Omáana wichimóbachi nijí iʼwírili japalí nirú echi pandemia

Marzo inárachi 2020 echi Organización Mundial de la Salud nawésali echi pandemia COVID-19, pe kuabi pagótami ko a nátili japi jepuná nayulí COVID-19 ko a rojorama aminá bilé bamíali. Na pandemia jitra milloni pagótami alí testigo Jeobá si a nayuli, we siwéami nílili alí ke me iteli winomí. ¿Chúriká nokali echi testigo iʼwírimia echi hermanos?

Nareli iʼwírili japi newalé

Echi Comité de Coordinadores japi nocha echi japi Aʼlá Niseri yúa testigo Jeobá jitra, anili japi nirúlima 950 Comités japi Nakuuri omáana wichimóbachi jiti kuʼíroma echi hermanos echi nayulí jitra. Isini kaachi echi Comité japi Nakuuri iʼwírili echi hermanos, we be nalí, ayénachó a nareli echi iʼwírili japi nijá echi weli isélikami. Ayénachó echi Comité japi Nakuuri iʼwiri echi hermanos japi jaréanacho piré.

Ma inepa chu ikili echomí Paraguay piréami. Bilé periódico aní japi echi nayulí jitra echi pagótami ma ke olali winomí japi jitra ralimea echi koʼwáami. Echi Comité japi Nakuuri echomí Paraguay, a nijili paquetes japi olayé namuti japi newaleli alí rojorama okuá tarali. Ibili paquete natéami nili 30 dólares, japi olayé koʼwáami alí namuti japi jitra biʼwama bilé niwíkami okuá kúchuwami.

¿Piri nokali echi hermanos japi nikúurili jiti ke nayuma echi COVID-19 alí ayénachó jiti kuʼíroma jarecho jiti ke nachuma echi nayulí? Néeka echi cubrebocas alí ke mulíwika anakupi. Tibúliwa japi echi pagótami japi too echi koʼwáami sinibí we biʼwíami nima. Ayénachó we aʼlá tibúliwa echi pagótami japi too echi paquetes japi ke riwema néea echi cubrebocas, guantes alí jarecho si namuti. Ayénachó we aʼlá biʼwaká néema echi carro jiti ke itélima echi nayulí COVID-19, alí jariwé echi paquetes japoná biʼwíami ju. Alí japi too echi paquetes ke mulíwima echi hermanos yúa.

We aʼlá néeliwa echi donaciones

Enero inárachi 2021, echi Comité de Coordinadores risensia iyali jiti néema simírikami 25 millones de dólares jiti iʼwírima echi japi risoa nili echi COVID-19 jitra. Echi sucursales alí echi Comités japi Nakuuri we aʼlá tibú chúriká néeliwa echi donaciones. We iʼwérika noká ralayá echi namuti japoná ke me natéami ju. Japi riká, echomí Chile echi hermanos japi iʼwírinali jarecho hermanos, ralinalie 750 kilos echi lentejas, nalí japalí ma simírili bilé mechá ma we rasíruka nateli echi lentejas alí echi hermanos echi riká a ralali. Nalí ma okuá horas simírisa echi ralinéami aneli japi bilecho japi ralali echi lentejas ku pali jiti ma ke nakili. Jiti la echi ralinéami aneli japi ralinema echi lentejas japi ikí natéami nili ne bachá.

Nalí japalí echi hermanos simili ralisia echi lentejas echi ralinéami ma ke ralinénali japi riká aneli ne kulí, jiti echi ko nátili japi echi hermanos nili japi riká jarecho organizaciones japi ke aʼlá nokáami ju japalí iyá echi koʼwáami echi pagótami japi newalé. Bilé hermano sapú kilí niraa raʼíchili Jeobá yúa alí echi ko aneli echi ralinéami japi ma aboi nárili sinéami echi hermanos jiti echi riká machimea jépuká ne bichíwali newalé japi iʼwíritami nima. Echi hermanos ayénachó ruyeli japi we natéami ju machiyá chúriká pireili echi japi iʼwírima, jiti la ibili paquete olali echi namuti japi ibili familia newaleli. Alí jubá ko aneli japi suwaba echi donaciones japi naré echi testigos Jeobá, echi winomí alí echi nóchali japi noká ke natétiwami ju. Echi rijoi ko we kanili japi aneli echi hermano, jiti la chiliweli 400 kilos lentejas jitra.

“Ne bichíwali galéami ju”

Bilé hermana, Lusu rewéami, japi ma wiláami alí kunámami ju, echomí Liberia bité malí téemala yúa. Siné biʼá japalí koʼyá mochili alí leeria echi texto diario, echi niétowala ko, japi kichao bamíbami nili, machili japi ma ke niruli koʼwáami echoná bitichí. Jiti la nárili: “¿Piri ta kopoa?”. Lusu ko aneli japi echi ko ma tánili Onorúami, jiti la a bichíwili japi Jeoba iʼwírima. Echalí rawé echi ancianos japoná echi napawí, aneli Lusu japi simea naremia echi koʼwáami japi iyama riweili. Lusu ko tamó ané: “Kini niétowala ko aní japi jipi a bichiwi japi Jeobá a kipú echi oraciones jiti a kipuli echi oración japi ni niwali”.

Bilé mukí echoná República Democrática del Congo bité mulipi japoná piré jaré japi testigo Jeobá ju. Japalí ineli japi echi ko nareli koʼwáami jarecho testigo Jeobá jitra, echi ko anili: “Japalí simírisa echi pandemia tamujé ayénachó testigo Jeobá nipo jiti aboi ko aʼlá nikuuro anakupi niraa”. Echi kunala ko nárili: “¿Ami testigo Jeobá nima pe bilepi bolsa de arroz jitra?”. Echi mukí ko jéaneli: “Ke, ke echi jitra bi ju. Nalí echi bolsa de arroz néwariwéliti japi echi ko ne bichíwali we galé anakupi niraa”.

Matétarabá echi donaciones japi emi nijí, echi testigo Jeobá ko a oméroli sapú iʼwiria echi hermanos pandemia nirúachi. Matétarabá echi donaciones japi emi nijí néeka echi página internet donate.jw.org.