Natchigagü i Ngutaqueꞌearü Nguꞌarü Popera Maü̃ rü Puracücaꞌ
5-11 DE TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 1 REIS 9-10
“Eꞌna cuü̃́ nameẽtchi i Yeuwaarü cuaꞌ?”
w99 01/07 30wa 6tchimaü̃
Bemana Chabáarü ãẽꞌgacü rü nüü̃ tiu i Charumóü̃maã ga natchigagü ga nagutchaü̃ na nüü̃ taüü̃caꞌ i norü cuaꞌ. Tupanaarü Ore nüü̃ niu na ngĩma “rü guxü̃ma ga yema nagu naxĩnüxü̃ãcüma nüxna ica”. Rü Charumóü̃ “rü meama ngĩxü̃ nangãxü̃ga ga guxü̃ma ga yema nüxna nax nacaxaxü̃, rü nataxuma ga wüxi ga ngearü ngãxü̃ã́xü̃.” — 1 Reis 10:2b, 3
w99 01/11 20wa 6tchimaü̃
Chabáarü ãẽꞌgacü rü ibaiãtchi rü ãẽꞌgacü ga Charumóü̃ü̃ ngĩgürügü: “Rü ñuxãcü nataãẽgüxü̃ i ngẽma curü duü̃xü̃gü i ngüxẽẽruü̃gü i guxü̃guma cuxü̃tawa ngẽxmagüxü̃ rü nüxü̃ ĩnüexü̃ nax ñuxãcü cua̱x cuxü̃́ ngẽxmaxü̃ i ngẽxguma quidexaxgu!” (1 Reis 10:4-8) Woo ga muü̃tchi ga yemaü̃gü ga Charumóü̃arü puracütanüü̃arü guü̃cüwawa nayema, ngĩma rü tama nüü̃ tiu ga yema rü nüü̃ nataãẽẽẽgü. Notürü, nümagü meã nayoniẽ ga Charumóü̃arü cuaꞌ ga Tupana nüna nanaã. Chabáarü ãẽꞌgacü wüi meẽtchi i cuaꞌruü̃ i Yeuwaarü duü̃ü̃gücaꞌ i nhuꞌma, na namaã nataãẽgü i Yeuwaarü rü Ngetchutchuarü cuaꞌ!
w99 01/07 30wa 7tchimaü̃
Chabáarü ãẽꞌgacü poraãcü namaã ibaiãtchi ga Charumóü̃arü cuaꞌ rü norü ãẽꞌgacüpata ga naüü̃ne. (1 Reis 10:4, 5) Nümaü̃ nagu rüĩnüẽ ga ngĩma rü bemana niyuãtchi. Tama nüü̃ icuaꞌgüü̃ tchi yema rü aicuma niĩ, notürü ngĩma rü poraãcü namaã ibaiãtchi ga guü̃ma ga nüü̃ ĩnü rü nüü̃ idau. Ngĩma rü nüü̃ tiu ga Charumóü̃arü puracütanüü̃gü rü tataãẽgü erü nüü̃ naĩnüẽ ga Charumóü̃arü cuaꞌ. Rü ta ngĩma rü Yeuwaü̃ natatchigaẽẽ erü nüma rü Charumóü̃ü̃ nauneta na ãẽꞌgacü niĩü̃caꞌ. Rü yemawena ga ngĩma ga ãẽꞌgacüna inanaã ga muü̃tchi i ãmaregü i meẽtchiü̃ rü uiru. Charumóü̃ rü ta tüna naã ga ãmaregü, “rü yema Chábaanearü ãẽ̱xgacüna nanaxã ga guxü̃ma ga yema ngĩma naxca̱x ínaxca̱xü̃”. — 1 Reis 10:6-13
Nguꞌẽẽtaegü uirurüü̃ iĩü̃
w08 01/11 22wa 4-6tchimaü̃gü
Tupanaarü Ore nüü̃ niu ga Iráü̃, Tíruarü ãẽꞌgacü, Charumóü̃na naãü̃ ga 4 mil quírugü ga uiru, rü na ngĩma ga Chabáarü ãẽꞌgacü nüna naã i uiru ta. Rü nhuꞌmatchi, Charumóü̃arü wapurugü Ofíwa naĩ rü 15 mil quírugü ga uiru namaã nawoeguü̃. “Rü yema úiru ga Charumóü̃ wüxichigü ga taunecügu yaxuxü̃”, nhaü̃ i Tupanaarü Ore, ‘rü 25 mil quíruwa nanguꞌ. (1 Reis 9:14, 28, 10:10, 14) Eꞌna na aicuma niĩ? Nũcüma, nhuregu ga uiru ãẽꞌgacügü nüü̃ nayemagü?
Cuaꞌãtchiruü̃, wüi ore natchiga ga ãẽꞌgacü ga Tutmés III, ya Eyítuanewa, nanaweꞌ ga nüma rü nüna naã ga 13 mil quírugüarü yeera i Amon-Rápataü̃caꞌ. Rü naü̃pa ga 800 taunecügu naü̃pa ya Cristu, ãẽꞌgacü ga Tiglate-Pileser III nanayau 4 mil quírugüarü yeera ga Tíru, rü Sargão II nüna naã i 4 mil quírugü ga uiru nacaꞌ i tupanagü ga Babiróniawa. Rü nhuꞌmatchi, nüü̃ niugü na Machedóniãarü ãẽꞌgacü, ga Filipe II, nanayau ga 28 mil quírugüarü uiruarü yeera ga wüitchigü ga taunecügu ga Tráciawa.
Yeguma Filipe nane, ga Areyáü̃dru, niyau ga ĩane ga Chúcha, bemana nüma rü nanayau ta wigütaꞌa ga 2 mil quírugü ga uiru rü wigütaꞌa 7 mil quírugü ga guü̃ma ga Pérchia. Rü ngẽmacaꞌ, ngẽguma nangügu i ngẽma, taꞌacü Tupanaarü Ore nüü̃ niu i Charumóü̃arü uirutchiga aicuma niĩ.
12-18 TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 1 REIS 11-12
“Cuaꞌ nüü̃́ nangẽma ngẽguma nüü̃ naunetagu i teémaã ningĩtchaü̃”
w 07/18 18wa 7tchimaü̃
7 Charumóü̃arü cuaꞌruü̃ poraãcü tüü̃ nanguꞌẽẽ. Yeguma ngetüꞌü̃ niĩgu, Charumóü̃ Yeuwacaꞌ naca ga norü ucuꞌẽgü. Rü yemacaꞌ, Tupana nüna naã i cuaꞌ ga ü̃pa taguma teéaü̃́ yemaü̃ rü ta i puracü na naüü̃caꞌ ga meẽtchiü̃ ga Tupanapata ga Yerucharéü̃wa. Notürü Charumóü̃ tama Tupanaga naĩnüama. (1 Reis 3:12, 11:1, 2) Tupanaarü mugü nüü̃ niu ga wüi ãẽꞌgacü tama muü̃tchi i ngeü̃gümaã naãmaꞌ na tama Tupanana niũgatchiü̃caꞌ. (Deut 17:17, TNM) Charumóü̃ tama yema muga naĩnü rü 700 ga namaü̃tchi, rü nai ga 300 ga nge ga ngĩmaã namamarecü. (1 Reis 11:3) Yema ngeü̃gü tupananetagüü̃ ticuaꞌüü̃gü rü tama iraéutanüü̃gü iĩgü. Rü yemacaꞌ, Charumóü̃ rü ta tama naga naĩnü ga Tupanaarü mu i ngẽmatchiga. — Deut 7:3, 4
w 01/19 15-16wa 6tchimaü̃
6 Chataná nanawaꞌe na narüü̃ tiĩgü rü tama Yeuwaga taĩnüẽ rü yigüguicatama rüĩnüẽ. Chataná tama tüü̃ namu na narüü̃ nagu tarüĩnüẽ rü naügüü̃ nhuãcü nüma rü naü. Rü ngẽmaãcü, nüma rü tüü̃ nawomüẽẽtchaü̃ i nacümagümaã. Cuaꞌãtchiruü̃, aicuma niĩ na teé ya tchieü̃ i duü̃ü̃maã ãmücüe rü tüü̃́ inayanaoẽẽ i tümacümagü i meü̃. (1 Cor 15:33) Rü ngẽmacaꞌ, duü̃ü̃gü na marü Chataná nüü̃ nawomüẽẽ rü guü̃cüwawa nangẽma rü nüma rü nanawaꞌe na namaã taãmücügü. (1 Juã́ũ 5:19) Ngẽma rü nangupetüü̃ ga Charumóü̃maã. Nüma rü muü̃tchi i ngeü̃gümaã naãmaꞌ rü ngĩmagü tupananetagüü̃ ticuaꞌüü̃gü. Rü yema namaꞌgügagu niĩ ga Tupanana yaũgatchiü̃ ga Charumóü̃. — 1 Reis 11:3
w 07/18 19wa 9tchimaü̃
9 Notürü Yeuwa guü̃guma nüü̃ nadau i tchieü̃. Tupanaarü Ore nüü̃ niu na Yeuwa Charumóü̃maã nanuü̃tchi, erü nüma rü Yeuwana niũgatchi, woo Yeuwa tareeꞌpüꞌcüna nacaꞌ nangoꞌ rü marü ngẽmatchiga nüü̃́ naucuꞌẽ na tama to tupanagüwe narüũ. Notürü Charumóü̃ rü tama Yeuwaga naĩnü. Rü yemagagu, Yeuwa tama nüü̃ narüngü̃ẽẽama ga Charumóü̃. Rü ãẽꞌgacügü ga nawena tama guü̃ma i Iraéuenamaã ínacuágüü̃, rü muü̃ taunecügu gutchaü̃gü nüü̃ nangupetü. — 1 Reis 11:9-13
Nguꞌẽẽtaegü uirurüü̃ iĩü̃
w 06/18 14wa 1-3tchimaü̃gü
Na nanameẽẽü̃caꞌ ga yema gutchaü̃, Roboáü̃ tchuraragü nanutaqueꞌe. Notürü Yeuwa ngerüma i nügü na nadaiü̃. Nüma rü Chemaíáü̃ namu na Roboáü̃ü̃ nhanagürü: “Rü ngexrüma i nügü nax nadaixü̃ i ngẽma togü i natanüxü̃ i Iraégümaxã! ¡Rü guxü̃ma i duü̃xü̃gü napataca̱x woegu!.” — 1 Reis 12:21-24
Tama nügü nadai? Nagu rüĩnü na nhuãcü yema rü Roboáü̃ü̃ natchiewe. Taꞌacü norü duü̃ü̃gü nagu narüĩnüẽ? Naü̃pa, nüma rü nanaãũne ga duü̃ü̃gü na ‘cuairuü̃ i fiérumaã ãpeeü̃maã nüü̃ nicuaigüü̃’. Rü taꞌacü nanaü na yema gutchaü̃ nanameẽẽü̃caꞌ? (Nüü̃ nadau ta 2 Crônicas 13:7, TNM.) Woo ga yema, ãẽꞌgacü rü norü tchuraragü “rü yema Cori ya Tupanaarü dexaxü̃ nax naxĩnüexü̃, rü guxü̃ma ga duü̃xü̃gü̃ rü napataca̱x nawoegu”.
Taꞌacü ngẽma ore tüü̃ nanguꞌẽẽ? Guü̃guma narümemaẽ niĩ Yeuwaga naĩnü, rü woo ngẽma rü tüü̃ naãneẽẽ i togüarü ĩnügagu. Tchi guü̃guma naga iĩnüẽ, Yeuwa taétü nawémeꞌ. — Deut 28:2, TNM
19-25 TCHETẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 1 REIS 13-14
“Tüꞌcüü̃ nameẽtchi niĩ namaã nataãẽ i ngẽma marü nüü̃ ngẽmaü̃?
w08 15/08 8wa 4tchimaü̃
4 Rü yemawena ga nüma ga ãẽꞌgacü rü yema orearü uruü̃ü̃ nhanagürü: “¡Ngĩxã rü chowe rüxũ i chauchiü̃wa nax ngẽ́ma íraxü̃ cungṍxü̃ca̱x! Rü tá wüxi i ãmare cuxna chaxã.” (1 Reis 13:7) Taꞌacü ga yema orearü uruü̃ naütchi? Nanayau ga yema ãẽꞌgacüarü ngü̃ẽẽ woo nüma rü marü nüü̃ niu i ore i pocutchiga? (Sal 119:113) Rüeꞌna tama nanayau ga yema ãẽꞌgacüarü ãmare, woo nüma rü bemana nügüü̃tama nananguꞌẽẽ? Yeruboáü̃caꞌ tama nagutcha na nüna naã i ãmaregü ga namücugücaꞌ. Tchi yema orearü uruü̃ ngútchaü̃ nüü̃ yemagu, yema ãẽꞌgacüarü ãmare yeera nüü̃ nangútchaü̃ẽẽ. Notürü, Yeuwa nüü̃ namu: “¡Taxũtáma cuchibü rü taxũtáma cuxaxe rü taũtáma ngẽma nama i noxri nagu quixũxü̃gu cutáegu!.” Yemacaꞌ, orearü uruü̃ rü ãẽꞌgacüü̃ nangãü̃ga rü nhanagürü: “Woo chi norü ngãxü̃ i curü ngẽmaxü̃gü i cuchiü̃wa ngẽxmagüxü̃ choxna cuxãxgu, rü taxũchima cuwe charüxũ, rü taxũchima chachibü, rü taxũchima chaxaxe i ñaa nachicawa.” Rü yema orearü uruü̃ rü to ga namagu natáegu. (1 Reis 13:8-10) Taꞌacü ngẽma uneta ga orearü uruü̃ tüü̃ nanguꞌẽẽ natchiga aicuma nüü̃ nangetchaü̃ rü naga naĩnü? — Rom 15:4
w08 15/08 11wa 15tchimaü̃
15 Taꞌacü yeera tüü̃ nanguꞌẽẽ ga tchieü̃ ga Yudáarü orearü uruü̃? Provérbios 3:5 nhanagürü: “¡Rü guxü̃ i curü maxü̃maxã nüxna rüyoe ya Cori ya Tupana! ¡Rü taxṹ i cuxrütama cua̱xna curüyoexü̃!” Orearü uruü̃ tama Yeuwagu nayaõguama, rü yema ngupetüü̃wa nüma rü nügügu nayaõ. Yema tchieü̃gagu nüma rü nayu rü tchieü̃ naü ga Tupanapeꞌewa. Taꞌacü namaã nangupetüü̃ nanaweꞌ na nameẽtchi niĩ nügü írüíra rü aicuma naga naĩnü na Yeuwacaꞌ napuracüü̃caꞌ.
w08 15/08 9-10wa 10tchimaü̃
10 Orearü uruü̃ nawaꞌetchi nüü̃ nicuaꞌãtchi ga yema Orearü uruü̃ ga marü yacü nüü̃ nawomüẽẽtchaü̃. Bemana nügüãẽwa nügüna naca: ‘Tüꞌcüü̃ Yeuwa nanamu i ãĩyu na to i duü̃ü̃maã nidea i ucuꞌẽgü i tchaucaꞌ?’ Bemana orearü uruü̃ Yeuwacaꞌ naca na namaã nüü̃ niu ga yema ucuꞌẽtchiga, notürü Tupanaarü Ore tama naweꞌ ga nüma rü naü i ngẽma. Yema orearü uruü̃, “rü düxwa nawe narüxũ [orearü uruü̃ ga marü yacü] rü nachiü̃wa nayachibü rü nayaxaxe”. Yeuwa tama namaã nataãẽ ga yemamaã. Yeguma orearü uruü̃ ga Yudáanecü̃ãꞌ rü íniü̃, wüi ga leóü̃ rü nayamaꞌ. Nangetchaü̃tchi ga yema ngupetüü̃ ga orearü uruü̃maã! — 1 Reis 13:19-25
Nguꞌẽẽtaegü uirurüü̃ iĩü̃
w10 01/07 29wa 5tchimaü̃
Rü 1 Reis 14:13wa tüü̃ naweꞌ wüi meẽtchi i nguꞌẽẽtae natchiga i Yeuwa rü taꞌacü nüma rü nangugü i torü maü̃wa rü torü ĩnüwa. Nüna nacuaꞌãtchi ga Abiáwaicatama niĩ na ‘nüü̃ dauü̃ na nameü̃ i norü maü̃’. Yema rü nanaweꞌ na Yeuwa nangugü ga norü maü̃wa rü nüü̃ inayangau i nüma rü nameü̃ ga norü maü̃. Wüi yatü na Tupanaarü Orecaꞌ nangú nüü̃ niu ga Abiá wüi duü̃ü̃ i meü̃ niĩ ga guü̃ma ga natanüü̃wa. Yeuwacaꞌ name ga yema Abiácüma, rü nüü̃ nangetchaü̃tümüü̃ woo natünüü̃ tchieü̃ niĩ.
26 TCHETẼBRUARÜ – 2 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 1 REIS 15-16
“Achárüü̃ rü tama muü̃waꞌe”
w12 15/08 8wa 4tchimaü̃
Rü 20 ga taunecügu nawena ga niyautchigü ga Iraéutanüü̃ ga taretücumügu, Yudáwa muü̃tchi i tupananetagüü̃ nicuaꞌüü̃gü. Yeguma Achá rü ãẽꞌgacü niĩ, ga 977 naü̃pa ya Cristu, ãẽꞌgacüpatawa nayema i tupananetagü ga Canaáü̃cü̃ãꞌ. Notürü, Tupanaarü Ore nüü̃ niu na ãẽꞌgacü ga Achá rü inaügü na Tupanaga naĩnü rü meü̃ naü ga napeꞌewa. Achá rü nagu napogü i ngẽma natchicagü i ngetá ngẽma duü̃ü̃gü norü tupanagücaꞌ naü̃nagü nawa ínaguü̃. (2 Crô 14:2, 3, TNM) Rü nhuꞌmatchi, “yema nachixü̃ãnewa ínanawoxü̃ ga yema yatügü ga nügümaãtama maxẽxü̃ ga yexguma norü tupananetaca̱x nangutaque̱xegügu”. Achá rü ta duü̃ü̃güü̃ poraãcü naucuꞌẽ na Yeuwacaꞌ nawoeguü̃caꞌ rü norü mugüga naĩnüẽü̃caꞌ. — 1 Reis 15:12, 13, 2 Crô 14:4, TNM
w 03/17 19-20wa 7tchimaü̃
7 Wüi nacüma na Achárüü̃ tiĩgüü̃caꞌ niĩ Yeuwacaꞌ tapuracüe i guü̃ i torü maü̃nemaã, woo nhugüãcü rü nagutcha niĩ. Nhuãcü nüü̃ icuaꞌgüü̃ tchi nhuꞌma iügüü̃ i ngẽma? Name yigüãẽwa yigüna nacagü: ‘Eꞌna na tchaugü tchaporaẽẽ na aicuma Yeuwaga tchaĩnü rü tama wüi cuaꞌruü̃ i tchieü̃ tchiĩ i taenegücaꞌ?’ Achá tama namuü̃waꞌe yeguma norü noẽ ga Maácamaã nanauegu na tüma rü tama ãẽꞌgacüarü noẽ tiĩü̃. Bemana, nhugüãcü cuma rü nawaꞌe Achárüü̃ niĩ rü tama namuü̃waꞌe. Cuaꞌãtchiruü̃, nagu rüĩnü na wüi cutanüü̃ rüeꞌna curü ãmücü poraãcü tchieü̃ naü rü tama nüü̃ narüo ga ngẽma pecadu. Rü ngẽmagagu, nüü̃ ínataꞌ ya yaõgüü̃tücumüwa. Cuma rü tama natanügu cuã i ngẽma duü̃ü̃? Taꞌacü cuütchi?
it-1 225wa 1tchimaü̃
Woo nhugüãcü Achá tama meã nüü̃ cuaꞌ na taꞌacü naüü̃, nüma rü nüü̃́ nayema meü̃ i nacümagü rü ta taguma nüna niũgatchi ga Tupanaarü aicumagü. Rü yemacaꞌ, nüma rü niĩ wüi ãẽꞌgacü na aicuma Yeuwaga naĩnü ga Yudáwa. (2 Crô 15:17, TNM) Achá rü 41 taunecü ãẽꞌgacü niĩ, rü yema taunecüguyane to i ãẽꞌgacügü Iraéuwa nayema: Yeruboáü̃, Nadá, Baácha, Éra, Ziü̃rí, Oü̃rí, Tiní rü Acá. (1 Reis 15:9, 15:25, 33, 16:8, 15, 16, 21, 23, 29) Yeguma nayuꞌgu ga Achá rü nane ga Yochapá niĩ ga natchicüü ãẽꞌgacü iĩcü. — 1 Reis 15:24
Nguꞌẽẽtaegü uirurüü̃ iĩü̃
w98 15/09 21wa 8tchimaü̃
Cuaꞌãtchiruü̃, nawa naugütae i Yeuwaarü ore natchiga ga wenaarü inanaügüe ga Yericó rü ngẽmawena nagu rüĩnü na nhuãcü yema rü nangupetüü̃. Josué 6:26wa rü nhanagürü: “Rü yemawena nüma ga Yochué rü nanaxuegu ga ñaa dexa rü ñanagürü: —Rü Tupanape̱xewa rü chixexü̃ tá tüxü̃ nangupetü ya yíxema wena inaxügüxẽ nax ítanadaxẽẽxü̃ ya yima ĩane ya Yericú. Rü ngẽxguma itanaxügügu nax wena ítanadaẽẽxü̃ ya yima ĩane rü tümane ya yamaecüca̱x tá ínangu i yu. Rü ngẽxguma nanucugu i naxtapü̱xarü ĩã̱xgü rü tümane ya rübumaecüca̱x tá ínangu i yu—ñanagürü.” Yema rü nangupetüü̃ ga 500 taunecügüwena, rü ngẽmatchiga 1 Reis 16:34wa rü nhanagürü: “Rü yexguma Acáx ãẽ̱xgacü ixĩxgu rü nüma ga Ié ga ĩane ga Betéxcüã̱x rü wena nanaxü ga guma ĩane ga Yericú. Rü yexguma inanuãgu ga guma nutagü ga guma ĩane nawa ixügücü rü nane ga yamaecü ga Ajbiráü̃maxã naxãtanü rü nayu. Rü yexguma nanucuãgu ga naxtapü̱xarü ĩã̱xgü rü nane ga Chegú ga rübumaecümaxã naxãtanü rü nüma rü ta nayu. Yerü yemaacü nanaxuegu ga Cori ya Tupana nawa ga Yochué ga Núü̃ nane.” Tupana i aicumacüicatama na nüü̃ niuü̃caꞌ ga yema oregü rü na nüü̃ nayanguẽẽü̃caꞌ ga guü̃ma ga norü unetagü.
3-9 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 1 REIS 17-18
“‘Nhuguratáta i pema i nüü̃ perüoeü̃ na tare i ĩnügu perüĩnüeü̃?’”
w 03/17 14wa 6tchimaü̃
6 Yeguma iraéutanüü̃gü marü naãne na Tupana namaã nauneta namaẽgu, nümagü nanawaꞌegü nüü̃ naunetaü̃caꞋ tchi Yeuwaü̃ nicuaüü̃güü̃ rüeꞌna to i tupananetagüü̃ nicuaꞌüü̃güü̃. (Nawa naugütae Josué 24:15.) Yema uneta rü nameẽtchi, na namaẽamagüü̃caꞌ rüeꞌna tama nümagü nanawaꞌegü nüü̃ nauneta. Yeguma Yeuwa nüna naãgu i ãẽꞌgacügü na namaã ínacuágüü̃caꞌ, iraéutanüü̃gü mueꞌpüꞌcüna tchieü̃ i unetagü naügüü̃. Nümagü rü tama Yeuwaga naĩnüẽtchaü̃ rü tupananetagüü̃ nicuaꞌüü̃gü. (Juí 2:3, TNM, 2:11-23) Rü yemawena, yeguma Ería namaü̃gu, duü̃ü̃gü nawaꞌegü wenaarü nüü̃ nauneta: Yeuwacaꞌ napuracüe rüeꞌna tupananeta ga BaácaꞋ. Ería nüü̃ inayarüweãtchiẽẽ ga duü̃ü̃gü erü nümagü tama nüü̃ naunetagü nacaꞌ i teéwe narüĩ. Bemana cuma rü nagu rüĩnüẽ: ‘Notürü yema uneta rü tama nagutcha. Yeuwacaꞌ napuracü rü nüü̃ nicuaꞌüü̃ guü̃guma rü torü mecaꞌ niĩ!’ Aicuma niĩ, tauema nawaꞌe to i tupanaü̃ nicuaꞌüü̃. Notürü, yema iraéutanüü̃gü tare i ĩnügu narüĩnüeü̃. (1 Reis 18:21) Ería namaã meã ngóü̃ niu rü nüü̃ naucuꞌẽ na Yeuwa ya Tupana aicumacüü̃ nicuaꞌüü̃güü̃.
ia 88wa 15tchimaü̃
15 Baáarü tchatcherdótegü “rü nayadaxẽxẽ ga nax yaxáichaxü̃. Rü cüxchimaxã nügü niwítüchacüügü rü nügü inapaiaxü̃negü.” Notürü, “taxuxü̃ma nanangãxü̃ rü bai ga wüxi ga naga ga nüxü̃ naxĩnüexü̃.” (1 Reis 18:28, 29) Aicuma niĩ natauma i Baá. Yema tupananeta niĩ i wüi Chatanácüma na duü̃ü̃güü̃ nawomüẽẽgüü̃caꞌ rü nüü̃ ínata ga Yeuwa. Teé nüü̃ nauneta i to tupana na nüü̃ nicuaꞌüü̃ü̃caꞌ rü guü̃guma ãne nüü̃ ningeẽẽü̃. — Nawa naugütae Salmo 25:3, 115:4-8
ia 90wa 18tchimaü̃
18 Naü̃pa ga Eríaarü yumüẽ, guü̃ma i duü̃ü̃gü bemana nagu narüĩnüẽ tchi Yeuwa wüi tupananeta niĩ ga Baárüü̃. Notürü, yema yumüẽwena, duü̃ü̃gü tama yemagu narüĩnüẽama. Tupanaarü Ore rü nhanagürü: “Rü yexgumatama [Yeuwa] Cori ya Tupanaarü üxüema rü ngürüãchi yexma naétü nangu ga yema wocaxacümachi. Rü nixa ga yema namachi rü üxü rü wootama ga guma nutagü rü waixümü. Rü yema dexá ga yema ícaeguxü̃machatexewa yexmaxü̃ rü niipa.” (1 Reis 18:38) Nameẽtchi i yumüẽarü ngãü̃! Rü yemawena taꞌacü duü̃ü̃gü nagu narüĩnüẽ?
Nguꞌẽẽtaegü uirurüü̃ iĩü̃
w08 01/04 quadru naátü 19wa
Yeuwaarü orearü uruü̃ ga Ería, ãẽꞌgacü ga Achámaã nidea ga paãma naãnegu napu. Yema rü tamaeꞌpüꞌ ga taunecüguwena ga Ería nüü̃ niu ga tama napu. (1 Reis 18:1) Yeuwa nanapuẽẽ nawena ga Ería nüü̃ niu ga yema. Yemaãcü, bemana nümaü̃ nagu rüĩnüẽ na yema nguneü̃gu ga tama napu naguꞌẽẽ ga naü̃pa ga tamaeꞌpü ga taunecügu. Notürü, Ngetchutchu rü Tiagu nüü̃ niugü “ga tomaẽ̱xpü̱x ga taunecüarü ngãxü̃ rü taguma napuxü̃”. (Luca 4:25, Tia 5:17) Nhure i nguneü̃gu aicuma tama napu?
Iraéuãnewa, airügumaraü̃ niĩ tama napu i 6 taumacüguyane. Rü Ería Acápeꞌewa naũ yeguma marü nangupetügu i yeera i tauemacü. Yemaãcü, yeguma Ería nüü̃ niu ga napugu i tamaeꞌpü ga taunecüwena ga nüma rü nüü̃ niu ga tama napu ga yema naãnewa rü marü naüpetü ga tamaeꞌpüꞌ ga taunecüarü ngãü̃ ga taguma napuü̃. Rü yemawena ga duü̃ü̃gü nanangutaqueꞌegü ga mapüne ya Carmérugu.
10-16 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 1 REIS 19-20
“Yeuwacaꞌ nadau na nüü̃ nataãẽẽẽü̃caꞌ”
w 06/19 15-16wa 5tchimaü̃
5 Notürü yeguma Yechabé nüü̃ nimaꞌtchaü̃gu ga Ería, nüma rü nüü̃ nicuaꞌãtchi ga ãũcümaü̃wa na nayemaü̃, rü yemacaꞌ ĩane ga Bechébawa ga Yudáanewa yemanewa nanha. Ería poraãcü narümaãtchi rü nayutchaü̃. Tüꞌcüü̃ yemagu narüĩnü? Erü “Ería nixĩ ga wüxi ga yatü ga taxrüü̃ ixĩcü”. (Tia 5:17) Bemana nipaü̃tchi rü naoegaãẽü̃tchi. Rü Ería nagu rüĩnü ga woo nügü naporaẽẽ na nüü̃ ínapoü̃ü̃caꞌ ga õ i aicumaü̃, yema rü tama nüü̃ narüngü̃ẽẽ. Nacaꞌ, iraéutanüü̃ tama meü̃ i Tupanapeꞌewa namaẽ rü nümaicatama Yeuwaü̃ nicuaꞌüü̃. (1 Reis 18:3, 4, 13, 19:10, 14) Bemana Eríaarü ĩnü tüü̃ nabaiꞌãtchiẽẽ. Notürü Yeuwa meã nüü̃ nacuaꞌü̃ ga Eríaarü ĩnü.
ia 103wa 13tchimaü̃
13 Taꞌacügu curü ĩnü: taꞌacügu Yeuwa rüĩnü yeguma nüü̃ nadaugu norü orearü uruü̃ rü wüi ga naitüü̃wa nayarütoõtchi rü nacaꞌ naca na nayuü̃caꞌ? Tupanaarü Ore nanaweꞌ i ngẽma. Yemawena ga Ería nape, Yeuwa nanamu wüi ãĩyu. Ãĩyu Eríaü̃ ningogü rü nhanagürü nüü̃: “¡Írüda rü nachibü!” Ería naga naĩnü, erü ãĩyu nüna naã i õna, paũ rü deá na natchibüü̃caꞌ. Eꞌna Ería moẽ ãĩyuna naã ga yemacaꞌ? Tupanaarü Ore nüü̃ niu ga nüma rü ínarüda rü natchibü rü naae. Eꞌna Ería poraãcü narümaãtchi rü nacaꞌ nagutchaü̃tchi nidea? Tama nüü̃ icuaꞌgüü̃, notürü ãĩyu rü wenaarü Eríaü̃tawa naũ, bemana pamama niĩ. Rü wenaarü nhanagürü nüü̃: “¡Írüda rü nachibü!”, rü nhanagürü ta: “Erü yáxü̃gu tá quixũ i ngẽma ícuxũxü̃wa.” — 1 Reis 19:5-7
ia 106wa 21tchimaü̃
21 Tupanaarü Ore nüü̃ niu na Yeuwa tama yema ngupetügüwa nayema. Ería nüü̃ nacuaꞌ ga Yeuwa tama tupananetarüü̃ niĩ. Cuaꞌãtchiruü̃, Baáarü duü̃ü̃gü nagu nayaõ ga Baá napumaã ínacuá. Yeuwa nanaü i guü̃ma i naãnewa ngẽmaü̃ rü guü̃arü yeera napora niĩ. ‘Rü ngẽma daũguü̃ i naãne i taütchiü̃ rü tama yangugu na nawa nangemaü̃!’ (1 Reis 8:27) Nhuãcü yema rü Eríaü̃ narüngü̃ẽẽ? Nüna nacuaꞌãtchi ga Ería namuü̃. Notürü, Tupana iaicumacü nacüwawa nayema, rü Yeuwa Guãẽtüwa Ngẽmacü niĩ, rü yemacaꞌ Ería tama namuü̃ ga Acá rü Yechabé. — Nawa naugütae Salmo 118:6
ia 106-107wa 22tchimaü̃
22 Rü yema üüemawena, “rü yéma inanaxũ ga wüxi ga ígaxü̃ ga naga ga mexechixü̃”. Yema naga Eríana nau na wenaarü nideaü̃caꞌ. Yemaãcü, norü tareeꞌpüꞌcüna ga Ería nüü̃ niu i norü oegaãẽtchiga. Bemana naü ga yema nüü̃ narüngü̃ẽẽ. Notürü, aicuma niĩ ga Eríaü̃ nataãẽẽẽ yeguma wenaarü nüü̃ naĩnügu “ga naga ga mexechixü̃”. Yeuwa nanaweꞌ ga Ería nacaꞌ nameẽtchi. Nhuãcü? Tupana namaã nüü̃ niu i taꞌacü naütchi ga Baáarü duü̃ü̃gümaã ga Iraéuãnewa. Aicuma niĩ, ga guü̃ma ga Eríaarü puracü rü name, erü Yeuwa norü ngútchaü̃ naüama rü tauema nüü̃ nagutchaẽẽ. Rü nhuꞌmatchi, Yeuwa nanamu ga Ería nacaꞌ napuracüama. — 1 Reis 19:12-17
Nguꞌẽẽtaegü uirurüü̃ iĩü̃
w97 01/11 31wa 1tchimaü̃
Nhuꞌma muü̃tchi i Yeuwaarü duü̃ü̃gü narüü̃ naü rü nüü̃ narüo i norü ngútchaü̃. Nümaü̃ “naãnegüna ngema iũẽ”, rüeꞌna norü puracü, na Tupanaarü Oreü̃ niugüü̃caꞌ i to natchicagüwa rüeꞌna na napuracüe i Betéuwa. Togü to i natchiü̃ãnewa naũ na nanaügüü̃caꞌ i ngutaqueꞌepataü̃gü. Muü̃tchi nanaü i ngeü̃rüüü̃mare i puracügü. Notürü, Yeuwacaꞌ teé nacaꞌ napuracü rü nameẽtchi niĩ. Teé norü ngútchaü̃maã napuracüe Yeuwa naétü nawémeꞌ. — Marcu 10:29, 30
17-23 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 1 REIS 21-22
“Yeuwarüü̃ naü ngẽguma togümaã ínacuágu”
it-2 53wa 6tchimaü̃
Yeguma Yochué nüü̃ nadagu wüi ãĩyu ga Yericúarü ngaicamagu, rü nüna naca tchi norü uwanü niĩgu, ãĩyu rü nhanagürü: “Choma rü taxuxétanüxü̃ chixĩ. Nuã chaxũ nax Cori ya Tupanaarü churaragüerü chixĩxü̃ca̱x.” (Jos 5:13-15) Orearü uruü̃ ga Micaía ãẽꞌgacü Acacaꞌ rü Yochapácaꞌ nhanagürü: “Rü nüxü̃ chadau ga Tupana ya norü tochicaxü̃wa rütocü, rü guxü̃ma i daxũcüã̱x i orearü ngeruxü̃ i naxü̃tagu chigüxü̃ ga norü tügünecüwawa rü norü toxoxwecüwawa”, rü nüü̃ niu natchiga i ãĩyugü. (1 Reis 22:19-21) Nüü̃ niu i ‘Tupanaarü tchuraragü’ rü weguü̃ niĩ erü Tupanaarü Ore natchiga nidea i querubiü̃gü, serafimgü rü ãĩyugü (Isa 6:2, 3, Gên 3:24 rü Apo 5:11), notürü, rü nhuꞌmatchi i natücumügü, erü Ngetchtchu natchiga nidea “muxü̃ma i norü orearü ngeruü̃gü i daxũcü̱̃ã̱x”. (Mat 26:53) Yeguma Echequía nayumüẽgu nüma rü Yeuwatchiga nhanagürü: “Pa Corix, Pa Torü Tupana ya guxãétüwa ngẽxmacü, rü Iraétanüxü̃güarü Tupana ixĩcü i Nua Daa Cupataarü Aixepewa i nachica i Üünexü̃wa Ngẽxmaxẽx”, yerü natchiga nidea ga yema baú ga Tupanaarü mugü nawa yemaü̃ rü ‘Yeuwa ya guãétüwa ngẽmacü rü querubiü̃güarü ngaü̃tanüwa nüü̃́ ngẽmacü i norü totchicaü̃’. (Isa 37:16, rü nüü̃ nadau ta 1 Sam 4:4 rü 2 Sam 6:2.) Rü nüü̃ nataãẽẽẽ ga Erichéuarü ngü̃ẽẽruü̃ yeguma nüü̃ nadaguꞌ “ga yema churaragü ga guma ĩanexü̃ íchomaeguãchixü̃ namaxã ga norü cowarugü, rü namaxã ga naweü̃gü ga cowaru itúgüne”, rü yema niĩ i nümaü̃ ga Yeuwaarü ãĩyugü. — 2 Reis 6:15-17
w 02/21 4wa 9tchimaü̃
9 Yeuwa Guãétüwa Ngẽmacü niĩ, notürü nüma rü nüü̃ naĩnü i norü duü̃ü̃güarü ĩnü. (Gên 18:23, 24, 32) Rü ta Yeuwa nanayau i norü ‘ucuꞌẽgü’. (1 Reis 22:19-22) Yeuwa meãma nüü̃ nacuaꞌ na yiemagü tipecaduãgüü̃. Notürü, nüma rü norü duü̃ü̃güü̃ narüngü̃ẽẽ. (Sal 113:6, 7) Rü ngẽmacaꞌ, Tupanaarü Ore nüü̃ niu na Yeuwa niĩ ya tüü̃ rüngü̃ẽẽcü. (Sal 27:9, Ebr 13:6) Dawí nüü̃ nacuaꞌ ga meã naü ga norü puracü erü Yeuwa nüü̃ narüngü̃ẽẽ. — 2 Sam 22:36
it-2 354wa 7tchimaü̃
Micaía nangoꞌetü rü nüü̃ nadau ga Yeuwa tama nanatchuꞌu na wüi ãĩyu rü ‘doramare i ore naãẽwa nanguẽẽ i guü̃ma i ngẽma Acáarü orearü uruü̃gü’. Rü yema ãĩyu rü norü poramaã nüü̃ nanangútchaü̃ẽẽ ga Acáarü orearü uruü̃gü na Acámaã doraü̃ niugüü̃caꞌ. Woo marü Acáü̃ naucuꞌẽ na tama yema duü̃ü̃güü̃ naĩnüü̃caꞌ, rü nacaꞌ name ga yema dora rü yemagagu nayu. — 1 Reis 22:1-38, 2 Crô 18
Nguꞌẽẽtaegü uirurüü̃ iĩü̃
w 10/21 3wa 5-6tchimaü̃gü
5 Yema ngupetüü̃ Acá nangetchaü̃ü̃tchi. Woo ga yema, nüma rü tama aicuma nüü̃ narüoe ga norü tchieü̃. Erü tama íraeutanüü̃güna natchuꞌu na Baáü̃ yacuaꞌüü̃güü̃caꞌ rü bai nüü̃ naucuꞌẽ na Yeuwaü̃icatama yacuaꞌüü̃güü̃caꞌ. Rü ta nüma rü togü ga nacümagüwa nanaweꞌ na tama aicuma nüü̃ narüoe ga norü tchieü̃.
6 Nümaü̃ ga nguneü̃guwena, Acá rü nügü nadaiü̃ ga Chíriaanecüãꞌgümaã. Nüma rü Yudáãnearü ãẽꞌgacü ga Yochapácaꞌ naca ga norü ngü̃ẽẽ. Rü yema ga Yochapá nüü̃ naucuꞌẽ na wüi Tupanaarü orearü uruü̃na inacaꞌ ga norü ucuꞌẽgü. Tama Acáü̃́ name ga yema. Rü nüma rü nhanagürü: “Ngü̃, nangexma nixĩ ya wüxi nax tüxü̃́ Tupanana nacaxacü, rü nüma nixĩ ya Micaía ya Irá nane. Natürü naxchi chaxai erü taguma ta̱xacürü mexü̃xü̃ chomaxã nixu, rü guxü̃guma chixemarexü̃xicatama nixu”. Woo ga yema, Acá nacaꞋ nadau ga Micaáarü ore. Rü Acáü̃́ tama name ga norü ore rü yemagagu Micaíaü̃ napocu. Taꞌacü naüü̃ ga Acá nanaweꞌ na nüma rü tama aicuma nüü̃ narüoe ga nacüma ga tchieü̃. (1 Reis 22:7-9, 23, 27) Aicuma niĩ na Acá nüü̃ napocu ga Tupanaarü orearü uruü̃, noturü Yeuwa yanguẽẽü̃ ga yema ore ga Micaía nüü̃ niuü̃. Rü yemawena nügü nadaitchicawa Acá nayu. — 1 Reis 22:34-38
24-30 OTUBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 2 REIS 1-2
“Meü̃ i cuaꞌrüü̃ na nhuãcü togüü̃ nangúeẽẽtchiga”
w15 15/04 13wa 15tchimaü̃
15 Yema Erichéuarü ore, nanaweꞌ na nhuãcü taenegü nanaweꞌgü na naga naĩnüẽü̃ ya anciãogü i yeera nüü̃ cuaꞌgüü̃. Wüi ga nguneü̃guwena ga Ería rü Erichéu naü̃tawa nayemagü ga ngetüꞌü̃cügü ga orearü uruü̃gü ga Yericúwa rü nümagü natü ga Yudáü̃wa naĩ. Rü yema natüwa “Ería rü nanayaxu ga naxchiru ga mámüxü̃ rü nanadixcumü rü yemamaxã dexáchiüwa nanacua̱i̱xca. Rü ga dexá rü niyauxyexü̃chiüãchi. Rü nüma ga yema taxre rü yéma nügümaxã nichoü̃ pachitamaxü̃wa . . . Rü yemaãcü yadexatanüyane ga nax inaxĩxü̃”. Erichéu meãma nüü̃ naĩnü ga Eriá erü yeera nüü̃ nacuaꞌtchaü̃. Yemawena guma niĩ ga Eríaü̃ igaü̃ne ga dauü̃guü̃ ga naanewa nagu ga wüi ga buanecü ga iãꞌũꞌemacü. Rü yema ngupetüü̃wena “rü nüma ga Erichéu rü nanayaxu ga Eríachiru ga mámüxü̃ ga yéma nguxü̃. Rü natü ga Yudáü̃ca̱x natáegu rü yemacutügu nayachi. Rü ñuxũchi yema Eríachirumaxã dexáchiüwa nanacua̱i̱xca, rü tagaãcü ñanagürü: —¿Ngexcü yixĩxü̃ ya Cori ya Eríaarü Tupana ixĩcü? —ñanagürü. Rü yexguma yema ñaxgu rü dexáchiüwa nanacua̱i̱xca rü niyauxyexü̃chiü ga dexá.” — 2 Reis 2:8-14
w15 15/04 13wa 16tchimaü̃
16 Rü nüü̃ quicuaꞌãtchi ga taꞌacü ga naüü̃ ga Erichéu ga Yeuwaarü̃ poramaã rü yegumarüü̃ ga Ería naüü̃? Tüꞌcüü̃? Erü Erichéu tama nagu nidaucüraü̃tchaü̃ ga taꞌacü Ería nüü̃ nangúeẽẽ, rü yemagagu narüü̃ naüü̃ ga norü puracü ga Yeuwacaꞌ. Yema nacüma ngetüꞌücügü ga orearü uruü̃güü̃ narüngü̃ẽẽ na Erichéugu nayaõgüü̃caꞌ. (2 Reis 2:15) Erichéu 60 ga taunecügu Tupanaarü orearü uruü̃ niĩ, rü Yeuwa nüü̃ narüngü̃ẽẽ ga norü poramaã na muü̃tchi ga meü̃gü naüü̃caꞌ ga Eríaarü yeera. Rü taꞌacü nawa icuaꞋgüü̃?
Nguꞌẽẽtaegü uirurüü̃ iĩü̃
w05 01/08 9wa 1tchimaü̃
Taꞌacü yiĩ ga yema ‘dauü̃guü̃ ga naane’ ga Ería nawa naũ? Ngẽma dauü̃guü̃ i naane tama niĩ ngeta Yeuwa rü ãĩyugü namaẽ. (Deut 4:19, Sal 11:4 rü Mat 6:9; 18:10) Rü ngẽma ‘dauü̃guü̃ i naane’ rü atmosfera niĩ ngetá caianeü̃ ngẽmagüü̃. (Sal 78:26, Mat 6:26) Bemana yema ‘naweü̃ ga iyauꞌracüǘne’ rü nayaga ga Eriá ga dauü̃guü̃ ga naanewa i to i iãnecaꞌ, yema iãnewa Ería namãẽ. Nümaü̃ ga taunecüguwena nanawü ga wüi carta nacaꞌ ga ãẽꞌgacü ga Yoráü̃. — 2 Crô 21:1, 12-15
31 OTUBRUARÜ – 6 NOWẼBRUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ | 2 REIS 3-4
“Daa niĩ ya cune”
w 12/17 4-5wa 7tchimaü̃
7 Erichéu ga nanaü ga Tupanaarü poramaã ga norü tare i ore natchiga i duü̃ü̃ ga wenaarü namaü̃ nawa i Tupanaarü Ore. Wüie ga nge ga Chúnecü̃ãꞌ ga ãtchiü̃cü Erichéumaã tamecüma. Yeuwa taétü nawémeꞌ ga yema nge rü ngĩte ga marü naya ga nanemaã. Nümaü̃ ga taunecüwena, ngĩne nayu. Nagu rüĩnü na nhuãcü yema nge rü poraãcü tangetchaü̃! Yéma iũ rü nawa ingu ga guma maꞌpǘne ga Carmérugu ãégane ga Erichéu íyemaü̃wa. Erichéu nanamu Yiéchi, norü ngü̃ẽẽruü̃, ga Chúnewa naũ. Notürü Yiéchi tama wena namaü̃ü̃ ga bucü. Yemawena, Erichéu rü nae ga bucü Chúnewa nangugu. — 2 Reis 4:8-31
w 12/17 5wa 8tchimaü̃
8 Erichéu ucapugu naücu rü Yeuwacaꞌ nayumüẽ. Rü Yeuwa wenaarü nüna naã i maü̃. Aicuma niĩ, nae ga guma bucü tataãẽü̃tchi! (Nawa naugütae 2 Reis 4:32-37.) Bemana tüma rü nüna tacuaꞌãtchi ga Anaarü yumüẽ yeguma Chamué inaügügu ga norü puracü ga Tupanapatawa: ‘Yeuwa . . . rü nanayau i maü̃ rü ngegumarüü̃ tá tüna nanaã.’ (1 Sam 2:6) Ngẽma ngupetü nanaweꞌ na Yeuwa aicuma wenaarü duü̃ü̃gü namaẽ tá.
Nguꞌẽẽtaegü uirurüü̃ iĩü̃
it-2 728wa 4tchimaü̃
Bemana “yatü ga Tupanaarü orearü uruũgütanüxü̃ ixĩxü̃” nüü̃ niu natchiga i wüi ngúepataü̃ nacaꞌ i teé orearü uruü̃ niĩ, rüeꞌna wüitücumürica niĩ. Nüü̃ niugü ga Betéuwa, Yericúwa rü Yirigáwa nayema i orearü uruü̃gütücumü.