Xóo muʼnigajmaa itháan májánʼ

Atayáá rí itháán gíʼdoo numuu

Maski ajndu nanigulúʼ muraxnuu Biblia, mú, nguáná na̱nguá guáʼdaa mbiʼi mu muraxnuu xóo phú gíʼmaa. Ndiéjunʼ gámbáyulú mu majmuluʼ májánʼ mbiʼi ndrígulú rá. Timbá, gajmaaʼ májánʼ mbiʼi mu matanigajma̱a̱. Itháan májánʼ rí matraxnuu mañuu mañúú numuu rí ma̱ta̱ya̱a̱ ndiéjunʼ eyoo gáʼthí ki xóo rí matraxnuu xúgíʼ mbá nacha̱.

Nda̱wa̱á, atayáá ndiéjunʼ rí itháán gíʼdoo numuu (Efes. 5:15, 16). Gi̱i̱ ma̱ndoo mataxkamaa dí ma̱ndoo mambáyaaʼ:

• Atraxnuu Biblia xúgíʼ mbiʼi (Sal. 1:2). Mu ma̱ndoo matagíʼdi̱i̱, atraxnuu capítulo rí kaʼyoo náa reunión dí kaʼyoo ta̱pha̱ xmáná.

• Atanirataminaʼ wapháá dí mbuʼyáá náa reunión rí nuʼnigajmaa i̱yi̱ʼ Bi̱ Nayejngoo ga̱jma̱a̱ náa reunión dí guaʼdáálu ta̱pha̱ xmáná. Atanirataminaʼ májánʼ mu matani comentar (Sal. 22:22).

• Á mu natanigajmaa itháan, atayáá ma̱ngaa xúgíʼ dí naguwíi xuajñuu Jeobá, xóo revistas dí nuxnulú xa̱bu̱, videos ga̱jma̱a̱ xúgíʼ rí nagájnuu náa jw.org.

• Atanigajma̱a̱ mbá tema dí nanigua̱ʼ. Ma̱ndoo mataʼyááʼ ga̱jma̱a̱ numuu mbá xkujndu dí ikháán natraʼníí, mbá dí nitraximínáʼ o mbá tema dí na̱ʼkha̱ náa Biblia dí nanigua̱ʼ makrua̱ʼa̱a̱ʼ itháan. Ma̱ndoo mataxkamaa itháan dí mambáyáaʼ náa sección “Actividades para estudiar la Biblia”, náa jw.org.