BINELÍWAMI 30
CANCIÓN sjj 97 Onorúami Raʼicháala ko we natéami ju
Aminabi biné echi namuti jitra japi mi bachá bineli
“Ani sinibí emi newalárinali jepuná namuti, tákoré timí ma machí alí timí we bichiwi echi ne bichíwali” (2 PED. 1:12, TNM).
JAPI TA JITRA BINEPO
Chúriká echi namuti japi mi bineli japalí mi kulí chotásili binea echi Biblia, a bijí mi iʼwiri tákoré mi wiká bamibi japi riká testigo Jeobá.
1. ¿Chumi inílili japalí mi bineli japi aní echi Biblia?
ECHI namuti japi ta bachá bineli echoná Biblia, we aʼlá tamó iʼwírili. Japi riká, machiyá japi Onorúami ko rewé Jeobá, tamó iʼwírili jiti echi amígowala nipo (Is. 42:8). Japalí ti bineli japi echi suwíami ma ke risoa nili, tamó iʼwírili jiti ku kilí nílipo (Ecl. 9:10). Alí japalí ta bineli japi echi Wichimóbachi we baʼóami nima, tamó iʼwírili jiti ke me natabo japi ta ikiboa pe aminana. ¿Chúsiá? Jiti ta machili japi ta ke bi pirélipo 70 u 80 bamíali, nalí ne sinibí (Sal. 37:29; 90:10).
2. ¿Chúsiá ti machí japi echi japi ma wiká bamibi japi riká testigo Jeobá ayénachó iʼwiri echi namuti japi bachá bineli echoná Biblia? (2 Pedro 1:12, 13).
2 Tákoré ti ma wiká bamibi japi riká testigo Jeobá, ke ti wikawásaré japi echi namuti japi ta bachá bineli echoná Biblia, we natéami ju. Echi apóstol Pedro osélili echi osá carta echi cristianos japi ma wiká bamíali jonsa machili echi bichíwali (leeri 2 Pedro 1:12, 13, TNM). Nalí echi ko iʼwérili iyali jiti tibuka nokimea echoná congregación, japi riká echi ikaleka binériami jitra alí jarecho si pagótami chati (2 Ped. 2:1-3). Echi riká isili iʼwírimia jiti ke riwema nijewia Jeobá alí newalárili jaré namuti japi ma bineli.
3. Néeka bilé ejemplo ruyé chúsiá we natéami ju japi sinéami aminabi natabo echi namuti jitra japi ta bachá bineli echoná Biblia.
3 Tákoré ti ma wiká bamibi japi riká testigo Jeobá, ati aminabi omeri binea kulíwami namuti echi jitra japi ta bachá bineli echoná Biblia. Natabo jepuná ejemplo: bilé iyela alí echi ranala nee echi kulú niwamia bilé walí. Nalí jiti echi iyela ma wiká bamíali jonsa niwali echi walí, echi ko ma we aʼlá machí chúriká niwama jarecho walí we baʼóami. Echi riká cho, japi ta ma wiká bamibi japi riká testigo Jeobá, ati omeri binea che jaré namuti echi jitra japi ta chabé bineli, echi yúa japi kulí binésimi echi Biblia. ¿Chúsiá? Jiti japalí jonsa pakoli ma sinúrika ju japi riká ti piré alí japi riká ti noká nóchilia Jeobá. Jiti la echi namuti japi ta chabé bineli, jipi ko sinúrika tamó iʼwiri. Echi japi ma wiká bamibi japi riká testigo Jeobá, ¿piri omeri binea echi jitra japi bachá bineli echoná Biblia? Jenaʼí binelíwami binepo bikiá echi namuti.
JEOBÁ NIWALI SUWABA NAMUTI
4. ¿Chúriká tamó iʼwírili binea japi Jeobá ju japi niwali suwaba namuti?
4 Ata machí japi echi kawí alí suwaba japi nirú echoná, niwárami nili bilé jitra japi we machíami ju alí we jiwérami. Echoná Biblia aní: “Japi niwali suwaba namuti japi ikí nirú ko ju Onorúami” (Heb. 3:4, TNM). Nalí ke echi bi namuti ju japi ta biné na versículo jitra. Jiti Jeobá tamó niwali, echi ko we aʼlá tamó machí. Ayénachó echi ko we tamó galé alí machí chúriká ti nokisáré jiti kanila pirélipo. Jiti la, machiyá japi Jeobá niwali suwaba namuti, tamó iʼwiri sinúrika niraa. Japi riká, ata machí chúsiá ti piré alí tamó iʼwiri we kanila pirelia jipi alí pe aminana.
5. ¿Piri ta biné machiyá japi Jeobá niwali suwaba namuti? (Isaías 45:9-12).
5 Machiyá japi Jeobá niwali suwaba namuti, tamó iʼwiri ke niráami niya. Ma binepo Job jitra. Ne kulí ko, echi ko we nátili binoy jitra alí iʼwérili isili néwariwélitia japi we aʼlá isíami nili, nalí Jeobá ko newalárili japi echi ju japi niwali suwaba namuti alí japi suwaba omériami ju (Job 38:1-4). Jepuná iʼwírili Job machiyá japi suwaba japi Jeobá isimí sinibí we aʼlá ju. Echi profeta Isaías osali japi echi pagótami ke siné natásaré japi wabé machíami ju Jeobá yúa (leeri Isaías 45:9-12).
6. ¿Chúsiá aʼlá ju japi natabo japi Jeobá niwali suwaba namuti? (Ayénachó iné echi imágenes).
6 Bilé cristiano japi ma wiká bamibi japi riká testigo Jeobá chotásimiré we bichiwia japi aʼlá ju japi riká binoy nata alí ke ko japi riká aní echi Biblia (Job 37:23, 24). Jiti ke echi riká isima, aʼlá nima japi natama japi Jeobá niwali suwaba namuti alí japi we machíami ju (Is. 40:22; 55:8, 9). Jepuná iʼwírima jiti ke niráami nima alí jiti newalama japi Jeobá wabé machíami ju echi yúa.
¿Piri tamó iʼwírima néwalayá japi riká Jeobá nata wabé aʼlá ju japi riká tamujé nata yúa? (Iné echi párrafo 6).d
7. ¿Piri isili Rahela jiti aʼlá niraa inema bilé echi kulíwami namuti japi nulá echi organización?
7 Bilé hermana Eslovenia bitéami, Rahela riwéami, aní japi natia japi Jeobá niwali suwaba namuti, iʼwírili aʼlá niraa inea echi namuti japi sinúrika nílisimi echoná organización; jéaní: “Isini kaachi we ni jilí nirae aʼlá niraa inea jaré namuti japi nulá echi hermanos japi Jeobá jáwili. Japi riká, tákoré ni ma ineki echi video Japi nawesa echi japi Aʼlá Niseri 2023 #8, japalí ni kulí riwaki bilé hermano chabówami nijíami nawésali, ke ni aʼlá niraa ineki. Jiti la ni raʼíchiki Jeobá yúa alí ni aneki japi tamí iʼwírima aʼlá niraa inea”. Rahela we aʼlá inámili japi Jeobá, japi niwali suwaba namuti, aʼlá machí piri ju japi nokisáré echi níwala organización. Ami ayénachó jilí niráaká aʼlá niraa inea echi namuti japi ta jipi ko sinúrika ku bichiwi o echi kulíwami namuti japi nulá echi organización, aʼlá nima japi mi kilí niraa natama japi Jeobá japi niwali suwaba namuti, we machíami ju alí we jiwérami (Rom. 11:33-36).
CHÚSIÁ JEOBÁ RIWÉ JAPI RISOA NÍLIPO
8. ¿Chúriká mi iʼwírili binea chúsiá Onorúami riwé japi ta risoa nílipo?
8 Japalí echi pagótami ke machí chúsiá Onorúami riwé japi ta risoa nílipo, we iyoa nili Onorúami yúa alí jaré ko ke bichiwi echi (Prov. 19:3). Nalí mujé ko ma bineli japi Jeobá ke isimí japi ta risoa nílipo, nalí ti risoa nili jiti ta ke sébali aʼlá nokáami ju. Ayénachó mi bineli japi Jeobá kilí buwéami ju, jiti la wiká millones pagótami machili echi alí japi isima pe aminana jiti ma ke risoa nilia pirélipo (2 Ped. 3:9, 15, TNM). Machiyá jepuná we mi kanílitili alí mi iʼwírili aminabi muliwia Jeobá.
9. ¿Chu kabú aʼlá nima japi ta checho ku natabo chúsiá Jeobá riwé japi ta risoa nílipo?
9 Ata machí japi ta kilí buwéami nísaré japalí chéami Jeobá isisa japi ta ma ke risoa nilia pirélipo. Nalí be, japalí mukusaa bilé japi ta we galé o japalí tamujé o tamó téemala ikisaa namuti we jilírami o jarecho cha riká tamó olasa, ati natáboré chúsiá Jeobá ke sapú tamó iʼwiri (Hab. 1:2, 3). Echalí aʼlá nima japi checho ku natabo chúsiá Jeobá riwé japi echi pagótami aʼláala ikimea chati namuti (Sal. 34:19).a Ayénachó aʼlá nima japi natabo japi Jeobá ma mulipi isima japi ma ke risoa nílipo.
10. ¿Piri isimí Anne ku kanílimia tákoré mukuli echi iyela?
10 Machiyá chúsiá Jeobá riwé japi ta risoa nilia pirélipo, tamó iʼwiri anachia. Bilé hermana Anne riwéami, jéaní: “Ma jaré bamíali simírili japalí nijé iyela mukuli, nijé ko we omona nilie, nalí sinibí ni newalá japi Jeobá ke isimí japi ta risoa nilia pirélipo. Echi ko suwábinili suwaba echi namuti japi tamó risoa níliti alí ku jawásinali echi japi ma suwili. Japalí ni nata jepuná jitra, we ni ku kilí nili tákoré ni a bijí we omona nili”.
11. Machiyá chúsiá Jeobá riwé japi ta risoa nílipo, ¿chúriká tamó iʼwiri jiti ke riwepo nawesia?
11 Machiyá chúsiá Jeobá riwé japi ta risoa nílipo, tamó iʼwiri jiti ke riwepo nawesia. Ma ruyesa japi Jeobá we kilí buwéami ju jiti nakí japi echi pagótami japi riwé cha nokayá niyúbitami nima, Pedro ko osali: “¡Natasi japi chúriká timí nokáami nísaré! A timí aʼlá namuti nokisáré japi riká Onorúami galé” (2 Ped. 3:11, TNM). Alí bilé echi namuti ko ju nawesia. Japi riká Jeobá, tamujé ayénachó galé echi pagótami alí ti nakí japi sinibí pirélima echoná Wichimóbachi we baʼóachi. Jiti Jeobá we kilí buwéami ju, echi ko nakí japi sinéami pagótami machimea echi jitra alí nijéwima. Alí tamujé omeri nikuuria Jeobá japalí ti nawesa alí iʼwiri wiká pagótami jiti machimea echi jitra kecho bijí suwábiachi echi chati namuti (1 Cor. 3:9).
ATI PIRÉ “WAMINÁNOMÍ RAWÉ”
12. Inea japi echi profecías ma echi riká ikísimi, ¿piri ta we aʼlá bichiwi?
12 Echi Biblia we aʼlá ruyé chúriká nima riweili echi pagótami “waminánomí rawé” (2 Tim. 3:1-5). Ineka echi namuti japi ikí, ati machí japi ma echi riká ikísimi. Alí inea aminabi we cha nokísiachi echi pagótami, tamó iʼwiri aminabi bichiwia japi echi Biblia ne bichíwali aní (2 Tim. 3:13-15).
13. ¿Piri namuti we natéami nárika nokisáré? (Lucas 12:15-21).
13 Machiyá japi ta jubá rawé piré, ayénachó tamó iʼwiri natia piri namuti nalí wabé natéami ju japi nokiboa jipi rawé. Jesús ko echi jitra raʼíchili japalí anili bilé historia japi chukú echoná Lucas 12:15-21 (leeri, TNM). ¿Chúsiá echi rijoi wiká namuti níwami “ke aʼlá nátami” anérami nili? Jiti echi rijoi ke nátili piri namuti nalí wabé natéami nili. Echi versículos aní japi echi rijoi muwéwili wiká namuti binoy olamia, nalí Onorúami ineli japi riká ko we risóati. ¿Alí chúsiá we natéami nili japi echi rijoi natama piri namuti nalí wabé natéami ju? Onorúami jéaneli: “Jepuná rokó mujé mukumea”. ¿Piri ta biné jepuná jitra? Jiti ta ma jubá rawé piré, we aʼlá ju japi ta nárika nokiboa: “Echi namuti japi ni isimí, ¿achi néwariwéliti japi ni a machí piri namuti nalí wabé natéami ju? ¿Piri namuti ni ané kini kúchuwala japi nokimea pe aminana? ¿Achi ni nee kini jiwérala, winomí alí jarecho si namuti nóchilimia Jeobá o wechi ko namuti muwéwimia?”.
14. Japi riká isili Miki, ¿chúsiá we natéami ju japi natabo japi ta jubá rawé piré?
14 Machiyá japi ta jubá rawé piré, tamó iʼwiri natia piri ti nokayá piré jipi. Echi riká ikili bilé hermana Miki riwéami. Echi ko aní: “Japalí ni suniki binea echi secundaria, ma ni we inilie siminalia echoná universidad japoná binéliwa echi namuti jákami jitra. Nalí ayénachó ni precursora nínalie alí ni siminalie biléanachó japoná newaléliwa nawésiami. Jaré hermanos tamí aneli japi ni we aʼlá natama achi ni ikírima binea alí ayénachó precursora niya. Alí tamí natárili japi echi namuti japi nirú jenaʼí wichimóbachi suwábitami nima alí japi echoná wichimóbachi we baʼóachi ani omérima binea wiká namuti jákami jitra. Jiti la ni bineki bilé namuti japi ke wiká bamíali binéliwa. Jiti ni echi riká isiki, ani omériki olayá bilé nóchali japoná ni ikírili precursora niya alí miná ko ni simiki echomí Ecuador japoná newaléliwa nawésiami”. Jipi rawé Miki alí echi kunala nocha japi riká circuito echoná país.
15. ¿Piri ta biné Santiago jitra? (Ayénachó iné echi fotos).
15 Ke ti siwésaré japalí echi pagótami ke tamó kipúnali. Ata newalásaré japi echi pagótami japi ke nijewi jipi, pe aminana mulíwimiré Jeobá. Natabo Santiago jitra japi Jesús rejimala nili. Echi ko Jesús yúa ochérili, ineli japalí Mesías nílili alí japi ke niruili bilecho we aʼlá binériami japi riká echi. Tákoré echi riká nili, echi ko ke sapú bichíwili Jesús alí echi discípulowala nili japalí Jesús ma ku owínili. Echalí jonsa, echi ko iʼwérili isili nóchilia Jeobá (Juan 7:5; Gál. 2:9).b Jiti la, ke ti natásaré japi tamujé téemala japi jipi ke kipúnali echi Biblia jitra, ke siné mulíwinalima Jeobá. Ayénachó ke ti siwésaré simíaya binérisia echi pagótami japi jipi ke kipúnali. Ata newalásaré japi ta jubá rawé piré alí ke ti riwésaré nawesia. A keʼré japi echi namuti japi mujé ané jipi, pe aminana echi iʼwírima muliwia Jeobá. Echi riká nokiméeré ayénachó ma chotásiachi echi gran tribulación.c
¿Chúsiá ti ke natásaré japi tamujé téemala ke siné mulíwima Jeobá? (Iné echi párrafo 15).e
AMINABI MATÉTARA IYABO JEOBÁ ECHI NAMUTI JITRA JAPI TAMÓ NEWALARI
16. ¿Chúriká mi iʼwírili echi namuti japi Jeobá mi newalari? (Ayénachó iné echi recuadro “Nee japi mi biné echoná Biblia iʼwírimia jarecho”).
16 Jaré namuti japi tamó bineri echi organización, niwárami ju jiti binema echi pagótami japi ke me machí echi Biblia jitra. Japi riká, echi nawésali japi nijíliwa sábado o oméachi ma, jaré artículos, videos japi uchuwi echoná jw.org alí jaré revistas, niwárami ju jiti binema echi japi ke testigo Jeobá ju. Nalí jepuná namuti ayénachó tamó iʼwiri jiti aminabi we galepo Jeobá, we bichíwipo japi aní echi Biblia alí jiti aminabi we aʼlá binéripo jarecho (Sal. 19:7).
17. ¿Chu kabú mi iʼwírima echi namuti japi mi bineli japalí mi chotásili binea echi Biblia?
17 Japi ta ma wiká bamibi japi riká testigo Jeobá, ata we kanili japalí ti biné kulíwami namuti japi ta chabé sinúrika bichíwili. Nalí ayénachó ti waʼlú matétara iyá Jeobá jiti tamó ruyé namuti we natéami japi ta bineli japalí ti chotásili binea echi Biblia. Japi riká ti ma ineli, sinéami ta omeri aminabi binea wiká namuti jepuná jitra. Japi riká, ata we jilí niráaká nijewia bilé kulíwami namuti jiti ta we bichiwi japi tamujé aboi nata o jiti ta mayé japi aʼlá ju japi riká ti aboi noká, ke ti niráami nísaré alí ti newalásaré japi Jeobá, japi tamó niwali, japi we omériami ju alí we machíami, nulá echi organización. Alí japalí tamujé o bilé téemala ikí namuti we jilírami, kilí buwéami nísaré alí ti natásaré chúsiá Jeobá riwé japi risoa nílipo. Alí ayénachó japalí ti nata piri namuti nalí wabé natéami ju japi nokiboa jipi rawé, ata natásaré japi ta jubá rawé piré alí japi ma mulipi suwábitami nima suwaba namuti chati. Jiti la, ke ti riwésaré binea echi namuti japi Jeobá tamó newalari, jiti echi riká we aʼlá nátika nokiboa alí sinibí nijéwipo Jeobá.
CANCIÓN sjj 95 Ma ti ke rukáwachi piré
a Iné echi libro We mi kanílika bitélima, echoná binelíwami 26 japi rewé “¿Chúsiá wiká chati namuti ikí alí ti we risoa nili?”.
b Iné echi folleto Galebo echi pagótami: Binéripo jiti najátima Jesús, echoná binelíwami 8.
c Iné echi artículo riwéami “¿Piri ta a machí japi chúriká Jeobá oyérima pe aminana?”, echoná oselí Echi Nawésami mayo bamíali 2024, páginas 8 aminá 13.
d JAPI RUYÉ JAPI MACHINA ECHONÁ IMÁGENES: Jaré ancianos napawika muchuwi alí bilé anciano aní japi binoy nata, nalí jarecho ancianos ke galé japi echi aní. Miná ko, echi anciano ripá sipolí inea wilí alí machí japi Jeobá nata wabé aʼlá ju japi echi nata yúa.
e JAPI RUYÉ JAPI MACHINA ECHONÁ FOTOS: Bilé hermana bineli niraa biné echi namuti jitra japi néwariwéliti japi ta jubá rawé piré, alí jepuná iʼwiri jiti raʼichánilima binoy rejimala echi Biblia jitra.