Gajmaaʼ Biblia xó má ejmaaʼ mbá niwan’

Discípulo Santiago niʼthí dí Biblia nindxu̱u̱ xóo mbá niwan’, rí nasngájmulú mbuʼyáá xóo xa̱bu̱ nindxu̱lú (Sant. 1:​22-25). Mú xú káʼnii gajmulú májánʼ niwan’ rígi̱ rá.

Tsumáá guraxnuu Ajngá rawunʼ Dios. Á mu mbá nacha̱ eʼyamijná náa niwanʼ, mbáa xúʼyáá náa na̱nguá ekujmáaʼlú májánʼ. Ikháá má kayuuʼ á mu nuraxnuu Biblia mbá nacha̱, xúʼyáá náa mbaʼyóo’ muriʼkumijnáaʼlú. Ikha jngóo gíʼmaa muraxnuu tsumáá.

Guʼyamijnalú ikháanʼ, raʼkháa eʼwíinʼ. Nguáná índo̱ nduʼyamijnalú náa niwanʼ ma̱ngaa ma̱ndoo mbuʼñún eʼwíinʼ ga̱jma̱a̱ mbuʼyáá náa na̱nguá ekujmiin májánʼ ikhiin. Ikháá má kayuuʼ índo̱ nuraxnuu Biblia mbáa mundxa̱ʼwa̱míjna̱ náa ndayóo’ muriʼkumijná eʼwíinʼ. Mú rígi̱ gáʼni dí xúʼyáá náa mbaʼyóoʼ muriʼkumijnáalú ikháanʼ.

Awan gúʼyamijnálú. Á mu índo̱ nduʼyamijná náa niwan’, i̱ndó nduʼyáá dí tsénigulú, mbáa rígi̱ maʼni dí makáwabáanʼlú. Mu xágíʼnulú rígi̱ índo̱ nuraxnuu Biblia, awan gúʼyáá ndiéjunʼ maʼngulú muʼni, numuu dí Jeobá tséndu̱ʼu̱lú má wéñuuʼ (Sal. 103:14).