Lá maʼngu̱u̱n xa̱bu̱ murikháá dí xárígá gamiéjunʼ numuu dí naxtiʼkhuu clima ráʼ. | Ndiéjunʼ eʼthí náa Biblia rá.

Domingo 20 ñajunʼ gu̱nʼ noviembre tsiguʼ 2022, niguámbá Conferencia ndrígóo Naciones Unidas ga̱jma̱a̱ numuu Cambio Climático (COP27). Xa̱bu̱ bi̱ nikúwá ikhí nitamijná rí muyejxi̱i̱ mbújkha̱a̱ mu mumbañún xa̱bu̱ bi̱ kúwá náa xuajen ngíná índo̱ nuraʼníí mbá gamiéjunʼ numuu dí naxtiʼkhuu clima. Maski ajndu awan rígi̱ gíʼdoo wéñuʼ numuu, mbaʼin nakumu̱ún dí xáʼngo̱o̱ gáʼni májáanʼ náa naku̱mu̱u̱ xkujndu.

‹Májánʼ má eyoo mangúún dí muyejxi̱i̱ mbújkha̱a̱ mu mumbáñún xa̱bu̱ náa nandáti̱gu̱u̱n ga̱jma̱a̱ nuraʼníí mbá gamiéjunʼ […]. Nduʼyáá dí i̱ndó rígi̱ xáʼngo̱o̱ […]. Numbaaʼ ndrígulú ra̱ʼkhá tháán niguma gachíí rí migamíi dí ní xáʼngo̱o̱ maguma májáanʼ› (António Guterres, secretario general ndrígóo Naciones Unidas; 19 ñajunʼ gu̱nʼ noviembre tsiguʼ 2022).
‹Ku̱ba̱ʼ ndrígulú migamíi maʼchúu mbá kayuuʼ ga̱jma̱a̱ numuu dí naxtiʼkhuu clima› (Mary Robinson, bi̱ nákha ginii ninindxu̱u̱ presidenta náa Irlanda ga̱jma̱a̱ mbáa bi̱ nigiʼdoo numuu náa ONU ga̱jma̱a̱ numún Derechos Humanos; 20 ñajunʼ gu̱nʼ noviembre tsiguʼ 2022).

Bi̱ itháán naxmiéjúnʼ ga̱jma̱a̱ numuu ndiéjunʼ gárígá nda̱wa̱á náa numbaaʼ nindxu̱ún jiámá ga̱jma̱a̱ wa̱ʼxa̱ʼ. Lá maʼngu̱u̱n xa̱bu̱ xuajen muñajunʼ mbóó ga̱jma̱a̱ munimbánii dí nixudamíjna̱ muni ga̱jma̱a̱ numuu dí naxtiʼkhu̱u̱ clima ráʼ. Ndiéjunʼ eʼthí náa Biblia rá.

Lá maʼngu̱u̱n xa̱bu̱ xuajen muñajunʼ mbóó ga̱jma̱a̱ munimbánii dí nithi ráʼ.

Maski ajndu kúwi̱i̱n bi̱ nuñajunʼ gakhi̱i̱ ga̱jma̱a̱ xúgíʼ a̱jkiu̱ún mu munimbánii xkujndu ga̱jma̱a̱ numuu dí naxtiʼkhuu clima, Biblia nasngájmaa dí xáʼngu̱u̱n muni xúgíʼ dí nandún. Guʼyáá a̱jma̱ numuu.

“Dí mixngaa xándoo maguma jmbi̱i̱” (Eclesiastés 1:15).

Rí nandoo gáʼthí. Xa̱bu̱ ñajunʼ xáʼngu̱u̱n gunimbánii xúgíʼ dí nuxudamijná numuu dí xa̱bu̱ numbaaʼ na̱nguá nigumawíin mu mutañajumijná ikhíi̱n (Jeremías 10:23). Tséʼñuu má nguáthá ñajunʼ enii, maski má nuñajunʼ mbóó, xa̱bu̱ xuajen xáʼngu̱u̱n munimbánii xkujndu dí rígá náa numbaaʼ.
“Numuu rí xa̱bu̱ maʼndún kuyamíjna̱ i̱ndó ikhiin, maʼndún kuyáá wéñuuʼ mbújkha̱a̱ […], xámbánún mu makuwá tsímáá” (2 Timoteo 3:2, 3).

Rí nandoo gáʼthí. Náa Biblia niʼtáriyaʼ dí xa̱bu̱ bi̱ makuwá mbiʼi xúgi̱ i̱ndó maʼndún kuyamijná ikhiin ga̱jma̱a̱ dí xáʼndúún muñajunʼ mbóó mu mumbañún xúgínʼ. Lá raʼkháa rígá xúʼko̱ eʼyáá ráʼ.

Mbá numuu mu muguaʼthi̱i̱n dí májánʼ

Xóo marígá nda̱wa̱á náa numbaaʼ, rakáʼyoo ga̱jma̱a̱ numuu dí nuxuda̱mi̱jna̱ muni xa̱bu̱ ñajunʼ. Dios nigíiʼ má mbáa xa̱bu̱ ñajunʼ bi̱ maʼngo̱o̱ maʼni májáanʼ, ikhaa nindxu̱u̱ Jesucristo. Rígi̱ eʼthí náa Biblia ga̱jma̱a̱ numuu ikhaa:

“Ikhaa makhánaa dí maʼtáñajunʼ. Ma̱ngaa magumbiʼyuu bi̱ Raʼkhá tháán májánʼ exná Xtága̱bu̱, Dios bi̱ gíʼdoo Tsiakii, bi̱ nindxu̱u̱ xó má Anu̱lú bi̱ xtáa Kámuu, Xa̱bu̱ Ñajunʼ bi̱ naʼni marigá rí Tsímáá” (Isaías 9:6).

Jesús nindxu̱u̱ Rey náa Reino ndrígóo Dios, mbáa Xa̱bu̱ Ñajunʼ bi̱ xtaa náa mekhuíí (Mateo 6:10). Ikhaa gíʼdoo tsiakii, ku̱ma̱, nandoo mañewu̱u̱n ku̱ba̱ʼ ndrígulú ga̱jma̱a̱ bi̱ kúwi̱i̱n ikhí (Salmo 72:12, 16). Índo̱ gáʼtañajunʼ, maʼni “gámbíin bi̱ kúwá runigámbáa ku̱ba̱ʼ ”ga̱jma̱a̱ maʼni májáanʼ numbaaʼ (Apocalipsis 11:18; Isaías 35:1, 7).

Á mu nandaaʼ ma̱ta̱ya̱a̱ itháan xú káʼnii gaguma májáanʼ mbájkhu rí naguma gaʼchúu ga̱jma̱a̱ numuu dí naxtiʼkhuu clima, atraxnuu artículo “Ndiéjunʼ eʼthí náa Biblia ga̱jma̱a̱ numuu xóo extiʼkhuu clima ga̱jma̱a̱ dí guáʼthi̱i̱n nda̱wa̱á rá.”