Ata iʼwiri japalí risoa ikisaa

Echi bamíali 2020, niruili wiká namuti japi risoa nílitili echi pagótami alí chotásili echi nawilí COVID-19. ¿Piri nokali echi testigo Jeobá iʼwiria japi risoa nili?

Bamíali 2020,a echi hermanos Comité de Coordinadores japi nocha echi japi Aʼlá Niseri yúa a katúwili japi néema 28 millones de dólaresb jiti iʼwírima echi pagótami japi risoa nili. Jepuná winomí ko néeri iʼwiria echi pagótami japi risoa nili echi namuti chati jitra aminá 200 simírika, japi riká echi nawilí COVID-19, wiká ciclones tropicales niruili, we ukuli echomí África, ke me nirúili koʼwáami echomí Venezuela alí echomí Zimbabue ke ukuyé. Echi winomí jitra ralali koʼwáami, baʼwí, napacha alí sipucha, japi newalé echi doctores, niwayá alí akarewia japoná pirélima. Ayénachó ralali jaré namuti japi jitra biʼwama echoná bitichí, ku atewia alí niwayá echi kalí. Ma inepo jaré ejemplos chúriká iʼwírili echi pagótami japi risoa nili.

COVID-19. Omáana Wichimóbachi, echi nawilí jitra a nayuli echi hermanos alí risoa niili, alí ke olali winomí. Jiti bela niruili aminá 800 Comités de Socorro iʼwiria echi pagótami. Echi hermanos japi nocha echoná comités a inésimi japi newalé echi hermanos alí ruyé echi hermanos japi nocha echoná Comité de Coordinadores jiti echi ko julama echi namuti japi newaléliwa.

Echi chabé bamíali, echi hermanos japi nocha echoná Comité de Socorro iʼwírili jiti echi pagótami olama koʼwáami, baʼwí, japi jitra biʼwama echoná bitichí, japi newalé echi doctores. Alí jaréanami japoná piré echi pagótami nóchili echi ancianos yúa japi echoná piré jiti echi hermanos ayénachó kuʼíritami nima echi silíami jitra.

Echi pagótami japi ke testigo Jeobá ju, ayénachó ineli japi ta iʼwírili echi pagótami japalí risoa niili. Japi riká, Field Simwinga, japi nuláami policía ju echomí Nakonde (Zambia), aneli echi hermanos: “Ati we kanili alí timí matétara iyá jiti timí iʼwírili echi pagótami japi newaleli”.

Ke me niruili koʼwáami echomí Angola. Jiti niruili echi nawilí COVID-19, echomí Angola ke me niruili koʼwáami, alí aminabi we natétili raliwá, jiti bela echi hermanos ko we jilíe olayá japi jitra koʼmea.

Jiti bela, tániri echi hermanos japi sucursal Brasil muchuwi japi iʼwírima echi hermanos Angola piréami koʼwáami júulika. Jiti we aʼlá néema echi winomí, echi hermanos ko we aʼlá nátili chúriká ralimea alí júulima echi koʼwáami, jiti bela wiká koʼwáami ralali. Ibili niraa echi kit japi koʼwáami olali raliwá alí júuliwa nateli 22 dólares. Ibili kit nokí 20 kilos nili (44 libras) japi koʼwáami olali japi riká arroz, muní, alí aceite. Jipi jonsa a juláari 33,544 kits, echi ko ju 654 toneladas (721 toneladas americanas). Suwaba jepuná alí japi jarecho si namuti ralali echomí, iʼwírili jiti aminá 50,000 pagótami olama koʼwáami.

¿Chu nili echi hermanos? Alexandre, japi bité echomí Angola biléanami japoná we miká ju, aní: “We ni aʼlá machí japi Jeobá ko we tamí nakí, japi ni ke bineli ju alí japi sinéami echi hermanos we tamí galé”. Mariza, echi ko kuuchi olá nalí ke rijówami ju, aní: “Jeobá ko a ipuli japalí ni yúa raʼíchali. Ani matétara iyá Jeobá alí echi hermanos”.

Zimbabue ke ukuyé. Echi bamíali 2020, wiká michá nili japi ke ukuli echomí Zimbabue, wiká millones pagótami nili japi nokí suwili lochea. Ayénachó wiká hermanos nili japi ke me olali japi koʼmea.

Niruili 5 Comités de Socorro jiti echi riká júulima koʼwáami echi hermanos. Wiká ciento hermanos si nakúurili kariwea echi koʼwáami, ayénachó muchuwia echoná trókachi alí jarecho ko tanéwili echi troka.c Echi bamíali 2020, suwábili 691,561 dólares iʼwiria jiti aminá 22,700 pagótami olama koʼwáami.

Isini kaachi, japalí iʼwíritami nili echi hermanos ko ma ke che olayé koʼwáami. Jiti bela echi hermanos matétara iyali Jeobá alí ayénachó jaré echi hermanos wikarali Jeobá we kanílika.

Okuá hermanas japi echi kunala ko mukuli simíali japoná nirú bilé napawíliwami japoná aboi piré, echoná nawisama riké chúriká iʼwíritami nima bilé organización jitra japi ke silíami níwala ju (ONG). Nalí be, echoná napawíliachi chotásili política jitra raʼicha, alí echi hermanas ko nátili japi ke nokimea japi aniyé echoná, tákoré ke iʼwíritami ke. Japalí echi ko ma ku simíayé, sinéami echi pagótami achiyé echi jitra alí jéaneli: “Kiti ku si sili tamó tánisia koʼwáami”. Nalí be, pe aminana okuá tarali simírisa, echi hermanos ko sili echomí alí koʼwáami iyali echi hermanas... nalí echi ONG ko kecho siyé kuʼírisia.

Echoná Zimbabue echi pagótami japi ke testigo Jeobá ju, ayénachó ineli japi ta iʼwírili echi pagótami japalí risoa nili. Ma inepo japi ikili Prisca, japi bité echoná pueblo japoná okuabi pagótami piré. Tákoré we jilí nili jiti ke ukuyé, Prisca ko simiyé binérisia echi pagótami echi Biblia jitra miércoles rawé alí viernes, ayénachó tákoré ichiwáachi ke. Echi pagótami echoná piréami echi ko achiyé echi jitra alí jéanelie: “¡Ami miʼama mujé téemala lochea jiti mi bineria iyena japi aní echi Biblia!”. Prisca ko jéaneli: “Jeobá ko ke siné riwé japi nijéwami ju”. Pe aminana echi hermanos júali koʼwáami. Jaré pagótami ke mayeli japi echi riká ikimea jiti bela jéaneli: “Onorúami ko ke siné mi riweli. Jiti bela tamujé ko atí binénili Onorúami jitra”. Jipi ko kichao pagótami kipú echi napawíliami japi niwá echi testigo Jeobá radio néeka.

Jiti ta aminabi kuwachimi rawé pirélisimí, a aminabi nirúlisima echi namuti chati japi risoa nílitima echi pagótami (Mateo 24:3, 7). Ati mi waʼlú matétara iyá jiti timí we kanílika nijí echi winomí echoná página internet donate.jw.org. Echi winomí ko néerami nima jiti iʼwírima echi hermanos japi we risoa nílika piré.