Araxtaa kámuu mbiʼi ga̱jma̱a̱ʼ bi̱ ndiyáa

Xa̱bu̱ gajmii bi̱ kúwá májánʼ nuni mba̱a̱ Jeobá ga̱jma̱a̱ kúwá tsímáá (Mr 10:9). Á mu mbáa xa̱bi̱i̱ Jeobá nandoo dí bi̱ mbayáa mbajyúuʼ ga̱jma̱a̱, ma̱ngaa dí maxtáa tsímáá, ndayóoʼ maʼnimbánuu dí naʼthí náa Biblia nákha xóó tseraʼwíi bi̱ maxtáa ga̱jma̱a̱.

Xóó xáraʼdaa novio o novia á mu kaʼníí xóó chiʼgíínʼ, índo̱ ra̱ʼkhá tháán egua̱ʼa̱ mata̱ba̱a̱ʼ ga̱jma̱a̱ʼ imba̱a̱. Numuu dí rúʼko̱ gaʼni dí xatraʼwíí májánʼ dí matani̱ (1Co 7:36). Nákha xóó xtaa mbáwíín, gajmaaʼ májánʼ mbiʼi mu xúʼko̱ mambajxáaʼ itháán májánʼ ga̱jma̱a̱ʼ Dios ma̱ngaa mu mani̱ndxa̱a̱ʼ mbáa xa̱bu̱ xóo naniguuʼ Dios. Á mu xúʼko̱ tani mambáyáaʼ maraxtaa itháán xawii mu mani̱ndxa̱a̱ʼ mbáa májáanʼ xa̱bu̱ nikhi̱i̱ o a̱ʼgú nikhi̱i̱.

Nákha xóó tsératháán dí mbi̱ya̱a̱ mbáa, atríyaʼ mbayuuʼ mbiʼi mu matatsiʼníiʼ xú kaʼnii phú xa̱bu̱ nindxu̱u̱ (1Pe 3:4). Á mu natayáá mbá rí maʼña̱a̱ʼ mingíjyúuʼ maraxtaa ga̱jma̱a̱ʼ nda̱wa̱á, ma̱ndoo maratamíjná ga̱jma̱a̱ʼ numuu rúʼko̱. Índo̱ ikháán gíyáa mbaʼyóoʼ matatsaʼwamínáʼ ndiéjuunʼ dí ikháán ma̱ndoo maraxna̱a̱, raʼkháa dí ikhaa mbaʼyóoʼ maxnáaʼ (Flp 2:3, 4). Á mu natagíʼ natanimbaníí dí naʼthí náa Biblia nákha xóó xtaa mbáwíín, xáʼñaanʼ gakhii matanimbaníí índo̱ gáraxtaa ga̱jma̱a̱ʼ bi̱ ndiyáa, rúʼko̱ gámbáyáaʼ maraxtaa tsímáá gajmaaʼ.

NDA̱WA̱Á RÍ NITAYÁÁ VIDEO XÓO GÁTANI RATAMINAʼ MU MBI̱YA̱A̱ MBÁA. RAGAJTSÚ NÍʼKHÓO: “ATAYÁÁ NGUÁTHÁ MBÚJKHA̱A̱ GÁMBÁAʼ”, ATRIʼÑA̱A̱ GRAXE̱ RÍGI̱:

• Xú kaʼnii nigíʼdu̱u̱ nimbájxu̱u̱ itháan ndxájulú a̱ʼgu̱ ga̱jma̱a̱ Shane rá.

• Ndiéjunʼ nijkha raʼyoo índo̱ ndxájulú a̱ʼgu̱ nijkha raniniiʼ itháán Shane rá.

• Xú kaʼnii nimbáyúu anu̱u̱ ga̱jma̱a̱ ru̱dúu̱ ma̱ngaa ndiéjunʼ dí itháan májánʼ niraʼwíí maʼni xá.