ATAGÍʼDI̱I̱ MARATA̱
KÍXNUU 4
Ganindxa̱a̱ʼ xa̱bu̱ guabaaʼ
Ikha rí na̱ʼkha̱ náa Biblia: “Ganindxa̱la xa̱bu̱ guabaaʼ, gundxa̱ʼwa̱míjna̱ rí eʼwíinʼ guaʼdáá itháan numún ki xóo ikháanʼ” (Filip. 2:3).
Dí niʼni Pablo
1. Atayáá VIDEO o atraxnuu Hechos 26:2, 3. Nda̱wa̱á atayáá graxe̱ rígi̱:
Xú káʼnii nisngájma Pablo dí nindxu̱u̱ xa̱bu̱ guabaaʼ ga̱jma̱a̱ xóo niʼthúu̱n rey Agripa xá.
Ndiéjunʼ niʼni Pablo mu xa̱bu̱ mbuyáá dí itháan gíʼdoo numuu Jeobá ga̱jma̱a̱ dí naʼthí náa Escrituras, raʼkháa ikhaa xá. (Atayáá Hechos 26:22).
Ndiéjunʼ ejmañulúʼ náa xkri̱doo Pablo rá.
2. Itháan má nacha̱ gáʼni dí xa̱bu̱ manigu̱u̱ʼ maʼdxawuun ajngáa dí nuʼtháán á mu nuʼthá ga̱jma̱a̱ gamajkhu ma̱ngaa á mu nindxu̱lú xa̱bu̱ guabaaʼ.
Atayaridáá Pablo
3. Xátanimbamínaʼ dí ikháán najmañaaʼ itháan. Xátani maku̱mu̱u̱ xa̱bu̱ dí ikháán najmañaaʼ xúgíʼ ga̱jma̱a̱ dí ikhaa na̱nguá ekro̱ʼo̱o̱ nditháan. Aratháán má xúʼko̱ ga̱jma̱a̱ gamajkhu.
4. Arathá mbájmbu dí náa Biblia e̱ʼkha̱ dí narasngáa. Dí naʼthí náa ajngá rawuunʼ Dios ma̱ndoo maʼga̱nú náa a̱jkiu̱ún xa̱bu̱. Índo̱ najmulú, numbáñún xa̱bu̱ muguaʼdáá mbá fe gujkhuʼ.
5. Xakiʼnán nacha̱. Xátani dí naratá ikháán gíʼdoo itháan numuu. Tsíyulú magi̱ʼdu gajmiúlú xa̱bu̱. Dí manindxu̱lú xa̱bu̱ guabaaʼ mambáyulúʼ mu xákiʼnááʼlu ga̱jma̱a̱ mbuʼyáá nguáná ma̱ndoo muʼguááʼ (Prov. 17:14; Tito 3:2). Á mu ikháán nanindxa̱a̱ʼ májánʼ xa̱bu̱, mbáa ikhaa ma̱ndoo maʼtámíjná ga̱jma̱á nindxu̱lú imbo̱o̱ aʼphu̱.