Nguáná niʼthí Jesús dí ma̱ʼkha̱ fin rá.

ATATSAʼWÁMINAʼ NÁA A̱JMA̱ AJNGÁA RÍGI̱ DÍ NIʼTHÍ JESÚS:

“Gakuwáanʼla xawii má xúʼko̱, numuu rí tséya̱a̱ náá mbiʼi ni má náá hora” (MATEO 25:13).

“Ikha jngóo xúnuʼla, gakuwáanʼ xawii má xúʼko̱, numuu rí tséya̱a̱ nguáná gáʼni” (MARCOS 13:33).

Ikha jngóo nimbáa xa̱bu̱ numbaaʼ tséʼyoo nguáná gáʼkha̱ fin ndrígóo numbaaʼ rígi̱. Mú Dios nigíʼ má, “mbiʼi ga̱jma̱a̱ hora” rí phú ma̱ʼkha̱ fin (Mateo 24:36). Lá nandoo gáʼthúu̱n rígi̱ dí xándoo mbuʼyáá nguáná ga̱ʼkha̱ fin ráʼ. Na̱nguá. Jesús niʼthún discípulos ndrígióo dí índo̱ fin gíʼ má mijngii marígá mbaʼa wéñuuʼ señal.

SEÑAL

Señal dí marígá, “manindxu̱u̱ dí mambáa xúgíʼ dí xtáa rarígá náa numbaaʼ”. Jesús niʼthí: “Xuajen mba̱ʼu̱ magi̱ʼdu̱u̱n gajmiún i̱ʼwáʼ xuajen mba̱ʼu̱, xa̱bu̱ ñajunʼ magi̱ʼdu̱u̱n gajmiún eʼwíinʼ xa̱bu̱ ñajunʼ, marigá ewiʼ ga̱jma̱a̱ maʼxma asndu náá” (Mateo 24:3, 7). Ma̱ngaa niʼthí dí marigá “nandiiʼ” (Lucas 21:11). Lá ma̱ndoo ma̱ta̱ya̱a̱ xú káʼnii embánuu dí niʼtáriyaʼ Jesús ráʼ.

Rí mbiʼi xúgi̱ mbaʼin wéñuuʼ xa̱bu̱ numínii ga̱jma̱a̱ numuu dí narígá guerra, ewiʼ gaʼxma ga̱jma̱a̱ nandiiʼ dí nagudíin mbaʼin xa̱bu̱. Mbá xkri̱da, nákha tsiguʼ 2004 índo̱ niʼxma gakhi̱i̱ wéñuuʼ náa océano Índico niʼni rí magajnúu lamáa ga̱jma̱a̱ nigudíin xóo mbá 225.000 xa̱bu̱. Ga̱jma̱a̱ náa mbá ajtsú tsiguʼ dí rígá nandii rí mbiʼyuu COVID-19, nigudíin itháán rí mbá 6.9 millones xa̱bu̱ náa xúgíʼ numbaaʼ. Jesús niʼthí dí índo̱ gárígá xóo rígi̱, fin ndrígóo numbaaʼ gíʼ má mijngii.

“IWÁÁ MBIʼI”

Náa Biblia naʼthí dí ginii marigá “iwáá mbiʼi” ikhú índo̱ gájngoo rígi̱ ikhú ma̱ʼkha̱ fin (2 Pedro 3:3, 4). Náa 2 Timoteo 3:1-5 naʼthí, rí náa iwáá mbiʼi xa̱bu̱ nánguá mbuyamajkumijná (atayáá kúgumaʼá “Ikhú nákha xóó tséʼkha̱ fin ndrígóo numbaaʼ”). Lá natayáá ikháán dí mbiʼi xúgi̱ xa̱bu̱ i̱ndó naxmiéjúúnʼ kuyamijná ikhiin, najmangu̱u̱nʼ nandún kuyáá itháán mbújkha̱a̱ ga̱jma̱a̱ nuniu̱u̱n dí raʼkhí eʼwíinʼ xáʼ. Rígi̱, nasngájma dí kuwáanʼ itháán mijngii dí ma̱ʼkha̱ fin ndrígóo numbaaʼ rígi̱.

Nguáthá mba̱yu̱u̱ʼ gájyúuʼ dí iwáá mbiʼi rá. Náa Biblia naʼthí rí xájyúuʼ má mba̱yu̱u̱ʼ. Ga̱jma̱a̱ ikhú Dios maʼni gámbíin “xúgíinʼ bi̱ nuni gámbáa ku̱ba̱ʼ” (Apocalipsis 11:15-18; 12:12).

NÁNGUÁ MÁ MBA̱YU̱U̱ʼ DÍ KU̱BA̱ʼ MAʼNI̱I̱ MITSAANʼ

Dios ndiʼyoo má náa mbiʼi ga̱jma̱a̱ náa hora gáʼni gámbáa dí rígá náa numbaaʼ xkawiʼ rígi̱ (Mateo 24:36). Mú raʼkháa i̱ndó rúʼko̱: Dios “tsíyóóʼ rí nimbáa xa̱bu̱ makhañúu” (2 Pedro 3:9). Ikhaa naniñuuʼ mbiʼi rí xúgíinʼ xa̱bu̱ muniʼniiʼ ga̱jma̱a̱ munimbu̱ún kuyáá. Ndíjkha rá. Numuu rí ikhaa nandoo dí makáwáanlu índo̱ gáʼkha̱ fin ga̱jma̱a̱ makuwáanʼ náa numbaaʼ nuxi̱ʼ dí ikhaa ma̱ʼkha̱ kayóo.

Dios niriyaʼ mbá awan náa xúgíʼ numbaaʼ dí majuiʼsngáa numuu Biblia, mu xúʼko̱ xúgiáanʼ ma̱ndoo mbuʼyáá ndiéjunʼ gíʼmaa muʼni mu makuwáanʼ náa numbaaʼ rúʼko̱ dí maʼtáñajunʼ Xa̱bu̱ Ñajunʼ ndrígióo. Jesús niʼthí, ajngáa rí májánʼ ndrígóo Reino majuiʼtáraʼa “náa xúgíʼ numbaaʼ” (Mateo 24:14). Náa xúgíʼ numbaaʼ, xa̱bi̱i̱ Jeobá nutaraʼa mbayu̱u̱ʼ hora ga̱jma̱a̱ nusngáa dí naʼthí náa Biblia dí marigá nda̱wa̱á. Jesús niʼthí dí marigá awan mu miʼtáraʼa náa xúgíʼ tsu̱du̱u̱ numbaaʼ nákha xóó tséʼkha̱ fin.

Rí nagájnuriyooʼ, xúgíinʼ xa̱bu̱ ñajunʼ bi̱ kúwá náa numbaaʼ kíxnún mbiʼi xóó kúwi̱i̱n. Mú rí itháán májánʼ nindxu̱u̱ dí makáwáanʼ náa numbaaʼ rígi̱ ga̱jma̱a̱ makuwáanʼ náa mitsaanʼ dí naʼthí Dios maxná. Náa i̱mba̱ artículo maʼthí ndiéjunʼ gíʼmaa muʼni mu makuwáanʼ náa numbaaʼ nuxi̱ʼ.