Nduyáʼ rí gajkhun

Rí matayaa rí gajkhun ma̱ndoo mani̱ndxu̱u̱ rí xóo maraxtaa o makhañáa’. Mbá xkri̱da, atatsa’wáminaʼ ga̱jma̱a̱ numuu graxe̱ dí gíʼdoo numuu rígi̱: Xú káʼnii ejkaroʼoo nandii dí mbiiʼ rá.

Mba̱yu̱u̱ʼ tsiguʼ, nimbáa táʼngo̱o̱ gáʼyoo xóo extiʼña̱a̱, ikha jngó mbaʼin wéñuʼ xa̱bu̱ nikháñun ga̱jma̱a̱ nandii. Mú índo̱ ni̱jkha̱ ranújngoo mbiʼi, cientificos niguánu ndiyáá rí gajkhun. Nithi rí mbaʼa nandii na̱ʼkha̱ náa microbios náa bacteria ga̱jma̱a̱ náa virus. Rí niguánu ndiyáá rígi̱ niʼni rí ma̱ndoo muñeumíjna̱ náa mbaʼa nandii, ga̱jma̱a̱ rí mbaʼin wéñuʼ xa̱bu̱ makuwíin mba̱yu̱u̱ʼ ga̱jma̱a̱ májánʼ.

Dí gándoo gúʼthá ga̱jma̱a̱ numuu i̱ʼwáʼ graxe̱ dí gíʼdoo numuu rá. Lá nakuma̱a̱ʼ dí á mu ma̱ta̱ya̱a̱ dí gajkhun ga̱jma̱a̱ numuu graxe̱ rígi̱ ma̱ndoo mariʼkhuu xóo xtáa ráʼ.

Tsáá nindxu̱u̱ Dios rá.
Tsáá nindxu̱u̱ Jesucristo rá.
Ndiéjunʼ nindxu̱u̱ Reino ndrígóo Dios rá.
Dí kuaʼti̱i̱n nda̱wa̱á rá.

Mbaʼin má wéñuʼ xa̱bu̱ ndiyáá rí naxtiʼña̱a̱ graxe̱ rígi̱, rí xúgi̱ kúwá itháán májánʼ. Rígi̱ ma̱ndoo mambáyaʼ mangáán.

LÁ RÍGÁ DÍ GAJKHUN RÁʼ.

Mbáa ikháán natrajximínáʼ á mu ma̱ndoo ma̱ta̱ya̱a̱ rí gajkhun ga̱jma̱a̱ numuu mbá. Maski ajndu xúʼko̱, mámbá mbiʼi naʼni itháan gakhi̱i̱ matayaa dí nindxu̱u̱ rí gajkhun ga̱jma̱a̱ dí nindxu̱u̱ rí mindu̱wa̱ʼ. Náá numuu narígá rígi̱ rá.

Mbaʼin wéñuʼ xa̱bu̱ tsénimbu̱u̱n rí nuthi Xa̱bu̱ Ñajunʼ, o dí nanújngoo náa radio. Naʼniún gakhi̱i̱ mbuyáá á mu gajkhun rí nuthi o nindxu̱u̱ i̱ndó rí nakumu̱ún, nindxu̱u̱ mbá nduwaʼ. Náa numbaaʼ rígi̱ nánguá enimbu̱u̱n kuyamijná xa̱bu̱, ga̱jma̱a̱ numuu rí tsethi rí gajkhun, ikha jngó naʼniún gakhii munimbu̱u̱n dí phú gajkhun nirígá.

Maski ajndu xúʼko̱ ikháán ma̱ndoo mataxkamaa rí naxtiʼña̱a̱ graxe̱ rí gíʼdoo wéñuʼ numuu xóo maraxtaa. Xú káʼnii rá. Ikháá má xóo nitaya dí maxtiʼña̱a̱ i̱ʼwáʼ graxe̱ dí na̱nguá má gíʼdoo numuu.

XÚ KÁʼNII GÁTAXKAMAA RÍ GAJKHUN RÁ.

Gajkhun rí xúgíʼ mbiʼi nduʼyáá rí gajkhun. Mbá xkri̱da, Jessica ikhaa gíʼdoo rí mbaʼyoo májánʼ ganitsu rí matsi rí xágiʼdoo cacahuate. Ikhaa naʼthí: “Wáxioʼ naʼniu maski ajndu mikhu chíʼgíʼ rí gíʼdoo cacahuate numuu dí asndu gamíi makhañúu. Ikha jngó nákha xóó tsétsi, ganitsu ginii nagúxnuu ga̱jma̱a̱ tsumáá i̱yu̱u̱ʼ mu mba̱yo̱o̱ dí gíʼdoo. Nda̱wa̱á ndaʼyáʼ xóó itháán ga̱jma̱a̱ asndu natamíjná gajmuʼ bi̱ nagujua̱ mu xúʼko̱ mba̱yo̱o̱ á mu na̱nguá gíʼdoo nditháan cacahuate rí matsi. Ma̱ngaa natamíjná gajmíʼ bi̱ mutu̱nʼ rí gajkhun ga̱jma̱a̱ numuu ganitsu rí naxtagujua̱”.

Ikhaa má xa̱bu̱ xtáa raguxnuu mbá libro dí niriyaʼ náa estante ga̱jma̱a̱ naʼni mbrigui̱i̱ ga̱jma̱a̱ rí nixkamaa náa celular ndrígóo

Mbáa ikháán xáʼyóoʼ mataʼyáʼ xúgíʼ mbiʼi mbá rí gíʼdoo numuu, mú ma̱ndoo matani xó má Jessica: Ga̱jma̱a̱ maxkamaa rí naxtiʼña̱a̱ náa i̱ʼwáʼ graxe̱

Ma̱ta̱ya̱a̱ itháán.
Mataʼyáʼ itháán.
Ma̱ta̱ya̱a̱ májánʼ á mu nindxu̱u̱ gajkhun.

Rígi̱ ma̱ndoo mambáyaʼ matayaa xóo extiʼña̱a̱ graxe̱ rí gíʼdoo itháán numuu xóo maraxtaa. Guʼyáá xú káʼnii.

KÁAʼ MBÓÓ LIBRO DÍ NAʼTHÍ RÍ GAJKHUN

Mu mataxkamaa rí gajkhun ga̱jma̱a̱ numuu graxe̱ dí gíʼdoo numuu náa makuwáanʼ, Jessica niʼni xúʼko̱ kaʼnii índo̱ naʼtsi ganitsu ndayóoʼ mbaʼyoo á mu dí ragíʼdoo cacahuate. Ikhaa naʼthí: “Rí nagúxnuu tsumáá ga̱jma̱a̱ rí ndaʼyáʼ itháán nimbáyuʼ maxkamaa rí gajkhun dí nasngáa náa Biblia”. Mbaʼin wéñuʼ xa̱bu̱ nini xó má niʼni Jessica ga̱jma̱a̱ niguánu ndiyáá rí gajkhun rí naʼsngáa náa Biblia ga̱jma̱a̱ numuu graxe̱ rígi̱:

Náá numuu dí kuwáanʼlu rá.
Ndiéjunʼ egíʼniin índo̱ nakhañulúʼ rá.
Náá numuu dí rígá wéñuʼ tsingíná rá.
Ndiéjunʼ xtáa raʼni Dios mu maʼni gámbóo tsingíná rá.
Xú káʼnii gándoo gakuwáánʼ gagi náa mbá guʼwáanʼ rá.

Ikhaa má xa̱bu̱ xtáa raguxnuu Biblia ga̱jma̱a̱ mbá computadora dí nakhamu

Ikháán ma̱ngaa ma̱ndoo mataxkamaa xóo phú extiʼña̱a̱ graxe̱ rígi̱ ga̱jma̱a̱ i̱ʼwáʼ á mu natraxnuu Biblia ga̱jma̱a̱ natayáʼ itháán náa www.jw.org.