Rí 10 gamiéjunʼ

ATAYÁÁ náa mámbá kúgu̱maʼá. Nasngájma mámbá gamiéjunʼ rí Jeobá nikuʼma náa Egipto. Náa timbá kúgu̱maʼá natayáá Aarón rí xtáa raxnúu ga̱jma̱a̱ ixu̱u̱ náa mañu Nilo. Ikhú iyaʼ mañu nirtaximínáʼ eʼdi, ga̱jma̱a̱ xúgínʼ e̱gi̱ʼ nikháñun náa mañu, rí xúgi̱ mañu nigíʼdu̱u̱ niʼni ndajtsúunʼ mixkawiʼ wéñuʼ.

Nda̱wa̱á, Jeobá niʼni rí magajnún gu̱boo náa mañu Nilo. Nitu̱ʼu̱u̱n náa awúu̱n horno, náa tséxua̱a̱ rí nuxmindú xúwaʼ, náa xiyoo, asndu náa kuwa. Índo̱ gu̱boo nikháñun, bi̱ egipcios nigimbúti̱gi̱i̱n ga̱jma̱a̱ xuajin niʼni ndajtsúunʼ mixkawiʼ wéñuʼ.

Ikhú Aarón nixpámi̱di̱ mbayííʼ ga̱jma̱a̱ ixu̱u̱ ikhú yujndaʼ nirtaximínáʼ jejenes, bugi̱ ni̱ndxu̱ún ñu̱ju̱n tsí lájkiinʼ bi̱ naʼphu̱. Rígi̱ ninindxu̱u̱ ajtsú gamiéjunʼ.

I̱ndó bi̱ Egipcios niʼniún dí raʼkhí i̱ʼwáʼ gamiéjunʼ, bi̱ Israel nda̱a̱ rí niʼniún. Rí maʼni a̱jkhu̱ gamiéjunʼ nikuwa ñu̱ju̱n mba̱ʼu̱u̱n bi̱ nitu̱ʼu̱u̱n náa xúgíʼ guʼún bi̱ Egipcios. Rí maʼni witsu gamiéjunʼ ni̱ʼkha̱ náa xujkhúʼ. Ra̱ʼkhá tháán mbaʼin wéñuʼ xede̱, mugu̱ ga̱jma̱a̱ tsu̱jtuunʼ ndrígu̱ún egipcios nikháñun.

Nda̱wa̱á Moisés ga̱jma̱a̱ Aarón nidaʼ idiʼ náa giñánʼ, ikhaa rígi̱ niʼni dí muda̱ ra̱mbu̱jya̱ʼ mbá xúgínʼ xa̱bu̱ ga̱jma̱a̱ xujkhúʼ. Rígi̱ ninindxu̱u̱ majun gamiéjunʼ.

Nda̱wa̱á dí nirígá rígi̱ Moisés nikuxi ñawúunʼ mekhuíí, ikhú Jeobá nikuʼma eʼtsí ga̱jma̱a̱ bi̱gu̱. Nimbá miʼtsú na̱nguá nixnúu kayuʼ eʼtsí xóo nixnúu náa Egipto.

Índo̱ rí niʼni migiñuʼ gamiéjunʼ nikúwi̱i̱n ra̱ʼkhá tháán mbaʼin wéñuʼ tsíʼbu. Nimbá miʼtsú na̱nguá nikuwa wéñuʼ tsíʼbu xóo nákha ikhú asndu má xúgi̱. Niguámbu̱u̱n ni̱ʼphu̱ xúgíʼ rí táʼnigámbóo eʼtsí.

Índo̱ rí niʼni mijna gu̱wa̱ʼ gamiéjunʼ nikína. Ajtsú mbiʼi nikína gakhi̱i̱ wéñuʼ xúgíʼ xuajin, mu bi̱ israelitas niguáʼdáá aguʼ náa nikúwi̱i̱n.

Nda̱wa̱á kayuʼ, Dios niʼthúu̱n xuajin ndrígóo rí muxtajma̱a̱ eʼdxuu tsu̱jtuunʼ o eʼdxuu mugu̱ náa riejun guʼún. Ikhú ángel ndrígóo Dios nikrújngoo náa Egipto. Índo̱ ángel eʼyoo eʼdi, na̱nguá exiyáa nimbáa náa guʼwá rúʼko̱. Mú índo̱ na̱nguá eʼyoo eʼdi, naxiyáa timbáa aʼdá giʼnii bi̱ nigumaa, xóo má xa̱biya̱ ga̱jma̱a̱ xujkhúʼ. Rígi̱ ninindxu̱u̱ gu̱wa̱ʼ gamiéjunʼ.

Nda̱wa̱á rí ninújngoo gamiéjunʼ rígi̱, Faraón niniñuʼ magun israelitas, dí ikhiin má kuwa xawii. Núkhu má mbruʼun rúʼko̱ nigi̱ʼdi̱i̱ nigájnun náa Egipto.