Lá nduya xóó xa̱bu̱ nda̱wa̱á dí nikháñúún ráʼ.

Lá nikháñuu mbáa bi̱ xtayáá ikháán ráʼ. Mbiʼi dí mingíjyúuʼ wéñuʼ rúʼko̱, mbáa ikháán nitraximínáʼ “Lá nduya xóó xa̱bu̱ nda̱wa̱á dí nikháñúún ráʼ”. “Lá ma̱ndoo matangi̱ín mbuʼñún mbu̱júu̱ bi̱ nikháñúún ráʼ.” Náa kíxnuu rígi̱ ga̱jma̱a̱ náa i̱mba̱ mbuʼyáá xóo eriʼña̱a̱ náa Biblia graxe̱ rígi̱.

1. Lá nduya xóó xa̱bu̱ nda̱wa̱á dí nikháñúún ráʼ.

Xú káʼnii mbríguii rí nakháñuu mbáa ga̱jma̱a̱ bi̱ naʼgu rá. Jesús niʼthí, índo̱ mbáa nakháñuu nindxu̱u̱ xóo mbáa bi̱ naʼgu midu̱u̱. Índo̱ mbáa xa̱bu̱ naʼgu midu̱u̱, na̱nguá eʼyoo ndiéjunʼ rígá náa xtáa. Índo̱ mbáa nakháñuu, nánguá mínuuʼ ni má na̱nguá eku̱mu̱u̱ dí na̱ʼkhu̱. Náa Biblia naʼthí “bi̱ nikháñúún nánguá eyáá nditháan kayuʼ” (atraxnuu Eclesiastés 9:5).

2. Ndíjkha rí nambáyulúʼ mbuʼyáá dí gajkhun xóo kúwá bi̱ nikháñúún rá.

Mbaʼin xa̱bu̱ namíñúún makhañún ga̱jma̱a̱ namíñúún eni̱ bi̱ nikháñúún. Á mú xúʼko̱ egíʼnaaʼ mangáánʼ maʼni̱i̱ a̱jkia̱a̱nʼ índo̱ gáta̱ya̱a̱ dí naʼthí náa Biblia ga̱jma̱a̱ numún bi̱ nikháñúún. Jesús niʼthí: “Rí gajkhun maʼni káwáanʼla” (Juan 8:​32). Náa Biblia na̱nguá eʼthí xóo esngáa náa i̱ʼwáʼ religión dí xa̱bu̱ guaʼdáá mbóo alma rí nditháan xákhañuu dí jngruigo̱o̱ ndaʼya nda̱wa̱á rí mbáa nikháñuu. Ikha jngóo nimbáa na̱nguá mínuuʼ nda̱wa̱á dí nakháñun. Numuu rí bi̱ nikháñúún nánguá eya nditháan, xándoo muniulúʼ dí raʼkhí. Ikha jngóo tséyóo muʼni rezo ga̱jma̱a̱ numún ni má rí muʼni costumbre rí mbiʼyamajkhúún o dí xakiʼníin.

Tikhun xa̱bu̱ nuthi rí ma̱ndoo muʼtámíjná gajmiúlú bi̱ nikháñúún, mú rúʼko̱ nditháan xándoo, numuu xó má ndiʼyáá, bi̱ nikháñúún “nánguá eyáá nditháan kayuʼ”. Bi̱ nakumu̱ún dí kúwá rutamíjná gajmiún bi̱ nikháñúún, kúwá rutamíjná gajmiún xa̱bu̱ wéñiʼ bi̱ nusngajmamijná xóo mbáa bi̱ nikháñuu. Ikha jngóo índo̱ nduʼyáá xóo phú kúwá bi̱ nikháñúún nuñewumíjna̱ náa xa̱bu̱ wéñiʼ. Jeobá naʼthúlú dí xáʼyóoʼ muʼtámíjná gajmiúlú bi̱ nikháñúún numuu rí ikhaa ndaʼyoo dí migamíi nindxu̱u̱ rí muʼtámíjná gajmiúlú xa̱bu̱ wéñiʼ (atraxnuu Deuteronomio 18:​10-​12).

3. Rí nagíʼnuu mbáa índo̱ nakháñuu

Náa xúgíʼ numbaaʼ rígá mixtiʼkhu enii xóo ekumu̱ún xa̱bu̱ ndiéjunʼ eguaʼníín índo̱ nakháñulú. Mú, raʼkháa xúgíʼ nindxu̱u̱ gajkhun xóo ekumu̱ún xa̱bu̱.

• Xú káʼnii ekumu̱ún xa̱bu̱ náa xuajñanʼ ikháán ga̱jma̱a̱ numuu xóo kúwá bi̱ nikháñúún rá.

VIDEO: Dí eguáʼníí índo̱ nakháñulú rá. (Mbá xuíʼtóo) (1:​19)

Guraxnuu Eclesiastés 3:​20 ga̱jma̱a̱ gutamíjnála rígi̱:

• Xó má naʼthí náa versículo, ndiéjunʼ egíʼníín xa̱bu̱ índo̱ nakháñúún rá.

• Índo̱ nakháñuu mbáa xa̱bu̱, lá naguanúu xóo espíritu o alma ndrígóo xáʼ.

Náa Biblia naʼthí ga̱jma̱a̱ numuu rí nikháñuu Lázaro, mbáa bi̱ nimbáxu̱u̱ májánʼ ga̱jma̱a̱ Jesús. Xú káʼnii nixtáa Lázaro niʼthí Jesús rá. Guraxnuu Juan 11:​11-​14 ga̱jma̱a̱ gutamíjnála rígi̱:

• Ndiéjunʼ niʼni mbríguii Jesús índo̱ mbáa nakháñuu rá.

• Ndiéjunʼ eʼsngúlúʼ ga̱jma̱a̱ numún bi̱ nikháñúún xkri̱da rígi̱ rá.

• Lá kaʼnii matatsimbaaʼ ikháán dí naʼsngáa náa Biblia ga̱jma̱a̱ numún bi̱ nikháñúún ráʼ.

4. Naʼni káwáanʼ rí mbuʼyáá dí gajkhun ga̱jma̱a̱ numún bi̱ nikháñúún

Índo̱ najmañulúʼ dí gajkhun ga̱jma̱a̱ numún bi̱ nikháñúún, naʼni káwáanʼ numuu rí naʼni dí xámiñulu kuʼñúún. Guraxnuu Eclesiastés 9:​10 ga̱jma̱a̱ gutamíjnála rígi̱:

• Ma̱ndoo muniulúʼ dí raʼkhí bi̱ nikháñúún ráʼ.

Índo̱ najmañulúʼ dí naʼsngáa náa Biblia ma̱ngaa naʼni dí xúʼnimbulúʼ índo̱ nuthi rí muʼni costumbre mu xakíʼníin kuyulúʼ o rí mbuʼyamajkhúún bi̱ nikháñúún. Guraxnuu Isaías 8:​19 ma̱ngaa Apocalipsis 4:​11 ga̱jma̱a̱ gutamíjnála rígi̱:

• Xóo eku̱mu̱u̱ Jeobá ku̱ma̱ʼ ikháán índo̱ mbáa ndaʼyamajkhún bi̱ nikháñúún o nundu̱ʼu̱u̱n rí mumbáñún xá.

5. Rí mbuʼyáá dí gajkhun xóo kúwá bi̱ nikháñúún naʼni̱i̱ a̱jkiu̱lú

Mbaʼin nusngáa, índo̱ mbáa nakháñuu mamínuuʼ ga̱jma̱a̱ numuu xúgíʼ dí raʼkhí niʼni nákha xóó ndaʼya. Mú naʼni̱i̱ a̱jkiu̱lú índo̱ nduʼyáá rí nimbáa xamínuuʼ nda̱wa̱á dí nakháñuu, maski ajndu bi̱ nini dí raʼkhí wéñuuʼ. Guraxnuu Romanos 6:7 ga̱jma̱a̱ gutamíjnála rígi̱:

• Xó má naʼthí náa Biblia índo̱ mbáa nakháñuu naguma kríyaa náa aʼkhá dí niʼni. Á mu xúʼko̱, naku̱ma̱a̱ʼ ikháán rí bi̱ nikháñúún numíniiʼ mu muni numa̱a̱ xúgíʼ dí raʼkhí nini nákha ginii xáʼ.

Índo̱ nuniʼníiʼ itháan Jeobá, nduʼyáá kaʼwu rí ikhaa nditháan xáʼni mumíniiʼ bi̱ nikháñúún. Guraxnuu Deuteronomio 32:4 ma̱ngaa 1 Juan 4:8 ga̱jma̱a̱ gutamíjnála rígi̱:

• Lá maniñuuʼ mbáa Dios bi̱ xóo na̱ʼkha̱ raʼthí náa versículos rígi̱ dí maguma gíníi bi̱ nikháñúún ráʼ.

• Naku̱ma̱a̱ʼ ikháán dí índo̱ najmañulúʼ dí gajkhun rí naʼsngáa náa Biblia naʼni̱i̱ a̱jkiu̱lú ráʼ. Ndíjkha rá.

RÍ NAGÁJNURIYO̱O̱ʼ

Índo̱ mbáa nakháñuu, nánguá eʼya itháan. Bi̱ nikháñúún nánguá míniiʼ ni má xándoo muniu̱u̱ dí raʼkhí eʼwíinʼ.

Rí nijmañaaʼ

• Lá nduya xóó bi̱ nikháñúún ráʼ.

• Ndíjkha rí naʼni káwáanʼ mbuʼyáá dí gajkhun xóo kúwá bi̱ nikháñúún rá.

• Ndíjkha rí naʼni̱i̱ a̱jkiu̱lú mbuʼyáá xóo kúwá bi̱ nikháñúún rá.

ATAYÁÁ ITHÁAN

Atayáá ndiéjunʼ phú eʼthí náa Biblia ga̱jma̱a̱ numuu ajngáa alma.

“Ndiéjunʼ nindxu̱u̱ alma rá.” (Artículo dí rígáa náa jw.org)

Atayáá á mu Dios naʼni rí mumíniiʼ xa̱bu̱ náa infierno bi̱ nuni dí raʼkhí.

Lá numíniiʼ xa̱bu̱ náa infierno ráʼ. (3:​07)

Lá mbaʼyóoʼ mamiñúlúʼ gúni bi̱ nikháñúún ráʼ.

Espíritu ndrígu̱ún bi̱ nikháñún... ma̱ndoo mumbayíí mbáa xáʼ. O muni̱i̱ dí raʼkhí mbáa xáʼ. Gajkhun kúwi̱i̱n xáʼ. (Folleto)

Atayáá xú káʼnii mbáa xa̱bu̱ niʼni̱i̱ a̱jkiu̱u̱n índo̱ nijmañuu xóo kúwá bi̱ nikháñúún.

“Niniguʼ wéñuuʼ rí náa Biblia nariʼña̱a̱ mbájmbu” (Bi̱ Nayejngoo, 1 ñajunʼ gu̱nʼ febrero tsiguʼ 2015)