Sapú iʼwíripo echi pagótami japi a sinibí pirélinali

1. ¿Piri noká echi pagótami japalí ti nawesi? (Hechos 13:47, 48; 16:14, 15).

ECHALÍ bachá siglo, wiká pagótami sapú bichíyami nílili japalí nawisárami nili echi raʼíchali aʼláala (leeri Hechos 13:47, 48, TNM; 16:14, 15, TNM). Jipi rawé ayénachó nirú pagótami japi kanílika kipú echi raʼíchali aʼláala japalí kulí nawisárami ju. A keʼré japi echi pagótami japi kulí ko ke kipúnali, miná ko kipúnilima alí binénilima Onorúami jitra. Japalí ti nawesia jari alí ti riwisáaká pagótami japi kipúnali echi raʼíchali aʼláala, ¿piri ta nokisáré?

2. ¿Chúsiá ti aní japi nawesia ko ju japi riká ko tibúa bilé ichirúami?

² Nawesia echi pagótami ko ju japi riká ko tibúa bilé ichirúami. Japalí echi icháami ichá namuti alí we aʼlá tibú japi ichali, a keʼré japi echi ko inema japi jaré ma waali echi rakala, jiti la echi ko sapú ʼwi japi ichali. Echi riká cho, japalí ti iʼwiri bilé pagótami inamia echi namuti we natéami japi bineri echi Biblia, a keʼré japi ta riwiboa jarecho pagótami japi a binénali, jiti la ti iʼwérili noká sapú iʼwiria (Juan 4:35, 36). Ati we aʼlá inéami nísaká, ati we aʼlá machiboa chúriká ju echi pagótami alí echi riká ti machiboa chúriká iʼwíripo ibili niraa. Jepuná binelíwami binepo piri ta nokisáré japalí ti kulí raʼicha echi pagótami yúa echi a binénalaká. Ayénachó binepo chúriká iʼwíripo jiti aminabi mulíwima Jeobá.

ECHI PAGÓTAMI A BINÉNALAKÁ ECHI BIBLIA JITRA

3. Ati riwisáaká bilé pagótami japi a binénali echi Biblia jitra, ¿piri ta nokisáré? (1 Corintios 9:26).

³ Japalí ti nawesia jari alí ti riwisáaká bilé pagótami japi a binénali echi Biblia jitra, ati sapú iʼwírinali jiti mulíwima Jeobá. Japalí ti kulí chotasi raʼichia bilé yúa, sapú náripo achi binénala echi Biblia jitra alí bayepo echoná napawíliwachi. Isimia jepuná ke wilí buwepo (leeri 1 Corintios 9:26, TNM).

4. ¿Chu iyiri ejemplo néwariwéliti japi nirú pagótami japi sapú chotásimi binea echi Biblia?

⁴ Nari achi binénala echi Biblia. Nirú pagótami japi sapú chotásimi binea echi Biblia. Ma inepo japi ikili echomí Canadá. Siné rawé jueves, bilé tiwé mulíwili echoná carrito alí ujuli echi folleto We mi kanílika bitélima. Echi hermana japi echoná wilili, ruyeli japi néeka echi folleto binériwa echi pagótami. Echi tiwé ko anili japi a binénali alí iyali binoy níwala número echi hermana. Miná ko echalí rawé, echi tiwé ko júulili bilé mensaje echi hermana nárimia chu kabú binoy binérima. Echi hermana ko aneli japi echi ko omérima sábado o oméachi, nalí echi tiwé ko anili: “¿Chúsiá mi ke baʼalí nawá? Ani ikírima”. Baʼalínala rawé chotásili binea echi Biblia alí echalí tarali oméachi rawé, echi ko simili echi bachá napawíliwachi alí aminabi we mulíwisili Jeobá.

5. ¿Piri ta newalásaré japalí ti nari bilé achi binénali echi Biblia jitra? (Ayénachó iné echi fotos).

⁵ A bichíwali ju japi ke sinéami japi ta nawesi binénilima echi Biblia jitra japi riká echi tiwé. Nalí ati newalásaré japi isini kaachi a newalema japi ta chotásipo ruyea jaré namuti jitra japi echi pagótami machinali. Nalí ati natásaká japi echi pagótami a kipúnilima alí binénilima, a keʼré japi ta sapú chotásipo bineria bilé echi Biblia jitra. ¿Chúriká náripo bilé achi binénali? Echi riká náritami nili jaré hermanos alí hermanas japi we machí chotasia bineria echi pagótami echi Biblia jitra. Ma inepo piri anili.

6. ¿Piri anepo echi pagótami jiti nakimea japi ta checho ku roʼipo echi yúa?

⁶ Jepuná publicadores alí precursores, aní japi jaréanamí wabé aʼlá ju ke aniyá echi raʼíchali bineria o binea, nalí wabé aʼlá ju aniyá raʼichia alí we aʼlá machiyá echi Biblia. Jiti anepo echi pagótami japi ta checho ku simánali echi yúa, echi ko aní japi wabé aʼlá ju aniyá jepuná: “We semati ju machiyá japi echi Biblia we aʼlá ruyé japi ta sinibí nárika nokali” o “Echi Biblia ke bi raʼicha echi namuti jitra japi noká echi religiones, ayénachó uchuwi busuréliami japi ta newalé”. Ayénachó ti omeri jériká aniyá: “10 o 15 minutos bi, mujé ko omeri binea wiká namuti japi mi iʼwírima”. Ke natéami ju japi ta ruyepo echi pagótami japi ta sinibí tarali simabo echi yúa, jiti echi riká echi pagótami ke inílima japi sinibí napawísaré tamujé yúa.

7. ¿Chu kabú machí echi pagótami japi riwali echi bichíwali? (1 Corintios 14:23-25).

⁷ Bayé echoná napawíliwachi. Japalí echi apóstol Pablo biteili, niruili pagótami japi machili japi riwali echi bichíwali japalí kulí chotásili simíaya echoná napawíliwachi (leeri 1 Corintios 14:23-25, TNM). Jipi rawé echi riká cho ikí. Wiká pagótami sapú mulíwisimi Jeobá japalí chotásimi simíaya echoná napawíliwachi. Jiti la, ¿chu kabú bayepo? Echi libro We mi kanílika bitélima, binelíwami 10, ruyé echi jitra. Nalí ke ti buwésaré sibamia echi binelíwami bayemia echi pagótami echoná napawíliwachi. Ati omeri bayea echi napawíliwami japi ju sábado o oméachi ma, japalí ti kulí nawesi. Alí ayénachó ruyepo echi nawésali jitra japi nijírami nima echoná napawíliwachi o echi binelíwami jitra japi binéporé echoná oselí Echi Nawésami.

8. Ati bayésaká bilé echoná napawíliwachi, ¿piri ti ruyésaré? (Isaías 54:13).

⁸ Japalí ti bayesa echi pagótami, ruyepo japi riká ti noká echoná napawíliwachi ke ju japi riká noká jarecho religiones japi a keʼré echi machí. Japalí bilé binéami kulí simili echoná napawíliwachi alí ineli chúriká binéliwa echi oselí Echi Nawésami, echi ko jériká nárili echi japi binoy binerie: “Echi japi nari, ¿a machí sinéami pagótami riwalá?”. Echi hermana ko ruyeli japi sinéami echoná congregación ju japi riká téemala, jiti la ti iʼwérili noká machiyá ibili echi riwalá. Echi binéami ko anili japi echoná iglesia ne sojí ke bilé machí jarecho pagótami riwalá. Wiká pagótami ayénachó ke machiyéeré piri ti noká echoná napawíliwachi, jiti la we aʼlá ju japi ta ruyepo (leeri Isaías 54:13). Ati napawí walubéala anemia Jeobá, binemia echi jitra alí iʼwérili iyamia anakupi niraa (Heb. 2:12; 10:24, 25, TNM). Jiti la, echoná napawíliwachi ati noká wiká sinúrika namuti binemia Onorúami jitra, nalí ke japi riká noká jarecho religiones (1 Cor. 14:40). Echoná salón japoná ti simía, we aʼlá machía wilí jiti ta simía binemia echi Biblia jitra. Ayénachó jiti ta neutrales ju, ke ti raʼichi echi política jitra alí ke ti bilé echi iʼwiri. Echoná napawíliwachi ke ti naʼawi alí ke ti weli siná. Jiti echi pagótami machimea chúriká ju japoná ti napawí, ati omeri riwiria echi video japi rewé ¿Chu nokiwá japoná napawíliwa?

9, 10. Ati bilé bayésaká echoná napawíliwachi, ¿piri nokiboa jiti kanila simírima? (Ayénachó iné echi foto).

⁹ Jaré pagótami ke simánali echoná napawíliwachi jiti majawá japi jaré anema japi Testigo nílisaré. Jiti la ruyepo echi pagótami japi sinéami omeri moʼiyá kipumia; echi a nakiyáaká, omeri bakiyá alí ke bilé iʼwérili anema japi nijima bilé comentario o japi Testigo nílima. Ke rojaa niwáliwa echi napawíliwami echi kuuchi yúa, jiti la echi téemala omeri simíaya alí napawika mochía binea. Echi riká echi wénwala machimea kumi muchuwi aboi kúchuwala alí piri biné (Deut. 31:12). Ayénachó ke ti taa winomí jiti ta noká japi riká Jesús anili: “Jiti timí nareli ke bilé natétika, nijisi ke bilé namuti taka” (Mat. 10:8, TNM). Ayénachó ti omeri ruyea echi pagótami japi ke newalé we natéami napacha uchaká simiyá echoná napawíliwachi, jiti Onorúami ko iné echi pagótami sulala, ke ko chúriká napáchika simía (1 Sam. 16:7).

¹⁰ Echi pagótami a simisáaká echoná napawíliwachi, iʼwérili nokiboa jiti kanila simírima. Ruyepo echi ancianos alí jarecho si hermanos chu riwéami ju echi pagótami. Ati nokisáaká japi echi pagótami kanila simírima, a keʼré echi ko checho ku roʼima. Japalí ma kaachi napawíliwami, echi pagótami ke olásaká Biblia, riwíripo echi textos tamó níwala Bíbliachi alí ruyepo kumi ju japi leeri.

MA TI CHOTÁSISAKÁ BINERIA BILÉ

11. Ma ti chotásisaká bineria bilé echi Biblia jitra, ¿piri ti newalásaré?

¹¹ Ma ti chotásisaká bineria bilé echi Biblia jitra, ¿piri ti newalásaré? Japi echi pagótami olá wiká jarecho namuti japi isísaré alí ti binérisaré bi echi ikí minutos japi echi ikiri alí japalí ikiri. Japi riká, ma ti anésaká chu iyiri hora simabo echi yúa, iʼwérili nokiboa simíaya echi hora, tákoré echi pagótami echoná piréami ke natéami niraa iné echi riká nokayá. Ayénachó japalí ti kulí simía, aʼlá nímiré japi teeli raʼichabo echi yúa. Jaré hermanos alí hermanas japi ma wiká pagótami binérili echi Biblia jitra, aní japi we aʼlá ju teeli raʼichia echi yúa, tákoré echi pagótami aminabi raʼichánali. Alí kiti we raʼichabo, nalí riwepo japi echi pagótami animea japi echi nata (Prov. 10:19).

12. ¿Piri ta buwé japalí ti bineri bilé pagótami echi Biblia jitra?

¹² Ne kulí jonsa japalí ti chotasi bineria bilé pagótami echi Biblia jitra, tamujé ko nakí japi galema Jeobá alí Jesús. Jiti echi riká nokiboa, binéripo japi aní echi Biblia, ke ko japi tamujé aboi nata (Hech. 10:25, 26). Echi apóstol Pablo ko sinibí binérili Jesús jitra, echi japi Jeobá júali tamó iʼwírimia machiyá echi alí galea (1 Cor. 2:1, 2, TNM). Pablo ruyeli japi we natéami ju iʼwiria echi binéami jiti olama we aʼlá cualidades, japi ju japi riká oro, plata alí echi rité we semati (1 Cor. 3:11-15). Jaré echi ko ju bichiwia, machíami niya, aʼlá nátika isíami niya alí kichía echi namuti japi omonáriti Jeobá (Sal. 19:9, 10; Prov. 3:13-15; 1 Ped. 1:7, TNM). Nokiboa japi riká Pablo alí iʼwíripo echi binéami jiti we bichíyami nima alí we aʼlá Jeobá amígowala (2 Cor. 1:24).

13. ¿Piri nokiboa jiti néwariwélitipo echi binéami japi ta kilí ju alí inami piri nata? (2 Corintios 10:4, 5; ayénachó iné echi foto).

¹³ Kilí niraa binéripo echi binéami japi riká Jesús isili alí iʼwérili nokiboa inamia piri nata. Kiti náripo namuti japi ke kanílitima. Ati inésaká japi jilí niraa inamia jaré namuti japi bineri echi binelíwami, aminabi binepo alí miná ko checho ku roʼipo echoná binelíwami. Ati inésaká japi jilí niraa inamia jaré busuréliami japi aní echi Biblia, kiti iʼwérili anepo, nalí kilí niraa buwepo jiti echi binéami aboi natama chúsiá we aʼlá ju nijewia japi aní echi Biblia (Juan 16:12; Col. 2:6, 7). Echi Biblia aní japi echi namuti ke bichíwali japi binériliwa ko ju, japi riká bilé namuti japi we jiwérami ju alí japi ta najunásaré (leeri 2 Corintios 10:4, 5, TNM). Jiti echi binéami isima japi biné, ati bachá iʼwírisaré jiti bichíwima Jeobá (Sal. 91:9).

ECHI PAGÓTAMI SIMISÁAKÁ ECHONÁ NAPAWÍLIWACHI

14. ¿Chúriká nokisáré echi yúa japi kulí sii echoná napawíliwachi?

¹⁴ Jeobá ko nakí japi ta galepo sinéami echi pagótami japi sii echoná napawíliwachi, kumi ke japoná piréami ju, chúriká piréami ju o chu ikí winomí olayé (Sant. 2:1-4, 9). Jenaʼí binepo jaré namuti japi chúriká echi riká nokiboa.

15, 16. ¿Piri nokiboa jiti kanila simárima echi japi kulí sii echoná napawíliwachi?

¹⁵ Jaré pagótami simía echoná napawíliwachi jiti inénali piri nokiwá o bilé bayeli japi ke mulipi bitéami ju. Jiti la, ati inésaká japi bilé pagótami kulí nawá echoná salón, mulíwipo echi alí yúa raʼichabo, simá nokáami nipo alí nokiboa japi kanila simírima. Ati omeri bayea japi tamó yúa asimea. Áalipo bilé Biblia alí jarecho si publicaciones, o riwíripo echi japi ta olá. Natabo piri jarecho si namuti ati nokisáré jiti echi pagótami kanila simírima. Japi riká, bilé rijoi japi kulí simili echoná salón, newalá japi riwélali jiti inílili japi echi napacha japi uchaká simili, ke chopi riká nili jarecho yúa japi echoná napawili. Jiti kilí nílima, echi hermano ko aneli japi ke chibi lama jiti echi testigo Jeobá ko ju japi riká chuwé pagótami. Jepuná rijoi ko pakoli alí sinibí newalá japi riká isili echi hermano. Tákoré ti echi riká nokayé echi pagótami yúa japi kulí sii echoná napawíliwachi, ati we aʼlá tibuka nokisáré jiti ke náripo namuti japi cha nílitima echi pagótami (1 Ped. 4:15).

¹⁶ ¿Piri jarecho si namuti nokiboa jiti echi pagótami japi kulí sii echoná napawíliwachi kanila simárima? Ati riwíwika niraa raʼichánali suwaba echi namuti jitra japi ta aní echoná salón. Ke aniboa namuti japi cha nílitima jarecho o japi isima japi ma ke ku roʼínalima (Tito 2:8; 3:2). Japi riká, ke ti cha riká raʼichánali echi namuti jitra japi echi pagótami bichiwi (2 Cor. 6:3). Echi hermanos japi nijí nawésali, we aʼlá tibuka nokisáré jepuná jitra. Ayénachó newalásaré echi pagótami jitra japi kulí sii echoná salón, japalí ruyé jaré raʼíchali japi tamujé nee alí japi echi jilí nirama inamia.

17. Ati riwisáaká bilé japi a machinali Onorúami jitra, ¿piri nokiboa?

¹⁷ Sinibí rawé aminabi wabé natéami nílisimi nawesia alí ati aminabi ritiwá echi pagótami japi a sinibí pirélinali (Hech. 13:48, TNM). Jiti la, ati riwisáaká bilé japi machinali echi Biblia jitra, sapú náripo achi binénali alí bayepo echoná napawíliwachi. Echi riká iʼwíripo jiti echi pagótami chotásima simiyá “echi buwé japi bitéliwami too” (Mat. 7:14, TNM).