Nakidiin náa lamáa Maña̱ʼ

¡ATAYÁÁ rí xtáa rarígá! Ikhaa ni̱ndxu̱u̱ Moisés bi̱ xtáa rakruiyaʼ ixu̱u̱ náa lamáa Maña̱ʼ. Ikhaa xtáa gajmíi̱n israelitas imbo̱o̱ ridoo náa nándáa gamíi. Mú Faraón gajmíi̱n soldado kuwa raguʼwi̱i̱n. Guʼyáá xú káʼnii nirígá rígi̱.

Xóo má nijmañulúʼ, nda̱wa̱á rí nirígá gimbóó rí maʼni gu̱wa̱ʼ gamiéjunʼ Faraón niʼthún israelitas magajnún náa Egipto. Mbá 600,000 xa̱bekha israelitas nigájnun, xúʼko̱ má xóo mbaʼin gu̱ʼu̱ ga̱jma̱a̱ e̱ji̱n. Ma̱ngaa, eʼwíínʼ xa̱bu̱ bi̱ ninimbu̱ún náa Jeobá nigájnun gajmiún israelitas. Índo̱ nigájnun náa Egipto nigún gajmiún mugu̱, tsu̱jtuunʼ ga̱jma̱a̱ xede̱.

Nákha xóó tsegájnun, bi̱ israelitas ninda̱ʼa̱ xtíin ga̱jma̱a̱ tikhuu rí ki̱ʼni̱ ga̱jma̱a̱ oro ma̱ngoo plata náa xa̱bu̱ egipcios. Egipcios nimiñun wéñuʼ, ga̱jma̱a̱ numuu gimbóó rí maʼni gu̱wa̱ʼ gamiéjunʼ rí ni̱ʼkha̱ náa ikhiin. Ikha jngó nixnúún xúgíʼ rí israelitas ninda̱ʼa̱.

Tikhu mbiʼi nda̱wa̱á bi̱ israelitas niguánu náa lamáa Maña̱ʼ. Ikhí nida̱a̱ xúúnʼ. Rí niʼni Faraón gajmíi̱n xa̱bi̱i̱ nigi̱ʼdi̱i̱ nindxa̱ʼwa̱míjna̱ dí raʼkhí ni̱ni̱ rí niniñanʼ magun israelitas. ‹¡Niniʼñáʼ magun esclavo ndríguluʼ!› nithi.

Faraón niriʼkhuu rí nindxa̱ʼwáminaʼ mbu̱júu̱. Núkhu nigíʼdu̱u̱ niʼni mújúnʼ carro rí nuni̱ ga̱jma̱a̱ aguʼ gajmíi̱n soldado. Ikhú nigíʼdu̱u̱ ni̱jkha̱ kidxu̱únʼ israelitas ga̱jma̱a̱ 600 carro rí phú kiejunʼ, xúʼko̱ má xóo xúgíʼ carro dí rígá náa Egipto.

Índo̱ rí israelitas ndiyáá rí Faraón e̱ʼkha̱ gajmíi̱n soldado, nimiñun wéñuʼ. Nánguá xú munikáwimijna. Rígá iyaʼ lamáa Maña̱ʼ nijniun, ga̱jma̱a̱ egipcios naguwáʼ i̱mba̱ níʼkhá. Mú Jeobá niʼni rí mabá rujmbaaʼ náa kamba̱a̱ ndrígúun egipcios. Ikha jngó egipcios nánguá xú mbuñun bi̱ israelitas mu muxnún.

Rí xúgi̱ Jeobá niʼthúu̱n Moisés rí makruiyaʼ ixu̱u̱ náa lamáa Maña̱ʼ. Índo̱ Moisés niʼni rígi̱, Jeobá niʼni rí ma̱ʼkha̱ mbá giñánʼ náa nagájnuu a̱jkha̱ʼ rí nixnúu gakhi̱i̱ wéñuʼ. Iyaʼ ndrígóo lamáa niʼni a̱jma̱, ga̱jma̱a̱ nájma̱ níʼkhóo niguanúu má xúʼko̱.

Ikhú israelitas nigi̱ʼdi̱i̱ nigún náa tapo̱o̱ lamáa rí niʼni̱i̱la mixooʼ. Ndiyóoʼ mbaʼa wéñuʼ hora mu manujngun imbo̱o̱ ridoo xa̱bu̱ bi̱ ra̱ʼkhá tháán mbaʼin wéñuʼ ga̱jma̱a̱ xúgínʼ xujkiún. Nda̱wa̱á kayuʼ bi̱ xa̱bu̱ egipcios nindoo ndiñún mbu̱júu̱ israelitas, ikhú nijngún náa lamáa mu magun kidxu̱ún.

Índo̱ ni̱ni̱ rígi̱, Dios niʼni gachúu cárriuún. Bi̱ egipcios nimiñun wéñuʼ rí asndu nigi̱ʼdi̱i̱ nindxaʼwaská: ‹Jeobá nagi̱ʼdu̱u̱ náa ikháanʼlu ga̱jma̱a̱ numún israelitas. ¡Agajnúlu mu̱ʼgua̱!›. Mú ní raʼkháa ikhaa mbi̱ʼi̱i̱.

Ikhú Jeobá niʼthúu̱n Moisés rí makruiyaʼ ixu̱u̱ náa lamáa Maña̱ʼ, xóo má nitayáá náa kúgu̱maʼá. Índo̱ Moisés niʼni xúʼko̱, ikhú iyaʼ nigi̱ʼdu̱u̱ niwa̱a̱ rí asndu niʼni rí egipcios maguanún náa awúu̱n iyaʼ ga̱jma̱a̱ cárriuún. Xúgínʼ soldado nijngún náa lamáa. ¡Xúgínʼ xa̱bu̱ egipcios nikháñun!

¡Ra̱ʼkhá tháán nidxuu xuajin ndrígóo Dios numuu rí nikríyaʼ! Xa̱bekha ni̱ni̱ ajmúú náa Jeobá mú muxna̱a̱la núma̱a, nithi: ‹Jeobá niʼngo̱o̱ nidaʼ mba̱a̱ wéñuʼ. Nikumíínʼ náa lamáa wáyú ga̱jma̱a̱ xa̱bu̱ bi̱ nundramiunʼ›. Míriam, ndxájuu Moisés, niríyaʼ pandereta ga̱jma̱a̱ xúgínʼ gu̱ʼu̱ ni̱ni̱ xúʼko̱ kaʼnii. Ma̱ngoo nisian, ga̱jma̱a̱ ni̱ni̱ ajmúú: ‹Jeobá niʼngo̱o̱ nidaʼ mba̱a̱ wéñuʼ. Nikumíínʼ náa lamáa wáyú ga̱jma̱a̱ xa̱bu̱ bi̱ nundramiunʼ›.