Moisés ga̱jma̱a̱ Aarón nduyáá Faraón

ÍNDO̱ Moisés nitanga̱a̱ náa Egipto, niʼthúu̱n ndxájuu Aarón ga̱jma̱a̱ numuu ajtsú milagro. Ma̱ngaa índo̱ Moisés ga̱jma̱a̱ Aarón nisngajma milagro náa israelitas, xúgínʼ ninimbu̱ún rí Jeobá xtáa gajmíi̱n.

Ikhú Moisés ga̱jma̱a̱ Aarón nigún gúyaa Faraón. Nitháán: ‹Jeobá Dios ndrígóo Israel eʼthí: “Atatsíñaʼ rí xuajñunʼ magun mu mbuyamajkhuʼ ajtsú mbiʼi, náa ku̱ba̱ʼ gíná”.› Mú Faraón niʼthí: ‹Ikhúúnʼ tsénimbo̱ʼ ka̱yo̱o̱ Jeobá. Xániʼñúʼ rí Israel maʼga̱›.

Faraón nikiʼnáa, numuu rí xuajin nindúún magun gúyamajkuíí Jeobá índo̱ rí kuwa ruñajunʼ. Ikha jngó, nitsudíín muñajunʼ itháan gakhi̱i̱. Israelitas ni̱ni̱ tsu̱di̱i̱ Moisés numuu rí nijma gíníín wéñuʼ, ikhú Moisés nixtáa gíná. Mú Jeobá niʼthúu̱n rí xáxnúu ga̱jmá. ‹Ma̱ni̱ rí Faraón maniñuʼ maʼga̱ xuajñunʼ›, niʼthí.

Moisés ga̱jma̱a̱ Aarón nigún gúyaa mbu̱júu̱ Faraón. Aʼphu̱ rí nigún rígi̱ ni̱ni̱ mbóo milagro. Aarón nitíga̱ mbayííʼ ixu̱u̱, ikhú ixi̱ rígi̱ nirtaximínáʼ a̱bu̱nʼ mba̱a̱. Mú mangiin xa̱bi̱i̱ Faraón bi̱ najmañún wéñuʼ niti̱ga̱ mbayííʼ ixún, rí nirtaximi̱jna̱ a̱bu̱nʼ. Mú ¡atayáá! a̱bu̱nʼ ndrígóo Aarón naʼkhu̱u̱n a̱bu̱nʼ ndrígu̱ún bi̱ najmañún wéñuʼ. Mú Faraón táʼndoo xóó gániñúnʼ magun israelitas.

Ikha jngó ni̱jkha̱nú mbiʼi rí Jeobá maxnúu mbá ikha Faraón. Lá natayáá xú káʼnii niʼni xáʼ. Niʼni rí ma̱ʼkha̱ mbá 10 gamiéjunʼ, o gaʼkhu mba̱a̱, náa Egipto.

Nda̱wa̱á rí ni̱ʼkha̱ mbaʼa gamiéjunʼ, Faraón nindxa̱ʼóo Moisés ga̱jma̱a̱ niʼthúu̱n: ‹Atani̱i̱ rí mawi̱ji̱i̱ gamiéjunʼ mu maniʼñúʼ maʼga̱ Israel›. Mú índo̱ nawi̱ji̱i̱ gamiéjunʼ, nariʼkhu̱u̱ rí xú endxa̱ʼwáminaʼ. Na̱nguá eniñúnʼ magun. Mú nda̱wa̱á rí ninújngoo giwáá gamiéjunʼ niʼthún rí magajnún.

Lá natatsiʼnuʼ mámbá rí 10 gamiéjunʼ ráʼ. Anújngaʼ náa imbo̱o̱ ináa i̱yi̱i̱ʼ mu mbuʼyáá xú káʼnii ni̱ndxu̱u̱ mámbá.