DÍÍ GÁTANI̱ ÍNDO̱ NATU̱JXU̱U̱ NUMUU

Araʼti̱i̱n mbá dí májánʼ

Lá naku̱ma̱a̱ʼ dí náa xtaa itháan má nacha̱ etsimuu numuu dí maratsi̱ ki xóo dí natadaaʼ ráʼ. Lá naxmiéjuanʼ dí xáʼnga̱a̱ʼ gáraxnu̱u̱n dí nda̱ñúunʼ bi̱ kúwá náa guʼwáaʼ ráʼ. Á mu dí xúʼko̱, mbáa naxmiéjuanʼ dí maʼga ratsimuu má xúʼko̱ numuu. Dí marigá mbá dí maraʼti̱i̱n mambáyáaʼ wéñuuʼ náa mbiʼi gakhi̱i̱ rígi̱.

NDÍJKHA GÍʼDOO NUMUU RÁ.

Xa̱bu̱ bi̱ rígá mbá dí gíʼthu̱u̱n, tségi̱ʼi̱ wíí mbaʼyoo xóo gárígá dí májánʼ. Dí gíʼthu̱u̱n naxkaxi̱i̱ mu mbayáʼ xó ma eʼngo̱o̱ maʼni rí maxtáa májánʼ. Mbá xkri̱da, mbaʼin médico nuthi rí xa̱bu̱ bi̱ rígá dí guáʼti̱i̱n:

Naʼngu̱u̱n nuraʼníí itháan xkujndu.
Nuriʼkui̱i̱ xóo kúwá.
Nuraʼwíí májánʼ rí nuni̱ ga̱jma̱a̱ rígi̱ nambáñúún makuwá májánʼ ga̱jma̱a̱ tséʼniún wéñuuʼ nandii.

DÍ MA̱NDOO MATANI̱

Timbá, atatsaʼwáminaʼ xú káʼnii Biblia ma̱ndoo mambáyáaʼ dí mbiʼi xúgi̱. Biblia kagu̱ consejo rí ma̱ndoo mambáyáaʼ ma̱ta̱ya̱a̱ ndiéjunʼ gátani̱ índo̱ natsimuu numuu dí maratsi̱ ma̱ngaa ma̱ta̱ya̱a̱ dí na̱nguá xtaa mbáwíín ga̱jma̱a̱ dí rígá mbá rí ma̱ndoo matani̱ ga̱jma̱a̱ rúʼko̱ gámbáyáaʼ matraʼníí dí gáʼkha̱ nda̱wa̱á.

“Rí najmáán natatsaʼwáminaʼ majngawíín ga̱jma̱a̱ dí najmáán natayáá ndiéjunʼ nindxu̱u̱ dí májánʼ ga̱jma̱a̱ dí ra̱májánʼ mañewa̱a̱nʼ” (Proverbios 2:11).

Ragajma, atayáá rí eʼthí náa Biblia dí marigá nda̱wa̱á. Índo̱ gáta̱ya̱a̱ dí nayambáá consejo dí na̱ʼkha̱ náa Biblia, mbáa maʼndaaʼ ma̱ta̱ya̱a̱ dí naʼthí ga̱jma̱a̱ numuu dí marigá nda̱wa̱á. Ga̱jma̱a̱ ma̱ta̱ya̱a̱ rí Dios nandoo ‹makuwáanʼlú májánʼ nda̱wa̱á ga̱jma̱a̱ rígá mbá rí maguáʼthinlú› (Jeremías 29:11). Nduʼyáálú dí nindxu̱u̱ gajkhun numuu dí nigíʼ mbá Reino mu maʼnimbánuu rígi̱.

NDIÉJUNʼ NINDXU̱U̱ REINO NDRÍGÓO DIOS GA̱JMA̱A̱ NDIÉJUNʼ GÁʼNGO̱O̱ GÁʼNI XÁ.

Reino ndrígóo Dios nindxu̱u̱ mbáa xa̱bu̱ ñajunʼ bi̱ xtáa náa mekhuíí ga̱jma̱a̱ maʼtáñajunʼ náa xúgíʼ tsu̱du̱u̱ Ku̱ba̱ʼ (Daniel 2:44; Mateo 6:10). Índo̱ gáʼtañajunʼ, nimbáa ní xámínuuʼ ga̱jma̱a̱ xáʼni migínáa, xúgíinʼ makuwá tsímáá ga̱jma̱a̱ maguaʼdáá rí nda̱ñúunʼ mu makuwá gagi. Texto rígi̱ nasngájma dí xúʼko̱ gárígá.

“Maraxtaa gagi ga̱jma̱a̱ tsímáá numuu dí maraʼdáá xúgíʼ rí májánʼ” (Salmo 128:2).

Bi̱ gákuwá náa maʼtañajun Xa̱bu̱ Ñajunʼ ndrígóo Dios “xúñajunʼ ndíí” (Isaías 65:23).

“Náa ku̱ba̱ʼ marigá wéñuuʼ ganitsu” (Salmo 72:16).

Mbaʼin xa̱bu̱ nunimbu̱ún dí nikudaminaʼ maʼni Dios, numuu rí nduyáá dí ikhaa “tséʼni nduwaʼ” (Tito 1:2). Lá manigua̱a̱ʼ dí mínaaʼ ikháán ma̱ta̱ya̱a̱ rí naʼthí náa Biblia ráʼ. Rí kuaʼti̱i̱nlú dí naʼthí náa Ajngá rawuunʼ Dios, ma̱ndoo maxnáaʼ tsiaki̱i̱ mu xáxmiéjuaanʼ wéñuuʼ gáʼni rí nda̱a̱ mbújkha̱a̱ ga̱jma̱a̱ mambáyáaʼ ma̱ta̱ya̱a̱ dí marigá rí májánʼ nda̱wa̱á.