Graxe̱ rí nuni bi̱ nuraxnuu

Asndu nguáná gúniʼñááʼ ruʼtáraʼa rá.

Jesús niʼthí: “Ga̱jma̱a̱ majuiʼtáraʼa ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios náa xúgíʼ tsu̱du̱u̱ ku̱ba̱ʼ mu mudxawíín xúgíinʼ xa̱bu̱, ga̱jma̱a̱ ikhú martumuu mbiʼi” (Mat. 24:14). Índo̱ náa versículo rígi̱ ga̱jma̱a̱ náa versículo 6 ma̱ngaa 13 naʼthí rí “martumuu mbiʼi”, náa ajngáa griego nandoo gáʼthúu̱n dí mambáa mbá kayúʼ rí naʼtáñajunʼ Gixa̱a̱ náa Armagedón (Apoc. 16:​14, 16). Ikha jngóo muniʼñááʼ ruʼtáraʼa índo̱ inuu magi̱ʼdu̱u̱ Armagedón. Rígi̱ nindxu̱u̱ rí nakru̱ʼu̱lú xúgi̱, numuu dí nákha ginii mbá nuthu xóo ekru̱ʼu̱lú.

Nákha ginii nakru̱ʼu̱lú dí muniʼñááʼ ruʼtáraʼa ajngáa rí májánʼ índo̱ gaguma gámbáa Babilonia rí Mba̱a̱, ga̱jma̱a̱ índo̱ gági̱ʼdu̱u̱ gaʼkhu rí majphú mba̱a̱ (Apoc. 17:​3, 5, 15, 16). Nákha niʼnii nakumulú dí índo̱ gági̱ʼdu̱u̱ gaʼkhu rí majphú mba̱a̱, a̱ʼkuíí má gártumuu mbiʼi “dí Jeobá magáwíinʼ a̱jkiu̱u̱n” kaʼñún xa̱bu̱ (Is. 61:2). Ma̱ngaa nikumulú dí índo̱ gági̱ʼdu̱u̱ gaʼkhu rí majphú mba̱a̱, i̱ndó maguma káwíin bi̱ niguájun jmbu náa Jeobá. Niʼtálú dí ikhiin mani̱ndxu̱u̱n xóo judíos bi̱ niguma káwíin, índo̱ niguma gámbáa Jerusalén nákha 607 tsiguʼ ginii, ikhiin nijuaxtaʼwíin nákha wapháá mu maguma káwíin, numuu dí ndiyamajkuíí Jeobá ga̱jma̱a̱ niwiñunʼ kuyáá dí ra̱májánʼ (Ezeq. 5:11; 9:4). Mú, rígi̱ tsémbríguii ga̱jma̱a̱ dí niʼthí Jesús náa Mateo 24:​14, náa naʼthí dí mbáa makuwíin xa̱bu̱ bi̱ maʼndún mudxawíín ajngáa rí májánʼ, nákha xóó tséguma gámbáa mbá kayuuʼ rí naʼtáñajunʼ Gixa̱a̱ náa Armagedón.

Xúgi̱ dí nakru̱ʼu̱lú itháan kaʼwu dí naʼthí náa Mateo 24:​14, ma̱ngaa ndayóo muriʼkui̱i̱ xóo ekru̱ʼu̱lú dí naʼthí náa Apocalipsis 16:​21, náa naʼthí ga̱jma̱a̱ numuu eʼtsí rí nindxu̱u̱ xóo itsí. Índo̱ ninigajma̱a̱xu̱ itháan májánʼ a̱jma̱ texto rígi̱, ndi̱ya̱xu̱ dí naʼthí ga̱jma̱a̱ numuu ikháá má ajngáa. Ndíjkha rá. Náa Apocalipsis 16:21 naʼthí ndiéjunʼ gúni xa̱bu̱ índo̱ gúdxawíín ajngáa rí májánʼ ga̱jma̱a̱ numuu Xa̱bu̱ ñajunʼ ndrígóo Dios. Apóstol Pablo niʼnirámáʼ dí bi̱ makáwíin nduyáá dí ajngáa rí nuʼthúún nindxu̱u̱ májánʼ, mú xa̱bu̱ sia̱nʼ ndrígióo Dios nduyáá rí nindxu̱u̱ ra̱májánʼ (2 Cor. 2:​15, 16). Tsénigunʼ mudxawíín, numuu dí nuʼthúún rí Gixa̱a̱ eʼtáñajúúnʼ ga̱jma̱a̱ dí inuu má maguma gámbáa (Juan 7:7; 1 Juan 2:17; 5:19).

Ma̱ngaa náa Apocalipsis 16:​21, naʼthí dí eʼtsí rí nindxu̱u̱ xóo itsí mani̱ndxu̱u̱ “mba̱a̱ wéñuuʼ”. Rígi̱ nandoo gáʼthúu̱n dí muʼtáráʼa mbájmbu ga̱jma̱a̱ ajngáa dí gúʼthá magiʼdoo itháan numuu. Rígi̱ maʼni dí mbaʼin xa̱bu̱ mudxawíín, ga̱jma̱a̱ mbaʼin maguánú muniʼnuuʼ mbiʼyuu Jeobá (Ezeq. 39:7). Lá rígi̱ eʼyoo gáʼthúu̱n dí nda̱wa̱á dí gaguma gámbáa Babilonia rí Mba̱a̱, makuwa xóó xa̱bu̱ bi̱ manigu̱u̱nʼ mudxawíín ajngáa dí gúʼtáráʼa ráʼ. Mbáa xúʼko̱, mbáa marmáʼáan a̱jkiu̱ún dí testigo de Jeobá mba̱yu̱u̱ʼ má tsiguʼ nikuwa rutaraʼa dí maguma gámbáa xúgíʼ religión dí minduwaʼ.

Xúʼko̱ má kayuuʼ nirígá náa Egipto índo̱ nijngoo gu̱wa̱ʼ gamiéjunʼ, nda̱wa̱á dí Jeobá niʼni gíníi “xúgíinʼ dioses bi̱ kúwá ikhí”, mbaʼin bi̱ na̱nguá nindxu̱ún israelitas nigún gajmiún xa̱bi̱i̱ Dios (Éx. 12:​12, 37, 38). Mbáa xa̱bu̱ bugi̱ niraʼwi̱i̱ munimbu̱ún kuyáá Jeobá, índo̱ ndiyáá dí nimbánuu xúgíʼ rí Moisés niʼthí marigá ga̱jma̱a̱ numuu mbá gu̱wa̱ʼ gamiéjunʼ.

Asndu tsáá bi̱ gáraʼwíi maʼnimbo̱o̱ kaʼyoo Jeobá nda̱wa̱á rí gaguma gámbáa Babilonia rí Mba̱a̱, ma̱ndoo mambáñún a̱ngui̱i̱n Cristo bi̱ kaʼníí gákuwá náa tsu̱du̱u̱ Ku̱ba̱ʼ, ga̱jma̱a̱ xúʼko̱ ma̱ndoo majuiʼthá dí nindxu̱ún xóo mugu̱ (Mat. 25:​34-36, 40). I̱ndó ma̱ndoo musngajma rí nunimbu̱ún kuyaaʼ Jeobá índo̱ inuu magi̱ʼdu̱u̱ Armagedón, ga̱jma̱a̱ índo̱ bi̱ kaxtaʼwíin bi̱ gákuwá xóó náa tsu̱du̱u̱ Ku̱ba̱ʼ gáguáan mekhuíí.

Rí nakru̱ʼu̱lú xúgi̱ nasngájma kaʼwu dí Jeobá ra̱ʼkhá tháán eyoo kaʼyulú ga̱jma̱a̱ nagáwíinʼ a̱jkiu̱u̱n kaʼyulú numuu dí ikhaa “tsíyóo rí nimbáa maguma gámbáa, ikhaa nandoo rí xúgíinʼ maguánú matanga̱a̱ a̱jkiu̱ún” (2 Ped. 3:9).