BINELÍWAMI 58
Sinibí Jeobá nalí nijewi
Japi ta ne bichíwali cristianos ju ke ti nakí japi bilé namuti o bilé pagótami isima japi ta riwepo nijewia Jeobá. Ati machí japi mujé echi riká cho nili alí Jeobá ko we natéami niraa iné japi mi echi bi nijewi (leeri 1 Crónicas 28:9). ¿Piri namuti isímiré japi mi riwema nijewia Jeobá? Alí, ¿piri namuti mi isima echi riká ikisaa?
1. ¿Piri namuti nokiméeré jarecho jiti ta riwepo nijewia Jeobá?
Jaré pagótami nokiméeré japi ta riwepo nijewia Jeobá. ¿Jepi echi riká nokimea? Jaré ko ju echi pagótami japi ma riweli nijewia Jeobá alí jipi ko ikaleka raʼicha echi organización jitra japi Jeobá wilali, jiti ta riwepo bichiwia Jeobá. Echi pagótami anéliwa apóstatas. Ayénachó nirú líderes religiosos japi ikaleka raʼicha tamujé jitra jiti echi japi ke me bichíyami ju riwema nijewia Jeobá. We chati ju japi ta raʼichabo echi yúa japi sayeri Onorúami puéblowala, leeria echi libros japi echi osá o japi uchá echoná internet alí inea echi videos. Jiti la Jesús ko tamujé busuré iyali, echi ko jéanili: “Ariwesi echi [...]. Aboni chopi mapurigá jaré ke machíliami ju mapu we bayera auché jaré ke machíliami. Aʼlí a bilé ke machíliami rijói miná bayérasagá auché bilé ke machíliami, okuánika echoʼná biléana jochi rujuímiré” (Mateo 15:14).
2. ¿Piri jarecho namuti isímiré japi ta riwepo nijewia Jeobá?
Jiti ta we galé Jeobá, ke ti nokinali echi namuti japi noká echi religiones japi ke bichíwali ju. Japi riká japoná ti nocha, echi organizaciones japi iʼwiri echi pagótami o jarecho si namuti, ke nísaré japoná jonsa machina echi religión japi ke bichíwali ju. Jeobá ko jériká ané echi puéblowala: “Echoʼná walúlachi [Babilonia] jonsa waminá simasi” (Apocalipsis 18:2, 4).
AMINABI NATABO JAPI TA BINÉ
Biné piri mi isísaré jiti ke bilé namuti isima japi mi riwema nijewia Jeobá. Ayénachó mi binema japi mi ke mulíwisaká echi Walúala Babilonia yúa, ami néwariwélitima japi mi we nijéwami ju.
3. Ke tasi kipú japi ikaleka bineri
¿Piri ta nokisáré ata kipúsaká japi jaré ikaleka raʼicha Jeobá organizaciónwala jitra? Leérisi Proverbios 14:15 alí raʼichasi jepuná jitra:
¿Chúsiá ti we aʼlá nátami nísaré alí ti ke bichíwisaré suwaba japi ta kipú?
Leérisi 2 Juan 9-11 alí raʼichasi jepuná jitra:
¿Chúriká ti nokiboa echi apóstatas yúa?
Tákoré ke ti raʼicha echi apóstatas yúa, nalí ¿piri namuti isímiré japi ta echi mulíwipo?
Ata kipúsaká echi japi cha riká raʼicha Jeobá jitra alí echi organización, ¿chu nílimiré Jeobá?
4. Newariwéliti japi mi Jeobá nalí we galé japalí bilé hermano cha isisa
Ati machisáaká japi bilé echoná congregación we cha isili, ¿piri ta nokisáré? Jiti ta machiboa inepo bilé nulalíwami japi Jeobá iyali echi israelitas. Leérisi Levítico 5:1.
Japi riká aní echi texto, ati machisáaká japi bilé pagótami isili bilé namuti we chati, ati ruyésaré echi ancianos. Nalí kecho bijí ruyea, ati bachá yúa raʼichásaré echi pagótami japi cha isili alí ti anésaré japi echi binoy ruyema echi ancianos. Echi ke nijéwisaká, tamujé ju japi ta ruyepo jiti ta nijéwinali Jeobá. ¿Chúsiá echi riká ti nokisaa, néwariwélitipo japi ta nijewi alí we galé...
... Jeobá?
... echi pagótami japi cha isili?
... echi congregación?
Bilé hermano cha isílaká, ¡iʼwiri!
5. Kiti isí echi namuti japi isima japi mi mulíwima echi Walúala Babilonia
Leérisi Lucas 4:8 alí Apocalipsis 18:4, 5, alí raʼichasi jepuná jitra:
¿Achi bijí oserúa chukú nijé riwalá echoná oselichi japi echi religión ke bichíwali níwala ju?
¿Achi ni napawí bilé organización yúa japi noká jaré namuti japi riká echi religión ke bichíwali?
¿Achi echi nóchali japi ni olá iʼwiri echi religión ke bichíwali?
¿Achi ni riwésaré isiá jarecho namuti jiti echi riká ke ni mulíwima echi religión ke bichíwali?
Ani anílaká “ayena” bilé echi náriwami, ¿piri ni isísaré?
Ma mi natásaká japi mi isima, isí bilé namuti jiti mi kanila ripima alí japi néwariwéliti japi mi nijewi Jeobá.
Bilé organización japi nocha iʼwiria jarecho mi anésaká japi mi echi iʼwírima, nalí echi ko napawíkami nísaká bilé religión japi ke bichíwali ju, ¿piri mi isima?
JAPI ANÍ JARÉ PAGÓTAMI: “Ke ni machisáaká japi aní echi apóstatas echi testigo Jeobá jitra, ¿chúriká ni nimima echi bichíwali?”.
¿Achi aʼlá ju japi ta machiboa japi aní echi apóstatas? ¿Chúsiá?
JAPI MI BINELI
Ati sinibí nijéwinalaká Jeobá, ata ke napawísaré echi pagótami yúa japi tamó ékinali.
Piri mi animea
¿Chúsiá ti ke kipúsaré japi aní echi apóstatas?
Ati machisáaká japi bilé hermano isili bilé namuti we chati, ¿piri ta nokisáré?
¿Chúriká ti nokiboa nijewia japi aní Jeobá japi ta buyapo echi Walúala Babilóniachi jonsa?
JITI MI CHE BINEMA
¿Piri ta nokiboa japalí jarecho ikaleka raʼicha echi testigo Jeobá jitra?
“¿Achi ta bichíwisaré suwaba japi ta kipú?” (Echi Nawésami, agosto 2018)
¿Chúriká ti machiboa achi bilé organización o bilé nóchali iʼwiri echi Walúala Babilonia?
¿Chu nokali jaré japi sayeri echi bichíwali jiti ta riwepo bichiwia?
Bilé sacerdote sintoísta riweli echi religión ke bichíwali. Leeri echi jitra echoná biografía “Ani machinalie Onorúami taa ka jonsa”.
“Binesa echi Biblia jipi ko we kaníliami ju” (Echi Nawésami, 1 inárachi julio 2011)