Rí mambáyaʼ mu makruaʼaʼ Biblia

Atatsaʼwáminaʼ rí nadxuʼ gátaya timbá aʼphu̱ mbá xuajen mba̱a̱. Natayáá dí xa̱bu̱, xóo kúwi̱i̱n, ganitsu ga̱jma̱a̱ mbújkha̱a̱ nindxu̱u̱ mixtiʼkhu kayuʼ. Mbáa xáta̱ya̱a̱ dí matani.

Mbáa xúʼko̱ kaʼnii gátagiʼnii índo̱ gátra̱xnuu Biblia timbá aʼphu̱. Ma̱ta̱ya̱a̱ xú káʼnii nirígá nákha wajyúúʼ rí ikháánʼ tseʼtatsinuʼ. Ma̱ta̱ya̱a̱ mbaʼa xuajen, xóo xuajñún filisteos ga̱jma̱a̱ nuxi̱ʼ xóo ikhiin kúwi̱i̱n, mbá xkri̱da, rí nuxkuʼtu xtíñún. Ma̱ngaa matraxnuu ga̱jma̱a̱ numuu mbá ganitsu rí nigumbiʼyuu maná, ga̱jma̱a̱ numuu mbá mbújkha̱a̱ rí nagumbiʼyuu dracma (Éxodo 16:31; Josué 13:2; 2 Samuel 3:31; Lucas 15:9). Mbáa xúgíʼ rígi̱ maʼni jngawa̱a̱n. Índo̱ ikháánʼ xtaa náa i̱mba̱ xuajen, ikháanʼ ma̱ʼdxa̱ʼ rí mbáa mambáyaʼ. Lá xánigua̱ʼ rí mbáa mambáyaʼ mu makruaʼaʼ Biblia ráʼ.

XÚ KÁʼNII NISNGÁA NÁKHA WAJYÚÚʼ

Asndu nákha nigi̱ʼdu̱u̱ nigumaraʼmáʼ Biblia, nákha siglo 16 tsiguʼ rí nirígá ginii, nixtambáñun mu makru̱ʼu̱u̱n rí naʼthí Biblia. Mbá xkri̱da, Moisés timbáa bi̱ ndiyá edxu̱u̱ náa xuajen Israel, ikhaa niʼni makru̱ʼu̱u̱n rí kiʼniraʼmáʼ asndu mbiʼi rúʼko̱ (Deuteronomio 1:5).

Mbá gu̱wa̱ʼ siglo nda̱wa̱á, kuwa xóó bi̱ nusngáa Escrituras. Nákha tsiguʼ 455 tsiguʼ rí nirígá ginii, mbá grupo mba̱a̱ ndrígu̱ún judíos, mbaʼin rí ikhiin ni̱ndxu̱ún e̱ji̱n, ndi̱wi̱i̱n náa xuá ndrígóo xuajen Jerusalén. Bi̱ nusngáa Biblia “niraxnuu gakhi̱i̱ má xúʼko̱ xtángoo ndrígóo Dios bi̱ gajkuwin, nitajuíi kaʼwu ndiéjunʼ eyoo gáʼthi ma̱ngaa nini dí xa̱bu̱ makru̱ʼu̱u̱n rí ikhiin kúwi̱i̱n ruraxnuu” (Nehemías 8:1-8).

Witsu ciento tsiguʼ nda̱wa̱á, ma̱ngaa mínaʼ Jesucristo niʼsngáa xúʼko̱ káʼnii. Mbaʼin xa̱bu̱ nuniʼniiʼ xóo mbáa bi̱ naʼsngáa (Juan 13:13). Ikhaa niʼsngúún mámbíin o mbaʼin xa̱bu̱. Mbá miʼtsú, niʼsngúún mbaʼin xa̱bu̱ ga̱jma̱a̱ nixnúún mbá discurso náa mbá kúbá. “Pu-nimakun xabo neʼne guisjngo” (Mateo 5:1, 2; 7:28). Nákha tsiguʼ 33, Jesús niʼtámíjná gajmíi̱n a̱jmi̱i̱n xa̱bi̱i̱ índo̱ kuwa ragún mbá xuajen dí rígá mijngii náa Jerusalén. Ikhiin nithi: “Niʼni ri mafraʼaʼlo ri naʼtan naʼ Huaʼtan”, xóó muʼthá, niʼsngúún májánʼ (Lucas 24:13-15, 27, 32).

Xa̱bi̱i̱ Jesús mangiin ninindxu̱ún bi̱ nusngáa Ajngáa rawunʼ Dios. Mbá miʼtsú, mbáa Xa̱bu̱ Ñajunʼ etíope xtáa raguxnuu rí naʼthí náa Escrituras. Discípulo Felipe nikuʼmaminaʼ náa ikhaa ga̱jma̱a̱ niraxu̱u̱: “Lá gajkhun nakruaʼaʼ rí xtaa raraxnuu ráʼ”. Etíope niriʼña: “Xú gándoo gákroʼoʼ mí nda̱wa̱a̱ tsáa mambáyuʼ rá.” Ikhú Felipe niʼthúu̱n rí naʼthí náa Escrituras (Hechos 8:27-35).

XÚ KÁʼNII ESNGÁA RÍ MBIʼI XÚGI̱

Xó má nákha wajyúúʼ nikuwa bi̱ nisngáa rí naʼthí náa Biblia, rí mbiʼi xúgi̱, bi̱ nutaraʼa numuu Jeobá nuni rígi̱ náa mbá 239 xuajen mba̱ʼu̱ ga̱jma̱a̱ territorios (Mateo 28:19, 20). Xúgíʼ xmáná numbañún itháan rí mijna gu̱wa̱ʼ millón xa̱bu̱ mu makru̱ʼu̱u̱n rí naʼthí náa Biblia. Mbaʼin rí ikhiin na̱nguá ni̱ndxu̱ún cristianos. Rí miʼsngáa tséxtuma ga̱jma̱a̱ ikháánʼ ma̱ndoo matanigajmaa náa guʼwáaʼ o i̱mba̱ níʼkhá, ma̱ngaa ma̱ndoo náa teléfono o videoconferencia.

Á mu nandaʼ miʼsngáaʼ, aratamíjná ga̱jma̱ʼ mbáa bi̱ naʼtáraʼa numuu Jeobá. Ma̱ta̱ya̱a̱ rí Biblia na̱nguá nindxu̱u̱ mingíjyúuʼ makruaʼaʼ. Ikhú ma̱ta̱ya̱a̱ rí “nayambáá mu miʼsngáa, mu maxprígulú, mu maʼni̱i̱ jmbi̱i̱ rí e̱ʼni̱, mu maxnúlúʼ ikha náa rí jmbu, mu xa̱bi̱i̱ Dios majmañuu wéñuʼ ga̱jma̱a̱ maxtáa xawii mu maʼni xúgíʼ enii rí májánʼ” (2 Timoteo 3:16, 17).