Ajtsú gamiéjunʼ rí nirígá ginii

Bi̱ israelitas ninindxu̱ún esclavos, ikha jngó bi̱ egipcios nitsudiín muñejunʼ gakhi̱i̱. Jeobá nikuʼmaa Moisés ga̱jma̱a̱ Aarón mu muthán faraón ajngáa rígi̱: “Atatsíñaʼ dí xuajñuʼ maʼga̱ náa ku̱ba̱ʼ mixooʼ mú mbuyamajkhuʼ”. Mú faraón niʼnimbamínáʼ wéñuʼ ga̱jma̱a̱ niriʼña: “Tsixmiéjunʼ dí naʼthí Jeobá. Xániʼñúʼ rí israelitas magún”. Nda̱wa̱á dí rúʼko̱, faraón niʼni dí muñajunʼ itháan gakhi̱i̱. Mú Jeobá rígá rí eyoo maʼsngóo. Ndiéjunʼ niʼni xá. Nikuʼma mbá gu̱wa̱ʼ gamiéjunʼ náa Egipto. Jeobá niʼthúu̱n Moisés: “Faraón tséʼnimbo̱o̱ kaʼyoʼ. Miʼcha̱ gájtsii maʼga̱ náa mañu Nilo. Mi̱dxu̱ʼ gáratha̱a̱n dí iyaʼ mañu Nilo martaxi̱i̱ eʼdi numuu dí tséniñuʼ maʼga̱ xuajñuʼ”. Moisés niʼnimbo̱o̱ ga̱jma̱a̱ ni̱jkha̱ gáʼyoo faraón. Faraón ndiʼyoo dí Aarón nixnúu mañu Nilo ga̱jma̱a̱ ixu̱u̱, ikhú iyaʼ nirtaxi̱i̱ eʼdi. Mañu nigíʼdu̱u̱ niʼni ndaska, nánguá nindoo muwa̱a̱n iyaʼ rígi̱, ma̱ngaa asndu e̱gi̱ʼ nikháñun. Mú faraón xóó tándoo maniñúnʼ magún náa ku̱ba̱ʼ mixooʼ.

Juwan mbiʼi nda̱wa̱á, Jeobá mbu̱júu̱ nikunguanʼ Moisés maʼthúu̱n faraón: “Xí tsetatsiñanʼ magajnúu xuajñunʼ, náa xúgíʼ Egipto majtíin gu̱boo”. Numuu rí faraón táʼnimbo̱o̱, Aarón nikuxi ixu̱u̱ ikhú xúgíʼ xuajin nijtíin gu̱boo. Nijtíin náa xúgíʼ guʼwún xa̱bu̱, náa xiewún, náa xúbá... ¡Asndu náa nijtíin! Faraón niʼthúu̱n Moisés: “Atanda̱ʼa̱a̱ Jeobá rí matsi̱ji̱i̱ rígi̱, xúgi̱ rí maniñúnʼ magún israelitas”. Ikha jngó Jeobá nitsiji rígi̱, ikhú xa̱bu̱ egipcios nigímbuti̱gi̱i̱n gu̱boo bi̱ nikháñun. Ku̱ba̱ʼ niʼni ndaska wéñuʼ, mú mbu̱júu̱, faraón tániñuʼ rí magajnúu xuajen.

Nda̱wa̱á, Jeobá niʼthúu̱n Moisés: “Aratháán Aarón rí maxnúu ga̱jma̱a̱ ixu̱u̱ mbayííʼ. Índo̱ gáʼni rígi̱, yujndaʼ mataxi̱ín ñu̱ju̱n”. Ga̱jma̱a̱ xúʼko̱ nirígá, nikujmiin ñu̱ju̱n asndu náa ga̱jma̱a̱ niʼphu̱u̱n xa̱bu̱. Tikhun egipcios nitháán faraón: “¡Gamiéjunʼ rígi̱ na̱ʼkha̱ náa Dios!”. Maski ajndu xúʼko̱, faraón tániñúnʼ israelitas magún.