NÁA MBÁ NUMBAAʼ MINGÍJYÚUʼ RÍGI̱

2 | Atie̱wa̱a̱n mbújkha̱a̱ʼ

NDÍJKHA RÍ GÍʼDOO NUMUU RÁ

Xúgíʼ mbiʼi, mbaʼin xa̱bu̱ nuni̱ mbá tsiakii mu makánún rí ndañúuʼ mámbá mbiʼi. Mú naʼni itháan mingíjyúuʼ ga̱jma̱a̱ numuu xkujndu dí rígá. Náá numuu rá.

Índo̱ rígá xkujndu náa mbá xuajen, rúʼko̱ naʼni rí magi̱jxi̱ numuu ganitsu ga̱jma̱a̱ renta.
Naʼni rí xárígá ñajunʼ ga̱jma̱a̱ tséni numún mba̱a̱.
Gamiéjunʼ dí narígá ma̱ndoo maʼni gámbáa náa nugujua̱, guʼwún, mbañúúnʼ. Rígi̱ naʼni rí mbaʼiin xa̱bu̱ maguanún gíníi.

Lá natayáá má ráʼ.

Á mu najmañaaʼ natie̱wa̱a̱n mbújkha̱a̱ʼ, maraxtaa xawii mu matraʼníí mbá gamiéjunʼ.
Mbá xnga̱á gándoo gámbáyáaʼ mbújkha̱a̱, numuu rí mbújkha̱a̱ dí natadaaʼ, dí natiéjxi̱i̱ ga̱jma̱a̱ mbayaaʼ ma̱ndoo mandátiga̱a̱.
Xándoo maratsi ga̱jma̱a̱ mbújkha̱a̱ dí maraxtaa gagi ni má rí makuwáanʼ mbá jnduʼ náa guʼwála.

Rí ma̱ndoo matani̱

Náa Biblia naʼthí: “Á mu kuaʼdáá ganitsu ga̱jma̱a̱ xtíin, gakuwáanʼ gagi ga̱jma̱a̱ numuu rúʼko̱” (1 Timoteo 6:8).

Dí maraxtaa gagi na̱nguá eyoo gáʼthúu̱n dí maraʼdáá xúgíʼ rí ikháán nandaaʼ, xtaa gagi numuu rí xtaʼdáá dí nda̱yáaʼ. Gíʼdoo numuu marmáʼáan a̱jkiu̱lú rígi̱, itháán índo̱ nda̱a̱ mbújkha̱a̱.

Mu maraxtaa gagi ndayóoʼ matriʼkhu̱u̱ xóo xtaa. Á mu naratsi rí tséyáaʼ maʼni rí mambáa mbújkha̱a̱ʼ.

RÍ MA̱NDOO MATANI̱: Consejo dí ma̱ndoo mambáyáaʼ

Mu ma̱ndoo matiewa̱a̱n mbújkha̱a̱ʼ náa mbiʼi mingíjyúuʼ, atanimbaníí ikha rígi̱

ARATSI INDÓ RÍ NDAYÁAʼ

Aratsi indó rí ndayáaʼ

A mu tséyáaʼ má wéñuuʼ xtíñaaʼ o i̱ʼwáʼ dí rígá xáratsi̱ má. Atrajxi̱mínáʼ: “Lá ndayóʼ wéñuʼ mbá carro ráʼ. Lá ma̱ndoo ma̱ni̱ mbá chíʼgíiʼ xtagíyáʼ mu xúʼko̱ xátsi̱ wéñuuʼ ganitsu ráʼ.”
Ma̱ndoo matraximínáʼ rígi̱ nákhá xóó tsératsi̱: “Lá gajkhun rí ndayóʼ ráʼ. Maʼngo̱ʼ ma̱ni̱ númuu ráʼ.”
Atanda̱ʼa̱ makhánáaʼ mangáán rí naxná gobierno á mu nandoo o náa tikhu programa dí rígá.

“Mbá guʼwáanʼ niriyáʼxu̱ awan mu xájmuxu̱ wéñuʼ mbújkha̱a̱ náa gitsíin. Ma̱ngaa nigíʼdi̱i̱ ninimájánʼ ganitsu rí na̱nguá má minumuu wéñuʼ” (Gift).

ATRIYA̱ʼ AWAN RÍ MARATSI

Atriya̱ʼ awan rí maratsi

Náa Biblia naʼthí: “Awan rí naríya’ bi̱ nañajun’ magajnúu májánʼ, mú bi̱ nacho̱o̱ maʼni migínáa” (Proverbios 21:5). Rí maraʼdáá mbá awan dí maratsi̱ mambáyáaʼ mu xájmaaʼ mbaʼ majmáánʼ mbújkha̱a̱ rí natadaaʼ.

Ginii, ataniraʼmáʼ nguátá mbújkha̱a̱ maʼngaaʼ matadaaʼ rí mbá gu̱nʼ.
Nda̱wa̱á, atani̱ mbá lista ndiéjunʼ dí naratsi̱ rí mbá gu̱nʼ ikhú tsumáá gáta̱ya̱a̱ náá phú ejmaa mbújkha̱a̱ʼ.
Nda̱wa̱á kayuuʼ, atani̱ mbríguii mbújkha̱a̱ rí najmaaʼ ga̱jma̱a̱ dí natadaaʼ. Á mu natayáá rí itháan mba̱a̱ mbújkha̱a̱ dí najmaaʼ ki xóo dí natadaaʼ, ikhú atayáá ndiéjunʼ gátani mu xájmaa wéñuʼ.

“Xúgíʼ gu̱nʼ, ndu̱ya̱a̱xu nguáthá mbújkha̱a̱ rí nudaaʼxu̱ ga̱jma̱a̱ rí najmuxu̱. Nunimíjnaxu̱ muyejxi chíʼgíiʼ mu majmaa náa gáʼyúxu̱. Rí nunixu̱ xígi̱ kaʼnii nayambáá mu xáxmiéjuxu̱, numuu rí ndu̱ya̱a̱xu̱ dí kuaʼdááxu mbá chiʼgíiʼ mbújkha̱a̱ á mu narígá mbá gamiéjunʼ” (Carlos).

XÁTAXUʼDÁMINAʼ GIDXÓÓ GA̱JMA̱A̱ ATIÉJXI̱I̱ MBÚJKHA̱A̱

Xátaxuʼdáminaʼ gidxóó ga̱jma̱a̱ atiéjxi̱i̱ mbújkha̱a̱

Atriya̱ʼ mbá awan xóo matani̱i̱ gidxawáaʼ á mu nandoo mbájkhu má xátani̱ gidxóó. Itháan májánʼ dí ginii matiejxíi mbújkha̱a̱ nda̱wa̱á gáratsi rí nda̱yáaʼ.
Ataniminaʼ rí mámbá igu̱nʼ matiejxíi mbújkha̱a̱ʼ mu majmaa náa mbiʼi rí phú gáʼyáaʼ.

ATIEJUNʼ MÁJÁNʼ

Náa Biblia naʼthí: “Xúgíʼ ñajunʼ rí gakhi̱i̱ na̱jkha̱nú narígá rí májánʼ” (Proverbios 14:23).

Atiejunʼ májánʼ

Atayáá ñajunʼ ndrígáaʼ xóo mbá rí ma̱ndoo mambáyáaʼ. Maski má tsénigua̱a̱ʼ mú nindxu̱u̱ náa ma̱ndoo makánáaʼ mbújkha̱a̱.
Ataniminaʼ rí ma̱nindxa̱a̱ʼ mbáa májáanʼ ñumbáá. Rúʼko̱ gámbáyáaʼ mu xúxkaaʼ náa ñajunʼ. Á mu mbóo mbiʼi nuxkaaʼ xáʼniáaʼ mingíjyúuʼ mataxkamaa imbo̱ʼ.

“Na̱ni̱ asndu xú káʼníí má ñajunʼ, tséʼniuu á mu tsénigu̱ʼ o tséni numuu mba̱a̱ xó má ikhúún eyoʼ. Mú na̱ni̱ minaʼ rí ñajunʼ ndrígóʼ magajnúu májánʼ” (Dimitri).

Xtaa ratayáʼ ñajunʼ ráʼ.

Atayáʼ rí matani̱. Aratarúʼún xa̱bu̱ bi̱ guaʼdáá ñajunʼ, mbáa ma̱ndoo muxnaaʼ mbá rí matani̱. Arathún bi̱ xtañún ga̱jma̱a̱ bi̱ nambájxáaʼ gajmiáanʼ rí xtaa ratayáʼ ñajunʼ.
Xátanda̱ʼa̱ má wéñuʼ. Mbáa xáʼnga̱a̱ʼ má gátaxkamaa mbá ñajunʼ xóo rí ikháán nanigua̱a̱ʼ.