¿Ami newalá?

¿Ami we aʼlá leérili suwaba echi binelíwami japi uchuwi echoná oselí Echi Nawésami? Iné achi mi aʼlá machiyá ruyea jepuná náriwami:

¿Piri aniwáami ju “siʼwinárigá ne galabé ʼnatasi”? (Rom. 12:2).

Iʼwérili ti nokisáré ne sulachí jonsa aʼlá nokáami niya, nijéwika japi aní Jeobá alí riwea suwaba japi chati ju (w23.01, páginas 8 alí 9).

¿Chúriká aʼlá nátika inepo echi namuti japi ikísimi omáana Wichimóbachi?

Ati we machinali echi namuti japi ikísimi omáana Wichimóbachi jiti echi riká ti machiboa chúriká ikísimi echi profecías. Nalí ke ti aninali japi ta aboi nata alí ke ti nakí japi tamujé jitra echi congregación rojama. Suwaba japi ta raʼicha nísaré japi riká ruyé echi organización (1 Cor. 1:10) (w23.02, página 16).

¿Chúsiá ke chopi iyiri nili japi riká pakoli Jesús alí japi riká pakó echi discípulos?

Echi ko ke katúwika isili Jeobá yúa jiti echi ko ochérili echoná pueblo japi ma katúwikami nili Onorúami yúa. Echi ko ke pakoli jiti riwema isiá echi chati namuti alí japi aʼlá nátami nima jiti echi ko ma aʼlá sébali isíami nili (w23.03, página 5).

¿Piri ta oméripo nokayá jiti wiká hermanos omérima nijía comentarios echoná napawíliwachi?

Ati oméripo aniyá comentarios japi ke wilí ju jiti echi riká wiká hermanos sibama nijía comentarios. Ayénachó echi comentarios japi ta aní ke wiká raʼíchali olásaré, echi riká echi hermanos a omérima ruyea jarecho namuti (w23.04, página 23).

¿Piri ju echi “Buwé biʼwíkami” japi aní echoná Isaías 35:8?

Japalí echi judíos pireili, echi “Buwé Biʼwíkami” ko nili japi machinie echoná Babilonia jonsa alí nawayé echomí Israel. Alí jipi ko, ¿chu iyiri ju echi buwé? Wiká bamíali kecho séachi 1919, Jeobá ko chotásili aʼlárika riwesia echi buwé, japi riká néeka echi máquinas japi jitra niwáliwa oselí alí traducción echi Biblia jitra. Echi “Buwé Biʼwíkami” isimí japi echi Onorúami puéblowala we kanílika nóchilima echi, alí pe aminana isima japi we kanila pirélima jenaʼí Wichimóbachi japalí ma nulasa echi Onorúami Gobiérnowala (w23.05, páginas 15 aminá 19).

¿Chu iyiri okuá mukí jitra raʼicha echi capítulo 9 echoná Proverbios?

Proverbios raʼicha “echi mukí ke aʼlá nátami” jitra alí ruyé “japi bayeli echi mukí ma rilé jochi tota bití”. Ayénachó raʼicha echi mukí jitra japi aniwáami ju “echi ne bichíwali machiwáami”. Japi nijewi jepuná mukí, simía “echoná buwérili aʼlá inámiami” alí sinibí pirélima (Prov. 9:1, 6, 13, 18) (w23.06, páginas 22 aminá 24).

¿Chúriká néwariwélitili Jeobá japi we aʼlá nátami ju, simá isíami alí ke niráami japi riká isili Lot yúa?

Jeobá ko aneli Lot japi júmisima echomí ripá kawírali. Japalí Lot tánili Jeobá japi riwema japi simama echomí Zóar, Jeobá ko a kipuli japi Lot tánili (w23.07, página 21).

¿Piri isísaré bilé mukí echi kunala inéaká pornografía?

Newalásaré japi ke echi iyiri ju. Wabé aʼlá ju japi aminabi mulíwima Jeobá alí japi natama echi ejemplos umukí jitra japi uchuwi echoná Biblia japi ayénachó ikili echi iyiri namuti alí japi raʼichia Jeobá yúa iʼwírili ku kanilia. Ami omérima iʼwiria mujé kunala jiti echi namuti japi isimí ke isima japi echi checho ku inema pornografía (w23.08, páginas 14 aminá 17).

¿Chúriká tamó iʼwiri aʼlá nátami niya jiti kilí nipo japalí jarecho tamó nari echi jitra japi ta bichiwi?

Tamó iʼwírima natia japi echi nárili tamó iʼwírima machiyá japi inili echi pagótami alí echi riká ati simárika raʼichabo alí kilí niraa japalí ti ruyé japi ta bichiwi (w23.09, página 17).

Japi riká isili María naremia echi jiwérili, ¿piri ta biné?

Japalí machili japi echi ko echi Mesías iyela nima, riweli japi jarecho echi iʼwírima. Gabriel alí Elisabet jiwérili iyali néeka echi Onorúami Raʼicháala. Echi hermanos ayénachó tamujé jiwérili iyama (w23.10, página 15).

¿Chúriká isímiré Jeobá tamó iʼwiria japalí ti echi yúa raʼicha?

Jeobá ko aní japi tamó kipuma japalí ti echi yúa raʼicha alí japalí kipú japi ta echi ané, echi ko nata japi binoy isínali (Jer. 29:12). Isini kaachi Jeobá ko sinúrika isimí tamó iʼwírimia tákoré ti chopi iyiri tánili jarecho yúa (w23.11, páginas 21 alí 22).

Echoná Romanos 5:2 Pablo ma anili japi echi cristianos Roma piréami buwea pireili bilé namuti, nalí ¿chúsiá checho raʼicha echi jitra echoná versículo 4?

Japalí jonsa echi pagótami biné echi bichíwali, echi ko buwea piré we kanílika pirélimia echoná Wichimóbachi we baʼóachi. Nalí, japalí ikí namuti we jilírami alí anachásimi, echi namuti iʼwiri jiti aminabi we bichíwima japi echi namuti a ne bichíwali echi riká ikimea (w23.12, páginas 12 alí 13).