Cien tsiguʼ rí nuʼtáraʼa numuu Reino
1. Ndiéjunʼ nixnúún tsiakii xa̱bu̱ bi̱ kuwa náa xuajñu Jeobá nákha 100 tsiguʼ rá.
1 “¡Gu̱ya̱a̱, Rey xtáa raʼtáñajunʼ! Ikháanʼ nindxa̱laʼ bi̱ najmaʼniáanʼ náa inún mbaʼin xa̱bu̱. Ikha jngó, gutaráʼa, gutaráʼa, gutaráʼa numuu Rey ga̱jma̱a̱ reino ndrígóo.” Itháan maʼni 100 tsiguʼ rí ndxájulú Rutherford niʼthí ajngáa rí nixnúún tsiakii xa̱bu̱ bi̱ kuwa náa xuajñu Jeobá, niʼthún rí mutaraʼa ajngáa ndrígóo Reino náa xúgíʼ xuajen dí rígá náa tsu̱du̱u̱ Ku̱ba̱ʼ. ¡Ga̱jma̱a̱ naʼngulú nuʼni! Xó má cristianos bi̱ nikuwa nákha timbá siglo, nuʼtáraʼa ajngáa rí májánʼ ndrígóo Reino “naʼ xoguiʼ inu numbaʼ” (Col. 1:23). Ndiéjunʼ niʼnilú náa 100 tsiguʼ rí ninújngoo mu muʼtáraʼa Reino ndrígóo Dios rá. Xú káʼnii gándoo guʼtáraʼa má xúʼko̱ índo̱ na̱jkha̱ maʼni cien tsiguʼ rí nigi̱ʼdu̱u̱ raʼtáñajunʼ xá.
2. Xú káʼnii eʼtáraʼa i̱yi̱i̱ʼ ndrígúlú ga̱jma̱a̱ numuu Reino ndrígóo Dios rá.
2 Guʼyáá dí nirígá. Mbaʼa i̱yi̱i̱ʼ ndrígúlú niʼni má mba̱yu̱ʼ tsiguʼ rí naʼtáraʼa ga̱jma̱a̱ numuu Reino ndrígóo Dios. Asndu nákha tsiguʼ 1939, timbá revista rí najmulú nagumbiʼyuu La Atalaya. Anunciando el Reino de Jehová. Revista rígi̱ naʼthí ga̱jma̱a̱ numuu Reino ma̱ngaa ndiéjunʼ gáʼngo̱o̱ gáʼni. ¡Despertad! ma̱ngaa naʼthí rí Reino ndrígóo Dios nindxu̱u̱ náa makuwá májánʼ xa̱bu̱. ¡Ra̱ʼkhá tháán nadxulú rí a̱jma̱ revista rígi̱ nindxu̱u̱ rí itháan nagájnuu náa mbaʼa ajngáa ga̱jma̱a̱ najuixnáraʼa náa xúgíʼ numbaaʼ! (Rev. 14:6.)
3. Arathá tikhuu rí nijmuxuʼ mu miʼtáraʼa numuu Reino.
3 Xuajñu Jeobá nijmuu mbaʼa eni mu maʼtáraʼa numuu Reino. Nákha ginii nijmuu carro rí gíʼdoo bocina, estación ndrígóo radio ga̱jma̱a̱ gramófonos rí nandoo nagún ku̱ñu̱u̱n. Rígi̱ niyembáá wéñuʼ mu miʼtáraʼa ajngáa rí májánʼ náa mbaʼin wéñuʼ xa̱bu̱ nákha nikuwa nguéjmi̱i̱n publicadores ndrígóo Reino (Sal. 19:4). Náa mbaʼa tsiguʼ rí xtáa ranújngoo natima mbaʼa i̱yi̱i̱ʼ náa jw.org, mu miʼtáruʼun ajngáa ndrígóo Reino mbaʼin wéñuʼ xa̱bu̱, asndu xa̱bu̱ bi̱ kuwa náa xuajen mba̱ʼu̱ náa tsíñún miʼtáraʼa.
4. Xú káʼnii nindxu̱u̱ programa kiejunʼ rí niguma mu miʼtáraʼa rá.
4 Xuajñu Jeobá ma̱ngaa niʼni mújúnʼ mbá programa kiejunʼ mu miʼtáraʼa ajngáa ndrígóo Reino. Mbá xkri̱da, asndu nákha tikuapa tsiguʼ 1990, nunixu mbá tsiakii mu mutaráʼaxu itháan raʼkháa i̱ndó náa mámbá guʼwá, náa parque, náa estacionamiento ga̱jma̱a̱ náa naxtango̱jo̱o̱. Ndiʼkhún nigájnuu mbá programa kiejunʼ mu miʼtáraʼa náa kuwa mbaʼin xa̱bu̱ náa xuajen mba̱ʼu̱ dí rígá náa xúgíʼ tsu̱du̱u̱ numbaaʼ. Ma̱ngaa, mbaʼa congregación nutaraʼa náa territorio ndrígu̱ún náa kuwa mbaʼin xa̱bu̱ ga̱jma̱a̱ carro chíʼgíʼ náa najthi i̱yi̱i̱ʼ ga̱jma̱a̱ mesa náa nudramaʼ i̱yi̱i̱ʼ náa nanújngun mbaʼin xa̱bu̱. Maski ajndu xúʼko̱, rí muʼtáraʼa náa mámbá guʼwá nindxu̱u̱ timbá rí naguma mu miʼtáraʼa ga̱jma̱a̱ numuu Reino (Hech. 20:20).
5. Ndiéjunʼ gándoo gúʼni índo̱ gági̱ʼdu̱u̱ i̱mba̱ nuxi̱ʼ tsiguʼ rí muʼni ñajunʼ Jeobá rá.
5 Guʼyáá dí marigá. Mbaʼin mugi̱ʼdi̱i̱ manindxu̱ún precursor auxiliar índo̱ gági̱ʼdu̱u̱ septiembre rí manindxu̱u̱ i̱mba̱ tsiguʼ rí muʼni ñajunʼ Jeobá. Lá maraxtaa náa ikhiin mangáán xáʼ. Á mu na̱nguá, lá nitatsaʼwáminaʼ má rí manindxa̱ʼ precursor auxiliar índo̱ ma̱ndoo matani ráʼ. Á mu nanindxa̱ʼ precursor o na̱nguá, Jeobá gáʼni tsajkurámááʼ asndu ndiéjunʼ má tsiakii rí gátani mu marataráʼa itháan numuu Reino (Mal. 3:10).
6. Ndíjkha rí octubre tsiguʼ 2014 maʼni mbá gu̱nʼ kiejunʼ rá.
6 Índo̱ gáʼni octubre tsiguʼ 2014 ikhú maʼni cien tsiguʼ rí nigíʼdu̱u̱ raʼtáñajunʼ Reino. Ikha jngó, La Atalaya rí nagájnuu mixnún xúgínʼ xa̱bu̱ maʼthí itháan gu̱nʼ rúʼko̱ ga̱jma̱a̱ numuu Reino ndrígóo Dios. Guʼni mbá tsiakii mu muniʼñaʼ revista rígi̱ náa inún mbaʼin xa̱bu̱. Xúgiáanʼ gúʼtaraʼa má xúʼko̱ “ajnga ri majan nuxiʼ ri naʼtañajun Dios” náa xa̱bu̱ bi̱ gaʼndún mudxuun (Hech. 8:12).