DÍÍ GÁTANI̱ ÍNDO̱ NATU̱JXU̱U̱ NUMUU

Araxná dí xtaʼdáá

Á mu naʼniaaʼ gakhi̱i̱ numuu rí natu̱jxu̱u̱ numuu dí maratsi̱, mbáa maku̱ma̱a̱ʼ dí xáʼngo̱o̱ maraxnu̱u̱n eʼwíinʼ dí xtaʼdáá. Mú, á mu naraxná dí xtaʼdáá ma̱ndoo mambáyáaʼ. Atayáá xú káʼnii ma̱ndoo matani̱ mu mi̱dxu̱ʼ ratiéjxi̱i̱ mbújkha̱a̱ʼ, mú, ma̱ngaa maraxnu̱u̱n eʼwíinʼ rí xtaʼdáá.

NDÍJKHA GÍʼDOO NUMUU RÁ.

Nakuwáanʼlu gagi ga̱jma̱a̱ májánʼ índo̱ nuxnún eʼwíinʼ rí guáʼdáá maski ajndu káaʼ mbá chíʼgíiʼ. Tikhuun médico nuthi dí nambáyulúʼ mu xáʼniulú nandii. Xóo dí xáxmiéjunlú wéñuuʼ, xíkhu̱ wéñuuʼ edxu̱lúʼ, xátsimuu o xágajtaa presión ndrígulú, ma̱ngaa asndu nambáyulúʼ mu muʼnuʼlú májánʼ.

“Rígá itháan gagi dí maraxna̱ ki xóo dí makánaa’” (Hechos 20:35).

Índo̱ nagu̱ʼwu̱nlú numbáñún eʼwíinʼ, mbáa ga̱jma̱a̱ mbújkha̱a̱ o ga̱jma̱a̱ eʼwáʼ, tséʼniulú gakhi̱i̱ muniʼñááʼ dí mumbayulúʼ nda̱wa̱á. Howard, bi̱ xtáa náa Inglaterra, naʼthí: “A̱ʼgiu̱ʼ ga̱jma̱a̱ ikhúún nakuwáanʼ xawii numbáñún eʼwíinʼ ga̱jma̱a̱ nuxnún rí nda̱ñúunʼ, ikha jngóo índo̱ ikháanʼ ndayúxu tséʼniuxu gakhi̱i̱ mu̱thu̱ún dí mumbayúxu”. Gajkhun má dí bi̱ nuxna ga̱jma̱a̱ xúgíʼ a̱jkiu̱ún tséguáʼthi̱i̱n dí xúʼko̱ magumiin mangiin, mú nduyáá dí maguáʼdiin bi̱ mambáxu̱u̱n májánʼ gajmiún, bi̱ makuwá xawii mumbañún índo̱ gáʼñúunʼ.

“Gaguʼwanla rí muxna, mu xúʼko̱ makánala” (Lucas 6:38).

DÍ MA̱NDOO MATANI̱

Maraxna dí xtaʼdáá. Maski ajndu na̱nguá xtaʼdáá wéñuuʼ, ma̱ndoo maraxna dí xtaʼdáá, xóo maraxna̱a̱ guma mikhu mbáa xa̱bu̱. Duncan gajmíi̱n bi̱ kúwá náa goʼwóo bi̱ kúwá náa Uganda, nindxu̱ún xa̱bu̱ migíníi, mú, maski ajndu xúʼko̱ ikhiin nuxna dí guáʼdáá. Duncan naʼthí: “Mámbá domingo, ikhúún gajmuʼ a̱ʼgiu̱ʼ nutha̱a̱nxu mbáa dí ma̱ʼkha̱ gakuiʼtsu náa guʼwúxu. Nani̱gu̱xu makuwáanʼ mbóó gajmiúxu eʼwíinʼ”.

Índo̱ gáraxna dí xtaʼdáá, awáán gátani̱, raʼkháa gáʼni dí nándáa dí muphu bi̱ kúwá náa guʼwáaʼ (Job 17:5).

Ataniminaʼ matani̱ rígi̱: Ma̱ndoo maraxna̱a̱ dí mikhu o dí ma̱ga̱nʼ mbáa xa̱bu̱. Á mu xtaʼdáá mbá dí nánguá ejmaa ma̱ndoo matamíniiʼ mbáa bi̱ ndayóoʼ.

I̱mba̱ dí ma̱ndoo matani̱. Tikhu rí itháan májánʼ dí ma̱ndoo maraxna, tséjuiʼtsi ga̱jma̱a̱ mbújkha̱a̱. Xóo dí matríya̱ʼ mbiʼi mu matambáñún eʼwíinʼ ga̱jma̱a̱ matasngajmá dí naxmiéjuaanʼ xtañún. Mbá dí ma̱ndoo muxnún eʼwíinʼ nindxu̱u̱ asndu dí muʼthúún rí májánʼ dí kúwá runi̱. Ikha jngóo arathún eʼwíinʼ dí guáʼdáá numún ga̱jma̱a̱ dí nandaaʼ xtañún.

Ataniminaʼ matani̱ rígi̱: Atambáñúún eʼwíinʼ náa ñajunʼ rí guáʼdáá o náa muni̱ májáanʼ guʼwún o ma̱ndoo mi̱dxu̱ʼ gáratsi̱ rí nda̱ñúunʼ. Ataniraʼmáʼ mbá nota mu maraxna̱a̱ núma̱aʼ mbáa bi̱ nambájxa̱a̱ʼ ga̱jma̱a̱ʼ o ataxúʼmá mbá mensaje maski ajndu i̱ndó maratha̱a̱n dí narmáʼáan a̱jkia̱a̱nʼ eʼni.

Á mu natayaʼ xóo maraxna dí xtaʼdáá, maraxtaa itháan gagi.

“Xámbumala mu̱ni̱ dí májánʼ, ga̱jma̱a̱ rí muxnu̱u̱ dí kuaʼdáála eʼwíinʼ” (Hebreos 13:16).