KÍXNUU 21
Xú kaʼnii ejuiʼtáráʼa ajngáa dí májánʼ rá.
Nánguá mbayuuʼ tígo̱o̱ rí Jeobá majmiuu Xa̱bu̱ Ñajunʼ ndrígio̱o̱ mu ma̱ʼkha̱a̱ gaʼni gámbóo xúgíʼ xkujndu dí nuraʼníí xa̱bu̱ numbaaʼ. ¡Lá xáʼyóoʼ muʼthúún xa̱bu̱ ajngáa dí májánʼ rígi̱ ráʼ.! Jesús nindoo rí xa̱bi̱i̱ muthúún ajngáa rígi̱ xúgíinʼ xa̱bu̱ numbaaʼ (Mateo 28:19, 20). Ndiéjunʼ eni̱ testigos de Jeobá mu munimbánii rí niʼtáñajunʼ Jesús rá.
1. Xú kaʼnii embánuu rí mbiʼi xúgi̱ dí naʼthí náa Mateo 24:14 rá.
Jesús niʼthí dí: “Majuiʼtáraʼa ajngáa rí májánʼ ga̱jma̱a̱ numuu Xa̱bu̱ Ñajunʼ ndrígióo Dios náa xúgíʼ tsu̱du̱u̱ ku̱ba̱ʼ” (Mateo 24:14). Bi̱ ni̱ndxu̱xu̱ʼ testigos de Jeobá naniguxu̱ʼ muni ñajunʼ rígi̱ dí gíʼdoo wéñuuʼ numuu. Nutaráʼaxu ajngáa rí májánʼ náa xúgíʼ numbaaʼ náa itháan rí 1,000 ajngáa. Mu maguma ñajunʼ rígi̱ dí ra̱ʼkhá tháán mba̱a̱, ndayóoʼ wéñuuʼ tsiakii ma̱ngaa marigá mbá májánʼ awan. Xúgíʼ ñajunʼ rígi̱ naguma numuu rí Jeobá nayambáá.
2. Ndiéjunʼ enixu mu muxkamiin xa̱bu̱ mutarúʼunxu rá.
Nutaruʼún asndu náa má exkamiinxu xa̱bu̱. Ga̱jma̱a̱ nuni̱xu xó má nini cristianos bi̱ nikúwá nákha siglo timbá, na̱jkuáxu̱ “náa mámbá guʼwá” (Hechos 5:42). Rígi̱ nindxu̱u̱ mbá májánʼ awan dí nunixu mu mutaruʼúúnxu mbaʼin xa̱bu̱ mámbá tsiguʼ. Numuu rí mbaʼa aʼphu̱ nda̱wi̱i̱n náa guʼwún, ikha jngóo nutaráʼaxu mbaʼa enii náa kúwá mbaʼin xa̱bu̱. Nduʼyáʼxu má xúʼko̱ náa ma̱ndoo muthu̱u̱n eʼwíinʼ ga̱jma̱a̱ numuu Jeobá ma̱ngaa dí nandxa̱ʼwáminaʼ maʼni.
3. Tsíin gíʼmaa mutaraʼa ajngáa dí májánʼ rá.
Cristianos bi̱ gajkhun, xúgíinʼ ikhiin ndayóoʼ mutaraʼa ajngáa rí májánʼ. Ikháanʼxu ndu̱ya̱a̱ dí ñajunʼ rígi̱ na̱nguá nindxu̱u̱ mbá gitsíin. Nutaráʼaxu xó má eʼnguxu numuu rí nanduxu muthu̱u̱n xa̱bu̱, mu xúʼko̱ makáwíin (atraxnuu 1 Timoteo 4:16). Nimbáa tséʼni numuxu rí nunixu ñajunʼ rígi̱, numuu dí náa Biblia naʼthí: “Nimina̱ánʼla, ikha jngóo guxna̱ála mangáanʼ” (Mateo 10:7, 8). Maski ajndu raʼkháa xúgíinʼ xa̱bu̱ edxawíín, mú nutaráʼaxu má xúʼko̱ numuu dí rúʼko̱ nindxu̱u̱ mbá rí xóo nduyamajkuííxu Jeobá ma̱ngaa dí xóo maxtáa gagi.
GAJMAÑAA’ ITHÁAN
Guʼyáá xúgíʼ rí kuwáanʼxu̱ runi bi̱ ni̱ndxu̱xu̱ʼ testigos de Jeobá mu mutaráʼaxu náa mbá xúgíʼ numbaaʼ ga̱jma̱a̱ xú káʼnii embáyuxú Jeobá.
Nuʼtáraʼa náa xúgíʼ numbaaʼ: A) Costa Rica, B) Estados Unidos, C) Benín, D) Tailandia, E) Yap (Micronesia), F) Suecia.
4. Nunixu mbá tsiakii mutaruʼúúnxu mbá xúgínʼ xa̱bu̱
Bi̱ ni̱ndxu̱xu̱ʼ testigos de Jeobá nunixu mbá tsiakii mutaruʼúúnxu xa̱bu̱ ajngáa rí májánʼ asndu náa má kúwá. Gu̱ya̱a̱ VIDEO ga̱jma̱a̱ gutamíjnála rígi̱:
Ndiéjunʼ dí enigua̱a̱ʼ itháán rí enixu bi̱ ni̱ndxu̱xu̱ʼ testigos de Jeobá mu mutaráʼaxu rá.
Guraxnuu Mateo 22:39 ma̱ngaa Romanos 10:13-15 ga̱jma̱a̱ gutamíjnála rígi̱:
Rí xóo etaraʼaxu xú kaʼnii esngájma rúʼko̱ dí nanduxu ku̱ñu̱u̱n xa̱bu̱ numbaaʼ gajmiúxu rá.
Xú kaʼnii eʼñún Jeobá bi̱ nutaraʼa ajngáa rí májánʼ rá. (Guraxnuu versículo 15.)
5. Nuñajunʼ gajmiúxu Dios
Mbaʼa náa nasngájma rí Jeobá nindxu̱u̱ bi̱ naxná ikha náa nutaráʼaxu. Guʼyáá ndiéjunʼ nirígá náa Nueva Zelanda. Mbá wakhííʼ, mbáa Testigo de Jeobá bi̱ mbiʼyuu Paul ni̱jkha̱ gáʼtaraʼa náa mámbá guʼwá, ikhí nixkamaa mbáa a̱ʼgu̱. Miʼcha̱ dí mbiʼi má rúʼko̱, ikhaa niʼtákáñuu Dios ga̱jma̱a̱ niríyaʼ mbiʼyuu Jeobá nindo̱ʼo̱o̱ rí mbáa ma̱ʼkha̱ gáʼyoo mu mambáyúu maniniiʼ. “Ajtsú hora nda̱wa̱á, eʼthí Paul, ikhúún níʼkhá gadu̱u̱ xkrugoo”.
Guraxnuu 1 Corintios 3:9 ga̱jma̱a̱ gutamíjnála rígi̱:
Xú kaʼnii esngájma xkri̱da xóo rígi̱ dí Jeobá naxná ikha náa najuiʼtáraʼa rá.
Guraxnuu Hechos 1:8 ga̱jma̱a̱ gutamíjnála rígi̱:
Ndíjkha jngóo ndayúlú rí Jeobá mambáyulú náa muʼtáraʼa rá.
Lá natayáá má rá’.
Náa reunión rí naguáʼdááxu ta̱pha̱ xmáná najuiʼsngúxu xóo mutaráʼaxu. A mu ikháán nidxu̱ʼ mbá miʼtsú náa reunión rígi̱, xú káʼnii nitayáá ikháán rí xóo eniratáanʼxu ikhí xá.
6. Índo̱ nutaráʼa nunimbuxu kiʼtáñajunʼ ndrígóo Dios
Nákha timbá siglo, xa̱bu̱ bi̱ tsíñún gúñún xa̱bi̱i̱ Jesús nigíʼ murikhúún mu nánguá mutaraʼa itháan. Timbíin cristianos buʼko̱ nimbayumijná ma xúʼko̱ “mu magi̱ʼdu̱u̱ miʼtáraʼa ajngáa rí májánʼ” (Filipenses 1:7). Ikhaa ma kayuuʼ eni̱ rí mbiʼi xúgi̱ testigos de Jeobá ma̱ngaa.a
Guraxnuu Hechos 5:27-42 ga̱jma̱a̱ gutamíjnála rígi̱:
Náá numuu dí xúniʼñáʼ rutaráʼaxu rá. (Gu̱ya̱a̱ versículo 29, 38 ga̱jma̱a̱ 39).
RÍ NURAJXI̱ TIKHUN: “Náá numuu rí testigos de Jeobá nagún mámbá guʼwá rá.”
Ndiéjunʼ gatriʼña̱a̱ rá.
RÍ NAGÁJNURIYO̱O̱ʼ
Jesús nikuʼmiin xa̱bi̱i̱ rí mutaraʼa náa mbá xúgíʼ xuajen. Jeobá nambáyúu xuajñuu mu maʼni ñajunʼ rígi̱.
Rí nijmañaaʼ
Xú kaʼnii etaraʼa ajngáa rí májánʼ náa xúgíʼ numbaaʼ xá.
Xú kaʼnii esngajmáxu rí nanduxu kuñu̱u̱n xa̱bu̱ numbaaʼ índo̱ nutaráʼaxu rá.
Lá nakumaaʼ ikháán rí muʼtáraʼa nindxu̱u̱ mbá ñajunʼ dí naʼni makuwáánʼ gagi ráʼ. Náá numuu rá.
ATAYÁÁ ITHÁAN
Atayáá xú kaʼnii etaraʼa testigos de Jeobá náa xuajen gúbíí.
Xóo nini testigos de Jeobá mu mutaruʼúún xa̱bu̱ bi̱ nigájnún náa xuajñún rá.
Ni̱ni̱xu a̱jkiu̱ún ga̱jma̱a̱ ajngóo Dios bi̱ nagáñún náa narígá guerra (5:59)
Atadxawíín xú kaʼnii gagi xtáa mbáa bi̱ naʼtáraʼa itháán kájxi̱.
Atayáá xú kaʼnii niʼngu̱u̱n ninimbaníí xkujndu mu ma̱ndoo mutaraʼa má xúʼko̱ ajngáa rí májánʼ.
a Dios nindxu̱u̱ bi̱ nikuʼmáanxu mutaráʼa, ikha jngóo bi̱ ni̱ndxu̱xu̱ʼ testigos de Jeobá tséyuxu má xa̱bu̱ ñajunʼ bi̱ kúwá náa numbaaʼ mu muxnuxu permiso rí mutaráʼaxu ajngáa dí májánʼ.