DÍÍ GÁTANI̱ ÍNDO̱ NATU̱JXU̱U̱ NUMUU

Gajmaaʼ májánʼ mbújkha̱a̱ʼ

Naʼni gakhi̱i̱ makuwáanʼlú índo̱ natu̱jxu̱u̱ numuu dí nuʼtsi, mú rígá dí ma̱ndoo muʼnilú.

NDÍJKHA GÍʼDOO NUMUU RÁ.

Á mu tsíñewa̱a̱n xóo ejmulú mbújkha̱a̱, mbáa rígi̱ gáʼni dí mumíniiʼ, maguaʼdáá xkujndu ga̱jma̱a̱ maxmiéjunlú ga̱jma̱a̱ numuu mbújkha̱a̱. Maski ajndu na̱nguá guáʼdáá mba̱a̱ mbújkha̱a̱ mú rígá mbaʼa dí ma̱ndoo muʼnilú mu majmulú májánʼ.

DÍ MA̱NDOO MATANI̱

Xáratsi̱ mbaʼ maratsíí á mu na̱nguá xtaʼdáá mbújkha̱a̱. Rígi̱ gámbáyáaʼ mu xáxmiéjuaanʼ wéñuuʼ ga̱jma̱a̱ maraxtaa itháan xawii índo̱ phú gaʼyáaʼ.

Á mu nataniraʼmáʼ nguáthá gátadaaʼ ga̱jma̱a̱ nguáthá gájmaaʼ, rígi̱ gámbáyáaʼ mu xájmáʼ mbaʼ majmááʼ, atatsaʼwáminaʼ ndiéjunʼ dí ndáyóoʼ maratsi̱ ga̱jma̱a̱ nda̱wa̱á ataniraʼmáʼ xóo gájmaaʼ mbújkha̱a̱ʼ ga̱jma̱a̱ atanimbáníí awan dí nitríyaʼ. Mú, á mu naxtiʼkhu̱u̱ dí natadaaʼ o naxtiʼkhu̱u̱ numuu dí naratsi̱, atriʼkhui̱i̱ awan dí nitríyaʼ. Ga̱jma̱a̱ á mu nitatsigúnʼ o nitanújunʼ, ginii atrajxi̱i̱ bi̱ ndiyáa nákhá xóó tsétraʼwíí dí matani̱.

Ataniminaʼ matani̱ rígi̱: Índo̱ gáratsi̱, mbájkhu má gátani̱ numáá, xátani gidxóó. Mbaʼin nambáñúún rígi̱ mu muñewa̱a̱n mbújku̱ún. Atayáá májánʼ nguáthá mba̱a̱ mbújkha̱a̱ xtaʼdáá mu matayaa májánʼ nguáthá gájmaaʼ.

Mbáa maʼniaaʼ gakhi̱i̱ dí xájmaaʼ wéñuuʼ mbújkha̱a̱. Mú, á mu natríyaʼ mbá májánʼ awan majmáán matiewa̱a̱n mbújkha̱a̱ʼ.

“Mbá xkri̱da, tsáá mbáa dí ikháanʼla á mu dí nandoo maʼni mbá guʼwá, tsígi̱ʼi̱ ginii mu mbaʼyoo nguáthá mba̱a̱ mbújkha̱a̱ gáraʼaa ga̱jma̱a̱ á mu kaʼnii maʼngo̱o̱ maʼnigájxu̱u̱” (Lucas 14:28).

Atie̱wa̱a̱n ñajunʼ rí xtaʼdáá. Ndiéjunʼ gátani̱ mu xandátigaa ñajunʼ dí xtaʼdáá rá. Ayuʼ náa hora dí nijuiʼtháanʼ, atatsaʼwáminaʼ náa rí májánʼ dí nakánáaʼ, atasngájmún eʼwíinʼ dí nandaaʼ matambáñún. Atiejunʼ gakhi̱i̱ ga̱jma̱a̱ atasngájma dí xtaʼdáá gamajkuaaʼ. Atatsimba̱a̱ʼ dí gútha̱nʼ ga̱jma̱a̱ atiniminaʼ majmañaaʼ matiejunʼ itháan májánʼ.

Xájmaaʼ mbaʼ majmáánʼ mbújkha̱a̱ʼ. Atrajxi̱mínáʼ: “Lá mbaʼ natsíí dí numuu wéñuuʼ o natsi̱ dí asndu na̱nguá má eyóoʼ ráʼ.” Mbaʼin xa̱bu̱ najmún mbújku̱ún mu mutsi̱ droga, ndíí o nutsi̱ wéñuuʼ iyaʼ najnga̱a̱ o mbaʼ nutsijmún mbújkhu̱ún. Rígi̱ naʼni dí xákúwá májánʼ ma̱ngaa gamíi mandáti̱gu̱u̱n ñajunʼ rí guáʼdáá.

“Gagi xtáa xa̱bu̱ bi̱ naxkamaa ku̱ma̱ […]. Nindxu̱u̱ itháan májánʼ ki xóo dí mataʼyáʼ plata” (Proverbios 3:13, 14).

Atiéjxi̱i̱ mbújkha̱a̱ mu majmaaʼ índo̱ gáʼyóoʼ. Á mu naʼngo̱o̱, atiéjxi̱i̱ mbá chíʼgíiʼ mbújkha̱a̱ʼ mu majmaaʼ índo̱ gáʼyóoʼ. Á mu xtaʼdáá mbá chíʼgíiʼ mbújkha̱a̱ dí nitiéjxi̱i̱, rígi̱ gáʼni dí xáxmiéjuaanʼ wéñuuʼ á mu ikháán o mbáa bi̱ xtayáá naʼniuu nandii, nandátígaaʼ ñajunʼ rí xtaʼdáá o narígá mbá dí na̱nguá xtaʼthi̱i̱n.

“Mbá xúgíinʼ nugíʼníí mbá dí tséguáʼthi̱i̱n, náa mbá mbiʼi dí tséguáʼthi̱i̱n” (Eclesiastés 9:11).

Ma̱ndoo matani̱ rígi̱ mu xájmaaʼ wéñuuʼ mbújkha̱a̱ʼ

Atani̱ májáánʼ ganitsu náa guʼwáaʼ

Á mu naguʼwaanʼ naratsíí dí miʼtsu o dí migi̱i̱n maʼni dí mambáaʼ wéñuuʼ mbújkha̱a̱. Gajkhun má dí maráʼaa mbiʼi ga̱jma̱a̱ mbaʼyóoʼ tsiaki̱i̱ á mu ikháán gátani̱ májáánʼ, mú mambáyáaʼ mu xáwámbáaʼ wéñuuʼ mbújkha̱a̱ʼ ma̱ngaa matiewa̱a̱n májánʼ xóo gátani̱ májáanʼ dí miʼtsu.

Atatsaʼwáminaʼ májánʼ ndiéjunʼ gáratsi̱

Atani̱ mbá lista dí gáratsi̱ ga̱jma̱a̱ xáratsi̱ mbaʼ maratsíí.
Á mu naʼngo̱o̱ mbújkha̱a̱ʼ ga̱jma̱a̱ na̱nguá egájnuu wéñuuʼ minumuu dí maratsi̱ mbaʼa, aratsi̱, mú atrajxi̱i̱ májánʼ mu xúʼko̱ xáʼchúu mbá nacha̱.
Atayáʼ maratsi̱ dí na̱nguá minumuu wéñuuʼ.
Á mu naʼngo̱o̱, aratsi̱ náa Internet, nguáná ikhí ma̱ndoo mataxkamaa dí na̱nguá minumuu wéñuuʼ ga̱jma̱a̱ xúʼko̱ ma̱ndoo ma̱ta̱ya̱a̱ náá ejmaaʼ mbújkha̱a̱ʼ.
Á mu naʼngo̱o̱ aratsi̱ índo̱ nagajta̱a̱ numuu. Xáratsi̱ mbá nacha̱, ginii atayáʼ náa na̱nguá minumuu wéñuuʼ.

Atatsaʼwáminaʼ májánʼ nákhá xóó tsératsi̱

Bi̱ nuni̱ celular ga̱jma̱a̱ i̱ʼwáʼ dí najmulú, nurawíi má xúʼko̱ dí nuxi̱ʼ mu ikhiin maguaʼdáá mbújkha̱a̱. Ikha jngóo nákhá xóó tsératsi̱, atrajxi̱mínáʼ: “Lá gajkhun ndayóoʼ mariʼkhu̱u̱ dí gúʼdoo ráʼ. Á mu xúʼko̱, lá ndayóoʼ ma̱tsi̱ má ka ráʼ. Á mu gajkhun ndayóoʼ ma̱tsi̱, lá gíʼma maʼni dí itháan nuxi̱ʼ ráʼ.”

Atani̱ májáanʼ rí xtaʼdáá ga̱jma̱a̱ aratsi̱i̱ dí wayuu

Atie̱wa̱a̱n rí xtaʼdáá, xóo refri, estufa o tele ga̱jma̱a̱ á mu naʼchúu ataniminaʼ matani̱ májáanʼ. Ma̱ngaa, xájmaaʼ wéñuuʼ mbújkha̱a̱ʼ á mu naratsi̱i̱ dí wayuu.

Atadu dí miʼtsu

Lá rígá mbá chíʼgíiʼ náa ma̱ndoo matadu dí miʼtsu ráʼ. Á mu natadu ní xáʼyóoʼ maratsi̱ wéñuuʼ. Ma̱ngaa maraʼdáá dí ma̱ndoo matagujua, matriʼku ga̱jma̱a̱ dí nandaa o ma̱ndoo maraxnún eʼwíinʼ.

“Magajnúu májánʼ awan dí naguwíi xa̱bu̱ bi̱ nanigu̱u̱ʼ mañajunʼ” (Proverbios 21:5).

“Ndu̱ya̱a̱xu nguáthá numuu dí najmuxu̱ tsejtsíí mbiʼi ga̱jma̱a̱ nuñewa̱a̱n nguáthá nuthu najmuxu̱ tarjeta de crédito”(Miles, Inglaterra).

“Nákhá xóó tséjkuá gútsi̱xu̱, ikhúún gajmíʼ bi̱ kúwá náa goʼwóo nu̱ni̱xu mbá lista dí ndáyúxu”(Jeremy, Estados Unidos).

“Nuriʼkhu̱u̱ awan xóo majmuxu mbújkha̱a̱ á mu ndu̱ya̱a̱xu̱ dí naxtiʼkhu̱u̱ nguáthá eda̱a̱ʼxu ga̱jma̱a̱ najkua ruyejxíixu mbá chíʼgíiʼ mu majmuxu índo̱ gáʼyóoʼ”(Yael, Israel).

“Nuʼsngúún ejñu̱nxu muni̱ májáanʼ dí naguma gachíí, raʼkháa dí mutsi̱i̱ dí nuxi̱ʼ. Xóo carriuxu̱ ga̱jma̱a̱ rí najmuxu̱ náa guʼwá. Ikhúún gajmuʼ a̱ʼgiu̱ʼ nuʼnimíjna dí xútsixu̱ dí itháán nuxi̱ʼ”(Jeffrey, Estados Unidos).

“Nidu tikhu verdura ga̱jma̱a̱ nikuíʼtíin xtílá mu xátsi̱ wéñuuʼ. Dí xúgi̱ asndu naʼngo̱o̱ naxnún eʼwíinʼ dí nadu”(Hono, Myanmar).