Ndiéjunʼ gáʼyoo muʼni mu makuwáanʼ náa numbaaʼ nuxi̱ʼ rá.

Náa artículo rí ninújngoo, nijmañulúʼ dí nánguá má mba̱yu̱u̱ʼ ma̱ʼkha̱ fin ndrígóo numbaaʼ rígi̱, xóo muʼthá Dios maʼni gámbíin xa̱bu̱ bi̱ nuni dí xkawiʼ ga̱jma̱a̱ xúgíʼ eni̱ xkujndu. Xú káʼnii eʼyáá dí gajkhun nindxu̱u̱ rígi̱ rá. Numuu dí ajngáa rawuunʼ Dios, Biblia naʼthí:

“Numbaaʼ na̱jkha̱ ranújngoo” (1 JUAN 2:17).

Nduʼyáá gajkhun dí makuwíin xa̱bu̱ bi̱ makáwíin, numuu dí náa texto má rúʼko̱ naʼthí:

“Bi̱ naʼni rí nandoo Dios maxtáa kámuu mbiʼi”.

Ikha jngóo mu ma̱ndoo makáwáanʼ ndayóoʼ rí muʼnimbulú kuʼyáá Dios. Mu muʼnimbulú kuʼyáá, ginii ndayóoʼ dí muniʼniiʼ.

GUNIʼNÍI DIOS MU MAKÁWÁANʼ

Mbaʼa xtiʼkhu: 1. Mbáa enfermera néʼngo̱o̱ ga̱jma̱a̱ naxmiéjuunʼ nagi̱ʼi̱ náa piso ndrígóo hospital. 2. Índo̱ kúwá ruya̱a̱jxún, ndaʼyoo rí mbáa compañeriuu bi̱ nañajunʼ ga̱jma̱a̱ xnduʼwá inuu eʼni índo̱ naguxnuu revista. 3. Compañeriuu naguxnuu mbá versículo ndrígóo Biblia ga̱jma̱a̱ mbá tarjeta ndrígóo jw.org.

Jesús niʼthí: “Rígi̱ eyoo gáʼthúu̱n rí makuwá kámuu mbiʼi: Rí muninuwíínʼ ikháán, mbáwíín ikháán bi̱ nindxa̱a̱ʼ Dios gajkhun” (Juan 17:3). Mu makáwáanʼ índo̱ gáʼkha̱ fin ndrígóo numbaaʼ ga̱jma̱a̱ makuwáanʼ kámuu, ndayóoʼ muniʼniiʼ Dios. Xóo muʼthá raʼkháa i̱ndó ndayóoʼ mbuʼyáá dí ikhaa xtáa o i̱ʼwáʼ ga̱jma̱a̱ numuu. Ndayúlú mambajxú gajmiúlú. Índo̱ nandulú mambajxú gajmiúlú mbáa, ndayulu muríyaʼ mbiʼi. Xúʼko̱ má ndayóoʼ muʼni gajmiúlú Dios ma̱ngaa. Guʼyáá tikhu kiʼsngáa ndrígóo Biblia rí mambáyulú mu mambajxú májánʼ gajmiúlú Dios.

Dí naʼsngáa náa Biblia

Dios nindoo má dí makuwáanʼ náa ku̱ba̱ʼ mitsaanʼ.

Dios niʼnii timbíin xa̱bu̱, Adán ma̱ngaa Eva ga̱jma̱a̱ niʼni dí makuwá náa ixi̱ ri̱ʼi̱ Edén. Ni̱ndxu̱ún xa̱bu̱ jmbiin ga̱jma̱a̱ Dios nixnúún xúgíʼ rí nda̱ñu̱u̱n mu makuwá tsímáá. Á mu nimbájxu̱u̱n má xúʼko̱ gajmiún Dios makuwá kámuu mbiʼi. Phú ngíná rí na̱nguá, numuu ikhiin niraʼwi̱i̱ dí xúnimbu̱ún mbá kiʼtáñajunʼ ndrígóo Dios dí nixnúún.

Náá numuu dí kuaʼdáá xkujndu ga̱jma̱a̱ numíniiʼ rá.

Índo̱ Adán bi̱ ninindxu̱u̱ timbáa xa̱biya̱ táʼnimbo̱o̱ kaʼyoo Dios, nindátigo̱o̱ mbá rí gíʼdoo wéñuʼ numuu: Dí maxtáa kámuu mbiʼi ga̱jma̱a̱ xa̱bu̱ bi̱ gáguwáʼ náa ikhaa. Náa Biblia naʼthí: “Ga̱jma̱a̱ numuu mbáwíi xa̱bu̱, nito̱ʼo̱o̱ aʼkhá náa numbaaʼ, ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, rí nakháñulú nigadráʼa náa xúgíinʼ xa̱bu̱” (Romanos 5:12). Xóo má mbáa xa̱bu̱ nikhi̱i̱ naxníin e̱ji̱i̱n nandii dí gíʼdoo, bi̱ naguwaʼ náa Adán nindrígúlú aʼkhá. Ikha jngóo xúgiáanʼ naniaanʼ ga̱jma̱a̱ nakháñulú.

Dios rígá má dí niʼni mu mambáyulú.

Náa Biblia naʼthí: “Dios ra̱ʼkhá tháán nindoo kaʼñún xa̱bu̱ numbaaʼ, ikha jngóo nixnájxi̱i̱ A̱ʼdióo bi̱ mbáwíi mu xúʼko̱ bi̱ gágiʼdoo fe náa ikhaa xákháñuu, maxtáa kámuu mbiʼi” (Juan 3:16). Dios nikuʼmaa Jesús ma̱ʼkha̱ náa tsu̱du̱u̱ ku̱ba̱ʼ mu makhañúu ga̱jma̱á numulú. Índo̱ nundxa̱ʼwáá edxu̱lú dí Dios niʼni, mbáa xa̱bu̱ bi̱ mbiʼyuu Prabhakar, gíʼdoo 86 tsiguʼ bi̱ na̱ʼkha̱ náa India naʼthí: “Rígi̱ naʼni mba̱yo̱o̱ dí Jeobáa nandoo kaʼyoʼ wéñuuʼ. Ngajua ndrígóo naʼni dí magúʼthu̱u̱n maxtáá kámuu mbiʼi”.

Ma̱ndoo musngajmá dí nuxnáa núma̱aʼ rí Dios niʼni ga̱jma̱á numulú.

Náa Biblia naʼthí dí ma̱ndoo musngajmá dí nuxnáa núma̱aʼ Dios rí niʼni ga̱jma̱á ni̱ndxu̱lú dí “muʼnimbulúʼ má xúʼko̱ kiʼtañajunʼ ndrígóo” (1 Juan 2:3). Ga̱jma̱a̱ ngajua Jeobá Dios naʼsngúlú dí ma̱ndoo muʼni mu makuwáanʼ gagi rí mbiʼi xúgi̱ (Isaías 48:17, 18, nota). Dios tsíyoo dí mumíniiʼ, ikha jngóo naʼthúlú á mu dí nuʼnimbulú kuʼyáá ikhaa, makuwáanʼ gagi xúgi̱ ga̱jma̱a̱ ma̱ndoo makuwáanʼ kámuu mbiʼi nda̱wa̱á.

GURAXNUU BIBLIA XÚGÍʼ MBIʼI

Enfermera nayejxiráʼan índo̱ niguambóo niguxnuu Biblia náa hora dí nikuiʼtsu. — Makáwáanʼ náa numbaaʼ rígi̱ índo̱ ga̱ʼkha̱ fin á mu nunda̱ʼa̱a̱ tsiakii Dios ga̱jma̱a̱ nuʼni rí ikhaa nanigu̱u̱ʼ.

Mu ma̱ndoo makuwáanʼ ndayóoʼ dí muphiʼtsu xúgíʼ mbiʼi. Mú Jesús niʼthí: “Raʼkháa i̱ndó rí makuiʼtsu gíʼmaa maxtáa ga̱jma̱a̱ xa̱bu̱ gíʼmaa maʼnimbánuu xúgíʼ rí naʼthí Jeobá” (Mateo 4:4).

Rí mbiʼi xúgi̱ nuxkamaa ajngóo Jeobá náa Biblia. Xóo má guʼgua̱ ruʼnigajmaa Biblia, maʼgá rajmañulú itháán dí niʼni Dios nákha wajyúuʼ, dí xtáa raʼni xúgi̱ ga̱jma̱a̱ dí maʼni nda̱wa̱á.

GUNDA̱ʼA̱A̱ DIOS RÍ MAMBÁYULÚ

Ndiéjunʼ ma̱ndoo muʼni á mu nandulú muʼnimbulú kuʼyáá Dios, mú naʼniulú gakhi̱i̱ muniʼñááʼ ru̱ʼni̱ dí ikhaa naʼthí dí nindxu̱u̱ ra̱májánʼ rá. Á mu xúʼko̱ dí muniʼniiʼ májánʼ Dios mambáyulú wéñuʼ.

Guʼyáá dí nigíʼnuu mbáa a̱ʼgu̱ bi̱ mbiʼyuu Sakura. Ikhaa nakudaminaʼ aʼkhá, mú índo̱ nigíʼdúu niʼnigajmaa Biblia nijmañuu rí Dios naʼthí: “¡Xúxuʼdámíjná aʼkhá gajmiála mbáa!” (1 Corintios 6:18). Sakura nindo̱ʼo̱o̱ Dios rí maxnu̱u̱ tsiakii ga̱jma̱a̱ niʼngo̱o̱ niriʼkumina̱a̱ʼ. Gajkhun má ndayóoʼ dí maʼni tsiakiminaʼ má xúʼko̱ ga̱jma̱a̱ tsaʼkhá rúʼko̱. Ikhaa naʼthí: “Índo̱ nandxa̱ʼwa̱mínáʼ dí xkawiʼ, ikhú na̱thu̱u̱n Jeobá ga̱jma̱a̱ xúgíʼ a̱jkiu̱nʼ, numuu rí nda̱yo̱o̱ dí maxaʼngo̱ á mu dí i̱ndó ga̱jma̱a̱ tsiakii ndrígóʼ ikhúún. Rí matajkáanʼ nimbáyuʼ mu maʼgá kanuu náa Jeobá”. Xóo má Sakura, mbaʼin wéñuʼ xa̱bu̱ nuniʼniiʼ Dios ga̱jma̱a̱ ikhaa naxnún tsiakii rí nda̱ñúnʼ mu muriʼkumijna ma̱ngaa rí makuwi̱i̱n xóo má ikhaa nandoo (Filipenses 4:13).

Índo̱ itháán guniʼníiʼ Dios, itháán ganiniáanlu mangáanʼ ma̱ngaa mbaʼyulú xóo mbáa bi̱ nambájxu̱u̱ máján ga̱jma̱a̱ (Gálatas 4:9; Salmo 25:14). Xúʼko̱ ma̱ndoo makáwáanʼ índo̱ ga̱ʼkha̱ fin ndrígóo numbaaʼ rígi̱ ga̱jma̱a̱ ma̱ndoo makuwáanʼ náa numbaaʼ nuxi̱ʼ. Xú káʼnii gánindxu̱u̱ numbaaʼ rúʼko̱ rá. Náa i̱mba̱ artículo gaʼthí rígi̱.

a Náa Biblia naʼthí dí mbiʼyuu Dios nindxu̱u̱ Jeobá.