DÍÍ GÁTANI̱ ÍNDO̱ NATU̱JXU̱U̱ NUMUU

Atayáá dí xúʼko̱ má gárígá

Índo̱ natu̱jxu̱u̱ numuu dí nuʼtsi ga̱jma̱a̱ nuni̱ numulú májánʼ tséxmiéjunlú má wéñuuʼ. Mú, á mu mbaʼ enújngoo etujxu̱u̱ numuu ga̱jma̱a̱ tséʼdaaʼ mba̱a̱ mbújkha̱a̱, mbáa maʼni dí maxmiéjunlú. Itháan á mu ndayóoʼ muxnún rí ndañún bi̱ kúwá náa guʼwúlú.

Nda̱a̱ dí ma̱ndoo mu̱ʼni̱ mu xátu̱jxu̱u̱ numuu dí nuʼtsi, mú dí mbuʼyáá dí xúʼko̱ má gárígá ma̱ndoo mambáyulú.

NDÍJKHÁ GÍʼDOO NUMUU RÁ.

Índo̱ natayáá dí xúʼko̱ má gárígá, maʼni dí:

Xaxmiéjuanʼ wéñuuʼ. Á mu tséxmiéjuaanʼ wéñuuʼ mambáyaaʼ matatsaʼwamínáʼ májánʼ ga̱jma̱a̱ matraʼwíí májánʼ dí gátani̱.
Majmaaʼ májánʼ mbújkha̱a̱ʼ. Mbá xkri̱da, xóo dí matani̱ numáá aguʼ o i̱ʼwáʼ rí ndayóoʼ.
Xágiʼda̱a̱ʼ gajmiáanʼ bi̱ kúwá náa guʼwáaʼ ga̱jma̱a̱ numuu mbújkha̱a̱.
Ma̱ta̱ya̱a̱ ndiéjunʼ gátani̱ ga̱jma̱a̱ matiewa̱a̱n dí naratsi̱.

DÍ MA̱NDOO MATANI̱

Atriʼkui̱i̱ xóo xtáa. Índo̱ mbá nacha̱ etujxu̱u̱ numuu, májánʼ gáʼni dí xáratsi̱ má dí tséyáʼ. Tikhuun xa̱bu̱ najmún mbújkha̱a̱ dí raguáʼdáá ga̱jma̱a̱ rígi̱ naʼni dí maʼniún gakhi̱i̱ makuwá. Májánʼ má dí naxmiéjuaanʼ xtañún bi̱ kúwá náa guʼwáaʼ ga̱jma̱a̱ dí nandaaʼ maraxnu̱u̱n xúgíʼ dí nda̱ñúunʼ, mú gármáʼáan a̱jkia̱a̱nʼ dí phú nda̱ñúunʼ mámbáa dí ikhiin nindxu̱u̱ dí matasngajmún dí nandaaʼ xtañún, dí maraxtaa mbóó gajmiáanʼ ga̱jma̱a̱ dí maxmiéjuaanʼ xtañún.

“Tsáa dí ikháanʼla ga̱jma̱a̱ numuu rí naxmiéjuunʼ ma̱ndoo maʼnirámáaʼ i̱mbá chíʼgíiʼ mbiʼi rí maxtáa rá.” (Lucas 12:25.)

“Xáxmiéjuanla nditháan ga̱jma̱a̱ numuu imbo̱o̱ mbiʼi, numuu rí imbo̱o̱ mbiʼi marigá rí maʼni maxmiéjuanla. Numuu rí mámbá mbiʼi narígá xkujndu” (Mateo 6:34).

Á mu najmaaʼ mbújkha̱a̱ dí na̱nguá xtaʼdáá, maʼni dí maʼniaaʼ gakhi̱i̱ maraxtaa.