Maski ajndu nati̱yu̱ʼ mú nijkhánú ninindxu̱ʼ misionera

Nixtáá náa Viena (Austria). Nákhá tsiguʼ 1951 maski ajndu nati̱yu̱ʼ mú tséʼniuʼ miʼskoo matakáñuu ma xúʼko̱ Dios, bi̱ kúwá náa goʼwóo nindxu̱ún católico, mú índo̱ nigúʼdoo 9 tsiguʼ anu̱ʼ nigíʼdúu niʼniga̱jma̱a̱ gajmíi̱n testigos de Jeobá ga̱jma̱a̱ nda̱wa̱á niʼniga̱jma̱a̱ ru̱dúʼ ma̱ngaa.

Nda̱wa̱á na̱jkuáxu̱ reunión dí narígá náa congregación rí mbiʼyuu Döbling, dí rígá náa Viena. Mbaʼa rí nu̱ni̱xu̱ náa mbá guʼwáanʼ: Nuni̱ga̱jma̱xu̱ ma̱ngaa nuráxnúxu̱ Biblia, na̱jkuáxu̱ náa reunión ga̱jma̱a̱ nuxnajxímíjnáxu muñajunʼxu̱ náa asamblea. Náa xúgíʼ tsiguʼ rúʼko̱ anu̱ʼ niʼsngóʼ rí maʼndoʼ ka̱yo̱o̱ Jeobá. Índo̱ naʼtájkháan na̱ndo̱ʼo̱o̱ Jeobá rí ikhúún gajmuʼ giʼtioʼ muʼguánú mani̱ndxu̱xuʼ precursora. Mú nákhá ikhú, ikhúún na̱nguá endxa̱ʼwa̱mínáʼ mani̱ndxu̱ʼ precursora.

XÓO NIGÍʼDU̱U̱ NI̱NI̱ ÑAJUUNʼ JEOBÁ

Nijngúnʼ iyááʼ nákhá 1965, nákhá ikhúún gúʼdoo 14 tsiguʼ. Naʼniuʼ gakhi̱i̱ wéñuuʼ matamíjná gajmíʼ xa̱bu̱ índo̱ na̱jkhá gátaraʼa ma̱ngaa naxtáá ngíná numuu rí nandxa̱ʼwa̱mínáʼ rí nda̱a̱ dí ejmúún ga̱jma̱a̱ na̱ni̱ xó má e̱ni̱ eʼwíinʼ jiámá ga̱jma̱a̱ wa̱ʼxa̱ʼ numuu rí nandoʼ mambaxúʼ gajmíʼ. Nda̱wa̱á rí nijngúnʼ iyááʼ nigíʼdu̱u̱ nimbájxuʼ gajmíʼ jiámá ga̱jma̱a̱ wa̱ʼxa̱ʼ bi̱ tséni̱ ñajuunʼ Jeobá. Maski ajndu nanigu̱ʼ maxtáá gajmíʼ mú nda̱yo̱o̱ dí raʼkhí nindxu̱u̱ rí maxtáá gajmíʼ xa̱bu̱ bi̱ tséni̱ ñajuunʼ Jeobá. Niʼniuʼ gakhi̱i̱ maniʼñúuʼ rambájxuʼ gajmíʼ. Mú ndiéjunʼ nimbáyúʼ rá.

Nákhá ikhú mbáa ndxáʼgú bi̱ gíʼdoo 16 tsiguuʼ mbiʼyuu Dorothée nigíʼdu̱u̱ ninindxu̱u̱ publicadora. Ra̱ʼkhá tháán ni̱gu̱ʼ xóo eʼni numuu dí ikhaa nanigu̱u̱ʼ wéñuuʼ maʼtáraʼa. Maski ajndu ikhúún itháan nikiu̱u̱n mú tségájnúʼ gátaraʼa. Ikhú nindxa̱ʼwa̱mínáʼ: “Anu̱ʼ ga̱jma̱a̱ ru̱dúʼ nindxu̱ún testigos de Jeobá, mú Dorothée mbáwíí eʼni gájma̱a̱. Maski ajndu ndayóoʼ mañewu̱u̱n ru̱dúu̱ bi̱ naʼniuu nandii mú ikhaa naʼtáraʼa má xúʼko̱”. Xkri̱da ndrígóo nimbáyúʼ ma̱ni̱ itháán ñajuunʼ Jeobá. Nda̱wa̱á mbá nájmáanʼ ninindxu̱xuʼ precursora auxiliar, itháan nda̱wa̱á ninindxu̱xuʼ regular. Nimbáyúʼ wéñuuʼ rí xóo nadxuu a̱jkiu̱u̱n Dorothée ma̱ngaa nimbáyúʼ mu masngóo mbáa xa̱bu̱ ga̱jma̱a̱ numuu Biblia. Mañu mañúún mangúún ninigu̱ʼ mathu̱u̱n xa̱bu̱ náa mámbá guʼwá, náa kamba̱a̱ o asndu náá má rí na̱jkhá.

Timbá tsiguʼ rí ninindxu̱ʼ precursora regular, nixuʼmaa mbáa precursor especial bi̱ mbiʼyuu Heinz náa congregación ndrígóʼ. Ikhaa nininuuʼ rí gajkhun náa Canadá índo̱ ni̱jkha̱ gáʼyoo mbáa ndxájuu bi̱ nindxu̱u̱ Testigo. Ninigiu̱ʼ asndu nákhá timbá míʼtsú rí ndi̱yo̱o̱. Ikhaa nandoo mani̱ndxu̱u̱ misionero mú ikhúún nditháan tséndxa̱ʼwa̱mínáʼ ma̱ni̱. Ikha jngóo tásngajmá rí nandoʼ ka̱yo̱o̱. Mú nda̱wa̱á ninindxu̱xuʼ novio ga̱jma̱a̱ nidamíjnaxu̱ ga̱jma̱a̱ ninindxu̱xuʼ má xúʼko̱ precursor náa Austria.

XÓO NIʼGÍMINAʼ MANI̱NDXU̱ʼ MISIONERA

Heinz mbaʼa aʼphu̱ naʼthí rí nandoo mani̱ndxu̱u̱ misionero. Nditháan ma tatsudún, mú naʼthúnʼ rí naʼniuʼ mandxa̱ʼwa̱mínáʼ: “Na̱nguá má kuáʼdíin e̱ji̱n, ma̱ndoo muʼni itháán ñajuunʼ Jeobá”. Gajkhun má rí nati̱yu̱ʼ mu ikhúún nindxu̱ʼ precursora, mú índo̱ nadxawuun rí mani̱ndxu̱ʼ misionera ra̱ʼkhá tháán emíñúʼ. Heinz niʼngo̱o̱ wéñuuʼ a̱jkiu̱u̱n, tániñuuʼ raʼthí má xúʼko̱ rí nandoo mani̱ndxu̱u̱ misionero. Ma̱ngaa niʼthúnʼ dí xandxa̱ʼwa̱mínáʼ i̱ndó ga̱jma̱a̱ numuʼ ikhúún, rí mbaʼyáʼ xóo ma̱ndoo mambáñún itháán xa̱bu̱. Nimbáyuʼ wéñuuʼ rí niʼthúnʼ.

Mañu mañúún ninigu̱ʼ rí mani̱ndxu̱ʼ misionera, ikha jngóo nixuʼmáxu solicitud mu mu̱ʼguáxu náa Escuela ndrígóo Galaad. Mbáa ndxájulú bi̱ kayá edxu̱u̱ náa sucursal niʼthúnʼ dí ginii ndaʼyóoʼ ma̱ta̱ májánʼ inglés. Xúʼko̱ má ni̱ni̱, ajtsú tsiguʼ nda̱wa̱á nixuʼmáanʼxu̱ mu̱ʼguá náa mbá congregación náa nuthi ajngáa serbocroata náa Salzburgo (Austria) nikúwáanʼxu rutaraʼa mbá juwan tsiguʼ, ikhí ma̱ngaa ninindxu̱xuʼ circuito. Maski ajndu ajngáa rúʼko̱ niʼniuxu̱ miʼskhaa mu̱tha̱, mu niguáʼdíinxu mbaʼin bi̱ nisngúún ga̱jma̱a̱ numuu Biblia.

Nákhá tsiguʼ 1979, nithuxu rí mu̱ʼguáxu pasia náa Bulgaria. Numuu rí náa xuajin rúʼko̱ tséniña̱a̱ʼ miʼtáraʼa, na̱nguá ni̱jkuáxu ikhí mu mutaráʼaxu, ni̱jkuáxu kudúxu ngu̱ʼwa̱á i̱yi̱i̱ʼ majkhaʼ mu muxnu̱u̱n mbá witsiin a̱ngiu̱lú bi̱ kúwá náa Sofía, náa xuajin rí phú kayá edxu̱u̱ náa Bulgaria. Ra̱ʼkhá tháán nimíñúʼ mu Jeobá nimbáyúʼ mu manimbánuu ñajunʼ rí nikánúʼ. Índo̱ ndi̱yo̱o̱ rí a̱ngiu̱lú bugi̱, tsémíñún muni̱ ñajuunʼ Jeobá maski asndu gamíi maʼga kiʼdiin náa guʼwá e̱jua̱nʼ, rúʼko̱ nimbáyuʼ mu ma̱ndoo ma̱ni̱ mangúún asndu ndiéjunʼ má ñajunʼ rí gándo̱ʼo̱ʼ xuajñuu Jeobá.

Nda̱wa̱á nixuʼmáxu imbo̱o̱ solicitud dí mu̱ʼguáxu náa Escuela ndrígóo Galaad ga̱jma̱a̱ ikhú nithuxu rí mu̱ʼguáxu. Nindxa̱ʼwa̱míjna̱xu rí mu̱ʼguá náa Estados Unidos náa escuela rí maʼni náa ajngáa inglés. Mú noviembre tsiguʼ 1981 nigíʼdu̱u̱ nirígá escuela rígi̱ náa sucursal ndrígóo Wiesbaden (Alemania). A̱ngiu̱lú bi̱ nisngáa nuthi má ajngáa alemán, ikha jngóo táʼniuʼ gakhi̱i̱ mikro̱ʼo̱ʼ. Mú náá nixuʼmáanʼxu mu̱ʼguáxu rá.

NIÑAMBÁXU̱ NÁA MBÁ XUAJIN DÍ NIGUÁMBÁA GA̱JMA̱A̱ GUERRA

Nixuʼmáanʼxu̱ náa Kenia. A̱ngiu̱lú bi̱ kúwá náa sucursal dí rígá ikhí nirajxu̱xu̱ á mu ma̱ndoo muʼguáxu̱ gúñambáá náa Uganda, gu̱wa̱ʼ tsiguʼ wapháá nirígá guerra náa xuajin Uganda, bi̱ naʼtáñajúúnʼ soldado bi̱ mbiʼyuu Idi Amin niʼngo̱o̱ niʼni ga̱jma̱a̱ xa̱bu̱ ñajunʼ bi̱ naʼtáñajunʼ ikhí. Mú índo̱ ikhaa niʼtáñajunʼ ra̱ʼkhá tháán mbaʼin xa̱bu̱ nikháñún ga̱jma̱a̱ ra̱ʼkhá tháán mbaʼin nimíniiʼ. Tsiguʼ 1979, mbu̱júu̱ ma nigiʼdu̱u̱n gajmiún xa̱bu̱ ñajunʼ. Xó má nandoo nundxaʼwamíjna̱ dí muʼguáxu̱ guñambáá náa mbá xuajin rí niguámbáa ga̱jma̱a̱ guerra na̱nguá ma niniguxu̱ʼ wéñuuʼ. Mú Escuela ndrígóo Galaad nimbáyuxu̱ʼ rí maku̱mu̱xu̱ kuya̱a̱ Jeobá, ikha jngóo nindríguxu̱ʼ dí muʼguáxu.

Raʼkhí kayuuʼ dí narígá náa Uganda. Xa̱bu̱ ñajunʼ na̱nguá exnún dí ndañún xa̱bu̱, xóo iyaʼ, aguʼ ga̱jma̱a̱ teléfono na̱nguá ejma̱a̱. […] Xa̱bu̱ nuradíin eʼwíinʼ ga̱jma̱a̱ nuni̱ kuʼwúún rí mbruʼun. […] Ikha jngóo xúgíinʼ xa̱bu̱ nuruguaraʼamijná rí mbruʼun ga̱jma̱a̱ nutakáñíí Dios, mu xa̱bu̱ xátuʼu̱u̱n muradíin ga̱jma̱a̱ muni̱ kuʼwúún. Maski ajndu xúʼko̱ kaʼnii erígá, a̱ngiu̱lú naguájun jmbu ga̱jma̱a̱ nuni̱ má xúʼko̱ ñajuunʼ Jeobá.

Nákhá tsiguʼ 1982, ikhúún gajmuʼ Heinz ni̱jkuáxu náa Kampala, náa xuajin rí phú kayá edxu̱u̱ náa Uganda. Mbá witsu igu̱nʼ nikuwáanʼxu̱ náa goʼwóo Sam ga̱jma̱a̱ Christina Waiswa, gíʼdiin witsiin e̱ji̱i̱n ga̱jma̱a̱ mbá a̱jkhui̱i̱n a̱ngui̱i̱n. Niʼniuxu̱ tsiánguá rí ikhiin nixnuxu̱ xúgíʼ dí guáʼdáá, mu a̱ngiu̱lú bugi̱ kááʼ mbá míʼtsú epiʼtsu dí mbá mbiʼi. Índo̱ nikúwáanʼxu gajmiúxu ikhiin, mbaʼa rí nijmañuxuʼ dí ma̱ndoo mambáyuxuʼ. Mbá xkri̱da nijmañuxuʼ xóo majmuxu iyaʼ: Chíʼgíiʼ iyaʼ dí nu̱náxuʼ ga̱jma̱a̱, ma̱ngaa iyaʼ má rúʼko̱ e̱jmuxu̱ náa baño. Tsiguʼ 1983, nixkamaaxu mbá guʼwá náa ma̱ndoo makuwáanʼxu náa Kampala náa nda̱a̱ gamíi.

Niniguxu̱ʼ xóo eriʼña xa̱bu̱ náa nutaráʼaxu. Narmáʼáan a̱jkiu̱nʼ rí mbá igu̱nʼ nuniʼñááʼxu̱ 4,000 revista. Ra̱ʼkhá tháán niguxu̱ʼ rí xa̱bu̱: Nduyamajkuíí Dios ga̱jma̱a̱ nandún majmañún dí naʼthí náa Biblia. Mámbáa rí ikháanʼxu̱ niguáʼdiinʼxu 10 o asndu 15 xa̱bu̱ bi̱ nusngúnxu̱ʼ ga̱jma̱a̱ numuu Biblia, mbaʼa rí nijmañuxuʼ náa ikhiin. Mbá xkri̱da, maski má xúgíʼ xmáná nagún rajkhúún índo̱ nagún reunión nditháan tsíxieʼká ga̱jma̱a̱ nadxún má xúʼko̱.

Nákhá tsiguʼ 1985 ga̱jma̱a̱ 1986 nirígá i̱mba̱ gi̱jma̱ guerra náa Uganda. Mbaʼa nuthu ndiñuxu̱ʼ soldado bi̱ kaʼnii nindxu̱ún e̱ji̱n bi̱ kuda má ajua̱nʼ wájun náa kamba̱a̱. Nángi eʼni etakáñixu̱ Jeobá mu mambáyuxuʼ mbuya̱a̱ ndiéjunʼ munixu̱ʼ ga̱jma̱a̱ rí xámíñuxu índo̱ kúwáanʼxu rutaraʼa. Ga̱jma̱a̱ ikhaa niriʼña̱a̱ dí nutakáñixu̱ʼ. Asndu nambumuxu̱ rí namíñuxuʼ índo̱ nuxkamaa mbáa xa̱bu̱ bi̱ nanigu̱u̱ʼ maʼniga̱jma̱a̱ Biblia.

Ma̱ngaa niniguxu̱ʼ mutaruʼúún xa̱bu̱ bi̱ naguwaáʼ. Mbá xkri̱da, nisngááxu̱ ga̱jma̱a̱ Biblia Murat ga̱jma̱a̱ Dilbar Ibatullin, xa̱bu̱ gajmii bi̱ naguwáʼ náa Tartaristán dí rígá Rusia. Murat nindxu̱u̱ médico, ga̱jma̱a̱ mbá nájmi̱i̱n ninigu̱u̱nʼ munigajma̱a̱ ma̱ngaa nuni̱ má xúʼko̱ ñajuunʼ Jeobá. Nda̱wa̱á niniʼníiʼ Tatjana Vileyska, mbáa a̱ʼgu̱ bi̱ na̱ʼkha̱ náa Ucrania bi̱ xtáa ngíná wéñuuʼ bi̱ asndu nindoo maxíyaminaʼ. Tatjana nijngúun iyááʼ ga̱jma̱a̱ nitanga̱a̱ náa xuajñuu, nda̱wa̱á ni̱jkha̱nú niñajunʼ náa najuiʼtájuíi iyulú.a

MBÁ RÍ NIʼNIUXU̱ MINGÍJYÚUʼ

Nákhá tsiguʼ 1991, ni̱jkua̱a̱ʼxu̱ mbá xngaa náa Austria, a̱ngiu̱lú bi̱ kúwá náa sucursal dí rígá ikhí nituxu̱ rí muʼguáxu̱ náa Bulgaria. Nákhá ginii tséniña̱a̱ʼ majuiʼtáraʼa náa xuajin dí rígá náa Europa, mú xúgíʼ rúʼko̱ nixtiʼkhuu ga̱jma̱a̱ niniña̱a̱nʼ majuiʼtáraʼa náa mbaʼa xuajin, mbá rí ikhaa nindxu̱u̱ Bulgaria. Xó má ni̱tha̱, ikhúún ga̱jmu̱ʼ Heinz nákhá ginii nijkuáxu̱ kudúxu̱ nguʼwáá i̱yi̱i̱ʼ ikhí mú rí xúgi̱ nuxuʼmáanʼxu mu̱ʼgua̱a̱ʼ ikhí mu mutaraʼa.

Nituxu̱ rí xútangáanʼxu̱ náa Uganda. Ikha jngóo nánguá nindoo matángáanʼxu̱ gúdáa trastiuxu̱ ni má rí mutangáwúún a̱ngiu̱lú, mbájmbu nijkuáxu̱ náa Betel dí rígá náa Alemania, ikhí nixnuxu̱ mbá carro rí nijkuáxu̱ ga̱jma̱a̱ asndu náa Bulgaria. Nixuʼmáanʼxu náa mbá congregación dí rígá náa Sofía náa kúwá mbá 20 a̱ngiu̱lú.

Náa Bulgaria niraʼnííxu̱ rí niʼniuxu̱ mingíjyúuʼ numuu rí tséjmañuxu̱ gútha̱ ajngáaʼ rí nuthi ikhí. Ma̱ngaa kááʼ a̱jma̱ i̱yi̱i̱ʼ rígá náa ajngáa búlgaro: La verdad que lleva a vida eterna ga̱jma̱a̱ Libro ndrígóʼ náa na̱ʼkha̱ raʼthí ga̱jma̱a̱ numuu Biblia. Naʼni gakhi̱i̱ mataxkamaa mbáa xa̱bu̱ bi̱ manigu̱u̱ʼ maʼni ga̱jma̱a̱ Biblia. Maski má xúʼko̱, a̱ngiu̱lú nutaraʼa ga̱jma̱a̱ gagi. Guʼwá ndxajkuun ortodoxa nigíʼdu̱u̱ ndiʼyoo rígi̱ ga̱jma̱a̱ ikhú nigíʼdu̱u̱ nirígá xkujndu.

Nákhá 1994, xa̱bu̱ ñajunʼ Búlgaro nánguá niniñuuʼ miʼtáraʼa mbu̱júu̱ ikhí, ikha jngóo mbaʼin xa̱bu̱ nindxaʼwamíjna̱ dí religión ndrígúlú nindxu̱u̱ ra̱májánʼ. Tikhuun a̱ngiu̱lú nixudi̱i̱nʼ guʼwá ejua̱a̱nʼ. Náa noticias nuthi dí raʼkhí kayuuʼ ga̱jma̱a̱ numuxu, mbá xkri̱da, nuthi rí Testigos nuniñu̱u̱nʼ rí e̱jñu̱ún makhañún ga̱jma̱a̱ nuthúún eʼwíinʼ Testigos dí muradímíjná. Ra̱ʼkhá tháán gakhi̱i̱ eʼni dí mutaráʼaxu. Mbaʼa nuthu nuxkamiin xa̱bu̱ bi̱ najmangu̱u̱nʼ, nundxaʼwajmáanʼxu̱, nundxa̱ʼu̱u̱n policía ga̱jma̱a̱ asndu káʼníí má rí nudajmáanʼxu̱. Ra̱ʼkhá tháán gakhi̱i̱ eʼni rí ma̱ʼkha̱nú i̱yu̱lúʼ ga̱jma̱a̱ rí muxkamaa mbá guʼwá náa marigá reunión. Mbá miʼtsu policía nitu̱ʼu̱u̱n náa mbá asamblea ga̱jma̱a̱ nánguá ni̱ni̱ña̱a̱ʼ mambúxu̱. Xúgíʼ rígi̱ nindxu̱u̱ timbá míʼtsú rí ndu̱ya̱a̱xu xígi̱ kaʼnii. ¡Mixtiʼkhu kayuuʼ xóo xa̱bu̱ bi̱ kúwá náa Uganda, ikhiin ra̱ʼkhá tháán májánʼ a̱jkiu̱ún ga̱jma̱a̱ nanigu̱u̱nʼ mudxawíín dí marathu̱u̱n! Mú ndiéjunʼ nimbáyúxu̱ mu makuwáanʼxu má xúʼko̱ gagi rá.

Rí phú nimbáyúxu̱ nindxu̱u̱ rí makuwáanʼ gajmiúxu̱ a̱ngiu̱lú. Ikhiin kúwá gagi numuu rí nixkamaa rí gajkhun ma̱ngaa nuxna̱a̱xu numaaʼ numuu rí kúwáanʼxu ikhí ga̱jma̱a̱ nindxu̱ún. Nikúwáanʼxu mbá kambájxu̱xu̱ ga̱jma̱a̱ niñewumíjna̱xu̱. Mbá nájmáanʼ nijmañuxuʼ rí ma̱ndoo makuwáanʼxu tsímáá tséʼniuu má náa kuwáánʼ ruñambáá, i̱ndó á mu nduʼyáʼ xóo mumbáñún xa̱bu̱, raʼkháa rí i̱ndó mundxa̱ʼwa̱míjna̱ náa xkujndu rí kuaʼdáá.

Nguáthá tsiguʼ nda̱wa̱á nijxoo xkujndu. Nákhá tsiguʼ 1998 xa̱bu̱ ñajunʼ nitanga̱a̱ niʼthí dí ma̱ndoo majuiʼtáraʼa, ikhú má nigíʼdu̱u̱ nijuiʼtájuíi mbaʼa i̱yu̱lúʼ náa ajngáa búlgaro. Nákhá 2004 niwájxi̱ i̱mba̱ guʼwá rí mani̱ndxu̱u̱ betel. Rí mbiʼi xúgi̱ rígá mbá 57 congregación náa Bulgaria, kúwá mbá 2,953 publicadores. Bi̱ nikúwíin náa Conmemoración tsiguʼ 2024 niʼni mbá 6,475. Náa Sofía, nákhá ginii kúwá mbá witsiin a̱ngiu̱lú, mú rí xúgi̱ rígá mbá nueve congregación. Gajkhun rí di̱ya̱a̱xu̱ xóo nimbánuu kiʼtáriyaʼ rígi̱: “Bi̱ chíʼgíiʼ maʼga̱nú mani̱ndxu̱u̱ mbá mil” (Is. 60:22).

GAMIÉJUNʼ RÍ NI̱ʼKHA̱NÚ NÁA INUXU

Náa mba̱yu̱u̱ʼ tsiguʼ rí nixtáá niniuʼ nandii. Nigúʼdoʼ mbaʼa tumor, mbá rí ikha nigiwa̱nʼ náa edxu̱ʼ. Ni̱jkhá náa India mu maguma thanuʼ ga̱jma̱a̱ ikhí niniu̱nʼ operar dí ndijyúuʼ mbá 12 hora mu murawíi tikhu tumor. Mba̱yu̱u̱ʼ mbiʼi niguanúʼ náa sucursal dí rígá náa India mu maʼni̱i̱ a̱jkiu̱nʼ, nda̱wa̱á nitangáanʼxu náa Bulgaria.

Xúʼko̱ má Heinz niʼniuu mbá nandii rí mbiʼyuuʼ Huntington. Mañu mañúún ni̱jkha̱ raʼñuu gakhi̱i̱ dí asndu nánguá xóo maʼga kruígo̱o̱, maʼthí ga̱jma̱a̱ rí maʼbañimínáʼ. Ikha jngóo ikhúún ndiyóoʼ dí mañewu̱u̱n itháán. Ni̱jkha̱nú mbiʼi rí niʼni néʼngo̱ʼ ga̱jma̱a̱ ra̱ʼkhá tháán nixmiéjunʼ, numuu rí niku̱mu̱ʼ dí asndu nánguá eʼngo̱ʼ gáñewu̱u̱n. Mú mbáa ndxájulú bi̱ mbiʼyuuʼ Bobi na̱jkha̱ kayáa má xúʼko̱ mu mataraʼa. Mú ndxájulú Bobi tséʼñuu gakhi̱i̱ wéñuuʼ dí mañewu̱u̱n Heinz ga̱jma̱a̱ numuu nandii rí naʼniuu. Índo̱ ikhúún ndayóʼ mbáa bi̱ mambáyuʼ mañewu̱u̱n, ikhaa na̱jkha̱ má xúʼko̱ mu mambáyúʼ. Gajkhun má rí ikháanʼxu̱ niraʼwi̱i̱ rí xúguaʼdiin e̱ji̱n náa tsu̱du̱u̱ numbaaʼ rígi̱, mú Jeobá nixniúxu̱ Bobi, bi̱ ni̱jkhánú ninindxu̱u̱ xóo a̱ʼdiúxu̱ (Mar. 10:​29, 30).

Heinz ma̱ngaa nigiʼdoo nandii cáncer ga̱jma̱a̱ cáncer má nixíyáa nákhá tsiguʼ 2015. Ra̱ʼkhá tháán ngíná nixtáá, tsíyóo gánimboʼ dí nánguá xtáá gajmuʼ. Nandxaʼwamínáʼ má xúʼko̱ ga̱jma̱a̱ numuu, narmáʼáan a̱jkiu̱nʼ xúgíʼ rí nini̱xu (Luc. 20:38). Mámbá mbiʼi narmáʼáan a̱jkiu̱nʼ xóo eʼthí ga̱jma̱a̱ nandxaʼwamínáʼ xúgíʼ rí mitsaanʼ naʼthúnʼ ga̱jma̱a̱ consejo rí naxnúʼ. Naxna̱a̱ núma̱aʼ Jeobá dí niniñuʼ maxtáá gajmuʼ mu ma̱ni̱ ñajuunʼ ikhaa.

NAXNA̱A̱ NÚMA̱Aʼ JEOBÁ NUMUU RÍ IKHAA MÁ NIMBÁYÚʼ

Gajkhun rí Jeobá nixtáa ga̱jma̱á nindxu̱ʼ índo̱ niraʼnuu gamiéjunʼ. Ma̱ngaa nimbáyúʼ mu mani̱ndxu̱ʼ misionera ga̱jma̱a̱ rí maʼndoʼ ka̱ñu̱u̱n xa̱bu̱ maski ajndu nati̱yu̱ʼ (2 Tim. 1:7). Núma̱aʼ ma Jeobá ikhúún gajmuʼ gi̱ʼtio̱ʼ nu̱ni̱xu̱ kájxi̱ ñajuunʼ ikhaa. Gi̱ʼtio̱ʼ ga̱jma̱a̱ ajmbio̱o̱ kúwá ruñambáá xóo circuito náa Europa nagún gúñún a̱ngiu̱lú bi̱ kúwá ikhí náa congregación dí nuthi ajngáa serbia. Rí xóo anu̱ʼ niʼtákáñuu Jeobá nákhá majkiáanʼxu̱ʼ ni̱jkha̱nú nimbánuu.

Dí nanigajma̱a̱ Biblia nambáyúʼ mu maxtáá tsímáá. Índo̱ ninújngoʼ náa awúu̱n gamiéjunʼ nijmañuʼ rí ‹matakáñuu itháan Jeobá›, xó má niʼni Jesús (Luc. 22:44). Mbá rí xóo Jeobá nariʼña̱a̱ dí natajkháan nindxu̱u̱ rí xóo nandún kuyoʼ a̱ngiu̱lú bi̱ kúwá náa congregación ndrígóʼ náa Nadezhda (Sofía). Nuthu̱nʼ rí maxtáá gajmíʼ ga̱jma̱a̱ nuthu̱nʼ dí ra̱ʼkhá tháán eñún kuyoʼ rúʼko̱ eʼni rí maxtáá tsímáá.

Nandxaʼwamínáʼ má xúʼko̱ náa rí maguaxúun bi̱ nikháñún. Asndu xóo nda̱ñu̱u̱n xúgíinʼ bi̱ kúwá náa goʼwóʼ dí kúwá kambájxu̱u̱n: Anu̱ʼ ga̱jma̱a̱ ru̱dúʼ ra̱ʼkhá tháán mitsiʼñíin xóo nákhá nidamijná, gi̱ʼtio̱ʼ naʼni mújúunʼ ganitsu ga̱jma̱a̱ Heinz karíguii wáyúu. Índo̱ nandxaʼwamínáʼ ga̱jma̱a̱ numuu xúgíʼ rígi̱ nambáyúʼ mu xáxtáá ngíná ga̱jma̱a̱ rí maxna̱a̱ núma̱aʼ Jeobá.

Índo̱ nandxa̱ʼwa̱mínáʼ xóo xtáá xúgi̱ ga̱jma̱a̱ xóo gáxtáá nda̱wa̱á naʼni rí maku̱mu̱ʼ xó má David, índo̱ niʼthí:“Náá lá gáxtáá ikhúún á mu tágúʼdoo fe rí mba̱yo̱o̱ xóo májáanʼ a̱jkiu̱u̱n Jeobá náa kúwá bi̱ nduya rá. Gakuma̱a̱ʼ xtayáá Jeobá, xámíñáaʼ ga̱jma̱a̱ gakhi̱i̱ a̱jkia̱a̱nʼ gátani̱. Xúʼko̱, gakuma̱a̱ʼ xtayáá Jeobá” (Sal. 27:​13, 14).