¿Achi mi nati anciano nimia?

1, 2. ¿Chu iyiri ju jaré nóchali we aʼláala japi noká echi ancianos?

MUJÉ ma wilí isíaká nochia japi riká siervo ministerial, a keʼré japi mi ma omérima anciano niya. ¿Achi mi omérima che miná nochia jiti mi isima echi “nóchali we aʼláala”? (1 Tim. 3:1, TNM).

² ¿Piri nóchali isimí bilé anciano? Echi ko iʼwérili isimí nawesia, iʼwérili iyayá echi hermanos, bineria alí iʼwiria echi congregación echi namuti jitra japi aní alí japi isimí. Jiti la echi Biblia ko aní japi echi rijoi ju japi riká chiliwéliami (Efes. 4:8, TNM).

3. ¿Piri isísaré bilé hermano jiti wilárami nima japi riká anciano? (1 Timoteo 3:1-7; Tito 1:5-9).

³ Japalí mi aa bilé nóchali, wabé natéami ko ju piri namuti mi machí isiá. Nalí jiti mi anciano nima, ¿piri mi isísaré? Echi ko ke bi ju japi mi we machimea nawesia alí bineria. Ami isísaré echi namuti japi echi Biblia aní echoná 1 Timoteo 3:1-7 (TNM) alí Tito 1:5-9 (leeri, TNM). Jenaʼí binelíwami binepo jepuná bikiá namuti japi nokisáré echi ancianos: echi ko ke cha riká raʼichárami nísaré echi congregación jitra alí jarecho pagótami, we aʼlá nuléami nísaré echi upila alí kúchuwala alí sinibí iʼwírinalisaré echi congregación.

KE CHA RIKÁ RAʼICHÁRAMI NÍSARÉ ECHI JITRA

4. ¿Piri ruyá aní echi raʼíchali “ke cha riká raʼichárami nísaré”?

⁴ Bilé echi namuti ko ju japi “ke cha riká raʼichárami nísaré” echi anciano jitra, echi ko nalí machirúami nísaré echi congregación jitra japi riká we aʼlá isíami. Ayénachó, “ke cha riká raʼichárami nísaré jarecho pagótami jitra japi ke bichíyami ju”. A bichíwali ju japi echi pagótami cha riká raʼichama echi namuti jitra japi ta bichiwi, nalí echi chati namuti japi aní echi ancianos jitra ke bichíwali nísaré (Dan. 6:4, 5). Jiti la nárika isí: “¿Achi aʼlá raʼicha tamí jitra echi japi muchuwi echoná congregación alí echi pagótami japi ke bichíyami ju?”.

5. ¿Piri aniwáami ju echi raʼíchali “galésaré isiá japi aʼlá ju”?

⁵ “Galésaré isiá japi aʼlá ju”. Jepuná ko aniwáami ju japi echi ko inema echi aʼláala namuti japi noká jarecho alí anema japi we aʼlá noká. Ayénachó japi echi ko we kanílima isiá namuti jarecho jitra alí ke bi echi jitra japi newalé (1 Tes. 2:8). Nalí, ¿chúsiá we natéami ju japi echi ancianos echi riká nima? Jiti echi ko we ikírisaré iʼwérili iyayá echi congregación alí nokayá echi nóchali japi olá (1 Ped. 5:1-3). Tákoré wiká nóchali ju echi riká nokayá, echi ko we kaníliami ju iʼwiria jarecho (Hech. 20:35, TNM).

6. ¿Chúriká néwariwéliti bilé japi kanílika naré jarecho binoy bitélachi? (Hebreos 13:2, 16; ayénachó iné echi foto).

⁶ “Kanila narésaré jarecho binoy bitélachi”. Echi ko ju japi ayénachó isima aʼláala namuti jarecho pagótami jitra japi ke echi amígowala ju (1 Ped. 4:9). Bilé oselí aní japi echi rijoi japi we kanila naré jarecho echi bitélachi, we simá isíami ju alí sinéami naré tákoré ke machí. Nárika isí: “¿Achi ni machirúami ju japi riká we kanílika naréami jarecho nijé bitélachi?” (leeri Hebreos 13:2, 16). Echi japi kanílika naré jarecho binoy bitélachi, echi ko iyá echi namuti japi olá echi japi risóati ju, echi japi iʼwérili noká nochia iʼwiria echi hermanos japi riká echi superintendente de circuito alí echi japi jaréana ka jonsa sii nawisasia (Gén. 18:2-8; Prov. 3:27; Luc. 14:13, 14; Hech. 16:15, TNM; Rom. 12:13).

7. ¿Chúriká néwariwéliti echi anciano japi ke we natéami niraa iné echi winomí?

⁷ “Ke we natéami niraa inésaré echi winomí”. Jepuná ko aniwáami ju japi echi ko ke iʼwérili isísaré olayá wiká namuti. Tákoré echi ko risóati ju o wiká winomíwami, wabé natéami niraa inésaré nóchilia Onorúami (Mat. 6:33, TNM). Ayénachó ikírisaré alí néesaré binoy jiwérala alí jarecho si namuti nóchilimia Jeobá, tibumia echi téemala alí iʼwírimia echi congregación (Mat. 6:24; 1 Juan 2:15-17). Jiti la nárika isí: “¿Chu yena ni natéami niraa iné echi winomí? ¿Achi ni kanila bité olayá echi namuti bi japi ni ma olá? ¿O wechi ko ni iʼwérili isimí mea wiká winomí alí jarecho si namuti?” (1 Tim. 6:6, 17-19, TNM).

8. ¿Chúriká néwariwéliti bilé japi aʼlá isíami ju alí japi ke isimí japi binoy nakí?

⁸ “Suwaba japi isimí aʼlá nísaré” alí “ke isísaré japi binoy nakí”. Bilé pagótami néwariwéliti japi echi riká isimí, japalí we aʼlá machiká isíami ju. Aʼlá machiká isiá ayénachó ju ke waʼlú koʼyá, bajía, aʼlárika napachia alí tichía, alí ke bitelia japi riká piré echi japi ke nijewi Jeobá (Luc. 21:34; Sant. 4:4). Ayénachó echi ko we kilí nísaré japalí jarecho cha riká noká echi yúa. Echi anciano “ke rikúami nísaré”, ke cho machirúami nísaré japi riká waʼlú bajíami. Nárika isí: “¿Achi ni néwariwéliti japi ni aʼlá isíami ju alí japi ni ke isimí japi binoy nakí?”.

9. ¿Chúriká bilé anciano “we aʼlá nátika isíami” ju alí “kárika aʼlá isíami”?

⁹ “We aʼlá nátika isíami nísaré”. Echi anciano echi riká isimí japalí aʼlá biné echi Biblia suwaba namuti jitra. Japalí aʼlá nata japi aní echi Biblia, echi ko aʼlá inami echi namuti alí we aʼlá nátika isimí. Ke we sapú isimí bilé namuti kecho suwaba aʼlá machisaa (Prov. 18:13). Jiti isimí suwaba echi namuti, echi ko aʼlá nátika isimí japi riká Jeobá nakí. Ayénachó echi ko “kárika aʼlá isíami” ju. Jepuná ko aniwáami ju japi ayó isimí echi namuti japi anéliwa japi isísaré. Sinéami bichiwi echi, jiti echi ko we aʼlá isíami ju alí nijewi japi riká anéliwa japi isísaré. Jiti olá suwaba jepuná cualidades, echi ko machirúami ju japi riká aʼlá isíami. Jipi ko inepo echi cualidades japi olásaré jiti nima we aʼlá kunala alí onolá japi riká aní echi Biblia.

WE AʼLÁ NULÉAMI NÍSARÉ ECHI UPILA ALÍ KÚCHUWALA

10. ¿Chúriká isimí bilé hermano japi we aʼlá nulé echi upila alí kúchuwala?

¹⁰ Bilé namuti japi iʼwírima bilé hermano niwíkami jiti omérima anciano niya, echi ko ju japi ke cha riká raʼichárami nísaré echi kúchuwala jitra alí upila. Jiti la echi Biblia aní japi “bilé rijoi nísaré japi we aʼlá nulé echi upila alí kúchuwala”. Echi ko machirúami nísaré japi riká bilé we aʼláala kunala alí onolá japi we galéami ju alí japi aʼlá nátika iʼwiri binoy téemala. Ayénachó iʼwérili isísaré binea echi Biblia echi téemala yúa echoná bitichí alí iʼwiria jiti sinibí simama echoná napawíliwachi alí jiti we aʼlá nawisama. ¿Chúsiá we natéami ju japi echi riká isima? Jiti japi riká anili Pablo, “bilé rijoi ke aʼlá tibúsaká echi upila alí kúchuwala, ¿chúriká tibuma echi Onorúami níwala congregación?” (1 Tim. 3:5, TNM).

11, 12. ¿Chúsiá we natéami ju japi echi hermano kúchuwala aʼlá nokimea? (Ayénachó iné echi fotos).

¹¹ Echi hermano kuuchi kúchuwami nísaká, “echi kúchuwala ko we aʼlá nijéwami nísaré echi onolá”. Jiti la echi onolá ko we simárika binérisaré alí anésaré japi nokisáré. A bichíwali ju japi echi kuuchi ko we kanili riʼea alí achiyá, nalí echi onolá we aʼlá binérisaká, echi ko we nijéwiami nima, riwíwiami alí sinibí we aʼlá nokimea. Echi onolá ayénachó iʼwírisaré echi kúchuwala jiti we aʼlá Jeobá amígowala nima, jiti nijéwima japi aní echi Biblia alí pakoma.

¹² “Echi kúchuwala ko bichíyami nísaré alí ke anérami nísaré japi noká namuti chati alí ke nijéwami ju”. Nalí, bilé echi kúchuwala japi a bijí bité echi yúa, isísaká bilé namuti we chati, ¿piri ikimea echi hermano? Echi onolá ke aʼlá binérilaká echi nolá alí ke raʼámilaká, a keʼré japi echi ko ke omérima anciano niya (iné echi oselí La Atalaya 15 inárachi octubre bamíali 1996, página 21, párrafos 6, 7).

IʼWÍRISARÉ ECHI CONGREGACIÓN

13. ¿Chúriká isimí bilé japi we aʼlá nátami ju alí ke iʼwérili aníami?

¹³ Echi hermanos japi olá we aʼlá cualidades, we iʼwiri echi congregación. Japi riká, bilé hermano “we aʼlá nátami” iʼwérili isimí kilí niya sinéami yúa. Ayénachó echi ko we aʼlá kipú japi aní jarecho alí iʼwérili isimí machiyá chu inili o japi riká nata jarecho. Japalí echi ancianos napawisa alí katúwika anisaa japi nokimea bilé namuti alí echi Biblia ke aní japi chati ju, echi hermano japi aʼlá nátami ju nijéwima tákoré echi ko ke nakili echi riká isiá. Echi anciano ko “ke iʼwérili isísaré isiá bilé namuti japi riká binoy nakí” o japi riká echi nata. Echi ko nalí machisáré japi nirú jarecho japi we machíami ju (Gén. 13:8, 9; Prov. 15:22). “Ke we iyóami nísaré” alí “ke cho sapú iyósaré”. Echi ko nalí we simárika isíami nísaré alí raʼíchami. Japi riká echi ko we kilí ju, echi ju japi bachá isimí japi echi pagótami ku kilí nílima, tákoré echi namuti japi ikí we jilí ju (Sant. 3:17, 18). Echi ko we simárika raʼicha alí isimí japi jarecho ma ke naʼáwima, alí tákoré echi sayérala ju (Juec. 8:1-3; Prov. 20:3; 25:15; Mat. 5:23, 24).

14. ¿Chúsiá ke omeri anciano niya bilé japi kulí chotásili bichíyami niya alí chúriká néwariwéliti japi we nijéwami ju?

¹⁴ Echi anciano ko “ke nísaré bilé rijoi japi kulí chotásili bichíyami niya”. Tákoré kecho bijí wiká bamibi japalí jonsa pakoli, wabé natéami ko ju japi ma we aʼlá Jeobá amígowala nima jiti omérima anciano niya. Jiti la kecho anciano niya, echi ko bachá néwariwélitisaré japi ju japi riká Jesús, ke niráami nísaré alí nóchinalisaré Jeobá japi riká echi nakí alí japalí echi aní (Mat. 20:23; Filip. 2:5-8, TNM). Ayénachó néwariwélitisaré japi “we nijéwami” ju, alí echi riká isimí japalí ke riwé Jeobá alí japi echi nulá, alí japalí sinibí nijewi japi aní echi organización (1 Tim. 4:15).

15. ¿Achi newaléliwa japi echi anciano we aʼlá nawésali nijíami nima?

¹⁵ Echi Biblia we aʼlá ruyé japi echi anciano “we aʼlá binériami nísaré”. Nalí, ¿achi aniwáami ju jepuná japi echi ko we aʼlá nawésali nijíami nísaré? Ke tasi, jiti nirú wiká ancianos japi ke machirúami ju japi riká we aʼlá nawésiami, nalí echi ko we aʼlá machisáré néea echi Biblia japalí simía nawisasia alí japalí iʼwérili iyá echi hermanos (ayénachó iné japi aní 1 Corintios 12:28, 29, TNM, alí Efesios 4:11). Tákoré ke newaléliwa japi we aʼlá nawésali nijíami nima, echi hermano japi anciano nínali a iʼwérili isísaré we aʼlá binériami niya. ¿Alí chúriká omérima echi riká isiá?

16. ¿Chúriká omérima bilé hermano we aʼlá binériami niya? (Ayénachó iné echi fotos).

¹⁶ “Sinibí binérisaré japi aní echi Onorúami Raʼicháala”. Jiti we aʼlá binériami nima japi riká anciano, sinibí néesaré echi Biblia japalí nawésali nijí alí japalí busuréliami iyá echi hermanos. We aʼlá binéami nísaré echi Biblia alí echi publicaciones (Prov. 15:28; 16:23). Echi ko iʼwérili isimí we aʼlá binea alí inamia japi aniwáami ju ibili versículo, jiti echi riká omérima we aʼlá ruyea alí iʼwiria echi pagótami jiti aminabi Jeobá amígowala nima alí nokimea japi riká biné. Bilé namuti japi echi iʼwírima jiti aʼlá binériami nima, echi ko ju iʼwírili tania jarecho ancianos japi we machíami ju alí isiá japi riká echi aní (1 Tim. 5:17). Echi ancianos ayénachó machisáré chúriká “iʼwérili iyama” echi hermanos alí hermanas. Alí tákoré isini kaachi busuré iyama o “raʼámima”, nalí we simárika nokisáré jena namuti. We simá nokáami nísaká alí we galéami, alí néesaká echi Biblia, echi ko we aʼlá binériami nima jiti noká japi riká Jesús japi we aʼlá binériami ju (Mat. 11:28-30; 2 Tim. 2:24).

AMINABI IʼWÉRILI ISÍ

17. a) ¿Piri iʼwérili iyama echi siervos ministeriales jiti aminabi iʼwérili nokimea anciano nimia? b) ¿Piri newalásaré echi ancianos japalí iné achi bilé hermano omeri anciano niya? (Iné echi recuadro “We aʼlá nátika nokisí japalí timí iné achi bilé hermano omeri anciano niya”).

¹⁷ Ma binesa suwaba echi namuti japi nokisáré echi ancianos, a keʼré japi jaré siervos ministeriales natama japi ke omérima nokayá echi namuti. Nalí newalásaré japi Jeobá alí echi organizaciónwala ke buwé japi timí sébali aʼlá néwariwélitima echi cualidades (1 Ped. 2:21, TNM). Jeobá iʼwírila jitra a timí omérima olayá echi cualidades (Filip. 2:13, TNM). ¿Alí mujé ru? ¿Achi mi kanílisa nili aminabi aʼlá isiá bilé echi cualidades? Echi riká nísaká, raʼichá Jeobá yúa, biné echi tema jitra alí iʼwírili tani echi ancianos jiti mi aʼlá isima.

18. ¿Piri nokisáré sinéami japi siervos ministeriales ju?

¹⁸ Sinéami hermanos alí echi japi ma ancianos ju, aʼlá nima japi iʼwérili nokimea olayá echi cualidades japi ta ma bineli jenaʼí binelíwami (Filip. 3:16). Alí ami siervo ministerial nísaká, aminabi iʼwérili isí jiti mi omérima anciano niya. Tani Jeobá japi mi binérima alí mi néema aminabi nóchilimia echi alí iʼwírimia echi congregación (Is. 64:8). Jeobá mi iʼwírima suwaba echi namuti japi mi isimí jiti mi anciano nima.