Xú káʼnii eʼyoʼ Jeobá rá.
1. Náa numuu rí nuʼthá rí Biblia nindxu̱u̱ xóo mbá niwanʼ rá.
1 Nguáthá nuthu etayaminaʼ náa niwanʼ rá. Mbaʼan rí ikháanʼ nuʼni tsejtsí mbiʼi, numuu dí rúʼko̱ nambáyulúʼ mbuʼyáá ndiéjunʼ rí tígo̱o̱ muʼni. Biblia nindxu̱u̱ xóo mbá niwanʼ. Rí muraxnulú nambáyulúʼ mbuʼyáá xú káʼnii xa̱bu̱ ni̱ndxu̱lú rí awúu̱n, rúʼko̱ rí ndaʼyoo Jeobá náa mbáa xa̱bu̱ (1 Sam. 16:7; Sant. 1:22-24). Ajngáa rawunʼ Dios “narmaʼto ri xujaʼni endxaʼjuaminaʼ jma naʼ ri iyo aʼtiun su xabu maʼni” (Heb. 4:12). Rí muraxnuu Biblia xúgíʼ mbiʼi ga̱jma̱a̱ rí mundxaʼwamíjna̱ rí eʼthí ikhí ma̱ndoo mambáyulúʼ muʼtáraʼa itháán májánʼ. Náa numuu rí nuʼthá rígi̱ rá. (Sal. 1:1-3.)
2. Xú káʼnii gándoo gambáyuluʼ Biblia mu mbuʼyáá xú káʼnii ni̱ndxu̱lú rá.
2 Ga̱jma̱ʼ Biblia xóo mbá niwanʼ. Náa Biblia na̱ʼkha̱ raʼthí ga̱jma̱a̱ numún xa̱bi̱i̱ Jeobá bi̱ nikuwa jmbu rí nambáyulúʼ mbuʼyáá xú káʼnii phú xa̱bu̱ gíʼmaa manindxu̱u̱ mbáa náa iduu ikhaa. Mbá xkri̱da, rey David nisngájma wéñuʼ gamajkhu náa mbiʼyuu Dios (1 Sam. 17:45, 46). Gaʼyee Isaías nixnáximinaʼ ga̱jma̱a̱ xúgíʼ a̱jkiu̱u̱n mu maʼga̱ gáʼtaraʼa náa mbá territorio rí mingíjyúuʼ wéñuʼ (Is. 6:8, 9). Jesús nindoo kaʼyoo wéñuʼ Anu̱u̱ bi̱ xtáa mekhuíí ikha jngó niniguʼ maʼtáraʼa, mbá rí niʼni maraxtaa gagi ga̱jma̱a̱ na̱nguá ninindxu̱u̱ xóo mbá carga rí naʼni maxkájkianʼ (Juan 4:34). Cristianos bi̱ nikuwa nákha timbá siglo nitaraʼa ga̱jma̱a̱ gagi, nikumu̱ún kuyáá Jeobá ga̱jma̱a̱ túniñaʼ runi ñajunʼ rí nikhanun (Hech. 5:41, 42; 2 Cor. 4:1; 2 Tim. 4:17). Rí mundxaʼwamíjna̱ náa xkri̱da rúʼko̱ nambáyulúʼ mbuʼyáá xú káʼnii ni̱ndxu̱lú, rí mambáyulúʼ muʼni itháan májánʼ ñajunʼ ndrígúlú.
3. Náa numuu rí ndayóoʼ muriʼkhumijná nacha̱ wéñuʼ rá.
3 Atriʼkhu̱u̱ dí raʼkhí. Xambáyulúʼ nditháan rí muyeximíjná náa niwanʼ á mu nda̱a̱ rí eʼni nditháan mu muriʼkhu̱u̱ dí raʼkhí ndiʼyáá. Ma̱ndoo munda̱ʼa̱a̱ Jeobá rí mambáyulúʼ mbuʼyáá ndiéjunʼ rí tígo̱o̱ muʼni ga̱jma̱a̱ muriʼkhumijná (Sal. 139:23, 24; Luc. 11:13). Numuu rí nánguá guanúu mba̱yu̱ʼ mbiʼi gíʼmaa rí mbuʼñíinʼ nacha̱ xa̱bu̱ bi̱ xóó ma̱ndoo makáwíin (1 Cor. 7:29; 1 Tim. 4:16).
4. Ndiéjunʼ eʼni mbáa xa̱bu̱ bi̱ nayeximínaʼ májánʼ wéñuʼ náa Ajngáa rawunʼ Dios ga̱jma̱a̱ nariʼkhu̱u̱ dí raʼkhí eʼyoo xá.
4 Rí xú káʼnii xa̱bu̱ ni̱ndxu̱lú rí awúu̱n —rí ndaʼyoo Jeobá— gíʼdoo itháan numuu ki xóo rí mbájníí náa mbáa xa̱bu̱ (1 Ped. 3:3, 4). Ndiéjunʼ eʼni mbáa xa̱bu̱ bi̱ nayeximínaʼ májánʼ wéñuʼ náa Ajngáa rawunʼ Dios ga̱jma̱a̱ nariʼkhu̱u̱ dí raʼkhí eʼyoo xá. Na̱jkha̱nú naʼnimbo̱o̱ “ri naʼtan xtaŋgo riʼcui, ga naʼnigucuminiʼ, ri maʼnimbo ri naʼtan, aʼcui gagui aʼtiun maʼni naʼ ñujunʼ maʼni” (Sant. 1:25). Manindxu̱lúʼ xa̱bi̱i̱ Jeobá bi̱ kuwa itháan gagi ga̱jma̱a̱ rí nuʼni májánʼ ñajunʼ numuu rí “ñajunʼlu xuri nihuanʼ muri naxpibianʼlu” náa inuu Jeobá (2 Cor. 3:18).