NÁA MBÁ NUMBAAʼ MINGÍJYÚUʼ RÍGI̱

4 | Xámbumaaʼ dí marigá nda̱wa̱á

NDÍJKHA RÍ GÍʼDOO NUMUU RÁ

Na̱ʼkha̱ kagu̱u̱ mbaʼa ga̱ʼkhu̱ dí makuwáanʼlu náa numbaaʼ rígi̱. Mbaʼiin bi̱ naguáʼníí tsingíná nakumu̱ún rí nándáa dí májánʼ ma̱ʼkha̱ nda̱wa̱á. Ndiéjunʼ eni̱ xá.

Tikhunʼ tsíñún gúndxaʼwamíjna mbiʼi rí ma̱ʼkha̱ nda̱wa̱á.
Eʼwíinʼ naʼwa̱a̱n iyaʼ najnga̱a̱ o najmún droga mu mambúmún dí niguáʼníí.
Tikhunʼ nakumu̱ún dí nándáa ma numuu makuwá ga̱jma̱a̱ nuthi: “Ndíjkha xóó muʼnimíjna makuwáanʼlu rá.”

Lá natayáá má ráʼ.

Mbáa xkujndu ndrígáaʼ mambáa má ga̱jma̱a̱ maraxtaa májánʼ nda̱wa̱á.
Á mu xkujndu ndrígáaʼ tsémbáa ma̱ndoo mataʼyáʼ dí matani̱ mu maʼngaaʼ matraʼníí.
Náa Biblia naʼthí dí mambáa kámuu mbiʼi xkujndu dí rígá.

Rí ma̱ndoo matani̱

Náa Biblia naʼthí: “Xáxmiéjuanla nditháan ga̱jma̱a̱ numuu imbo̱o̱ mbiʼi, numuu rí imbo̱o̱ mbiʼi marigá rí maʼni maxmiéjuanla. Numuu rí mámbá mbiʼi narígá xkujndu” (Mateo 6:34).

Ataniminaʼ maraxtaa mámbá mbiʼi. Xatatsiñán dí xkujndu dí gátraʼníí gajtsíín maʼni dí xáʼnga̱a̱ʼ gátani̱ dí kaʼyaaʼ matani̱ xúgi̱.

Rí maxmiéjuanʼ gaʼni dí ma̱ndoo marigá maʼni dí xáraxtaa májánʼ ga̱jma̱a̱ dí xáráʼti̱i̱n mbá rí májánʼ nda̱wa̱á.

RÍ MA̱NDOO MATANI̱: Consejo dí ma̱ndoo mambáyáaʼ

ATAYÁÁ NÁA RÍ MÁJÁNʼ

Náa Biblia naʼthí: “Xúgíʼ mbiʼi ra̱májánʼ eʼyoo bi̱ xtáa gíná; mú bi̱ májánʼ a̱jkiu̱u̱n gíʼdoo má xúʼko̱ ganitsu” (Proverbios 15:15). Á mu natatsaʼwáminaʼ wéñuʼ náa xkujndu dí xtaʼdáá, rúʼko̱ gáʼni dí xáta̱ya̱a̱ xóo káʼnii gátanimbáníí. Á mu natatsaʼwáminaʼ ma xúʼko̱ náa dí májánʼ mambáyáaʼ matraʼníí xkujndu.

Xátadxawíín ga̱jma̱a̱ xáta̱ya̱a̱ wéñuʼ noticia.
Wakíʼ rí mámbá mbiʼi atatsaʼwáminaʼ rí nigíʼnaaʼ rí niʼni maraxtaa gagi.
Atani̱ mbá lista dí matani̱ mámbá mbiʼi. Wájíʼ gátani̱ ñájunʼ rí mba̱ʼu̱ ga̱jma̱a̱ ñajunʼ rí majkhaʼ, rúʼko̱ gámbáyáaʼ ma̱ta̱ya̱a̱ ndiéjunʼ rí niʼnga̱a̱ʼ nitani̱.

ATANDA̱’A̱ RÍ MIXTAMBÁYÁA’

Náa Biblia naʼthí: “Xa̱bu̱ bi̱ naʼni kanímina̱ʼ […] naʼni gaʼduunʼ xúgíʼ ikha rí ma̱ndoo mambáyúu” (Proverbios 18:1). Nimbáa xáʼngo̱o̱ gágájna̱a̱ mbáwíi náa mbá iñáʼ. Ndayóo dí mbáa mambáyúu magajnáa.

Atandu̱ʼu̱u̱n dí mumbayáaʼ bi̱ xtañúún o bi̱ nambájxáaʼ gajmiáanʼ.
Xámbumaaʼ dí mangáán ma̱ndoo matambáñun. Rí matambáñún eʼwíinʼ mambáyáaʼ mu xaxmiéjuanʼ wéñuʼ náa xkujndu dí xtaʼdáá.
Á mu naku̱ma̱a̱ʼ dí nándáa má ndíjkha xtaa ga̱jma̱a̱ nándáa dí xta̱ʼthi̱i̱n, itháan májánʼ dí mi̱dxu̱ʼ náa médico. Rígi̱ narígá índo̱ naku̱mu̱u̱ mbá nandii, xóo depresión. Mbaʼiin xa̱bu̱ naʼni̱i̱ a̱jkiu̱ún índo̱ nagún mu maguma thanún.a

a ¡Awaxunʼ! Na̱nguá eʼthí ga̱jma̱a̱ numuu mbá thana kiejunʼ.

Biblia naʼthí dí rígá mbá rí májánʼ muguaʼthi̱i̱n

Mbáa bi̱ niʼnirámáʼ salmo o ajmúú ndrígóo Biblia niʼthúu̱n Dios: “Ajngáaʼ nindxu̱u̱ mbóo lámpara dí nambiʼiti̱ga̱ náa rajkúʼ, ga̱jma̱a̱ mbóo aguʼ náa kambo̱ʼ” (Salmo 119:105). Ndiéjunʼ eyoo gáʼthúu̱n rúʼko̱ rá.

Náa mbá mbruʼun dí krina mbiʼ ndayulú mbá lámpara mu mambiʼi náa mujngrígalú. Xúʼko̱ ma Biblia ma̱ngaa, kagu̱ mbaʼa consejo rí mambáyulú muraʼwíí mbá rí májánʼ mu̱ʼni̱.

Agiuuʼ lámpara nambáyulú mbuʼyáá ndiéjunʼ rígá náa kamba̱a̱ dí najkualú. Xúʼko̱ ma Biblia ma̱ngaa, nambáyulú mbuʼyáá ndiéjunʼ dí májánʼ kua̱ʼthi̱i̱n nda̱wa̱á.

Biblia nindxu̱u̱ mbá libro mitsúʼkháan náa na̱ʼkha̱ raʼthí xóo nigíʼdu̱u̱ nikúwáanʼlu ma̱ngaa naʼthúlú dí nda̱wa̱á ma̱ʼkha̱ rí májánʼ. Nariʼña̱a̱n graxe̱ xóo rígi̱:

Xú kaʼnii nigíʼdu̱u̱ dí numíníiʼlu rá.

Náa Biblia naʼthí: “Ga̱jma̱a̱ numuu mbáwíí xa̱bu̱, nito̱ʼo̱o̱ aʼkhá náa numbaaʼ, ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, ikha jngóo xúgíinʼ xa̱bu̱ nakháñún numuu rí xúgíinʼ nixudami̱jná aʼkhá” (Romanos 5:12).

Ndíjkha dí xa̱bu̱ tséʼngu̱u̱n gúni̱ gámbáa xkujndu rá.

Náa Biblia na̱ʼthí: “Xa̱bu̱ numbaaʼ na̱nguá kaʼyoo maʼtañajuminaʼ. Asndu má rakaʼyoo maʼthí xú káʼnii maxtáa” (Jeremías 10:23). Índo̱ nduʼyáá xóo rígá náa kuwáanʼ, nduʼyáá dí gajkhun nindxu̱u̱ ajngáa rígi̱.

Ndiéjunʼ gáʼni Dios mu maʼni májáanʼ xúgíʼ dí raʼkhí rá.

Náa Biblia naʼthí: “Makudi̱i̱ xúgíʼ iyaʼ idún, ni xákháñún itháan, ni xárígá itháan tsingíná ni má xtambi̱ya̱ʼ ni má ga̱ʼkhu̱” (Apocalipsis 21:4).