¿Ami ma bineli kanilia echi namuti jitra japi mi olá?

1. ¿Piri aniwáami ju kanilia bitea, alí piri ke aniwáami ju?

¿AMI kanila bité? Jepuná ko aniwáami ju japi mi kanili alí mi kilí bité jiti mi nata echi namuti aʼláala bi japi mi olá alí mi ke omona nili o iyoa nili jiti mi nata echi namuti jitra japi mi ke olá. Nalí kanilia bitea ke aniwáami ju japi ta ma kilí nílipo alí ma ke natabo japi chúriká ti piré. Japi riká, we aʼlá ju japi ta aminabi iʼwérili nokiboa nóchilia Jeobá (Rom. 12:1; 1 Tim. 3:1). Alí tákoré ti kecho bijí olá bilé asignación japi ta we nakí, ati aminabi we kanili.

2. ¿Chúsiá we chati ju ke kanilia echi namuti jitra japi ta olá?

² Ke ti kaníliami nísaká echi namuti jitra japi ta olá, a keʼré japi ta miná ko nokiboa namuti we chati. Japi riká, jaré wiká horas nocha ralinalia namuti japi ke ne bichíwali newalé. Ati omona nili machiyá japi jaré hermanos chikoli winomí alí jarecho namuti japi aboi olánali. ¿Chúsiá? A keʼré japi jériká nátili: “Nijé níwala nísaré echi namuti”, “Ma ni wilí buweli olamia echi namuti” o “Ani omeri toyá jepuná alí che siné ku ni nijima”. Nalí jepuná ko ju chikoa, alí Jeobá we kichí echi namuti jiti jarecho cha riká raʼichama echi riwalá jitra (Prov. 30:9). Jarecho ko we omona nili jiti ke nareli bilé asignación japi we nakili alí miná ko riweli nóchilia Jeobá (Gál. 6:9). ¿Chúsiá bilé japi testigo Jeobá ju nátili riwemia Jeobá? A keʼré japi kilipi niraa ma ke kanílili echi namuti jitra japi olá.

3. ¿Chúriká tamó iʼwiri japi aní Filipenses 4:11, 12?

³ A keʼré japi isini kaachi ati jilí niraa kanilia echi namuti jitra japi ta olá, nalí ati omeri alí binésaré echi riká nokayá. Pablo ko jéanili: “Nijeni ma bineli mápuni sinibí kanílama echi jaré namuti chopi jiti mapu ikini níwa” (leeri Filipenses 4:11, 12). Pablo osali jepuná japalí erta asali, nalí echi ko sinibí kaníliami nili. Ati jilí niráaká kanilia echi namuti jitra japi ta olá, japi Pablo anili alí japi riká biteili, néwariwéliti japi ta a omeri kaníliami niya. ¿Chúriká binepo kaníliami niya tákoré ikiyé chuwé namuti jilírami? Jenaʼí binelíwami binepo bikiá namuti japi tamó iʼwírima.

MATÉTARA NIJÍAMI NIPO

4. ¿Chúsiá ti aminabi we kaníliami nipo ati matétara nijíami nísaká? (1 Tesalonicenses 5:18).

⁴ Ati aminabi we kaníliami nipo, ata matétara nijíami nísaká (leeri 1 Tesalonicenses 5:18). Japi riká, ati ne sulachí jonsa matétara iyásaká Jeobá jiti ta olá japi ta newalé sinibí rawé, ke ti iʼwérili nokiboa olánalia echi namuti japi ta ke olá. Alí ti we natéami niraa inésaká japi ta omeri nokayá jipi nóchilia Jeobá, ati iʼwérili nokiboa we aʼlá nóchilia alí ke me natabo echi nóchali japi ta olánali. Jiti la echi Biblia aní japi matétara iyabo Jeobá japalí ti echi yúa raʼicha. Ata matétara nijíami nísaká, Jeobá tamó iʼwírima jiti kilí nílipo (Filip. 4:6, 7).

5. ¿Piri namuti jitra echi israelitas matétara iyasa riweili Jeobá? (Ayénachó iné echi dibujo).

⁵ Natabo echi israelitas jitra. Wisabé niraa naʼáwili Jeobá yúa jiti koʼnálili echi koʼwáami japi koʼali echomí Egipto (Núm. 11:4-6). A bichíwali ju japi echoná desierto we jilí nili, nalí echi israelitas a natéami niraa inélaká suwaba echi namuti japi isili Jeobá echi jitra, echi ko kanílimili. Echi ko newalasa riweili japi echi egipcios we nochárili echi alí risoa olali, nalí japi Jeobá ko niyúbili japalí júali echi 10 plagas. Japalí buyali Egipto jonsa, echi ko iyeli echi egipcios wiká namuti japi riká plata, oro alí echi chiní (Éx. 12:35, 36). Ayénachó, Jeobá ko néeli binoy jiwérala isimia japi echi israelitas simárima echoná mar Rojo, jiti ke kowirúami nima echi Faraón sontársiwala jitra. Alí japalí mochili echoná desierto, Jeobá sinibí rawé kóʼali echi maná jitra. Nalí be, ¿chúsiá ke kanílili echi israelitas? Ke nili jiti ke olali koʼwáami, nalí jiti echi ko ke matétara nijíami nili suwaba echi namuti jitra japi olali.

6. ¿Piri tamó iʼwírima matétara nijíami niya?

⁶ ¿Piri tamó iʼwírima matétara nijíami niya? Bachá, sinibí natabo echi namuti aʼláala japi ta olá. Aʼlá nima japi ta osiboa okuá o bikiá namuti japi ta jitra matétara nijí (Lam. 3:22, 23). Okuá, sinibí rawé matétara iyabo Jeobá alí jarecho si japi noká tamujé jitra (Sal. 75:1). Bikiá, napawipo echi amigos yúa japi matétara nijíami ju. ¿Chúsiá? Jiti ta napawísaká echi yúa japi matétara nijíami ju, tamujé echi riká cho nipo. Nalí, ata napawísaká echi yúa japi ke kanili echi namuti jitra japi olá, tamujé ayénachó ke kanílipo (Deut. 1:26-28; 2 Tim. 3:1, 2, 5). Ata iʼwérili nokisáaká sinibí matétara nijía, ke ti siwea nílipo jiti ta ikí namuti jilírami o jiti ta ke olá echi namuti japi ta nakí.

7. ¿Piri isili Amelia jiti ku kanílima?

⁷ Ma inepo bilé hermana jitra Amelia riwéami,a Indonesia bitéami. Echi ko jéaní: “Japalí niruili COVID-19, nijé ko inéi japi chúriká pireili jarecho hermanos alí miná ko ni inéi chúriká ni bité, jepuná isili japi ni ma ke kanílima” (Gál. 6:4). ¿Piri iʼwírili echi hermana? Echi ko jéaní: “Ani nátiki echi namuti aʼláala japi ni naré sinibí rawé alí japi ni ikí jiti ni atí echoná Jeobá puéblowala. Miná ko ni matétara iyaki Jeobá alí jepuná tamí iʼwírili ku kanilia”. Nokayá japi riká Amelia, tamó iʼwírima ati ayénachó ke kanílisaká japi riká ti piré.

KE NIRÁAMI NIPO

8. ¿Piri ikili Baruc?

⁸ Siné kaachi Baruc, japi iʼwíriami nili echi profeta Jeremías, ke kanílili japi riká biteili. Echi ko olali bilé nóchali we jilírami, japi nili iʼwiria Jeremías osayá japi ikimea echi israelitas jiti ke nijéwili Jeobá. Nalí miná ko ma ke natéami niraa ineli echi nóchali japi Jeobá iyali alí chotásili binoy niraa natia alí echi namuti japi echi isínali. Jiti la Jeobá ko busuré iyali echi profeta Jeremías jitra; jéaneli: “Mujé ko aa iyena weli namuti japi mi korú. Riwé aa echi namuti” (Jer. 45:3-5). Jepuná ko nili japi riká ko anea: “Kanili echi namuti jitra japi mi olá”. Baruc nijéwili echi busuréliami alí aminabi Jeobá amígowala nili.

9. ¿Piri tamó bineri japi aní 1 Corintios 4:6, 7? (Ayénachó iné echi imágenes).

⁹ Isini kaachi bilé hermano natámiré japi narésaré bilé nóchali. A keʼré echi ko we machí isiá jaré namuti, we nóchami ju alí wiká bamíali olá nóchilia Jeobá, o a keʼré echi bikiánika namuti. Nalí tákoré echi riká ju, a keʼré japi jarecho nalí iyárami nima echi nóchali japi echi olánali. ¿Piri iʼwírima echi hermano jiti ke omona nílima? Echi ko newalásaré echi busuréliami japi Pablo osali echoná 1 Corintios 4:6, 7 (leeri, TNM). Suwaba echi nóchali alí echi namuti aʼláala japi ta olá, Jeobá tamó iyá. Jiti la, ke ti natásaré japi ta naré echi namuti jiti ta aboi we aʼlá nokáami ju, nalí jiti Jeobá we aʼláala ju alí we tamó galé (Rom. 12:3, 6; Efes. 2:8, 9).

10. ¿Piri tamó iʼwírima ke niráami niya?

¹⁰ Natia echi Jesús jitra tamó iʼwírima ke niráami niya. Newalabo japi echi ko pabákili echi apóstoles ronola, tákoré Onorúami Nolá nili alí wilárami nili japi riká walubéala niraa. Echi apóstol Juan osali echi Jesús jitra: “Binói galá machili mapurigá Onorúami ma wilali Binói ne bachá wilíami Walubela niráa. [...] Binói chótali pabákiya echi jaré mapu Binói binérali ralálachi” (Juan 13:3-5). Jesús ke siné nátili japi echi discípulos nalí pabákisaré echi binoy ronola alí japi echi wiká namuti olásaré alí simárika bitélisaré (Luc. 9:58). Echi ko ke niráami nili, jiti la we kanílili echi namuti jitra japi olali. Echi riká tamó binérili chúriká ti nokisáré (Juan 13:15).

11. ¿Piri iʼwírili Dennis jiti ku kanílima?

¹¹ Bilé hermano Dennis riwéami, Países Bajos bitéami, aní japi iʼwérili isimí ke niráami niya japi riká Jesús, nalí isini kaachi jilí niraa. Echi ko aní: “Japalí ni iné japi jarecho naré echi nóchali japi ni olánali, isini kaachi ke ni kanili alí ni iyoa nili. Japalí ni echi inili, ani biné echi cualidad jitra japi ni ke niráami nísaré. Echoná JW Library^®, ani uchúchali wiká etiquetas echi textos japi raʼicha echi jitra, jiti echi riká ni sapú riwimea alí ni checho ku leérima. Ayénachó echoná teléfono ani olá jaré nawésali japi raʼicha echi jitra.b Ani bineki japi suwaba japi ta noká ju jiti ta walubéala anénali Jeobá alí ke ko tamujé aboi. Echi nóchali japi ta noká Jeobá níwala ju alí echi tamó riwé japi echi iʼwíripo”. Isini kaachi ati inílisaká japi riká echi hermano, iʼwérili nokiboa ke niráami niya. Echi riká ti nokisáaká, aminabi ti we aʼlá Jeobá amígowala nipo alí we kanílipo (Sant. 4:6, 8).

NATABO JAPI JEOBÁ ISIMA PE AMINANA

12. ¿Piri namuti japi ikimea pe aminana tamó iʼwírima jiti kaníliami nipo tákoré ikí namuti jilírami? (Isaías 65:21-25).

¹² Ati natásaká echi namuti aʼláala japi Jeobá tamó iyama pe aminana, jepuná tamó iʼwírima jiti we kaníliami nipo tákoré jipi ikí namuti we jilírami. Jeobá ko we aʼlá machí japi we jilí ju pirelia jenaʼí wichimóbachi jipi jubá rawé, jiti la echoná libro Isaías tamó ané japi suwábima suwaba echi chati namuti japi ta ikí (leeri Isaías 65:21-25). Echoná kulíwami wichimóbachi, sinéami olabo kalí we baʼóami japoná we kanílika pirélipo, olabo nóchali japi tamó kaníliti alí koʼwáami we raʼíami. Ke ti siné majabo japi tamujé o tamó kúchuwala ikimea namuti chati (Is. 32:17, 18; Ezeq. 34:25). Japi riká pirélipo pe aminana we semati nima, alí a ne bichíwali echi riká ikimea.

13. ¿Chu kabú ti aminabi newalé natia japi Jeobá isima pe aminana?

¹³ We natéami ju japi jipi aminabi we natabo echi namuti japi Jeobá isima pe aminana. ¿Chúsiá? Jiti ta jubá rawé piré alí sinéami ti ikí namuti we jilírami (2 Tim. 3:1). Jeobá tamó iʼwiri anachia nijika echi busuréliami japi ta newalé alí echi jiwérala (Sal. 145:14). Ayénachó echi namuti japi Jeobá isima pe aminana, tamó iʼwiri anachia echi namuti jilírami japi ta ikí ibili tamujé. Japi riká, a keʼré japi ta jiwérika noká nochia jiti olabo japi ta newalé echoná bitichí. Nalí ayénachó ti machí japi ke sinibí echi riká nima, jiti Jeobá tamó aneli japi echoná wichimóbachi baʼóachi tamó iyama suwaba japi ta newalé alí che wikabé (Sal. 9:18; 72:12-14). Ami sinibí rawé okoa níliré o nayúeré echi nayulí jitra japi we chati ju o echi depresión. Nalí jepuná ke aniwáami ju japi mi sinibí echi riká bitélima, jiti Jeobá ma anili japi echoná wichimóbachi we baʼóachi ma ke bilé nayuma alí ke bilé mukumea (Apoc. 21:3, 4). Natia jepuná tamó iʼwiri jiti ke siwea nílipo o ke iyoa nílipo echi namuti jitra japi ta ikí. Tákoré jarecho tamó cha olá, ati nayú, bilé japi ta we galé mukú o ati ikí chuwé namuti jilírami, ati omeri kaníliami niya. ¿Chúsiá? Jiti ta machí japi echi namuti japi ta ikí, ke wilí rojorama alí echoná wichimóbachi baʼóachi ma ke nirúlima japi tamó risoa níliti (2 Cor. 4:17, 18).

14. ¿Piri tamó iʼwírima we bichiwia japi ne bichíwali ikimea japi Jeobá isima pe aminana?

¹⁴ Natia japi ikimea pe aminana tamó iʼwírima we kanilia. Jiti la, ¿piri tamó iʼwírima we bichiwia japi ne bichíwali ikimea japi Jeobá isima pe aminana? Natabo jepuná: japi riká bilé pagótami japi iyena echoná bilé cuarto japi we rukawa wilí, newalé rajea echi luz jiti machílima, echi riká cho tamujé ati nokisáré jaré namuti japi tamó iʼwírima jiti ta inílipo japi riká ko ti ma pirea echoná wichimóbachi baʼóachi. Japi riká, ati omona níliaká jiti ta ke olá echi namuti japi ta newalé, natabo japi pe aminana ma ke newalepo winomí, ma ti ke wikaboa alí ke risóati nipo. Alí, ata omona níliaká jiti ta ke nareli jaré asignaciones japi ta olánali, natabo japi echi namuti ma ke me natéami niraa inepo japalí ma sébali aʼlá nokáami nisa alí ti ma wiká miles bamíali olasa nóchilia Jeobá (1 Tim. 6:19, TNM). A keʼré japi ta ikí namuti we jilírami alí ti jilí niraa natia japi ikimea pe aminana. Nalí echi riká ti nokisáaká, pe aminana ma ke jilí nirabo echi riká nokayá.

15. ¿Piri mi biné Christa jitra?

¹⁵ Ma inepo japi ta biné Christa jitra, echi Dennis upila, japi ta jitra bineki echoná párrafo 11. Echi ko aní: “Ani nayú bilé nayulí we chati jitra japi isimí japi ni ke omérima iyenia alí ni nee echi silla de ruedas. Ne sojí sinibí boʼiká bi ni simiri echoná cama alí sinibí ni we okoa nili. Ne kulí echi doctor tamí aneki japi ni ke ku saʼwimea, alí ni sapú nátiki: ‘Echi doctor ke machí japi ni ma mulipi ku saʼwimea echoná wichimóbachi we baʼóachiʼ. Natia echi namuti japi ikimea, tamí iʼwiri jiti ni kilí nílima. Jipi rawé, ani anachásaré jepuná namuti jilírami, ¡nalí echoná wichimóbachi baʼóachi, ani sinibí we kanílika bitélima!”.

“JAPI JEOBÁ NIJÉWAMI JU KO SINIBÍ OLAMA JAPI NEWALÉ”

16. ¿Chúsiá David anili “japi Jeobá nijéwami ju ko sinibí olama japi newalé”?

¹⁶ A keʼré japi jipi ata kanila, nalí ata ikiboa namuti we jilírami. Natabo echi silíami David jitra. Echi ko olali bikiá kúchuwala japi suwili alí a keʼré che jaré japi ta ke machí. Ayénachó cha riká raʼichárami nili echi jitra, echi amígowala cha olali alí echi sayérala wiká bamíali najátili jiti miʼlinali. Tákoré ikili wiká namuti we jilírami, echi ko a we kanila biteili. Jiti la, echi ko anili: “Japi Jeobá nijéwami ju ko sinibí olama japi newalé” (Sal. 34:9, 10). ¿Chúsiá David echi riká anili? Jiti Jeobá sinibí tamó iyá japi ta newalé, tákoré isini kaachi riwé japi ta ikiboa namuti we jilírami (Sal. 145:16). Japi riká David, tamujé ayénachó kanili jiti ta we bichiwi japi Jeobá ke siné tamó riwema, tákoré ikiyé namuti we jilírami.

17. ¿Chúsiá mi kanílika bitélinali tákoré isini kaachi mi ikí namuti jilírami?

¹⁷ Jeobá nakí japi ta kaníliami nipo (Sal. 131:1, 2). Jiti la ti iʼwérili nokisáré matétara nijíami niya, ke niráami niya alí natia echi namuti japi Jeobá isima pe aminana. Echi riká ti nokisáaká, ati oméripo jéaniyá: “Nijeni ma bineli mápuni sinibí kanílama” (Filip. 4:11).