Mbaʼin namíñúún dí nuradimijná xa̱bu̱ | Ndiéjunʼ eʼthí náa Biblia rá.

Nákha julio tsiguʼ 2022, náa mbá xúgíʼ numbaaʼ niradímíjná xa̱bu̱ ga̱jma̱a̱ ajua̱nʼ:

• “Índo̱ nixiyáa xa̱bu̱ ñajunʼ bi̱ najmaʼniiʼ wéñuʼ bi̱ xtáa náa Japón [bi̱ ninindxu̱u̱ timbáa ministro Shinzo Abe] rígi̱ niʼni dí mamiñún xa̱bu̱, numuu dí náa xuajin rúʼko̱ na̱nguá kúwá xa̱bu̱ bi̱ nuradíin a̱ngiu̱ún ga̱jma̱a̱ guáʼdáá xtángoo náa naʼthí dí raʼkháa xúgíinʼ ma̱ndoo maguaʼdáá ajua̱nʼ” (10 ñajunʼ gu̱nʼ julio tsiguʼ 2022, The Japan Times).

• “Xa̱bu̱ bi̱ kúwá náa Dinamarca, nimíñúún índo̱ ndiyáá dí mbáa xa̱bu̱ nigudíin mbá ajtsíin a̱ngui̱i̱n ga̱jma̱a̱ ajua̱nʼ náa naxtango̱jo̱o̱ dí mbiʼyuu Copenhague” (4 ñajunʼ gu̱nʼ julio tsiguʼ 2022, Reuters).

• “Náa Sudáfrica: Mbá nguáthi̱i̱n xa̱bu̱ bi̱ kuda ajua̱nʼ nirmidá náa awúu̱n mbá bar dí mbiʼyuu Soweto ga̱jma̱a̱ niradíin mbá 15 xa̱bu̱” (10 ñajunʼ gu̱nʼ julio tsiguʼ 2022, The Guardian).

• “Náa Estados Unidos nini̱ mbá ndxa̱a̱ nákha 4 ñajunʼ gu̱nʼ julio índo̱ naguámbá xmáná, ikhí nikháñún mbá 220 xa̱bu̱ ga̱jma̱a̱ ajua̱nʼ (5 ñajuunʼ gu̱nʼ julio tsiguʼ 2022, CBS News).

Lá maʼga̱nú mbá mbiʼi dí nánguá muradímíjná xa̱bu̱ ráʼ. Lá naʼthí náa Biblia ga̱jma̱a̱ numuu rígi̱ ráʼ.

Nánguá muradímíjná xa̱bu̱

Náa Biblia naʼthí dí kúwáanʼ náa “iwáá mbiʼi”, ga̱jma̱a̱ rí xa̱bu̱ mani̱ndxu̱u̱n xóo xujkhú xáná bi̱ najmangu̱u̱nʼ (2 Timoteo 3:1, 3). Rí nanindxu̱ún xígi̱ kaʼnii xa̱bu̱, rúʼko̱ naʼni rí mamiñún eʼwíinʼ (Lucas 21:11). Náa Biblia naʼthí dí maʼga̱nú mbiʼi dí xa̱bu̱ nánguá muradímíjná ga̱jma̱a̱ rí ‹xa̱bu̱ makuwá tsímáá, xámiñún ga̱jma̱a̱ maguáʼdáá guʼún náa mbuya̱a̱ jxu̱ún› (Isaías 32:18). Mú, xú káʼnii gáʼga̱nú mambáa dí nuradímíjná xa̱bu̱ rá.

Dios maʼni gámbáa xúgíʼ ajua̱nʼ ga̱jma̱a̱ xa̱bu̱ ra̱míjíinʼ.

• “Mú xa̱bu̱ bi̱ nuni dí ra̱májánʼ wéñuʼ mambíin náa tsu̱du̱u̱ ku̱ba̱ʼ; ga̱jma̱a̱ bi̱ nuninduwaʼ ní xákuwa ikhí” (Proverbios 2:22).

• “Ikhaa naʼni gámbáa guerra dí rígá náa xúgíʼ tsu̱du̱u̱ ku̱ba̱ʼ. Nakumigariga̱a̱ xkamídá ga̱jma̱a̱ narujku̱u̱ kúdú; ga̱jma̱a̱ natsikháa carriún soldado náa aguʼ” (Salmo 46:9).

Dios maʼni gámbáa náa naku̱mu̱u̱ dí nuradímíjná xa̱bu̱ ga̱jma̱a̱ maʼsngúún rí makuwá tsímáá.

• “Nándáa rí gúni ní má xúni̱ gachíí kúbá ndrígóʼ rí mikaʼwu; numuu rí náa ku̱ba̱ʼ marigá wéñuʼ ku̱ma̱ ndrígóo Jeobá xó má iyaʼ kajníʼ náa lamáa” (Isaías 11:9).

• Asndu nákha xúgi̱, Dios naʼsngúún xúgíinʼ xa̱bu̱ dí xurajthuun ajua̱nʼ mu muradimijná ga̱jma̱a̱, numuu rí ikhaa maʼni̱i̱ ‹arado ga̱jma̱a̱ lanzas xóo ajua̱n rí narujtu iná› (Miqueas 4:3).

Á mu nandaaʼ ma̱ta̱ya̱a̱ itháán ga̱jma̱a̱ numuu rí naʼthí náa Biblia xóo gánindxu̱u̱ numbaaʼ náa nánguá marigá gamíi, atraxnuu artículo “¿Es posible librarse del miedo?”.

Mu ma̱ta̱ya̱a̱ itháán, xóo gámbáa mbájkhu dí nuradimijná xa̱bu̱ atraxnuu artículo “¡Por fin paz en la Tierra!”.