DÍÍ GÁTANI̱ ÍNDO̱ NATU̱JXU̱U̱ NUMUU

Gaʼdxaaʼ ga̱jma̱a̱ dí xtaʼdáá

Bi̱ tséʼyáʼ maguáʼdáá wéñuuʼ, kúwá gagi ga̱jma̱a̱ rí guáʼdáá ma̱ngaa índo̱ naxtiʼkhu̱u̱ xóo kúwá nunimíjna̱ dí xájmúún mbaʼ majmúún mbújkhu̱ún.

NDÍJKHA GÍʼDOO NUMUU RÁ.

Psicóloga bi̱ mbiʼyuuʼ Jessica Koehler niʼthí dí xa̱bu̱ bi̱ nadxún ga̱jma̱a̱ rí guáʼdáá, tsexígu̱u̱n wéñuuʼ. Ikha jngóo ikhiin kúwá itháan gagi ga̱jma̱a̱ tsixmiéjuunʼ wéñuuʼ. Náa xúgíʼ numbaaʼ xa̱bu̱ bi̱ kúwá itháan gagi nindxu̱ún bi̱ na̱nguá má guáʼdáá wéñuuʼ ga̱jma̱a̱ nduyáá dí itháan má gíʼdoo numuu dí maraxtaa mbóó gajmiáanʼ bi̱ kúwá náa guʼwáaʼ ma̱ngaa bi̱ natambájxa̱a̱ʼ gajmiáanʼ, rígi̱ xándoo maratsi̱ ga̱jma̱a̱ mbújkha̱a̱.

“Á mu kuaʼdáá ganitsu ga̱jma̱a̱ xtíin, gakuwáanʼ gagi ga̱jma̱a̱ numuu rúʼko̱” (1 Timoteo 6:8).

DÍ MA̱NDOO MATANI̱

Xátani̱ mbríguíi dí xtaʼdáá ga̱jma̱a̱ rí guáʼdáá eʼwíinʼ. Á mu natani̱ mbríguminaʼ gajmiáanʼ bi̱ guáʼdáá dí numuu, maʼni dí makiʼnáa ga̱jma̱a̱ maxíguaaʼ xtañún. Mú xáʼnga̱a̱ʼ gátayáá xóo phú kúwá, numuu dí nguáná xa̱bu̱ bi̱ ra̱ʼkhá tháan guáʼdáá, guáʼdáá wéñuuʼ gidxóó. Mbáa a̱ʼgu̱ bi̱ xtáa náa Senegal bi̱ mbiʼyuu Nicole, naʼthí: “Tséyóoʼ ma magúʼdoo wéñuuʼ mu maxtáá gagi, á mu nadxuʼ ga̱jma̱a̱ rí gúʼdoo, xaxíguʼ kañún bi̱ guáʼdáá itháan ki xóo ikhúún”.

Ataniminaʼ matani̱ rígi̱: Xáta̱ya̱a̱ dí nuxuda náa Internet, ikhí xa̱bu̱ nuthi o nusngajma nguáthá mba̱a̱ mbújkha̱a̱ guáʼdáá ga̱jma̱a̱ nguáthá numuu rí nutsi̱.

“Maski ajndu mbaʼa wéñuuʼ dí gíʼdoo mbáa, raʼkháa rúʼko̱ eʼni rí maxtáa” (Lucas 12:15).

Araxnáa núma̱aʼ. Xa̱bu̱ bi̱ nuxnáa núma̱aʼ, nakúwá itháan gagi ga̱jma̱a̱ dí guáʼdáá, ma̱ngaa tséndxa̱ʼwa̱míjna̱ dí nda̱ñúunʼ o kaʼñún maguáʼdáá itháan. Roberton bi̱ xtáa náa Haití, naʼthí: “Nandxa̱ʼwa̱mínáʼ dí eʼwíinʼ xa̱bu̱ nuni̱ ga̱jma̱a̱ numuʼ ma̱ngaa ga̱jma̱a̱ numún bi̱ kúwá náa goʼwóʼ, nda̱wa̱á na̱thu̱u̱n dí ra̱ʼkhá tháan naxníi núma̱aʼ ga̱jma̱a̱ numuu dí nini̱. Ma̱ngaa nasngóo a̱ʼdióʼ bi̱ gíʼdoo 8 tsiguuʼ mu maxníin núma̱aʼ eʼwíinʼ ga̱jma̱a̱ numuu dí nuxnáá”.

Ataniminaʼ matani̱ rígi̱: Mámbá mbiʼi ataniraʼmáʼ mbá dí naʼni maraxnáa núma̱aʼ. Mbá xkri̱da, xóo dí tséʼniaaʼ nandii, dí xtaa mbóó gajmiáanʼ bi̱ xtaʼñún, bi̱ nambájxa̱a̱ʼ gajmiáanʼ o dí asndu nandoo natayáá xóo erámáaʼ a̱jkha̱ʼ.

“Bi̱ nadxuu a̱jkiu̱u̱n, xtáa gagi xúgíʼ mbiʼi” (Proverbios 15:15).

Nguáná naʼni gakhi̱i̱ makuwáanʼ gagi ga̱jma̱a̱ i̱ndó dí kuáʼdáá, mú gíʼdoo numuu mu̱ʼni̱ tsiakimíjna̱ numuu dí rígi̱ xánindxu̱u̱ ndíí. Á mu tséʼyáʼ maguáʼdáá itháan ki xóo rí kuáʼdáá má, makuwáanʼ gagi ga̱jma̱a̱ rígi̱ gíʼdoo itháan numuu ki xóo mbújkha̱a̱.