyasa bilé, ke bineli riwepo alí newalésaká iʼwíripo jiti nijéwima echi busuréliami.
17. ¿Chúriká ju echi ancianos japi we aʼlá busuréliami nijí? (Isaías 32:1, 2).
17 Jipi jubá rawé, ati newalé iyayá alí narea we aʼlá busuréliami (2 Tim. 3:1). “Japi riká baʼwí japi mawá japoná wakichea wilí” we aʼlá iʼwiri bilé pagótami, echi riká cho echi ancianos japi tamó busuré iyá néeka echi Biblia, tamó iʼwérili iyá alí tamó iʼwiri jiti ke riwepo nóchilia Jeobá (leeri Isaías 32:1, 2). Ata we kanili olayá hermanos alí hermanas japi tamó busuré iyá japalí ta newalé. Echi raʼíchali japi tamó ané we natéami ju japi riká echi manzanas oro jitra niwárami japi muchuwi echoná bilé batea plata jitra niwárami (Prov. 25:11). Jiti la, we natéami ju japi ta aminabi binepo chúriká narepo alí we aʼlá nijibo echi busuréliami.
CANCIÓN sjj 109 Galéami nipo ne sulachí niraa