Majun gamiéjunʼ itháan

Moisés ga̱jma̱a̱ Aarón nigún gúyáá faraón muthán rí niʼthí Dios: “Xí tsítatsiñaʼ rí xuajñuʼ maʼga̱, makuʼmíin ñu̱ju̱n mba̱ʼu̱u̱n náa xuajñaʼ”. Ikhú, phú mbaʼin wéñuʼ ñu̱ju̱n bugi̱ nitu̱ʼu̱u̱n náa xúgíʼ guʼwún xa̱bu̱ egipcios. Xúgíʼ xuajen nijtíin ñu̱ju̱n mba̱ʼu̱u̱n. Mú náa ku̱ba̱ʼ rí mbiʼyuu Gosén, náa kuwa bi̱ israelitas, na̱nguá nitu̱ʼu̱u̱n. Rí a̱jkhu̱ gamiéjunʼ rígi̱ ga̱jma̱a̱ rí ni̱ʼkha̱ nda̱wa̱á i̱ndó egipcios nigíʼniin, mú na̱nguá ni̱jkha̱nú náa inún israelitas. Faraón niʼtákáñuu Moisés: “Atanda̱ʼa̱a̱ Jeobá rí maʼni gámbíin ñu̱ju̱n mba̱ʼu̱u̱n bugi̱, nda̱wa̱á xuajñanʼ ma̱ndoo maʼga̱”. Índo̱ Jeobá niʼni gámbíin, faraón niriʼkhu̱u̱ ku̱ma̱ ndrígóo. Lá naku̱ma̱ʼ rí maʼga̱nú mbá mbiʼi rí faraón majmañuu ráʼ.

Nda̱wa̱á, Jeobá niʼthí: “Á mu faraón tséniñuuʼ magajnúu xuajñuʼ, xujkiún egipcios maʼniún nandii ga̱jma̱a̱ makhañún”. Imbo̱ʼ mbiʼi niʼnimbánuu rí niʼthí Jeobá, mú xujkiún israelitas nda̱a̱ rí niguáʼniin. Maski ajndu xúʼko̱, faraón táriʼkuminaʼ.

Ikhú Jeobá niʼthúu̱n Moisés dí mata̱nga̱a̱ gáʼyoo faraón ga̱jma̱a̱ maxídíí idiʼ náa giñánʼ. Idiʼ rúʼko̱ niʼni̱i̱ xóo yujndaʼ dí ni̱ʼkha̱ kagu̱u̱ giñánʼ náa xúgínʼ egipcios. Yujndaʼ rúʼko̱ niʼni dí ikhiin ga̱jma̱a̱ xujkiún muda̱ ra̱mbu̱jya̱ʼ rí na̱ʼkhu̱ wéñuʼ. Mú mbu̱júu̱ʼ faraón tániñúnʼ magún israelitas.

Jeobá nikuʼmaa mbu̱júu̱ Moisés náa faraón mu maʼthúu̱n ajngáa rígi̱: “Xóó tsíyaaʼ gátatsiʼñááʼ magajnúu xuajñuʼ ráʼ. Gajtsi ma̱ni̱ dí magajtaa eʼtsí”. Imbo̱ʼ mbiʼi Jeobá nikuʼma eʼtsí ga̱jma̱a̱ a̱jkhu̱u̱n o bi̱gu̱. Nimbá miʼtsú tárígá xúʼko̱ kaʼnii náa Egipto. Niʼni gámbóo xúgíʼ ixi̱ ga̱jma̱a̱ ku̱ba̱ʼ náa nudu, mu nda̱a̱ dí nirígá náa ku̱ba̱ʼ Gosén. Ikhú faraón niʼthí: “Atanda̱ʼa̱a̱ Jeobá rí matsi̱ji̱ xúgíʼ rígi̱ ga̱jma̱a̱ nda̱wa̱á ma̱ndoo mu̱ʼgua̱la”. Índo̱ niwi̱ji̱ eʼtsí ga̱jma̱a̱ ruʼwa, faraón nitanga̱a̱ a̱jkiu̱u̱n.

Ikha jngó Moisés niʼthí: “Xúgi̱ rá, tsíʼbu mba̱ʼu̱u̱n mu̱phu̱ xúgíʼ iná rí niguanúu niʼni ruʼwa mbiiʼ”. Mbaʼin wéñuʼ tsíʼbu niguwáʼ ni̱ʼphu̱ xúgíʼ rí niguanúu náa ixi̱ ga̱jma̱a̱ mbaaʼ. Faraón niʼtákáñuu Moisés: “Atanda̱ʼa̱a̱ Jeobá dí maʼni gámbíin xúgínʼ tsíʼbu mba̱ʼu̱u̱n bugi̱”. Mú nda̱wa̱á rí Jeobá niʼni gámbíin tsíʼbu mba̱ʼu̱u̱n, faraón mbu̱júu̱ʼ tániñuuʼ magún israelitas.

Nda̱wa̱á, Jeobá niʼthúu̱n Moisés: “Ataxúxi̱ ñawáanʼ mekhuíí”. Ikhú nacha̱ niʼni mikrina náa xúgíʼ Egipto mbá ajtsú mbiʼi. I̱ndó náa kuwa bi̱ israelitas táʼni mikrina.

Faraón niʼthúu̱n Moisés: “Ikháánʼ ga̱jma̱a̱ xuajñanʼ ma̱ndoo mu̱ʼgua̱laʼ, mú guniʼñúunʼ xujkiála”. Moisés niriʼñuu: “Gíʼmaa rí muʼguá kudíin mú muxna̱a̱ tsigijñaʼ Dios ndrígúxu̱”. Faraón nijmangu̱ʼ wéñuʼ ga̱jma̱a̱ niʼthí: “¡Agajnáʼ gi̱jyooʼ! Á mu nda̱ya̱ʼ mbu̱júu̱, maxíña̱a̱n”.