ARTÍCULO RÍ MUʼNIGAJMAA 21
Rí naʼthí náa Apocalipsis dí marigá nda̱wa̱á
“¡Xúʼko̱ gáʼni! Aye̱, Tátá Jesús” (APOC. 22:20).
AJMÚÚ 142 Guguaʼthi̱i̱n rí wíji̱ makánulu
RÍ MUʼNIGAJMAAa
1. Xú káʼnii rí gíʼdoo wéñuʼ numuu rí gáʼyóoʼ muraʼwi̱i̱ muni̱ mbá xúgíinʼ xa̱bu̱ rá.
XÚGÍINʼ xa̱bu̱ bi̱ kúwá rí mbiʼi xúgi̱ rígá mbá rí gíʼdoo wéñuʼ numuu rí ndayóoʼ muraʼwíí muni̱. Á mu mumbayíí Jeobá xóo Xa̱bu̱ Ñajunʼ bi̱ kaʼyoo maʼtáñajunʼ bi̱ xtaa mekhuíí, o á mu dí mumbayíí Gixa̱a̱, bi̱ tsíyóo gáʼyoo Dios. Mbaʼyóoʼ tsiakii rí muraʼwi̱i̱ mbá rí muni̱. Makhánún rí makuwá kámuu mbiʼi o na̱nguá, xó má dí gúraʼwi̱i̱ ikhiin (Mat. 25:31-33, 46). Índo̱ gárígá “majphú mba̱a̱ ga̱ʼkhu̱” xúgiáánʼlú bi̱ nindxu̱lú xa̱bi̱i̱ Jeobá mundrígúlú tsinaʼ rí maguma káwáanʼ (Apoc. 7:14; 14:9-11; Ezeq. 9:4, 6). Mú bi̱ gáguáʼdáá tsinaʼ ndrígóo xujkhúʼ xkawiiʼ maguma gámbíin (Apoc. 14:9-11).
2. a) Ndiéjunʼ rí naʼthúlú mu̱ʼni̱ Hebreo 10:35-39 rá. b) Xú káʼnii embáyulú libro ndrígóo Apocalipsis rá.
2 (Atraxnuu Hebreos 10:35-39).b Á mu dí ikháán nitraʼwíí má dí matambáyíí Xa̱bu̱ Ñajunʼ ndrígóo Jeobá, májánʼ dí xúʼko̱ nitani̱. Mbáa dí xúgi̱ mangáán nandaaʼ matambáñún eʼwíinʼ mu muni̱ xó má nitani̱ ikháán. Dí naʼthí náa libro ndrígóo Apocalipsis ma̱ndoo mambáyáaʼ wéñuʼ. Náa libro rígi̱ na̱ʼkha̱ raʼthí ndiéjunʼ gúguáʼníí bi̱ tsíñún gúyáá Jeobá. Mú ma̱ngaa na̱ʼkha̱ raʼthí xú káʼnii gáguma tsajkurámiinʼ bi̱ gúguajún jmbu náa Xa̱bu̱ Ñajunʼ ndrígóo Dios. Májánʼ eʼnilú rí nuʼnigajma̱a̱ rí gíʼdoo wéñuʼ numuu rígi̱, numuu dí rígi̱ ma̱ndoo mambáyúlú maxnúlú tsiakii mu mu̱ʼni̱ má xúʼko̱ ñajunʼ Jeobá. Mú raʼkháa i̱ndó rúʼko̱. Ma̱ngaa ma̱ndoo majmulú rí nijmañulú mu muxnún ga̱jma̱a̱ tsiakii eʼwíinʼ mu xúʼko̱ ikhiin muraʼwi̱i̱ mbá rí májánʼ muni̱ mu xúʼko̱ xágúu̱n skidi̱ʼ.
3. Xú káʼnii graxe̱ gúriʼña̱a̱ náa artículo rígi̱ rá.
3 Náa artículo rígi̱ muriʼña̱a̱lú graxe̱ rígi̱: Ndiéjunʼ guáʼthi̱i̱n bi̱ numbayíí Xa̱bu̱ Ñajunʼ ndrígóo Dios rá. Ga̱jma̱a̱ ndiéjunʼ gúguáʼníí bi̱ gúraʼwi̱i̱ mumbayíí xujkhú xkawi̱i̱ʼ bi̱ maña̱ʼ xngeʼdii bi̱ na̱ʼkha̱ raʼthí náa libro ndrígóo Apocalipsis rá.
RÍ GUÁʼTHI̱I̱N BI̱ GÁGUAJÚN JMBU
4. Xú káʼnii graxe̱ gúriʼña̱a̱ náa artículo rígi̱ rá.
4 Náa mbá visión rí ndiʼyoo apóstol Juan ndaʼñún a̱jma̱ grupo xa̱bu̱ bi̱ numbayíí Xa̱bu̱ Ñajunʼ ndrígóo Jeobá ma̱ngaa rí nundrigú rí makuwíi̱n kámuu mbiʼi ga̱jma̱a̱ ra̱ʼkhá tháán mba̱a̱ dí eguma tsajkurámiinʼ. Náa timbá grupo kúwá mbá 144,000 xa̱bu̱ (Apoc. 7:4). Ikhiin nindxu̱ún bi̱ kúwíin náa tsu̱du̱u̱ Ku̱ba̱ʼ nagúu̱n mekhuíí mu manindxu̱ún Xa̱bu̱ Ñajunʼ gajmiún Jesús. Xúgíinʼ ikhiin nutañajunʼ náa tsu̱du̱u̱ Ku̱ba̱ʼ (Apoc. 5:9, 10; 14:3, 4). Juan ndiʼyoo rí guájun gajmiún Jesús náa inuu kúbá Sion dí rígá mekhuíí (Apoc. 14:1).
5. Ndiéjunʼ rí gítháán maguáʼníí cristianos bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ rá.
5 Asndu nákha nikúwá apóstoles asndu mbiʼi xúgi̱, nixtaʼwíin mbaʼin xa̱bu̱ bi̱ makuwá náa bi̱ 144,000 (Luc. 12:32; Rom. 8:17). Mú Juan najuiʼtháán rí índo̱ gáʼni iwáá mbiʼi, káaʼ nguéjmi̱i̱n bi̱ kúwá náa grupo rúʼko̱ makuwá xóó nduya náa tsu̱du̱u̱ Ku̱ba̱ʼ. Índo̱ inuu magi̱ʼdu̱u̱ rí majphú mba̱a̱ ga̱ʼkhu̱, cristianos bigi̱ bi̱ kaxtaʼwíin “bi̱ naguanún xóó náa tsu̱du̱u̱ Ku̱ba̱ʼ” mundrigúu iwáá “sello”, xóo muʼthá, rí magruiguíin Jeobá (Apoc. 7:2, 3; 12:17). Awúu̱n má dí gárígá majphú mba̱a̱ ga̱ʼkhu̱, bi̱ kaxtaʼwíin bi̱ naguanún xóó náa tsu̱du̱u̱ Ku̱ba̱ʼ maʼga̱a̱ kiʼdiin mekhuíí mu mbuwi̱ín gajmiún a̱ngiu̱ún bi̱ 144,000 bi̱ niguájun jmbu asndu índo̱ nikháñún, bi̱ kúwá má ikhí. Mutañajunʼ gajmiún Jesús náa Xa̱bu̱ Ñajunʼ ndrígóo Dios (Mat. 24:31; Apoc. 5:9, 10).
6, 7. a) Náá guáʼyaa i̱mba̱ grupo ndiʼyoo apóstol Juan ga̱jma̱a̱ ndiéjunʼ eʼyáá ga̱jma̱a̱ numún ikhiin xá. b) Ndíjkha rí gíʼmaa bi̱ kaxtaʼwíin gajmiún bi̱ “mbaʼin xa̱bu̱” maxmiéjúúnʼ mbuyáá dí na̱ʼkha̱ raʼthí náa capítulo 7 ndrígóo Apocalipsis rá.
6 Índo̱ apóstol Juan niguámbóo ndiʼyoo grupo dí rígá mekhuíí, ikhú ndiʼñún “mbaʼin xa̱bu̱”. Mixtiʼkuiin ikhiin ki xóo bi̱ 144,000, grupo bi̱ maʼni raga̱jmi̱i̱n bigi̱ rakáʼnii maʼnga̱a̱ʼ matraxnii (Apoc. 7:9, 10). Ndiéjunʼ eʼyáá ga̱jma̱a̱ numún ikhiin xá. Juan nijuiʼtháán: “Ikhiin ni̱ndxu̱ún bi̱ nagájnaán náa majphú mba̱a̱ ga̱ʼkhu̱ ma̱ngaa nijña̱a̱ xtíñún rí mbi̱jua̱, rí asndu niʼni̱i̱ miʼxá ga̱jma̱a̱ eʼdiuu A̱ʼdá múgú” (Apoc. 7:14). Índo̱ gákáwíín náa majphú mba̱a̱ ga̱ʼkhu̱ “xa̱bu̱ bi̱ mbaʼin” bigi̱ makuwá náa tsu̱du̱u̱ Ku̱ba̱ʼ ga̱jma̱a̱ ra̱ʼkhá tháán mba̱a̱ dí gáguma tsajkurámiinʼ (Sal. 37:9-11, 27-29; Prov. 2:21, 22; Apoc. 7:16, 17).
7 Tséʼñuu má á mu nixtaʼwáánʼlú mu mu̱ʼgua̱áʼ mekhuíí o makuwáánʼlú náa tsu̱du̱u̱ Ku̱ba̱ʼ gi̱jyooʼ, xúgiáánʼlú gíʼmánʼ rí mbuʼyamijnálú náa “xtiʼkhuu” rí na̱ʼkha̱ raʼthí náa capítulo 7 ndrígóo Apocalipsis, lá ragájkhun ráʼ. ¡Ra̱ʼkhá tháán tsímáá gákuwíi̱n bi̱ a̱jma̱ grupo xa̱bi̱i̱ Dios bigi̱! Ra̱ʼkhá tháán gáʼdxulú índo̱ gúʼyáá rí táʼni ndíí rí niraʼwíí mumbáyíí Xa̱bu̱ Ñajunʼ ndrígóo Jeobá. Ndiéjunʼ itháan xóó eʼthúlú libro ndrígóo Apocalipsis ga̱jma̱a̱ numuu majphú mba̱a̱ ga̱ʼkhu̱ rá. (Mat. 24:21).
RÍ GUÁʼTHI̱I̱N BI̱ TSÍÑÚN GÚYÁÁ DIOS
8. Xú káʼnii gági̱ʼdu̱u̱ majphú mba̱a̱ ga̱ʼkhu̱, ga̱jma̱a̱ xú káʼnii gúni̱ mbaʼin xa̱bu̱ rá.
8 Xó má ndiʼyáálú náa artículo rí nijngoo, gítháán má rí xa̱bu̱ ñajunʼ bi̱ kúwíin náa tsu̱du̱u̱ Ku̱ba̱ʼ munigámbáa Babilonia rí Mba̱a̱, rí nindxu̱u̱ mbá xúgíʼ religión rí minduwaʼ dí rígá náa tsu̱du̱u̱ Ku̱ba̱ʼ (Apoc. 17:16, 17). Ikhaa rúʼko̱ gági̱ʼdu̱u̱ ga̱jma̱a̱ rí majphú mba̱a̱ ga̱ʼkhu̱. Lá maʼni dí rígi̱ mbaʼin xa̱bu̱ mugimbumijná mu mbuyamajkuíí Jeobá ráʼ. Na̱nguá, xárígá rúʼko̱. Xó má naʼthí náa capítulo 6 ndrígóo Apocalipsis, mbiʼi rúʼko̱, bi̱ tséni̱ ñajuunʼ Jeobá mbuyaʼ rí mixtambáñún náa xa̱bu̱ ñajunʼ ga̱jma̱a̱ náa dí naxtangujua̱ dí rígá náa tsu̱du̱u̱ numbaaʼ rígi̱, náa capítulo rígi̱ naʼnimbríguíin xóo kúbá. Numuu rí xúmbayíí Xa̱bu̱ Ñajunʼ ndrígóo Dios, Ikha jngóo Jeobá mbaʼyoo rí nindxu̱ún bi̱ sia̱nʼ gajmíi̱n (Luc. 11:23; Apoc. 6:15-17).
9. a) Ndíjkha rí xóo gúni̱ xa̱bi̱i̱ Jeobá xúgíinʼ xa̱bu̱ gúyáá índo̱ gárigá majphú mba̱a̱ ga̱ʼkhu̱ rá. b) Ndiéjunʼ gáʼni marigá rígi̱ rá.
9 Xúgíinʼ xa̱bu̱ gúyáá xóo gúni̱ xa̱bi̱i̱ Jeobá bi̱ gáguajún jmbu índo̱ gárígá majphú mba̱a̱ ga̱ʼkhu̱. I̱ndó ikhiin bi̱ gákuwá náa tsu̱du̱u̱ Ku̱ba̱ʼ mbuyamajkuíí má xúʼko̱ Jeobá ga̱jma̱a̱ xáʼndún gúmbayíí “xujkhú xkawi̱i̱ʼ” (Apoc. 13:14-17). Índo̱ bi̱ tsíñún gúyáá Jeobá gúyáá rí guájun jmbu, makásngañu̱únʼ. Rígi̱ gáʼni rí mbá nguéjmi̱i̱n xa̱bu̱ ñajunʼ muni̱ gínáa xuajñuu Dios náa mbájndi numbaaʼ. Náa Biblia naʼthí dí gárígá rígi̱ nindxu̱u̱ rí maʼni Gog ndrígóo Magog (Ezeq. 38:14-16).
10. Xó má eʼthí náa Apocalipsis 19:19-21, ndiéjunʼ gáʼni Jeobá índo̱ gáʼyoo rí naguma gínáa xuajñuu rá.
10 Ndiéjunʼ gáʼni Jeobá índo̱ gáʼyoo rí naguma gínáa xuajñuu rá. Ikhaa má minaaʼ naʼthúlú: “Makásngañuʼ” (Ezeq. 38:18, 21-23). Náa capítulo 19 ndrígóo Apocalipsis na̱ʼkha̱ raʼthí ndiéjunʼ gárígá. Ikhú Jeobá makuʼmaa A̱ʼdióo Jesús mu mambáyúu xuajñuu ga̱jma̱a̱ mu maʼni gámbíin mbá xúgíinʼ bi̱ tsíñún gúyáá. Jesús xáʼkha̱ mbáwíí; ma̱ʼkha̱ gajmíi̱n “soldados bi̱ kúwá mekhuíí”, xóo muʼthá, ángeles bi̱ guájun jmbu gajmiún bi̱ mbá 144,000 (Apoc. 17:14; 19:11-15). Majxoo guerra rígi̱ índo̱ gámbá raguma gámbíin mbá xúgíinʼ xa̱bu̱ ga̱jma̱a̱ xa̱bu̱ ñajunʼ bi̱ tsíñún gúyáá Jeobá (atraxnuu Apocalipsis 19:19-21).c
ÍNDO̱ GÁJNGOO GUERRA, IKHÚ MARIGÁ NDXA̱A̱ GATSIGÚNʼ
11. Ndiéjunʼ rí itháán mitsaanʼ dí marigá dí na̱ʼkha̱ raʼthí náa libro ndrígóo Apocalipsis rá.
11 Xú káʼnii gákumu̱ún xa̱bi̱i̱ Dios bi̱ guájun jmbu bi̱ kúwíin náa tsu̱du̱u̱ Ku̱ba̱ʼ índo̱ gúyáá rí nikáwíin índo̱ gámbá raguma gámbíin bi̱ tsíñún gúyáá Dios rá. ¡Ra̱ʼkhá tháán gáʼdxún! Maski ajndu índo̱ gámbá raguma gámbáa Babilonia rí Mba̱a̱ mawán aʼwá rí gagi náa mekhuíí mú marigá i̱mba̱ rí maʼni marigá itháán gagi (Apoc. 19:1-3). Dí manigúnʼ “A̱ʼdá múgú” nindxu̱u̱ mbá rí itháan mitsaanʼ dí na̱ʼkha̱ raʼthí náa libro ndrígóo Apocalipsis (Apoc. 19:6-9).
12. Nguáná gánigúnʼ A̱ʼdá múgú rá. (Apocalipsis 21:1, 2.)
12 Nguáná gárígá ndxa̱a̱ gatsigúnʼ rá. Maski ajndu mbá xúgíinʼ bi̱ 144,000 makuwá má náa mekhuíí índo̱ inuu magi̱ʼdu̱u̱ Armagedón, mú raʼkháa ikhú gánigúnʼ A̱ʼdá múgú (atraxnuu Apocalipsis 21:1, 2).d Manigúnʼ A̱ʼdá múgú índo̱ gájngoo guerra dí mbiʼyuu Armagedón, índo̱ gámbá raguma gámbíi̱n mbá xúgíinʼ bi̱ tsíñún gúyáá Dios (Sal. 45:3, 4, 13-17).
13. Ndiéjunʼ eyoo gáʼthúu̱n rí manigúnʼ A̱ʼdá múgú náa bi̱ nuyambáá ikhí rá.
13 Ndiéjunʼ eyoo gáʼthúu̱n rí manigúnʼ A̱ʼdá múgú náa bi̱ nuyambáá ikhí rá. Náa mbá ndxa̱a̱ gatsigúnʼ mbáa xa̱biya̱ ndayáa a̱ʼgu̱. Xúʼko̱ ma náa ndxa̱a̱ gatsigúnʼ rígi̱ ma̱ngaa manigúnʼ Rey, Jesucristo, ga̱jma̱a̱ bi̱ “mbayáa” nindxúu̱n bi̱ 144,000. Índo̱ gárígá ndxa̱a̱ gatsigúnʼ rígi̱, ikhú Jesús gajmíi̱n bi̱ mbá 144,000 muguáʼdi̱i̱ mutañájunʼ náa tsu̱du̱u̱ Ku̱ba̱ʼ mbá míí tsiguʼ (Apoc. 20:6).
MBÁ XUAJIN MITSAANʼ RÍ WÍJI̱ MARIGÁ NDA̱WA̱Á
Náa capítulo 21 ndrígóo Apocalipsis naʼthí rí Jerusalén dí Nuxi̱ʼ nagajtaa náa “mekhuíí náa xtáá Dios”. Índo̱ gáʼtañajunʼ Xa̱bu̱ Ñajunʼ ndrígio̱o̱ Dios mbá míí tsiguʼ, xuajin rúʼko̱ maʼni tsajkurámiinʼ xa̱bu̱ numbaaʼ bi̱ ninimbu̱ún (Atayáá kutriga̱ 14 asndu 16).
14, 15. Ndiéjuunʼ eʼni mbríguíin gajmiún bi̱ 144,000 náa Apocalipsis 21 rá. (Atayáá xtiʼkhuu rí nakujmaa náa nagi̱ʼdu̱u̱.)
14 Dí xúgi̱ guʼyáá dí naʼthí náa capítulo 21 ndrígóo Apocalipsis ikhí naʼnimbríguíin bi̱ mbá 144,000 gajmiún mbá xuajen rí mbiʼyuu “Jerusalén dí nuxi̱ʼ,” (Apoc. 21:2, 9). Náa rajkhúu xtajtsí ndrígóo xuajen rígi̱ “tuáʼán mbá 12 itsí ga̱jma̱a̱ ikhí nigumaraʼmáʼ mbá 12 mbiʼñún bi̱ mbá 12 apóstoles ndrígóo A̱ʼdá múgú”. Mbáa índo̱ Juan ndiʼyoo rígi̱, ra̱ʼkhá tháán ninigu̱u̱ʼ. Náá numuu rá. Numuu rí náa itsí rígi̱ ndiʼyoo rí kiʼnirámáʼ mbiʼyuu. ¡Ra̱ʼkhá tháán mitsaanʼ rí nikhánáá mbaʼyoo! (Apoc. 21:10-14; Efes. 2:20).
15 Xuajen mitsaanʼ rígi̱ nimbá tsémbríguíi ga̱jma̱a̱. Kamba̱a̱ a̱pha̱ ndrígóo niguma ga̱jma̱a̱ mbawíí oro, 12 xkrugoo rí gíʼdoo nindxu̱u̱ mbá 12 perlas, xtátsí ndrígóo ma̱ngaa itsí rí nituáʼán náa rajkhúu nindxu̱u̱ itsí mitsaanʼ, awan rí xóo mbaʼ rí xóo ma̱jña̱ʼ ga̱jma̱a̱ rí xóo mitsídánʼ xuajen rígi̱, ikháá nindxu̱u̱ (Apoc. 21:15-21). Mú Juan ndaʼyoo dí rígá mbá rí ndayóoʼ. Ndiéjuunʼ nindxu̱u̱ rá. Ikhaa naʼthí: “Na̱nguá ndi̱yo̱o̱ nimbá goʼwóo Dios ikhí, numuu rí Jeobá Dios bi̱ gíʼdoo xúgíʼ tsiakii nindxu̱u̱ guʼwá, xó má A̱ʼdá múgú. Na̱nguá má eyóoʼ rí agiuuʼ a̱jkha̱ʼ ni má agiuuʼ gu̱nʼ mambiʼi náa xuajen, numuu rí agiuuʼ Dios nambiʼi ga̱jma̱a̱ lámpara ndrígóo nindxu̱u̱ A̱ʼdá múgú.” (Apoc. 21:22, 23). Bi̱ kúwá náa Jerusalén dí nuxi̱ʼ mbuyamijná mbájmbu gajmiún Jeobá (Heb. 7:27; Apoc. 22:3, 4). Ikha jngóo najuiʼthá rí Jeobá ga̱jma̱a̱ Jesús nindxu̱ún goʼwóo Dios náa xuajen rúʼko̱.
Tsíín gaguma tsajkurámíinʼ índo̱ naʼthí ga̱jma̱a̱ numuu mbá “mañu” ga̱jma̱a̱ “ixi̱” rá. (Atayáá kutriga̱ 16 ga̱jma̱a̱ 17).
16. Xú káʼnii gáguma tsajkurámíinʼ xa̱bu̱ índo̱ gáxtáa raʼtáñajunʼ mbá míí tsiguʼ Xa̱bu̱ Ñajunʼ ndrígóo Dios rá.
16 Cristianos bi̱ kaxtaʼwíin ra̱ʼkhá tháán edxu̱ún índo̱ nundxa̱ʼwa̱míjna̱ ga̱jma̱a̱ numuu xuajen rígi̱. Xúʼko̱ má gíʼmaa maʼdxúún cristianos bi̱ makuwá náa tsu̱du̱u̱ Ku̱ba̱ʼ ma̱ngaa. Índo̱ gáxtáa raʼtáñajunʼ Xa̱bu̱ Ñajunʼ ndrígóo Dios mbáa míí tsiguʼ ikhú Jerusalén dí nuxi̱ʼ maʼni tsajkurámíinʼ bi̱ gákuwá náa tsu̱du̱u̱ Ku̱ba̱ʼ. Juan ndaʼyoo rí maguma tsajkurámíinʼ na̱jkha̱ xóo “iyaʼ rí ndaʼya” ga̱jma̱a̱ mbá nájma̱ rawuunʼ rígá “ixi̱ rí ndaʼya” rí inuu najmaa “mu maʼni̱i̱ a̱jkiu̱ún xa̱bu̱ bi̱ kúwá náa xúgíʼ xuajen” (Apoc. 22:1, 2). Xúgíinʼ xa̱bu̱ numbaaʼ bi̱ makuwá ikhú maguaʼdáá xúgíʼ rígi̱. Bi̱ gúnimbu̱ún mañu mañúú gáʼga ranindxu̱ún xa̱bu̱ jmbii. Ikhú ni xárígá nandii ni má ga̱ʼkhu̱ ni má xtabiya̱ʼ ni má gajmá (Apoc. 21:3-5).
17. Tsíin ñajúúnʼ gáʼni tsajkurámíinʼ Xa̱bu̱ Ñajunʼ ndrígóo Dios índo̱ gáʼtañajunʼ mbá míí tsiguʼ rá. (Apocalipsis 20:11-13.)
17 Tsíin gákánúún xúgíʼ rí mitsaanʼ rígi̱ rá. Ikhiin nindxu̱ún xa̱bu̱ mbaʼin bi̱ makáwíin náa Armagedón ga̱jma̱a̱ e̱ji̱nʼ bi̱ magumiin náa numbaaʼ nuxi̱ʼ. Mú raʼkháa i̱ndó ikhiin. Náa capítulo 20 ndrígóo Apocalipsis naʼthí rí bi̱ nikháñún magabi̱ín (atraxnuu Apocalipsis 20:11-13).e Tsí ñajúúnʼ gágabi̱ín náa tsu̱du̱u̱ Ku̱ba̱ʼ rá. Magabi̱ín xa̱bu̱ bi̱ nini rí “májánʼ”, xóo muʼthá xa̱bi̱i̱ Jeobá bi̱ niguájun jmbu nákhá wajyúuʼ, ga̱jma̱a̱ bi̱ túni̱ rí “májánʼ”, xóo muʼthá, bi̱ túniʼniiʼ Jeobá índo̱ nikháñún (Hech. 24:15; Juan 5:28, 29). Lá rígi̱ eyoo gáʼthí rí xúgíinʼ xa̱bu̱ bi̱ nikháñún magabi̱ín índo̱ Xa̱bu̱ Ñajunʼ ndrígóo Dios gáxtáa raʼtáñajunʼ mbá míí tsiguʼ ráʼ. Na̱nguá, bi̱ táʼndún gúni̱ ñajuunʼ Jeobá nákhá nikúwá nduya xágabi̱ín, numuu rí nákhá nikúwá nisngajmá dí rakáʼñúún makuwíin náa Ku̱ba̱ʼ mitsaanʼ (Mat. 25:46; 2 Tes. 1:9; Apoc. 17:8; 20:15).
IWÁÁ KAYUUʼ
18. Xú kaʼnii gákúwá xa̱bu̱ índo̱ gájngoo mbá míí tsiguʼ rá.
18 Rí iwáá kayuuʼ índo̱ gájngoo mbá míí tsiguʼ, xúgíinʼ bi̱ gákúwá náa tsu̱du̱u̱ Ku̱ba̱ʼ mani̱ndxu̱ún xa̱bu̱ jmbii. Nimbáa xáminuuʼ ga̱jma̱a̱ numuu aʼkhá rí nikudaminaʼ Adán (Rom. 5:12). Xárígá nimbá dí niʼni marigá dí nikiéʼkúun Adán. Ma̱ndoo muʼthá rí índo̱ gájngoo rí mbá míí tsiguʼ, xa̱bu̱ bi̱ makuwá náa tsu̱du̱u̱ Ku̱ba̱ʼ maguánú makuwá xóo phú gíʼmaa, numuu rí maguánú mani̱ndxu̱ún xa̱bu̱ jmbiin (Apoc. 20:5).
19. Náá numuu rí ndayóoʼ marigá iwáá tsáʼkhá rá.
19 Nduyáá rí Jesús niwi̱ji̱ jmbu náa Dios maski má Gixa̱a̱ nigruiga̱ mbaʼa tsáʼkhá náa inuu. Mú, lá xúʼko̱ má gúni̱ xa̱bu̱ jmbiin índo̱ Gixa̱a̱ gátanga̱a̱ mu magruiga̱ tsáʼkhá inún xáʼ. Mámbáa rí ikhaa mbaʼyóoʼ maʼni graxe̱ rígi̱ índo̱ gárámúunʼ mbáa míí tsiguʼ ga̱jma̱a̱ índo̱ Gixa̱a̱ gagájnaa náa iñá mbiʼ (Apoc. 20:7). Bi̱ gáʼngu̱u̱n gúraʼníí rí iwáá tsáʼkhá, ikhiin makánún rí makuwá kámuu mbiʼi ga̱jma̱a̱ rí maguma káwíin mbájkhu (Rom. 8:21). Mú bi̱ gúxuxijmíjna̱ mambíin mbá kayuuʼ xó má gágíʼnuu Gixa̱a̱ gajmíi̱n xa̱bu̱ wéñíinʼ ndrígióo (Apoc. 20:8-10).
20. Xú kaʼnii ku̱ma̱a̱ʼ ikháán xúgi̱ rí niguámbúlú ndiʼyáá kiʼtáriyaʼ dí na̱ʼkha̱ náa Apocalipsis rá.
20 Xú káʼnii ku̱ma̱a̱ ikháán xúgi̱ rí niguámbulú ndiʼyáá mbá chiʼgíiʼ rí na̱ʼkha̱ raʼthí náa libro ndrígóo Apocalipsis rá. Lá natayaminaʼ naa “xtiʼkhuu” rí nimbánuu má kiʼtáriyaʼ rí mitsaanʼ wéñuʼ ráʼ. Lá nandaaʼ rí marathu̱u̱n eʼwíinʼ mu mangiin mbuyamajkuíí Dios ndrígúlú xó má gíʼmaa ráʼ. (Apoc. 22:17). Xúgi̱ rí niguámbúlú ndiʼyáá xúgíʼ rí mitsaanʼ wíji̱ marigá, mbáa nadxulú ga̱jma̱a̱ nandulú muʼthá xóo má niʼthí apóstol Juan: “¡Xúʼko̱ gáʼni! Aye̱, Tátá Jesús” (Apoc. 22:20).
AJMÚÚ 27 Makujmaa tsíin phú ni̱ndxu̱ún e̱ji̱i̱n Dios
a Náa iwáá artículo ndrígóo serie rígi̱ rí naʼthí ga̱jma̱a̱ numuu libro ndrígóo Apocalipsis, mbuʼyáá xú káʼnii bi̱ naguájun jmbu náa Jeobá raʼkhá tháán mitsaanʼ xóo gákuwíi̱n nda̱wa̱á, mú ngíná xóo gáguáʼníí bi̱ tsíñún gúyáá Xa̱bu̱ Ñajunʼ ndrígóo Dios.
b Hebreos 10:35-39: “Ikha jngóo xámiñala, numuu dí rígá rí májánʼ mundrígúula. Ikháanʼ ndayóoʼ rí maʼngala, numuu rí nda̱wa̱á rí ni̱nila dí nandoo Dios, mundrígúu rí ikhaa nikudaminaʼ maxnála. Numuu rí, “nánguá má mba̱yu̱u̱ʼ tígo̱o̱”, “xájyúuʼ má gáʼkanú bi̱ na̱ʼkha̱”. “Mú xa̱bi̱ʼ bi̱ jmbii maxtáa ga̱jma̱a̱ numuu fe ndrígóo”, ga̱jma̱a̱, “á mu najkha̱a̱ skidiʼ, ni xánigu̱ʼ gáʼni”. Mú ikháanʼ na̱nguá ni̱ndxu̱lú bi̱ nagúun skidiʼ ga̱jma̱a̱ naguma gámbíin, ni̱ndxu̱lú bi̱ nakúwi̱i̱n má xúʼko̱ ga̱jma̱a̱ numuu fe rí guáʼdáá”.
c Apocalipsis 19:19-21: “Ma̱ngaa ndi̱yo̱o̱ xujkhú xkawi̱i̱ʼ, reyes bi̱ kúwá náa tsu̱du̱u̱ ku̱ba̱ʼ gajmiún soldado ndrígu̱ún, xúgíinʼ nigimbíin mu muxmijná gajmiún bi̱ gríguii wáyú gajmíi̱n soldado ndrígóo. Ikhú xujkhú xkawi̱i̱ʼ nixtugua̱a̱, ga̱jma̱a̱ profeta bi̱ minduwaaʼ bi̱ niʼni milagro náa inuu ikhaa dí nijmuu mu maʼni nduwiinʼ bi̱ nindrigú tsinaʼ ndrígóo xujkhú xkawi̱i̱ʼ ga̱jma̱a̱ bi̱ ndiyamajkuíí xtiʼkhuu ikhaa. Índo̱ kaʼníí xóó kúwá ruya ikhú mbá nájmi̱i̱n nijthiin náa mañu rí nakha ga̱jma̱a̱ azufre. Bi̱ xóó niguanún nikháñún ga̱jma̱a̱ espada dí mbaʼ dí nagájnuu náa rawuunʼ bi̱ gríguii wáyú. Ga̱jma̱a̱ xúgíinʼ xujkhú xnaʼ ni̱ʼphu̱ xuñúnʼ asndu nigiʼmún”.
d Apocalipsis 21:1, 2: “Ikhú ndi̱yo̱o̱ mbá mekhu nuxi̱ʼ ga̱jma̱a̱ mbá ku̱ba̱ʼ nuxi̱ʼ, numuu rí mekhu dí nirígá nákha ginii ga̱jma̱a̱ ku̱ba̱ʼ dí nirígá nákha ginii nindáti̱ga̱a̱ ga̱jma̱a̱ lamáa nánguá rígá. Ma̱ngaa ndi̱yo̱o̱ xuajen kaʼwu, Jerusalén dí nuxi̱ʼ, nagajtaa mekhuíí asndu náa xtáa Dios. Kijmarataa xóo mbáa a̱ʼgu̱ bi̱ nacho̱o̱ manújúnʼ mu mbayáa xa̱bu̱”.
e Apocalipsis 20:11-13: “Ndi̱yo̱o̱ mbá xílí mba̱a̱ rí miʼxá ga̱jma̱a̱ bi̱ gíʼ ikhí. Ku̱ba̱ʼ ga̱jma̱a̱ mekhu nigáñún náa inuu ga̱jma̱a̱ nánguá nitangi̱i̱n nikujmiin. Ndi̱ñu̱u̱n bi̱ nikháñún, bi̱ wanii ga̱jma̱a̱ bi̱ majkhiinʼ wájun náa inuu xílí, nimbaʼtoo mbaʼa rollo. Mú nimbaʼtoo i̱mba̱ libro: Libro rí ndaʼya. Xó má naʼthí náa rollos, nixtandi̱ʼi̱i̱n cuenta bi̱ nikháñún ga̱jma̱a̱ xó má rí nini̱. Lamáa nixnájxi̱ín bi̱ nikháñún ikhí, rí nakháñulú ga̱jma̱a̱ Iñá wajinʼ nixnajxi̱ín bi̱ nikháñún ikhí. Mámbáa nixtanda̱ʼa̱a̱ cuenta ga̱jma̱a̱ rí xóo niʼni”.